NAʼLEBʼ RE TZOLOK 33
«Li teʼabʼinq aawe» teʼkoleʼq
«Chawilaq aawibʼ ut chakʼe reetal chi us li kʼaru yookat chi xkʼutbʼal; jiiqʼaq aachʼool chi xbʼaanunkil aʼan: wi joʼkan taabʼaanu, taakol aawibʼ laaʼat joʼebʼ ajwiʼ li teʼabʼinq aawe» (1 TIM. 4:16).
BʼICH 67 «Predica la palabra»
RUʼUJIL LI TZOLOM *
1. Kʼaru raj tqaj naq teʼxbʼaanu li qakomon?
LI XPAULINE * jun li qechpaabʼanel naxye: «Chalen naq xintzol li yaal, xinrahi ru naq chixjunil linjunkabʼal teʼwanq wikʼin saʼ li Chʼinaʼusil Naʼajej. Xbʼeen xbʼeen, naq laj Wayne linbʼeelom, linchʼina yum ut laaʼin tookʼanjelaq chiru li Jehobʼa». Maare joʼkan ajwiʼ naqekʼa qibʼ laaʼo wi wankebʼ li qakomon li toj maajiʼ nekeʼxnaw ru li Yos ut maajiʼ nekeʼxra.
2. Kʼaru ebʼ li patzʼom tqasume saʼ li tzolom aʼin?
2 Moko naru ta tqamin ruhebʼ li qakomon re naq teʼxkʼulubʼa li yaal. Abʼan tooruuq xtenqʼankilebʼ re naq jwal t-alaaq saʼ xchʼoolebʼ rabʼinkil li esil li naxkʼe li Santil Hu (2 Tim. 3:14, 15). Kʼaʼut tento tqapuktesi li yaal rehebʼ li qakomon? Kʼaʼut tento tqakʼutbʼesi naq naqataw ru li nekeʼrekʼa? Kʼaru tooruuq xbʼaanunkil re naq teʼxtzol ajwiʼ xraabʼal li Jehobʼa joʼ naqabʼaanu laaʼo? Ut, chanru teʼruuq qatenqʼankil li qechpaabʼanel?
KʼAʼUT TENTO TQAPUKTESI LI YAAL REHEBʼ LI QAKOMON?
3. Joʼ naxye saʼ 2 Pedro 3:9, kʼaʼut tento tqapuktesi li yaal rehebʼ li qakomon?
3 Chi seebʼ, li Jehobʼa tixsach ru li ruuchichʼochʼ li naxjolomi laj Tza. Kaʼajwiʼ teʼkoleʼq li chaabʼil nekeʼnaʼlebʼak re xtawbʼal li junelik yuʼam (Hech. 13:48). Wi naqoksi naabʼal li qahoonal ut li qametzʼew re xpuktesinkil li yaal rehebʼ li kristiʼaan saʼ li qateep, relik chi yaal naq joʼkan ajwiʼ naqaj xbʼaanunkil rikʼinebʼ li qakomon re naq teʼoq chi kʼanjelak chiru li Jehobʼa. Li qachoxahil Yuwaʼ li jwal nokooxra «inkʼaʼ naraj naq taasachq junaq, naraj bʼan naq chixjunilebʼ teʼyotʼeʼq xchʼool ut teʼxjal xkʼaʼuxl» (taayaabʼasi 2 Pedro 3:9).
4. Chanru naru toopaltoʼq naq naqapuktesi li yaal rehebʼ li qakomon?
4 Tento tqajultika naq tooruuq xpuktesinkil li esil chirix li kolbʼa ibʼ chi chaabʼil malaj chi maajoʼil. Maare naq tqapuktesi li yaal re junaq li kristiʼaan li inkʼaʼ naqanaw ru toj tqasikʼ li qʼunil aatin, abʼan saʼ kawil aatin tqabʼaanu naq tooʼaatinaq rikʼin junaq li qakomon.
