Chiru li mil chihabʼ li xeʼnumeʼk, maaʼani xnawok re xsumenkil ut chi miyon li qas qiitzʼin xeʼkamk xbʼaanebʼ li letzbʼil yajel. Saʼ xnumikebʼ li kutan, ebʼ laj chamalnawom xeʼxnaw li yaal. Xeʼruuk xnawbʼal naq naabʼal li yajel xeʼchalk xbʼaan li tzʼaj joʼ li mitzʼ aj xul ut li nekeʼxletz ribʼ. Xnawbʼal li yaal aʼin xbʼaanu naq teʼruuq xkolbʼal ribʼ chiru ut xbʼanbʼal naabʼal chik li yajel, ut chi mil miyon li qas qiitzʼin najt chik nekeʼwank ut kawebʼ li xjunxaqalil.

Kʼaru naru tqaye chirix jalan chik ebʼ li patzʼom li wank xwankil? Ma nakaakʼoxla naq xnawbʼal li yaal chirixebʼ li patzʼom aʼin truuq xjalbʼal laayuʼam?

• Ani li Yos?

• Ani li Jesukriist?

• Kʼaru li Xʼawabʼejilal li Yos?

• Chanruhaq li qayuʼam saʼ li kutan chalkebʼ re?

Chi miyon li qas qiitzʼin ak xeʼxtaw xsumenkil ebʼ li patzʼom aʼin, ut ak xʼusaak li xyuʼamebʼ. Li xsumenkil ebʼ li patzʼom aʼin truuq ajwiʼ aatenqʼankil.

Maare nakaakʼoxla ma tatruuq tzʼaqal xtawbʼal li yaal chirix junaq li naʼlebʼ. Xbʼaan naq, rajlal kutan jwal chʼaʼaj chik xtawbʼal li yaal saʼ xyanq li tikʼtiʼ. Kʼaʼut?

Naabʼalebʼ inkʼaʼ chik nekeʼxpaabʼ li nekeʼxye laj jolominel tenamit, li xninqal ru aj kʼay malaj ebʼ li esil. Nachʼaʼajkoʼk chiruhebʼ xnawbʼal ma yaal li nekeʼxye malaj yal xkʼaʼuxebʼ, ma nekeʼxye chixjunil li yaal malaj yal tikʼtiʼ. Saʼ xkʼabʼaʼ naq moko paabʼajel ta chik li nekeʼxye ut inkʼaʼ nekeʼxkʼe chi tzʼaqal li esil, ebʼ li poyanam moko kaʼaj tawiʼ inkʼaʼ nekeʼxpaabʼ li nekeʼxye chirix li xkʼulmank, inkʼaʼ ajwiʼ nekeʼxpaabʼ li xkʼulmank tzʼaqal.

Usta joʼkan, laaʼat naru nakaataw tzʼaqal xyaalalil ebʼ li patzʼom li wank xwankil saʼ li qayuʼam. Chanru? Joʼ naq nakaasikʼ li xsumenkil jalan chik li patzʼom li moko nim ta xwankil.

Naru naqaye naq wulaj wulaj naqasikʼ li yaal. Qilaq jun li eetalil, li xJessica xbʼeenwa naxkʼe reetal naq li tzakahemq li tixloqʼ maakʼaʼaq li maniiy chisaʼ. Aʼan naxye: «Linkoʼ jwal naʼok xyajel naq naxyal bʼayaq li naxkʼam chaq li maniiy, ak xkamik nachalk. Joʼkan naq, naq maajiʼ ninloqʼ junaq li tzakahemq, xbʼeenwa nawil li naxye chirix re xnawbʼal kʼaru nekeʼxkʼe chisaʼ. Moqon chik ninsikʼ xkomon li naʼlebʼ ut wank sut ninbʼoqok rikʼinebʼ laj kʼay re xnawbʼal ma yaal naq inkʼaʼ xkoho bʼayaq chisaʼ. Nintzʼil ajwiʼ rix rikʼinebʼ li nekeʼxnaw chiʼus re xnawbʼal naq ebʼ laj kʼay aʼin nekeʼxyiibʼ chiʼus li tzakahemq».

Maare moko wulaj wulaj ta nakaasikʼ li yaal chirix junaq li nimla naʼlebʼ, abʼan naru nakaabʼaanu joʼ li xJessica re xtawbʼal xsumenkil jalan chik li patzʼom:

• Taasikʼ li naʼlebʼ.

• Taatzʼil rix xkomon li naʼlebʼ.

• Taawil naq yaal li nekeʼxye aawe.

Li naʼlebʼ aʼin truuq aatenqʼankil re xtawbʼal xsumenkil ebʼ li patzʼom li wank xwankil saʼ li qayuʼam. Qilaq chanru.

Re xtawbʼal li yaal chirixebʼ li patzʼom li wank xwankil saʼ li qayuʼam, li xJessica kiroksi ajwiʼ li naʼlebʼ li naroksi re xnawbʼal naq maakʼaʼaq maniiy saʼ li tzakahemq. Aʼan naxye: «Rilbʼal ut xtzʼilbʼal rix chiʼus junaq li naʼlebʼ nikinxtenqʼa chi xtawbʼal li yaal li naxkʼut li Santil Hu». Chi miyon li poyanam xeʼxbʼaanu ajwiʼ joʼ li xJessica ut xeʼxtzol li naxye li Santil Hu chirixebʼ li patzʼom aʼin:

• Kʼaru xyaalalil li qayuʼam?

• Kʼaru naqakʼul naq nokookamk?

• Kʼaʼut xnumtaak li rahilal?

• Kʼaru yook xbʼaanunkil li Yos re risinkil li rahilal?

• Chanru xtawbʼal li sahil chʼoolejil saʼ li junkabʼal?

Laaʼat ajwiʼ tatruuq xtawbʼal kʼaru tzʼaqal xyaalalil ebʼ li patzʼom aʼin ut jalan chik naq taawil li Santil Hu ut taasikʼ xkomon li naʼlebʼ saʼ www.pr418.com.