1. Kʼaru kixye chaq laj Isaias chirix li Jesus, ut kʼaʼut naxwaklesi qachʼool li propesiiy aʼin?

SAʼ JUN li propesiiy chirix li Jesus, laj Isaias kixye: «Inkʼaʼ taaraqoq aatin joʼ chanru naril chi moko xbʼaan naq yal xyeheʼk re. Taaraqoq bʼan aatin saʼ tiikilal chirixebʼ li maakʼaʼebʼ xwankil» (Is. 11:3, 4). Ebʼ li aatin aʼin kʼajoʼ naxwaklesi qachʼool. Kʼaʼut? Xbʼaan naq saʼ li ruuchichʼochʼ aʼin numtajenaq li tzʼeqtaanank u. Chiqajunilo naqaj naq twulaq xkutankil naq li Jesus traqoq aatin saʼ qabʼeen. Li Jesus, laj Raqol aatin li tzʼaqal re ru, maajunwa traqoq aatin aʼ yaal li kʼaru tril.

2. Kʼaru li taql kixkʼe qe li Jesus, ut kʼaru tqil saʼ li tzolom aʼin?

² Wulaj wulaj, nokooraqok aatin saʼ xbʼeenebʼ li junchʼol. Abʼan, saʼ xkʼabʼaʼ naq laaʼo aj maak, inkʼaʼ nokooruuk xbʼaanunkil chi tzʼaqal re ru joʼ naxbʼaanu li Jesus. Ak kʼaynaqo chi raqok aatin aʼ yaal chanru naqilebʼ li junchʼol. Joʼkan bʼiʼ, naq li Jesus kiwank saʼ Ruuchichʼochʼ, kixkʼe qe li taql aʼin: «Mexraqok aatin aʼ yaal chanru nekeril, chexraqoq bʼan aatin saʼ tiikilal» (Juan 7:24). Joʼ naqil, li Jesus naraj naq tqakʼam qe rikʼin ut inkʼaʼ tooraqoq aatin aʼ yaal kʼaru naqil. Saʼ li tzolom aʼin, tooʼaatinaq chirix oxibʼ li naʼlebʼ li nokooxkʼe chi raqok aatin: li xtenamit  junaq li qas qiitzʼin, li xtumin ut li xchihabʼ. Saʼ li junjunq chi naʼlebʼ aʼin, tqil chanru tooruuq xyuʼaminkil li xtaql li Jesus.

3, 4. a) Kʼaʼut kixjal xkʼaʼuxl li Apostol Pedro chirixebʼ li maawaʼebʼ aj Judiiy? (Taawil li jalam u saʼ xtiklajik). b) Bʼar wank li akʼ naʼlebʼ kixkʼe li Jehobʼa re laj Pedro?

³ Qayalaq xkʼoxlankil li kinumeʼk saʼ xkʼaʼuxl li Apostol Pedro naq kiyeheʼk re, naq txik saʼ li tenamit Cesarea, saʼ rochoch jun li winq li maawaʼ aj Judiiy, Cornelio xkʼabʼaʼ (Hech. 10:17-29). Naq xeʼkʼirisiik chaq, laj Pedro ut ebʼ li junchʼol aj Judiiy xeʼkʼuteʼk chaq chiru naq tzʼajebʼ li maawaʼebʼ aj Judiiy. Abʼan, kixkʼul wiibʼ oxibʼ li naʼlebʼ li kijalok re xkʼaʼuxl. Jun eetalil, kiril jun li xmoy u li Yos (Hech. 10:9-16). Saʼ li moy u aʼin, kiril chanchan jun li tʼikr nujenaq chi tzʼaj aj xul tojaʼ jun li xyaabʼ kuxej saʼ choxa yook chi taqlank re chi xkamsinkilebʼ ut chi xwaʼbʼalebʼ. Laj Pedro kixye naq inkʼa tixwaʼ. Tojaʼ naq, li xyaabʼ kuxej naxye ajwiʼ re: «Li kʼaru chʼajobʼresinbʼil xbʼaan li Yos maaye laaʼat naq tzʼajn ru». Naq kiraqeʼk li moy u, sachso kikanaak li Apostol Pedro ut inkʼaʼ kixtaw ru li kiyeheʼk re xbʼaan li xyaabʼ kuxej. Saʼ li hoonal ajwiʼ aʼin, keʼwulak wiibʼ oxibʼ li xmoos laj Cornelio. Saʼ xkʼabʼaʼ li santil musiqʼej, laj Pedro kixtaqehebʼ li winq saʼ rochoch laj Cornelio.