5. Kʼaru wanq saʼ qachʼool naq tqapuktesi li yaal rehebʼ li qakomon?
5 Naq naqajultika chanru xoopuktesink xbʼeen sut rikʼinebʼ li qakomon, maare t-oq qakʼaʼuxl ut tqakʼoxla naq xooruuk raj xsikʼbʼal chanru xbʼaanunkil chiʼus. Li Apostol Pablo kixkʼe li naʼlebʼ aʼin rehebʼ laj paabʼanel: «Junelik chexʼaatinaq saʼ usilal, chiwanq xyaalal leeraatin re naq teenaw xsumenkil chixjunilebʼ joʼ chanru xkʼulubʼ» (Col. 4:5, 6). Junelik wanq saʼ qachʼool li aatin aweʼ naq tooʼaatinaq rikʼinebʼ li qakomon. Wi inkʼaʼ tqabʼaanu aʼin, maare maajoqʼe tqakʼamebʼ chaq saʼ li yaal.
KʼARU TOORUUQ XBʼAANUNKIL RE XTENQʼANKILEBʼ LI QAKOMON?
Naqakʼe jun chaqʼal ru eetalil naq naqakʼutbʼesi li tawok u ut li chaabʼil naʼlebʼ. (Taawil raqal 6 toj 8). *
6, 7. Kʼe jun eetalil li tixkʼut naq wank xwankil xtawbʼal ru li narekʼa jun li sumʼaatin li maawaʼ aj Testiiw.
6 Qakʼutbʼesihaq naq naqataw ruhebʼ. Li xPauline, li ak xooʼaatinak chirix, naxye: «Naq ninʼaatinak chaq rikʼin linsumʼaatin junelik nawaj aatinak chirix li paabʼal. Inkʼaʼ xinʼaatinak chirix jalan chik naʼlebʼ». Abʼanan, laj Wayne jun miin ajwiʼ naxnaw chirix li Santil Hu ut moko naxtaw ta ru li naxye li rixaqil. Kixkʼoxla naq li xPauline junes chirix li xpaabʼal naxik xchʼool. Kixuwak chi xkʼoxlankil naq li rixaqil chʼikchʼo saʼ jun li chʼuut li xuwajel ru ut naq yookebʼ xbʼalaqʼinkil.
7 Anaqwan li xPauline naxkʼe reetal naq rajlal ewu ut saʼ li xraqik li xamaan kixnumsi naabʼal li hoonal rikʼinebʼ li rechpaabʼanel, saʼ li chʼutam, saʼ li puktesink ut naq nekeʼxchʼutubʼ ribʼ junpaataq. Naxseeraqʼi: «Wank sut, maaʼani wank saʼ ochoch naq nawulak laj Wayne, xchʼina junes narekʼa ribʼ». Chʼolchʼo naq naraj rilbʼal ru li rixaqil ut li ralal. Inkʼaʼ naxnaw ruhebʼ li kristiʼaan li narochbʼeni li xPauline ut kixkʼoxla naq jwal wankebʼ wiʼ chik xwankil li ramiiw li rixaqil chiru aʼan. Joʼkan naq kixsebʼesi li xPauline ut kixye re, naq tixjach ribʼ rikʼin. Peʼyaal naq kiruuk raj li xPauline xkʼutbʼesinkil naq naxtaw ru chiʼus li narekʼa li xbʼeelom?
