SAʼEBʼ li junjunq chi naʼlebʼ ak xqil naq wankebʼ li yajel li nachalk saʼ xkʼabʼaʼ junaq li rahilal li naru naxbʼaanu naq chanchan tawiʼ inkʼaʼ chik tqakuy. Maare anaqwan ajwiʼ yookat xnumsinkil junaq li chʼaʼajkilal ut nakaakʼoxla naq maakʼaʼ chik rusilal laayuʼam malaj maaʼani naxkʼe xchʼool chaawix. Abʼanan, chʼolchʼooq chaawu naq li Yos narahoʼk saʼ xchʼool chi rilbʼal naq wankat saʼ rahilal. Jwal naxkʼe xchʼool chaawix.

Li kitzʼiibʼank re li Salmo 86 kixkʼutbʼesi naq kʼojkʼo xchʼool rikʼin li Yos naq kixye: «Naq wankin saʼ rahilal, ninyaabʼa laakʼabʼaʼ, xbʼaan naq nakawabʼi lintzʼaamahom» (Salmo 86:7). Abʼan, maare nakaakʼoxla: «Chanru naxsume li Yos naq numtajenaq qakʼaʼuxl?».

Usta li Yos maare inkʼaʼ saʼ junpaat tixtuqubʼ ru li qachʼaʼajkilal, abʼan naxye naq tixkʼe xtuqtuukilal qachʼool re naq tqakuy. Saʼ li Santil Hu naxye qe: «Maakʼaʼ kʼaʼaq re ru chiʼok wiʼ eekʼaʼuxl, junelik bʼan cheqʼaxtesi saʼ roq ruqʼ li Yos leepatzʼom rikʼin tijok ut tzʼaamank, joʼwiʼ rikʼin yoxink. Ut li tuqtuukil usilal li nachalk rikʼin li Yos ut naxqʼax ru chixjunil li naʼlebʼ, tixkʼuula leechʼool ut leekʼaʼuxl» (Filipenses 4:6, 7). Tzʼil rix ebʼ li raqal aʼin ut taakʼe reetal naq li Yos naxkʼe tzʼaqal xchʼool chaawix.

«Maajun rehebʼ sachso saʼ xchʼool li Yos [...]: qʼaxal terto eetzʼaq chiru naabʼalebʼ li kokʼ xul» (Lucas 12:6, 7).

KʼOXLA AʼIN: Oxloqʼ chiru li Yos jun li chʼina xul joʼ li gorrion. Abʼanan, jwal oxloqʼ wiʼ chik chiru junaq li qas qiitzʼin. Laaʼo li xnimal ru xyobʼtesihom arin saʼ Ruuchichʼochʼ, xbʼaan naq kooxyobʼtesi joʼ xjalam u ut naru naqatzol li xchaabʼil naʼlebʼ joʼ ajwiʼ xkʼutbʼesinkil (Genesis 1:26, 27).

«At Qaawaʼ, laaʼat nakatzʼil wix ut nakanaw wu, [...] nakanaw li ninkʼoxla. [...] Chayal wix re xnawbʼal chixjunil li naweekʼa» (Salmo 139:1, 2, 23).

KʼOXLA AʼIN: Li Yos naxnaw aawu. Naxnaw li nakaawekʼa ut li naʼok wiʼ aakʼaʼuxl. Usta wankebʼ inkʼaʼ teʼxtaw ru chixjunil li rahilal li nakaakʼul, li Yos naxkʼe xchʼool chaawix ut naraj aatenqʼankil. Aʼin naxbʼaanu naq toj wank rusilal laayuʼam.

«At Qaawaʼ, chawabʼi taxaq lintij, chiwulaq taxaq aawikʼin li xyaabʼ inkux. [...] Chinaawabʼi taxaq naq ninpatzʼ laakʼabʼaʼ, ut chinaasume chaq chi junpaat». Li Jehobʼa «tixsumehebʼ li xtij li wankebʼ saʼ rahilal» (Salmo 102:2, 3, 18).

KʼOXLA AʼIN: Chanchan tawiʼ naq li Yos ak kixtzʼiibʼa reetalil chixjunilebʼ li keʼxtzʼeq xyaʼalebʼ ru chalen naq keʼyobʼtesiik chaq li xbʼeen winq ut ixq (Salmo 56:9). Saʼ xyanq aʼin wank ajwiʼ li xyaʼal aawu. Li Yos naxjultika chixjunil li chʼaʼajkilal li xaakʼul ut chixjunil li xyaʼal aawu, xbʼaan naq oxloqʼat chiru.

«Matkʼoxlak xbʼaan naq laaʼin laaYos. Laaʼin ninkawubʼresink ut nintenqʼank aawe, [...] laaʼin li Qaawaʼ, laaYos, [...] ninyehok aawe: “Matxiwak, laaʼin nintenqʼank aawe”» (Isaias 41:10, 13).

KʼOXLA AʼIN: Li Yos naraj aatenqʼankil. Wi tattʼaneʼq, aʼan tatxwaklesi.

«Xbʼaan naq li Yos kʼajoʼ naq kixra li ruuchichʼochʼ: kixkʼe chaq li Ralal jun chiribʼil re naq chixjunil li taapaabʼanq re, inkʼaʼ taasachq, wanq bʼan xyuʼam chi junelik» (Juan 3:16).

KʼOXLA AʼIN: Li Yos jwal nakatxra xbʼaan naq kixtaqla chaq li Jesus, li Ralal, re naq tkamq saʼ aakʼabʼaʼ. Li xkamik li Jesus naxbʼaanu naq wanq rusilal laayuʼam ut sahaq saʼ laachʼool chi junelik. *