⁴ Ebʼ laj Judiiy maajunwa nekeʼok saʼ rochoch li jalanebʼ xtenamit. Joʼkan bʼiʼ, wi laj Pedro kixkanabʼ raj naq ttaqlaaq xbʼaan li naril, maajunwa raj kiwulak saʼ rochoch laj Cornelio. Abʼan, kʼaʼut kixbʼaanu? Kixbʼaanu saʼ xkʼabʼaʼ li kiril saʼ li moy u ut li kiyeheʼk re xbʼaan li santil musiqʼej. Li Apostol Pedro ak xrabʼi li kixchʼolobʼ laj Cornelio naq kiʼekʼasiik xchʼool chi xyeebʼal: «Xintaw tzʼaqal xyaalal naq li Yos juntaqʼeet narilebʼ chixjunil» (Hech. 10:34, 35). Li akʼ naʼlebʼ li kixkʼul li Apostol Pedro tkʼanjelaq chiruhebʼ laj paabʼanel. Chanru?

5. a) Joʼ aj paabʼanel, kʼaru naraj li Jehobʼa naq tqataw ru? b) Usta naqanaw naq li Yos inkʼaʼ nasikʼok u, kʼaru tooruuq xkʼulbʼal?

⁵ Saʼ xkʼabʼaʼ laj Pedro, li Jehobʼa kixtenqʼa chixjunilebʼ laj paabʼanel re naq teʼxtaw ru naq inkʼaʼ nasikʼok u. Li Yos inkʼaʼ naxkʼe saʼ xchʼool bʼar xtenamit, xteep, xkʼalebʼaal malaj raatinobʼaal junaq li qas qiitzʼin. Naxkʼulubʼa ebʼ li winq malaj ebʼ li ixq li nekeʼloqʼonink re ut nekeʼxbʼaanu li us (Gal. 3:26-28; Apoc. 7:9, 10). Maare ,chixjunilebʼ laj paabʼanel nekeʼxye naq yaal aʼin ut nekeʼxye ajwiʼ naq inkʼaʼ nekeʼsikʼok u. Abʼan, wi saʼ li qateep malaj saʼ li qajunkabʼal xeʼtzʼeqtaanank chaq u, maare wank ajwiʼ aʼin saʼ xchamal li qachʼool. Aʼut laj Pedro usta kixtenqʼahebʼ li junchʼol chi xtawbʼal ru naq li Yos inkʼaʼ nasikʼok u, moqon chik kixkʼutbʼesi naq toj wank li tzʼeqtaanank u saʼ li xchʼool (Gal. 2:11-14). Joʼkan bʼiʼ, chanru tooruuq xyuʼaminkil li xtaql li Jesus ut inkʼaʼ tooraqoq aatin aʼ yaal kʼaru naqil?

6. a) Kʼaru tooxtenqʼa chi risinkil li tzʼeqtaanank u li wank saʼ li qachʼool usta qʼaxal kachʼin? b) Kʼaru kixkʼut jun li hu li kixtaqla jun li qechpaabʼanel?