8. Joʼ naqil saʼ 1 Pedro 3:1, 2, chirix kʼaru tana teʼxkʼe xchʼool li qakomon?
8 Qakanabʼaq naq li qanaʼlebʼ t-aatinaq chiqix. Naabʼal sut ebʼ li qakomon qʼaxal nekeʼxkʼe xchʼool chirix li naqabʼaanu ut inkʼaʼ chirix li naqaye (taayaabʼasi 1 Pedro 3:1, 2). Saʼ xnumikebʼ li kutan li xPauline kixkʼe reetal aʼin. Naxye: «Ninnaw naq laj Wayne nokooxra ut naq moko naraj ta xjachbʼal ribʼ wikʼin. Abʼan li kixye we xinxtenqʼa chi xtawbʼal ru naq tento tinnaʼlebʼaq joʼ naraj li Jehobʼa. Xinkʼe reetal naq maakʼaʼ naʼok wiʼ li kʼiila aatin, tento bʼan tinkʼe jun chaabʼil eetalil». Joʼkan naq inkʼaʼ chik xmin ru li xbʼeelom re aatinak chirix li Santil Hu, kiʼok bʼan chi aatinak rikʼin chirix li nakʼulmank rajlal kutan. Laj Wayne kixkʼe reetal naq li rixaqil jwal qʼun chik xchʼool ut li ralal rajlal kutan yook chi xchaabʼilobʼresinkil li xnaʼlebʼ (Prov. 31:18, 27, 28). Naq kixkʼe reetal naq li Santil Hu kixtenqʼa li xjunkabʼal, jwal kiʼalaak saʼ xchʼool rabʼinkil li esil (1 Cor. 7:12-14, 16).
9. Kʼaʼut naq inkʼaʼ toolubʼq chi xtenqʼankilebʼ?
9 Moolubʼk chi xtenqʼankilebʼ. Li Jehobʼa naxkʼe qe li eetalil. Rajlal yook xkʼebʼal xhoonalebʼ li kristiʼaan re naq teʼxkʼulubʼa li yaal ut teʼxtaw li junelik yuʼam (Jer. 44:4). Ut li Apostol Pablo kixye re laj Timoteo naq inkʼaʼ tixkanabʼ xtenqʼankilebʼ li junchʼol, xbʼaan naq chi joʼkan tkoleʼq ut teʼkoleʼq ajwiʼ li teʼabʼinq re (1 Tim. 4:16). Saʼ xkʼabʼaʼ naq naqara li qajunkabʼal, naqarahi ru naq teʼxnaw ru li yaal li wank saʼ li Santil Hu. Joʼ kixkʼul li xPauline, li raatin ut li xbʼaanuhom qʼaxal xeʼkʼanjelak saʼ li xjunkabʼal. Anaqwan sa saʼ xchʼool xbʼaan naq rochbʼen li xbʼeelom nekeʼkʼanjelak chiru li Jehobʼa, xkabʼichal wankebʼ choʼq aj kʼamolbʼe saʼ li puktesink ut laj Wayne nakʼanjelak choʼq cheekel winq.
10. Kʼaʼut naq tento twanq qakuyum?
10 Chiwanq qakuyum. Naq nokooʼok xyuʼaminkil li xchaqʼrabʼ li Yos, maare tchʼaʼajkoʼq chiruhebʼ li qakomon kʼayk rikʼin li naqapaabʼ, li naqaye ut naqabʼaanu. Saʼ junpaat nekeʼxkʼe reetal naq inkʼaʼ chik nokootzʼaqonk rikʼinebʼ saʼebʼ li ninqʼe li chalenaq saʼ li bʼalaqʼil paabʼal ut chi moko nokooʼokenk chirixebʼ li nekeʼraj awabʼejink. Saʼ xtiklajik maare wiibʼ oxibʼ li qakomon teʼpoʼq qikʼin (Mat. 10:35, 36). Abʼan miqakʼoxla naq maajunwa teʼxjal xnaʼlebʼebʼ. Wi tqakanabʼ xchʼolobʼankil chiruhebʼ li naqapaabʼ, relik chi yaal naq ak xqaraq aatin saʼ xbʼeenebʼ ut xqakʼoxla naq moko xkʼulubʼebʼ ta li junelik yuʼam. Abʼan li raqok aatin li Jehobʼa kixkʼe saʼ ruqʼ li Jesus, moko saʼ quqʼ ta laaʼo (Juan 5:22). Wi wank qakuyum, maare saʼ junaq kutan teʼalaaq saʼ xchʼool li qakomon rabʼinkil li esil (taawil li kaaxukuut « Qoksihaq li qanaʼaj saʼ Internet»).
