«Li kʼaru teetzʼaama chiru li Yuwaʼbʼej, tixkʼe eere saʼ inkʼabʼaʼ» (Juan 16:23).

Li Jesús kixye naq li Jehobʼa inkʼaʼ naraj naq tqoksi ebʼ li jalam u, li saant, li ánjel malaj li kamenaq naq tootijoq chiru, ut naraj naq tqabʼaanu saʼ xkʼabʼaʼ li Jesukriist. Naq nokootijok saʼ xkʼabʼaʼ li Jesús, naqakʼutbʼesi chiru li Yos naq chʼolchʼo chiqu naq nokoorabʼi saʼ xkʼabʼaʼ li kixbʼaanu li Jesús. Li Jesús kixye: «Maaʼani naxik rikʼin li Yuwaʼbʼej, wi inkʼaʼ ta saʼ inkʼabʼaʼ» (Juan 14:6).

«Tehomaq leechʼool chiru» (Salmo 62:9).

Aatinaqo chiru li Jehobʼa joʼ naqabʼaanu rikʼin jun li chaabʼil yuwaʼbʼej. Naq tootijoq, inkʼaʼ yal tqatzol malaj tqisi saʼ junaq li hu, tento bʼan tqaye li wank saʼ qachʼool.

«Aʼan nokoorabʼi wi wank kʼaru tqatzʼaama chiru joʼ chanru naraj Aʼan» (1 Juan 5:14).

Li Yos naxye qe saʼ li Santil Hu li tixbʼaanu chiqix ut li naraj naq tqabʼaanu chirix. Re naq tixkʼulubʼa li qatij, tento tootijoq «joʼ chanru naraj Aʼan». Re xbʼaanunkil aʼin, tento tqakʼe qaqʼe chi xtzolbʼal li Santil Hu re xnawbʼal ru chiʼus. Chi joʼkan toorabʼi chi sa saʼ xchʼool.

Tijonqo chirix li aajel ru chiqu. Naru tqatzʼaama re, naq tooxtenqʼa rikʼin li naʼajmank chiqu joʼ li qatzakahemq, qatʼikr malaj junaq li naʼaj bʼarwiʼ toowanq. Naru ajwiʼ tqaye re, naq tooxtenqʼa chi xnawbʼal kʼaru tqabʼaanu ut chi xkuybʼal junaq li chʼaʼajkilal. Qatzʼaamaq ajwiʼ re, naq tixkuy qamaak, tixkawresi qapaabʼal ut tooxkol (Lucas 11:3, 4, 13; Santiago 1:5, 17).

Tijonqo chirixebʼ li junchʼol. Ebʼ li yuwaʼbʼej nekeʼwulak chiru naq ebʼ li xkokʼal nekeʼxra ribʼ. Li Jehobʼa aʼan li Qayuwaʼ ut naraj naq tqatenqʼa qibʼ. Us naq tootijoq chirix li qasumʼaatin, li qakokʼal, li qajunkabʼal ut li qamiiw. Laj Santiago kixye: «Chextijoq cherix cheribʼil eeribʼ» (Santiago 5:16).

Choobʼanyoxinq. Li Santil Hu naxye naq laj Yobʼtesinel kixbʼaanu li chaabʼilal rehebʼ li junchʼol: «Saʼ choxa naxtaqla chaq li habʼ ut li ru leerawimq saʼ xqʼehil, ut naxkʼojobʼ eechʼool rikʼin tzekemq ut sahil chʼoolej» (Hechos 14:17). Toobʼanyoxinq chiru li Jehobʼa wi naqakʼoxla chixjunil li naxbʼaanu chiqix. Tqakʼutbʼesi ajwiʼ naq nokoobʼanyoxink chiru naq naqapaabʼ li xchaqʼrabʼ (Colosenses 3:15).