⁶ Re xnawbʼal ma toj wank li tzʼeqtaanank saʼ li qachʼool, aajel ru naq tqajuntaqʼeeta li qanaʼlebʼ rikʼin li naqatzol saʼ li Raatin li Yos (Sal. 119:105). Joʼkan ajwiʼ, naru naqapatzʼ re junaq li qamiiw naq tixye qe ma naril chiqu naq nokootzʼeqtaanank u (Gal. 2:11, 14). Maare qʼaxal xeʼink saʼ li qachʼool joʼkan naq inkʼaʼ naqakʼe reetal. Qilaq jun li eetalil chirix jun li qechpaabʼanel li wank xkʼanjel saʼ li xtenamit li Yos li kixtaqla jun li hu saʼ li qamolam chirix jun li sumal li kawebʼ xpaabʼal ut wankebʼ  choʼq aj kʼamolbʼe saʼ li puktesink. Li bʼeelomej aʼin xyoʼlaak saʼ jun li chʼina teep li tzʼeqtaananbʼil xbʼaanebʼ li qas qiitzʼin. Joʼ naqil, li qechpaabʼanel li kixtzʼiibʼa li esilhu inkʼaʼ naxkʼe reetal naq naxtzʼeqtaana ajwiʼ li chʼina teep aʼin. Usta chaabʼil aatin kixtzʼiibʼa chirix li bʼeelomej, saʼ xraqik li xhu kixye: «Usta kiyoʼlaak [saʼ li teep aʼin] li xnaʼlebʼ ut li xbʼaanuhom naxtenqʼahebʼ li junchʼol chi xtawbʼal ru naq li chalenaqebʼ [saʼ li teep aʼin] moko tzʼajebʼ ta chi moko qʼaxal nebʼaʼebʼ joʼ xkʼihalil ebʼ li qas qiitzʼin li wankebʼ aran». Ma naqataw ru aʼin? Maakʼaʼ naxye kʼaru li qakʼanjel saʼ li xtenamit li Yos, tento tqatzʼil qix chi timil timil ut tqakʼulubʼa chi anchal qachʼool naq ebʼ li junchʼol tooʼeʼxtenqʼa chi rilbʼal ma toj nokootzʼeqtaanank u. Kʼaru chik tooruuq xbʼaanunkil?

7. Chanru tooruuq xkʼutbʼesinkil naq xqate chiʼus li qachʼool?

⁷ Wi tqate chiʼus li qachʼool, li rahok trisi chixjunil li tzʼeqtaanank u li wank chisaʼ (2 Cor. 6:11-13). Ma kaʼajwiʼ naqachʼutubʼ qibʼ rikʼinebʼ li nekeʼxnaw li qaatinobʼaal, li wankebʼ saʼ li qakʼalebʼaal, tenamit malaj teep? Wi joʼkan, qakʼehaq qaqʼe chi xnawbʼalebʼ ru li jalanebʼ xwanjik chiqu. Us raj naq toopuktesinq rochbʼenebʼ malaj tqakʼamebʼ saʼ qochoch re naq toowaʼaq malaj toochʼutlaaq rikʼinebʼ (Hech. 16:14, 15). Wi naqabʼaanu aʼin, kʼajoʼaq li rahok ut maakʼaʼaq chik li tzʼeqtaanank saʼ li qachʼool. Abʼanan, toj wank ebʼ li naʼlebʼ li maakʼaʼebʼ xwankil li naru nataqlank saʼ qabʼeen naq tooraqoq aatin saʼ xbʼeenebʼ li junchʼol, joʼ li tumin.

8. Joʼ naxye saʼ Levitico 19:15, kʼaru chik li naʼlebʼ naru naxpoʼ qakʼaʼuxl chirix chanru tqilebʼ li junchʼol?

⁸ Jun chik li naʼlebʼ li naru naxpoʼ qakʼaʼuxl chirix chanru tqilebʼ li junchʼol aʼan li tumin. Ut chirix aʼin naʼaatinak Levitico 19:15 naq naxye: «Naq tatraqoq aatin: ma yal aatoqʼobʼa ru li nebʼaʼ chi moko taaxiwa ru li wank xwankil. Saʼ xyaalal bʼan tatraqoq aatin saʼ xbʼeenebʼ chixjunilebʼ». Chanru truuq li bʼihomal malaj li nebʼaʼil xbʼaanunkil naq sa malaj inkʼaʼ sa tqil junaq li qas qiitzʼin?

9. Kʼaru li chʼaʼajkilal kixtzʼiibʼa laj Salomon, ut kʼaru naqatzol chirix aʼin?

⁹ Naq ekʼasinbʼil rikʼin santil musiqʼej, laj Salomon kixtzʼiibʼa jun li chʼaʼajkilal chirix chanru ilbʼilebʼ li qas qiitzʼin: «Li nebʼaʼ maajun napatzʼok re; li bʼihom kʼajoʼebʼ li ramiiw» (Prov. 14:20). Kʼaru naqatzol saʼ li raqal aʼin? Wi inkʼaʼ naqabʼaan weent, naru naqasikʼebʼ choʼq qamiiw li wankebʼ naabʼal xtumin ut inkʼaʼ tqasikʼebʼ li moko naabʼalebʼ ta xtumin. Kʼaʼut xiwxiw naq tqakʼehebʼ xwankil kaʼajwiʼ li wankebʼ xtumin?