11-13. Kʼaru naqatzol chirix chanru kinaʼlebʼak li xʼAlice rikʼin li xnaʼ xyuwaʼ?
11 Tuulanaqo abʼan miwiibʼank qachʼool (Prov. 15:2). Qilaq li kixkʼul li xʼAlice. Li xnaʼ xyuwaʼ inkʼaʼ nekeʼxpaabʼ naq wank li Yos ut kaw nekeʼkʼanjelak saʼ li molam bʼarwiʼ wankebʼ li nekeʼraj awabʼejink, ut li xʼAlice kixtzol li yaal naq moko wank ta rikʼinebʼ. Kixkʼe reetal naq aajel ru naq inkʼaʼ tbʼayq chi aatinak rikʼin li xnaʼ xyuwaʼ chirix chixjunil li chaabʼil naʼlebʼ li yook xtzolbʼal. Aʼan naxye: «Wi nakatbʼayk chi xyeebʼal rehebʼ laakomon li xat-ok xpaabʼankil ut xbʼaanunkil, qʼaxal teʼkʼahoʼq aawikʼin». Joʼkan naq kixtzʼiibʼa ebʼ li esilhu choʼq re li xnaʼ xyuwaʼ bʼarwiʼ naxpatzʼ rehebʼ li nekeʼxkʼoxla chirix junaq li naʼlebʼ li naxkʼut li Santil Hu ut maare twulaq chiruhebʼ, joʼ li rahok (1 Cor. 13:1-13). Kixbʼanyoxi rehebʼ naq xeʼxkʼirisi ut xeʼril chaq chiʼus, ut kixtaqlahebʼ xmaatan. Naq kiwulak chi rulaʼaninkilebʼ, kixkʼe xqʼe chi xtenqʼankil li xnaʼ saʼ li ochoch. Abʼan, saʼ xtiklajik li xnaʼ xyuwaʼ li xʼAlice moko xeʼwulak ta chiru naq kiʼaatinak rikʼinebʼ chirix li naxpaabʼ anaqwan.
12 Naq kiwank chaq saʼ rochoch li xnaʼ xyuwaʼ, wulaj wulaj naril xsaʼ li Santil Hu. Li xʼAlice naxye naq aʼin kitenqʼank re li xnaʼ chi xkʼebʼal reetal naq wank xwankil choʼq re li naxye li Raatin li Yos. Joʼkan ajwiʼ, li xyuwaʼ kiʼok xtzolbʼal bʼayaq li Raatin li Yos re xtawbʼal ru li naxpaabʼ li xʼAlice ut re xsikʼbʼal junaq xmaajelal li Santil Hu. Li xʼAlice naxye: «Xinsi jun xSantil Hu ut xintzʼiibʼa re wiibʼ oxibʼ li chʼinaʼusil aatin». Kʼaru kikʼulmank? Li xyuwaʼ maajun xmaajelal li Santil Hu kixtaw, sachso bʼan xchʼool kikanaak naq kiril li naxye.
13 Tento naq tuulanaqo abʼan miwiibʼank qachʼool usta yooqo xnumsinkil li yalbʼaʼix (1 Cor. 4:12b). Jun eetalil, li xʼAlice kixkuy li xikʼ ilok saʼ ruqʼ li xnaʼ. Naxseeraqʼi: «Naq xkubʼeek inhaʼ, linnaʼ xye we naq moko ninra ta». Naxye ajwiʼ: «Moko xinkanabʼ ta aatinak rikʼin linnaʼ chirix aʼin, xinye re saʼ tuulanil naq nawaj wank joʼ aj Testiiw re li Jehobʼa ut naq inkʼaʼ tinjal li waatin. Xinkʼe inchʼool chi xyeebʼal re, naq jwal ninra. Kʼajoʼ naq xooyaabʼak, ut xinkʼubʼ choʼq re li sahil tzakahemq. Chalen li kutan aʼan, linnaʼ kiʼok xkʼebʼal reetal naq li Santil Hu kixchaabʼilobʼresi linnaʼlebʼ».
