Li Yos narosobʼtesihebʼ li nekeʼabʼink chiru
Li propeet Moisés kixye naq li Yos toorosobʼtesi wi naqapaabʼ li xchaqʼrabʼ (Deuteronomio 10:13; 11:27). Naqapaabʼ li Yos xbʼaan naq chaabʼil xnaʼlebʼ ut inkʼaʼ naqabʼaanu yal saʼ xkʼabʼaʼ naq inkʼaʼ tooxrahobʼtesi. Aʼin naxbʼaanu naq qʼaxal tqara ut inkʼaʼ tqasikʼ xbʼaanunkil junaq li naʼlebʼ li tixrahobʼtesi xchʼool. «Aʼan aʼin li xraabʼal li Yos: naq chiqapaabʼ ebʼ li xchaqʼrabʼ» (1 Juan 5:3).
Kʼaru li osobʼtesihom tqakʼul wi nokooʼabʼink chiru li Yos? Qilaq wiibʼ rehebʼ aʼin.
1. NAQ NAQABʼI LI NAXYE LI YOS NAQATAW QANAʼLEBʼ
«Laaʼin li Qaawaʼ, laaYos; laaʼin ninkʼut chawu li kʼaru us choʼq aawe ut nakatinbʼeres saʼ li bʼe tento taakʼam» (ISAÍAS 48:17).
Li Jehobʼa naxnaw qu ut naxkʼe qanaʼlebʼ. Wi naqaj naq tooxtenqʼa chi xsikʼbʼal ru li tqabʼaanu, tento tqil li naxye li Santil Hu ut tqayuʼami.
2. NAXKʼE XSAHIL QACHʼOOL NAQ NOKOOʼABʼINK CHIRU LI YOS
«Us bʼan xaq rehebʼ li nekeʼabʼink re li raatin li Yos ut nekeʼxkʼuula saʼ xchʼoolebʼ!» (LUCAS 11:28).
Saʼebʼ li qakutan chi miyon li poyanam li nekeʼxpaabʼ li Raatin li Yos qʼaxal sa saʼ xchʼoolebʼ. Qilaq jun li eetalil chirix jun li winq re España, li saʼ junpaat najosqʼoʼk, xikʼ naril li rixaqil joʼ ajwiʼ li junchʼol. Saʼ jun kutan kiril li kixtzʼiibʼa li propeet Moisés chirix li xchaabʼil naʼlebʼ laj José, li ralal laj Jacob. Keʼxkʼayi choʼq moos ut keʼxkʼe saʼ tzʼalam chi maakʼaʼ xyaalal. Usta joʼkan inkʼaʼ kijosqʼoʼk, qʼun xchʼool ut kiʼuxtaanank u (Génesis tasal 37 toj 45). Li winq aʼin kixye: «Li reetalil laj José xinxtenqʼa chi xkʼutbʼal li chaabʼilal, li usilal ut li kuyuk. Anaqwan sa saʼ xchʼool linjunkabʼal».
Saʼ li Santil Hu naqataw xkomon li naʼlebʼ chirix chanru tqilebʼ li junchʼol. Tqatzʼil rix aʼin saʼ li jun chik tzolom.
Maare twulaq ajwiʼ chaawu
EBʼ LI PATZʼOM CHIRIX LI SANTIL HU
Ma naru tinxtenqʼa li Santil Hu re naq sahaq saʼ xchʼool linjunkabʼal?
Li chaabʼil naʼlebʼ li naxkʼe li Santil Hu ak xtenqʼa chi miyon li junkabʼal re naq sahaqebʼ saʼ xchʼool.