10. Chirix kʼaru li chʼaʼajkilal kiʼaatinak laj Santiago?

¹⁰ Wi nokooraqok aatin saʼ xbʼeenebʼ li junchʼol yal saʼ xkʼabʼaʼ li xtuminebʼ, naru naqajach ru li chʼuut. Saʼ xkutankilebʼ li Apostol, li tzolom Santiago kixye naq li chʼaʼajkilal aʼin yook xjachbʼal wiibʼ oxibʼ li chʼuut (taayaabʼasi Santiago 2:1-4). Inkʼaʼ naru tqakanabʼ naq li qachʼuut tixkʼul aʼin. Chanru tooruuq xqʼaxbʼal ru li chʼaʼajkilal aʼin?

11. Chʼolobʼ chanru nachʼaʼajkink li xjunkabʼlal junaq li qas qiitzʼin re naq twanq choʼq ramiiw li Jehobʼa.

¹¹ Tento tqilebʼ li qechpaabʼanel joʼ chanru narilebʼ li Jehobʼa. Aʼan inkʼaʼ naxtaqsi malaj naxkubʼsi xwankilebʼ yal saʼ xkʼabʼaʼ naq nebʼaʼebʼ malaj bʼihomebʼ. Moko aajel ta ru naq wanq naabʼal kʼaru qe re naq toowanq choʼq ramiiw li Yos. Yaal naq li Jesus kixye: «Ninye eere naq junaq bʼihom qʼaxal chʼaʼaj naq taaʼok saʼ li xnimajwal  wankilal li choxa», abʼan inkʼaʼ kixye naq maajunwa truuq chi ok (Mat. 19:23). Abʼan kixye ajwiʼ: «Us xaq eere li nebʼaʼex, xbʼaan naq eere li xnimajwal awabʼejihom li Yos» (Luc. 6:20). Yaal naq rikʼin aʼin moko yook ta xyeebʼal naq chixjunilebʼ li nebʼaʼ teʼabʼinq chiru ut teʼosobʼtesiiq. Naabʼalebʼ li nebʼaʼ maajunwa xeʼok choʼq xtzolom. Joʼkan naq, inkʼaʼ naru naqaye naq junaq li qas qiitzʼin twanq choʼq ramiiw li Jehobʼa yal saʼ xkʼabʼaʼ li xbʼihomal.

12. Kʼaru naxye li Santil Hu rehebʼ li bʼihom ut ebʼ li nebʼaʼ?

¹² Li xtenamit li Jehobʼa kʼubʼanbʼil rikʼin winq ut ixq li nekeʼrahok re ut nekeʼkʼanjelak chiru chi anchalebʼ xchʼool. Wankebʼ bʼihom ut wankebʼ nebʼaʼ. Li Santil Hu naxkʼe li naʼlebʼ aʼin rehebʼ li bʼihom: «Moko teʼxkʼojobʼ xchʼool rikʼin li bʼihomal li taaʼosoʼq, teʼxkʼojobʼ bʼan xchʼool rikʼin li Yos» (taayaabʼasi 1 Timoteo 6:17-19). Joʼkan ajwiʼ, naxye rehebʼ laj kʼanjel chiru li Yos (aʼ yaal ma bʼihom malaj nebʼaʼ) naq xiwxiw xraabʼal li tumin (1 Tim. 6:9, 10). Wi naqate saʼ qu re rilbʼalebʼ li qechpaabʼanel joʼ narilebʼ li Jehobʼa, inkʼaʼ tooraqoq aatin saʼ xbʼeenebʼ yal saʼ xkʼabʼaʼ li xjunkabʼlal. Abʼan, ma us tawiʼ naq tooraqoq aatin saʼ xbʼeenebʼ li junchʼol yal saʼ xkʼabʼaʼ li xchihabʼebʼ? Qilaq.