14. Kʼaʼut naq maajunwa tqakanabʼ naq teʼxmin qu ebʼ li qakomon?
14 Maare li qakomon moko saʼ junpaat ta teʼxtaw ru chiʼus kʼaʼut qʼaxal wank xwankil choʼq qe kʼanjelak chiru li Jehobʼa. Jun eetalil, naq li xʼAlice kiʼok joʼ aj kʼamolbʼe saʼ li puktesink ut inkʼaʼ kiʼok xtzolbʼal li kʼaru ak xeʼxsikʼ ru li xnaʼ xyuwaʼ, kʼajoʼ naq kiʼok wiʼ chik chi yaabʼak li xnaʼ. Abʼan li xʼAlice inkʼaʼ xwiibʼank xchʼool. Aʼan naxye: «Wi nakaakanabʼ aawibʼ saʼ junaq li naʼlebʼ, maare teʼoq xminbʼal aawu saʼ jalan chik. Abʼan, wi saʼ tuulanil nakaakol rix laawaatin ut inkʼaʼ nawiibʼank aachʼool, maare wanqebʼ li teʼabʼinq aawe». Aʼin tzʼaqal kixkʼul li xʼAlice. Anaqwan li xnaʼ xyuwaʼ nekeʼkʼanjelak choʼq aj kʼamolbʼe saʼ li puktesink, ut li xyuwaʼ wank choʼq cheekel winq.
CHANRU TEʼRUUQ QATENQʼANKIL LI QECHPAABʼANEL?
Chanru teʼruuq li qechpaabʼanel xtenqʼankilebʼ li qakomon li maawaʼebʼ aj Testiiw? (Taawil li raqal 15 ut 16). *
15. Joʼ naxye saʼ Mateo 5:14-16 ut 1 Pedro 2:12, chanru teʼtenqʼaaq li qakomon xbʼaan li chaabʼil naʼlebʼ li nekeʼxbʼaanu li qechpaabʼanel?
15 Li Jehobʼa naroksi li chaabʼil naʼlebʼ li nekeʼxbʼaanu laj kʼanjel chiru re xqʼunbʼesinkilebʼ li kristiʼaan (taayaabʼasi Mateo 5:14-16; 1 Pedro 2:12). Wi laasumʼaatin maawaʼ aj Testiiw re li Jehobʼa, ma naxnaw ruhebʼ laawechpaabʼanel? Li xPauline, li xooʼaatinak chirix saʼ xtiklajik li tzolom, kixbʼoqebʼ li rechpaabʼanel saʼ li rochoch re naq laj Wayne tixnaw ruhebʼ. Laj Wayne naxjultika chanru kitenqʼaak xbʼaan jun li hermaan re naq moko xikʼ ta chik trilebʼ laj Testiiw. Naxseeraqʼi: «Kixpatzʼ jun kutan xleseens saʼ li xkʼanjel re naq tqil jun li bʼatzʼunk. Chi joʼkan xinkʼe reetal naq moko jalan ta peʼ».
