Wankebʼ nekeʼraj xnawbʼal ma inkʼaʼ tawiʼ xjalmank ru li naxye li Santil Hu. Li propeet Isaías kixye naq li esil li kixkʼe li Yos «wank chi junelik» (Isaías 40:8). Chanru naqanaw naq li xyeechiʼom li Yos kitzʼiibʼamank chi tzʼaqal re ru?

Li Yos wank xwankil re naq li Raatin wanq chi junelik ut maaʼani tixjal ru li naxye. Naq kitzʼiibʼamank li Santil Hu chi uqʼej, ebʼ laj tzʼiibʼ keʼrajla ebʼ li aatin re naq inkʼaʼ tkʼemanq xtzʼaqobʼ, t-isimanq malaj tjalmanq ru. Saʼ xkʼabʼaʼ naq moko tzʼaqal ta ru li xyuʼamebʼ, wankebʼ laj tzʼiibʼ keʼpaltoʼk abʼan moko keʼxjal ta ru li kiyeemank chaq saʼ xtiklajik.

Wank chi mil li Santil Hu li kitzʼiibʼamank chaq najter. Wi natawmank bʼayaq xjalanil junaq rehebʼ aʼin naru xjuntaqʼeetankil rikʼin junaq chik re xnawbʼal ma xeʼpaltoʼk (wi taawaj xnawbʼal xkomon li naʼlebʼ, sikʼ saʼ jw.org ut chaawil li tzolom «Ma xjalmank malaj xjalpaqimank li Santil Hu?»).

Qakʼoxlaq rix ebʼ li hu li nawbʼil joʼ li Bʼotbʼilhu re li Kamenaqil palaw, li keʼxtaw wiibʼ oxibʼ laj beduinos (ebʼ laj Árabe li nekeʼxbʼeeni li chaqi chʼochʼ) saʼ 1947 saʼ wiibʼ oxibʼ li bʼekbʼil jul chixkʼatq li Kamenaqil palaw. Saʼ li najteril hu aʼin kitawmank xtasalil li Santil Hu li kitzʼiibʼamank chaq numenaq wiibʼ mil chihabʼ anaqwan. Ebʼ li keʼxtzʼil rix aʼin keʼxjuntaqʼeeta ebʼ li bʼotbʼilhu rikʼin li Santil Hu. Kʼaru keʼxtaw?

Ebʼ li winq aʼin keʼxye naq li esil li wank saʼ li Santil Hu aʼan ajwiʼ li kitzʼiibʼamank chaq junxil. * Naq natzʼilmank rix ebʼ li najteril hu naxkʼut naq li wank saʼ li Santil Hu aʼan tzʼaqal li kixye chaq li Yos saʼ xtiklajik. Li Yos kixkol rix li Raatin re naq inkʼaʼ tjalmanq ru toj saʼebʼ li qakutan.

Chʼolchʼooq chiqu naq paabʼajel li naqil saʼ li Raatin li Yos. Qilaq kʼaru nekeʼxkʼut chiqu ebʼ li propeet chirix li Yos.