13. Kʼaru naxye qe li Santil Hu chirix chanru tqilebʼ li cheek?

¹³ Li Santil Hu naabʼal sut naxye qe naq tqoxloqʼi ebʼ li cheek. Saʼ Levitico 19:32 naxye: «Chatxaqliq re xkʼeebʼal xloqʼal ebʼ li cheekel poyanam. Chaxiwa ru laaYos». Saʼ Proverbios 16:31 naxye qe naq «wi saq rismal laajolom, aʼan reetalil laaloqʼal li xamaatani saʼ xkʼabʼaʼ li xtiikilal laachʼool». Ut li Apostol Pablo kixye re laj Timoteo naq inkʼaʼ tixqʼus chi kaw junaq li cheek, tento bʼan tixkʼe xnaʼlebʼ «joʼ yuwaʼbʼej» (1 Tim. 5:1, 2). Usta laj Timoteo wank bʼayaq xwankil saʼ xbʼeenebʼ li rechpaabʼanel li ak cheekebʼ chik, tento troxloqʼihebʼ ut tixtoqʼobʼa ruhebʼ.

14. Joqʼe raj us naq tqaqʼus li ak cheek chiqu?

¹⁴ Kʼaru tkʼulmanq wi chʼolchʼo chiru junaq li cheek naq yook chi maakobʼk malaj naxkʼamebʼ li junchʼol chi xbʼaanunkil li inkʼaʼ nawulak chiru li Yos? Li Jehobʼa inkʼaʼ traqoq aatin yal saʼ xkʼabʼaʼ li naril ut inkʼaʼ tixnumsi li xmaak yal saʼ xkʼabʼaʼ naq cheek chik. Qilaq li naʼlebʼ li naxkʼe li Santil Hu saʼ Isaias 65:20, TNM: «Aʼut laj maak, usta wanq oʼkʼaal chihabʼ re ttenebʼaaq li maaʼusilal saʼ xbʼeen». Naqataw jun chik li naʼlebʼ li naxkʼe li Santil Hu joʼ li xmoy u laj Ezequiel (Ezeq. 9:5-7). Joʼkan naq, li wanq xwankil chiqu junelik, aʼan roxloqʼinkil li Jehobʼa «li cheekel winq» (Dan. 7:9, 10, 13, 14). Chi joʼkan, inkʼaʼ tooxuwaq chi xqʼusbʼal li ani naʼajok re, maakʼaʼ naxye jarubʼ chihabʼ wank re (Gal. 6:1).

15. Kʼaru naqatzol rikʼin li Apostol Pablo chirix roxloqʼinkilebʼ li qechpaabʼanel li toj saajebʼ?

¹⁵ Chanru tqaatina ebʼ li saaj? Qilaq li eetalil chirix laj Timoteo. Li Apostol Pablo kixkʼe re li naʼlebʼ aʼin: «Maaʼani chitzʼeqtaananq aawe saʼ xkʼabʼaʼ laasaajilal, chayal bʼan aaqʼe chi xkʼambʼal xbʼehebʼ laj paabʼanel rikʼin aatinak, rikʼin laayuʼam, saʼ li rahok, saʼ laapaabʼaal joʼ ajwiʼ rikʼin xsaqal ru laachʼool» (1 Tim. 4:12). Naq li Apostol Pablo kixtzʼiibʼa ebʼ li aatin aʼin, laj Timoteo maare ak xqʼax tana 30 chihabʼ. Abʼan li Apostol Pablo ak kixtenebʼ saʼ xbʼeen ebʼ li nimla kʼanjel. Maakʼaʼ naxye kʼaʼut naq kikʼeheʼk re li naʼlebʼ aʼin, li xyaalalil aʼan naq inkʼaʼ tooraqoq aatin saʼ xbʼeenebʼ li saaj yal saʼ xkʼabʼaʼ li xchihabʼebʼ. Qajultikaq naq li Jesus kixbʼaanu li xkʼanjel li Yos naq ak xqʼax tana 30 chihabʼ.

16, 17. a) Chanru nekeʼxnaw ebʼ li cheekel winq naq junaq laj paabʼanel ak tzʼaqlojenaq re naq txaqabʼaaq choʼq aj tenqʼanel malaj choʼq cheekel winq? b) Kʼaru li chʼaʼajkilal naru nawank rikʼin li Santil Hu ut li qateep malaj li qakʼaʼuxl?

