Chanru tqakʼutbʼesi naq naqarahebʼ li junchʼol?
Chiqajunilo qas qiitzʼin qibʼ xbʼaan naq chalenaqo rikʼin laj Adán. Usta naʼoybʼenimank naq ebʼ li junkabʼal teʼxra ut teʼroxloqʼi ribʼ, anaqwan chʼaʼaj rilbʼal aʼin saʼ li Ruuchichʼochʼ. Abʼan moko aʼan ta naraj li Yos.
KʼARU NAXYE LI SANTIL HU CHIRIX LI RAHOK?
«Chara laawas aawiitzʼin, joʼ naq nakara aawibʼ laaʼat» (LEVÍTICO 19:18).
«Cherahaqebʼ li xikʼ nekeʼilok eere» (MATEO 5:44).
CHANRU TQAKʼUTBʼESI NAQ NAQARAHEBʼ LI JUNCHʼOL?
Saʼ 1 Corintios 13:4-7 li Yos naxye chanru li rahok.
«Li rahok wank xkuyum saʼ chixjunil; aʼan chaabʼil».
Kʼoxla aʼin. Chanru nakaawekʼa naq jun li poyanam wank xkuyum ut chaabʼil, ut inkʼaʼ napoʼk naq xatpaltoʼk?
«Li rahok inkʼaʼ nakaqalik».
Kʼoxla aʼin. Chanru nakaawekʼa naq jun li poyanam inkʼaʼ nakatxpaabʼ malaj tatxkaqali?
Li rahok «inkʼaʼ naxsikʼ xchaabʼilal xjunes».
Kʼoxla aʼin. Chanru nakaawekʼa naq jun li poyanam naxkʼulubʼa li naqaye ut inkʼaʼ li naxye aʼan?
Li rahok «inkʼaʼ naxkʼe saʼ xchʼool li inkʼaʼ us naxkʼul».
Kʼoxla aʼin. Li Yos naxkuyebʼ xmaak li nekeʼxyotʼ xchʼool chiru. «Inkʼaʼ nokooxqʼus chi junelik, chi moko najosqʼoʼk chi junajwa» (Salmo 103:9). Oxloqʼ chiqu naq li xqarahobʼtesi xchʼool naxkuy qamaak. Joʼkan naq tento tqakuy xmaak li nekeʼxtochʼ qachʼool (Salmo 86:5).
Li rahok «inkʼaʼ nasahoʼk saʼ xchʼool rikʼin li xmaakʼaʼil li tiikilal».
Kʼoxla aʼin. Inkʼaʼ nawulak chiqu naq nekeʼsahoʼk saʼ xchʼool li junchʼol naq naqakʼul junaq li chʼaʼajkilal. Joʼkan naq inkʼaʼ ajwiʼ tsahoʼq saʼ qachʼool wi nekeʼxkʼul li chʼaʼajkilal li xikʼ xooʼeʼril.
Wi naqaj naq li Jehobʼa toorosobʼtesi tento tqarahebʼ li junchʼol maakʼaʼ naxye li xchihabʼ, li xtenamit malaj li xpaabʼal. Naq naqatenqʼahebʼ li junchʼol naqakʼutbʼesi naq naqarahebʼ.