Wank sut maare tchʼinaaq qachʼool naq moko saʼ junpaat ta tixsume li qatij. Ma naraj xyeebʼal aʼin naq li Yos inkʼaʼ naxkʼe xchʼool chiqix? Moko joʼkan ta! Qilaq wiibʼ oxibʼ li eetalil li naxkʼut naq inkʼaʼ tqakanabʼ tijok.

Saʼ li xbʼeen tzolom xooʼaatinak chirix laj Steve. Toj naxye aʼin: «Wi xinkanabʼ raj tijok, inkʼaʼ raj xintaw wiʼ chik xsahil inchʼool». Kʼaru kitenqʼank re? Naq kiʼok xtzolbʼal li Santil Hu, kixkʼe reetal naq inkʼaʼ tixkanabʼ tijok. Laj Steve naxye: «Ninbʼanyoxi re li Yos naq ebʼ li wamiiw nikineʼxra ut nikineʼxtenqʼa. Anaqwan, qʼaxal sa saʼ linchʼool».

Ut, kʼaru kikʼulmank rikʼin li xJenny li kixkʼoxla naq moko xkʼulubʼ ta raj naq t-abʼiiq li xtij? Aʼan naxye: «Naq inkʼaʼ sa wankin nintzʼaama chaq re li Yos naq tinxtenqʼa chi xtawbʼal ru kʼaʼut nawekʼa aʼin». Chanru kitenqʼaak xbʼaan li tij? «Aatinak rikʼin li Yos xinxtenqʼa re naq twil wibʼ joʼ nikinril aʼan. Xinkʼe reetal naq li Yos inkʼaʼ naraqok aatin saʼ inbʼeen usta linchʼool naxbʼaanu. Xinxtenqʼa ajwiʼ re naq inkʼaʼ tchʼinaaq inchʼool». Kʼaru rusilal kixtaw? «Li tijok xinxtenqʼa chi rilbʼal li Jehobʼa joʼ jun tzʼaqal amiiw, jun chaabʼil Yuwaʼbʼej ut joʼ jun tzʼaqal Yos. Li Yos junelik wanq wikʼin ut tinxtenqʼa wi tinkʼe inchʼool chi xbʼaanunkil li naraj».

Anaqwan qilaq li kixkʼul li xʼIsabel. Naq wank saʼ yuʼam, ebʼ laj bʼanonel keʼxye re, naq li xkʼuulaʼal inkʼaʼ usaq li xjunxaqalil naq tyoʼlaaq. Kʼajoʼ naq kirahoʼk saʼ xchʼool. Wankebʼ keʼxye re, naq trisi li xkʼuulaʼal. Aʼan naxye: «Xinkʼoxla naq tinkamq xbʼaan xrahil inchʼool». Kʼaru kixbʼaanu? «Inkʼaʼ xinkanabʼ tijok chiru li Yos re naq tinxtenqʼa». Kiyoʼlaak laj Gerard, li xkʼuulaʼal joʼ keʼxye chaq laj bʼanonel. Ma kirekʼa li xʼIsabel naq li Yos kixsume li xtij? Joʼkan. Chanru kixbʼaanu aʼin li Yos? Li xʼIsabel naxye: «Laj Gerard wank 14 chihabʼ re ut ninkʼe reetal naq li Jehobʼa kixsume lintij naq nawil naq linyum jwal sa saʼ xchʼool usta yaj, aʼin jun nimla osobʼtesihom».

Li aatin aʼin naxjultika chiqu li naxye li salmo: «At Qaawaʼ, laaʼat nakawabʼi li xtijebʼ li nebʼaʼ; laaʼat nakakʼe xkawubʼ xchʼoolebʼ ut nakawilebʼ» (Salmo 10:17). Peʼyaal naq aʼin naxkʼut chiqu naq inkʼaʼ tqakanabʼ tijok?

Saʼ li Santil Hu wank naabʼal li tij li kixbʼaanu li Jesús. Li jwal nawbʼil ru aʼan li kixkʼut chiruhebʼ li xtzolom. Kʼaru naqatzol chirix li tij aʼin?