 ¹⁶ Wankebʼ li tenamit bʼarwiʼ inkʼaʼ nekeʼoxloqʼiik ebʼ li saajil winq. Wi joʼkan nakʼulmank saʼ li qateep, maare ebʼ li cheekel winq inkʼaʼ teʼraj naq teʼxaqabʼaaq ebʼ li saaj li tzʼaqlojenaqebʼ xpaabʼal re naq teʼkʼanjelaq choʼq aj tenqʼanel malaj choʼq cheekel winq. Ebʼ li cheekel winq tento teʼxjultika naq li Santil Hu inkʼaʼ naxye jarubʼ chihabʼ wanq re li qechpaabʼanel li txaqabʼaaq chi kʼanjelak saʼ xtenamit li Yos (1 Tim. 3:1-10, 12, 13; Tito 1:5-9). Wi junaq laj paabʼanel tixtenebʼ junaq li chaqʼrabʼ joʼ nabʼaanumank saʼ li xteep, inkʼaʼ yook xyuʼaminkil li naxkʼut li Santil Hu. Ebʼ li cheekel winq inkʼaʼ teʼraqoq aatin saʼ xbʼeenebʼ li saaj aʼ yaal li nekeʼxkʼoxla malaj joʼ chanru nabʼaanumank saʼebʼ li teep, tento bʼan teʼxbʼaanu joʼ naxye li Raatin li Yos (2 Tim. 3:16, 17).

¹⁷ Wi ebʼ li cheekel winq nekeʼxkʼam re rikʼin li naʼilmank saʼ li teep ut inkʼaʼ rikʼin li naxye li Santil Hu, maare inkʼaʼ teʼraj naq txaqabʼaaq junaq li tzʼaqlojenaq xpaabʼal re naq tkʼanjelaq joʼ aj tenqʼanel malaj joʼ cheekel winq. Saʼ jun li tenamit, jun laj tenqʼanel li kaw yook chi kʼanjelak kʼebʼil sa xbʼeen wiibʼ oxibʼ li kʼanjel saʼ li chʼuut. Usta chʼolchʼo chiruhebʼ li cheekel winq naq yook xyuʼaminkil li naʼlebʼ li naxkʼe li Santil Hu chirixebʼ li cheekel winq, inkʼaʼ xeʼraj aatinak chirix. Wiibʼ oxibʼ rehebʼ li cheekel winq li ak tiixebʼ chik, xeʼxye naq saaj chiʼus re naq t-oq choʼq cheekel winq. Yal saʼ xkʼabʼaʼ naq saaj nakʼutunk inkʼaʼ xeʼxxaqabʼ choʼq cheekel winq. Aʼin yal jun rehebʼ li eetalil, abʼan ebʼ li esilhu naxkʼut naq joʼkan nekeʼnaʼlebʼak naabʼalebʼ li cheekel winq yalaq bʼar re li Ruuchichʼochʼ. Qʼaxal us naq tqakʼam qe rikʼin li naxye li Santil Hu ut inkʼaʼ joʼ chanru ilbʼil saʼ li qateep malaj joʼ chanru naqil laaʼo. Kaʼajwiʼ chi joʼkan tqapaabʼ li Jesus ut tqakanabʼ raqok aatin aʼ yaal chanru naqilebʼ.

18, 19. Kʼaru tento tqabʼaanu re rilbʼalebʼ li junchʼol joʼ narilebʼ li Jehobʼa?

¹⁸ Usta laaʼo ak maak, naru naqatzol rilbʼalebʼ li junchʼol joʼ narilebʼ li Jehobʼa (Hech. 10:34, 35). Re xbʼaanunkil aʼin, tento naq junelik tqakʼe qaqʼe ut tqayuʼami li naʼlebʼ li naxkʼe li Raatin li Yos. Wi tqabʼaanu, yooqo xpaabʼankil li naʼlebʼ li kixkʼe li Jesus naq inkʼaʼ tooraqoq aatin aʼ yaal chanru naqilebʼ (Juan 7:24).

¹⁹ Chi seebʼ, li Awabʼej Jesukriist traqoq aatin saʼ tiikilal saʼ xbʼeen chixjunil li Ruuchichʼochʼ ut inkʼaʼ traqoq aatin aʼ yaal li kʼaru tril malaj li kʼaru trabʼi (Is. 11:3, 4). Kʼajoʼaq tana xchaabʼilal chixjunil aʼin.