EBʼ LI KRISTIʼAAN

Kʼaru naxye li Santil Hu? Li Yos «moko kixyiibʼ ta [li Ruuchichʼochʼ] chi maakʼaʼ xyaalal, re bʼan naq taatenamitoʼq» (ISAÍAS 45:18).

LI RUUCHICHʼOCHʼ

Kʼaru naxye li Santil Hu? «Wan yookebʼ chi yoʼlaak anaqwan, ut wan yookebʼ chi kamk, abʼan li ruuchichʼochʼ wank chi junelik» (ECLESIASTÉS 1:4).

KʼARU NARAJ XYEEBʼAL? Li Santil Hu naxye naq li Ruuchichʼochʼ maajunwa tsachmanq, junelik bʼan teʼwanq ebʼ li kristiʼaan saʼ xbʼeen. Joʼkan bʼiʼ, kʼaru naraj xyeebʼal naq naʼaatinak chirix li rosoʼjik li Ruuchichʼochʼ?

KʼOXLA AʼIN. Li Santil Hu naxjuntaqʼeeta li rosoʼjik li Ruuchichʼochʼ rikʼin li kikʼulmank chaq saʼ xkutankil laj Noé. Saʼebʼ li kutan aʼan, li Ruuchichʼochʼ «xnujak chi raaxiikʼ» (Génesis 6:13). Abʼanan laj Noé tiik chaq xchʼool, joʼkan naq kikoleʼk xbʼaan li Yos joʼ ajwiʼ li xjunkabʼal, abʼanan li maaʼusebʼ xnaʼlebʼ kixsachebʼ saʼ li Bʼutʼihaʼ. Li Santil Hu naxye li kikʼulmank chaq: «Xbʼaan aʼin kibʼutʼin ut kiʼosoʼk li ruuchichʼochʼ [li] kiwank najter» (2 Pedro 3:6). Chi joʼkan kiʼosoʼk li Ruuchichʼochʼ li kiwank chaq najter. Abʼan, kʼaru kisacheʼk? Maawaʼ li Ruuchichʼochʼ, aʼanebʼ bʼan li qas qiitzʼin li maaʼusebʼ xnaʼlebʼ. Joʼkan bʼiʼ, naq li Santil Hu naʼaatinak chirix li rosoʼjik li Ruuchichʼochʼ, moko yook ta xyeebʼal naq tsacheʼq li Ruuchichʼochʼ. Yook bʼan xyeebʼal naq teʼsacheʼq ebʼ li qas qiitzʼin li maaʼusebʼ xnaʼlebʼ.

LI CHʼAʼAJKILAL UT LI MAAʼUSILAL

Kʼaru naxye li Santil Hu? «Saʼ jun chʼina kʼamok maakʼaʼaqebʼ chik li inkʼaʼ usebʼ xnaʼlebʼ; us ta taasikʼebʼ saʼ li xnaʼajebʼ, abʼan maabʼar chik taatawebʼ. Aʼut ebʼ li nebʼaʼ teʼreechani li chaabʼil naʼajej [“li Ruuchichʼochʼ”, TNM]. Kʼajoʼ xnimal li tuqtuukil usilal teʼxyal chi junelik!» (SALMO 37:10, 11).

KʼARU NARAJ XYEEBʼAL? Naq ak xnumeʼk li Bʼutʼihaʼ, ebʼ li maaʼusebʼ xnaʼlebʼ keʼok wiʼ chik chi numtaak saʼ Ruuchichʼochʼ. Li Bʼutʼihaʼ li kikʼulmank chaq saʼ xkutankil laj Noé moko kixsach ta chi junajwa li maaʼusilal. Abʼanan chi seebʼ li Yos tixsach chi junajwa li maaʼusilal. Joʼ kixye jun rehebʼ li kitzʼiibʼank re li Salmo «maakʼaʼaqebʼ chik li inkʼaʼ usebʼ xnaʼlebʼ». Li Yos tixsach chi junajwa li maaʼusilal saʼ xkʼabʼaʼ li Xʼawabʼejilal, jun li awabʼejilal li wank saʼ choxa li t-awabʼejinq saʼ xbʼeenebʼ li kristiʼaan li teʼabʼinq chiru.

KʼOXLA AʼIN. Kʼaru tkʼulmanq rikʼin li xʼawabʼejilal li winq? Ma teʼokenq chirix li Xʼawabʼejilal li Yos? Li Santil Hu naxye naq inkʼaʼ. Teʼoq bʼan chi pleetik rikʼin li Yos (Salmo 2:2). Kʼaru tkʼulmanq? Li Xʼawabʼejilal li Yos tixsach chi junajwa li xʼawabʼejilal li winq ut kaʼajwiʼ «aʼan wanq xwankil chi junelik» (Daniel 2:44). Abʼanan, kʼaʼut tento naq ebʼ li winq inkʼaʼ chik teʼawabʼejinq?

Kʼaru naxye li Santil Hu? «Li winq moko aʼan ta yaal re saʼ xbʼeen li xyuʼam, chi moko saʼ ruqʼ wank li xbʼeenik» (JEREMÍAS 10:23).

KʼARU NARAJ XYEEBʼAL? Ebʼ li kristiʼaan moko xeʼyobʼtesiik ta re naq xjunes texʼawabʼeji ribʼ. Joʼkan naq moko us ta nekeʼelk naq nekeʼraj xʼawabʼejinkil ebʼ li junchʼol ut inkʼaʼ nekeʼruuk xtuqubʼankil ru ebʼ li xchʼaʼajkilal.

KʼOXLA AʼIN. Li enciclopedia Britannica Academic naxye naq ebʼ li junjunq chi awabʼej inkʼaʼ nekeʼruuk «xsachbʼal xwankil li nebʼaʼil, li weʼej, li yajel, li rahilal li naxkʼam chaq li kaqsut-iqʼ malaj li hiik, li yalok u malaj jalan chik li raaxiikʼ». Naxye ajwiʼ: «Wankebʼ [...] nekeʼxkʼoxla naq wiʼ teʼxjunaji ribʼ chixjunilebʼ li awabʼejilal teʼruuq xtuqubʼankil chi junajwa ebʼ li chʼaʼajkilal aʼin». Usta ebʼ li awabʼej teʼxjunaji ribʼ re xtuqubʼankil ruhebʼ li chʼaʼajkilal aʼin, inkʼaʼ teʼruuq xbʼaan naq moko wankebʼ ta xwankil re xsachbʼal chi junajwa ut moko tzʼaqalebʼ ta re ru li xyuʼam. Kaʼajwiʼ li Xʼawabʼejilal li Yos wank xwankil re xsachbʼal chi junajwa ebʼ li chʼaʼajkilal li wank saʼ xbʼeen li Ruuchichʼochʼ.

Joʼ naxkʼut li Santil Hu, ebʼ li kristiʼaan li chaabʼilebʼ xnaʼlebʼ inkʼaʼ raj teʼxxuwa li rosoʼjik li Ruuchichʼochʼ, li naraj xyeebʼal, li xsachik li maaʼusilal li wank saʼ Ruuchichʼochʼ. Aʼin bʼan jun chaabʼil esil, xbʼaan naq chi seebʼ li Xʼawabʼejilal li Yos tixsach chi junajwa li maaʼusilal li wank saʼ xbʼeen li Ruuchichʼochʼ.

Joqʼe tkʼulmanq aʼin? Li jun chik tzolom naxchʼolobʼ li naxye li Santil Hu.