LI YOS moko kiraj ta naq toowanq joʼ wanko anaqwan. Kiraj naq chixjunil li wankebʼ saʼ Ruuchichʼochʼ teʼroxloqʼi li xwankilal, teʼxtaw rusilal li naʼlebʼ li naxkʼe ut teʼxkʼam rehebʼ rikʼin li xchaqʼalil ru xnaʼlebʼ. Kiraj naq ebʼ li poyanam teʼwanq saʼ tuqtuukilal, sahaqebʼ saʼ xchʼool li xjunkabʼal, teʼxtaw jalan chik li akʼ naʼlebʼ ut teʼxchʼinaʼusa chixjunil li Ruuchichʼochʼ.

• «Aʼan xchʼanabʼank re li yalok toj saʼ xmaril li ruuchichʼochʼ» (Salmo 46:10).

• «Xtaw xqʼehil xsachbʼalebʼ [...] li nekeʼsachok re li ruuchichʼochʼ» (Apocalipsis 11:18).

• «Maajun chik saʼ qayanq tixye: “Yajin”» (Isaias 33:24).

• «Ebʼ li sikʼbʼilebʼ ru inbʼaan teʼxyal xsahil li xkʼanjelebʼ» (Isaias 65:22).

Chanru ttzʼaqloq ru ebʼ li propesiiy aʼin? Li Yos kixxaqabʼ li Jesus, li Ralal, joʼ Awabʼej saʼ jun li chaabʼil awabʼejilal saʼ choxa re naq tixjolomi chixjunil li Ruuchichʼochʼ. Li Santil Hu naxkʼabʼaʼi joʼ li Xʼawabʼejilal li Yos (Daniel 2:44). Ut naxye ajwiʼ aʼin chirix li Jesus: «Li Qaawaʼ Yos tixkʼe re li xkʼojaribʼaal [...], ut li xnimal awabʼejihom inkʼaʼ taalajq taaʼosoʼq» (Lucas 1:32, 33).

Naq li Jesus kiwank saʼ Ruuchichʼochʼ, kixbʼaanu naabʼal li sachbʼachʼoolej re xkʼutbʼesinkil naq jwal chaabʼilaq chik li xyuʼamebʼ li poyanam naq t-awabʼejinq.

• Kixkʼirtasi yalaq kʼaru li yajel, chi joʼkan kixkʼutbʼesi naq truuq risinkil chi junajwa (Mateo 9:35).

• Kixchʼanabʼ jun li kaqsut-iqʼ, chi joʼkan kixkʼutbʼesi naq truuq xtuqubʼankil ru li nakʼulmank saʼ li qasutam (Marcos 4:36-39).

• Kixchʼolani chi mil ebʼ li qas qiitzʼin, chi joʼkan kixkʼut chi tzʼaqal naq truuq xkʼebʼal li t-ajmanq chiqu (Marcos 6:41-44).

• Kixjaltesi li haʼ choʼq bʼiin saʼ jun li sumlaak, chi joʼkan kixkʼutbʼesi naq rubʼel li xʼawabʼejilal tqayal xsahil li qayuʼam (Juan 2:7-11).

Kʼaru tento taabʼaanu re naq taayal xsahil chixjunil li tixkʼe li Yos rehebʼ li nekeʼrahok re? Wank jun «li bʼe» li tento taakʼam. Li Santil Hu naxye naq aʼan jun «li bʼe nakʼamok saʼ li yuʼamej», ut moko naabʼalebʼ ta nekeʼtawok re (Mateo 7:14).

Kʼaru reetalil li bʼe li nakʼamok saʼ li junelik yuʼam? Li bʼe aʼin reetalil chixjunil li naxpatzʼ qe li Yos naq tqabʼaanu. Li Yos naxye qe: «Laaʼin li Qaawaʼ, laaYos; laaʼin ninkʼut chawu li kʼaru us choʼq aawe ut nakatinbʼeres saʼ li bʼe tento taakʼam» (Isaias 48:17). Jwal chaabʼilaq ru li qayuʼam wi toowanq saʼ li bʼe aʼin.

 Li Jesus kixye: «Laaʼin li bʼe, li yaal ut li yuʼam» (Juan 14:6). Xpaabʼankil li xkʼutum li Jesus ut xkʼambʼal qe rikʼin tixbʼaanu naq toojiloq chixkʼatq li Yos ut chaabʼilaq ru li qayuʼam.

Chanru tatruuq xtawbʼal li bʼe aʼin? Usta wankebʼ naabʼal li paabʼal malaj li bʼe, li Jesus kixye: “Moko chixjunil ta li nayehok we: «Qaawaʼ, Qaawaʼ», taaʼok saʼ li xnimajwal wankilal li choxa, taaʼok bʼan li taabʼaanunq re li rajom linchoxahil Yuwaʼ” (Mateo 7:21). Kixye ajwiʼ: «Rikʼin li teʼruuchin teenawebʼ ru» (Mateo 7:16). Li Santil Hu truuq aatenqʼankil chi xnawbʼal bʼar wank li tzʼaqal paabʼal (Juan 17:17).

Kʼaru tatruuq xbʼaanunkil re naq tatwanq saʼ li bʼe aʼin? Tento taanaw ru li kikʼehok re li qayuʼam. Xnawbʼal ani aʼan, ani xkʼabʼaʼ, chanru li xnaʼlebʼ, kʼaru yook xbʼaanunkil ut kʼaru naraj naq tqabʼaanu. *

Li Yos inkʼaʼ naraj naq kaʼajwiʼ tqoksi li qayuʼam re kʼanjelak, waʼak, rajsinkil qu ut twanq qajunkabʼal. Aʼan naraj naq tqanaw ru ut toowanq choʼq ramiiw. Naq naqapaabʼ, naqakʼutbʼesi naq naqara. Li Jesus kixye: «Aʼan aʼin li junelik yuʼam: naq teʼxnaw aawu laaʼat li junat chi tzʼaqal Yos» (Juan 17:3).

Re naq taasahobʼresi xchʼool li tzʼaqal Yos, maare wank kʼaru tento taajal saʼ laayuʼam. Maare tchʼaʼajkoʼq chaawu, abʼan tchaabʼiloʼq ru laayuʼam naq tat-oq chi bʼeek saʼ li bʼe aʼin. Wi wank junaq laapatzʼom chirix li Yos, patzʼ aatzolbʼal saʼ Internet saʼ www.pr418.com/kek. Ebʼ laj Testiiw re li Jehobʼa teʼwulaq chiru aatenqʼankil saʼ li hoonal li taaye ut bʼarwiʼ taawaj.