16. Kʼaʼut tqabʼoqebʼ li qakomon saʼebʼ li chʼutam?
16 Jun li xnimal ru naʼlebʼ li naru tqoksi re xtenqʼankilebʼ li qakomon aʼan naq tqabʼoqebʼ saʼebʼ li chʼutam (1 Cor. 14:24, 25). Laj Wayne kiwulak xbʼeen sut saʼ li chʼutam naq kinimaak li xkamik li Kriist, xbʼaan naq naʼuxmank naq ak xʼelk chik saʼ li xkʼanjel ut saʼ xkʼabʼaʼ naq junpaat ajwiʼ nabʼaanumank. Aʼan naxchʼolobʼ: «Inkʼaʼ xintaw ru chixjunil li kiyeemank, abʼan inkʼaʼ nasach saʼ inchʼool chanru xineʼxkʼul. Xeʼnachʼok chaq wikʼin ut kʼajoʼ naq keʼsahoʼk saʼ xchʼool naq xineʼril. Xwekʼa naq xeʼxbʼaanu chi anchalebʼ xchʼool». Saʼ li chʼuut wank jun li sumal li xeʼxkʼe xchʼool chi xtenqʼankil li xPauline chi rilbʼal li xyum saʼ li chʼutam ut saʼ li puktesink. Joʼkan bʼiʼ, naq kiʼalaak saʼ xchʼool laj Wayne xnawbʼal ru chiʼus li naxpaabʼ li rixaqil, kixpatzʼ re li bʼeelomej naq ttzoleʼq chirix li Santil Hu.
17. Chirix kʼaru inkʼaʼ t-oq qakʼaʼuxl, abʼan kʼaʼut naq maajunwa tqakanabʼ xtenqʼankilebʼ li qakomon?
17 Naqayoʼoni naq saʼ junaq kutan chixjunilebʼ li qakomon teʼoq chi kʼanjelak chiru li Jehobʼa. Abʼan usta tqabʼaanu chixjunil li wank saʼ quqʼ re xtenqʼankilebʼ, maare maajunwa teʼoq saʼ li yaal. Wi tkʼulmanq aʼin, miʼok qakʼaʼuxl chi xkʼoxlankil naq laaʼo wank qe chirix li teʼxbʼaanu. Chʼolchʼooq ajwiʼ chiqu naq maaʼani naru tqapuʼersi ru re naq tixkʼulubʼa li naqapaabʼ. Usta joʼkan, miqakʼoxla naq inkʼaʼ teʼxtaw rusilal naq teʼril naq sa saʼ qachʼool chi kʼanjelak chiru li Jehobʼa. Chootijoq chirixebʼ, chooʼaatinaq rikʼinebʼ chirix li yaal saʼ tuulanil ut miqakanabʼ xtenqʼankilebʼ (Hech. 20:20). Qakʼojobʼaq qachʼool naq li Jehobʼa trosobʼtesi li qakʼanjel. Ut, wi t-alaaq saʼ xchʼoolebʼ li qakomon qabʼinkil, teʼkoleʼq ajwiʼ.
BʼICH 57 Predicamos a toda clase de personas
^ párr. 5 Twulaq raj chiqu naq li qajunkabʼal teʼxnaw ru li Jehobʼa, abʼan aʼ yaal chik rehebʼ ma teʼkʼanjelaq chiru malaj inkʼaʼ. Saʼ li tzolom aʼin, tqil kʼaru tqabʼaanu re naq teʼalaaq saʼ xchʼool qabʼinkil.
^ párr. 1 Maawaʼ tzʼaqal xkʼabʼaʼebʼ.
^ párr. 53 XCHʼOLOBʼANKIL LI JALAM U. Jun li qechpaabʼanel li toj saaj naxtenqʼa li xyuwaʼ li moko aj Testiiw ta chi xyiibʼankil li bʼelebʼaal chʼiichʼ. Naq naxkʼe ribʼ chiru naxkʼut re li xyuwaʼ jun li bʼideo li natawmank saʼ jw.org®.
^ párr. 55 XCHʼOLOBʼANKIL LI JALAM U. Jun li qechpaabʼanel naxkʼe xchʼool chi rabʼinkil li xbʼeelom li maawaʼ aj Testiiw naq naxseeraqʼi re chixjunil li kixbʼaanu chiru li kutan. Moqon, narajsi bʼayaq ru rikʼin li xbʼeelom ut li xyum.
^ párr. 57 XCHʼOLOBʼANKIL LI JALAM U. Li hermaan aʼin naxbʼoqebʼ li rechpaabʼanel saʼ li rochoch. Ebʼ aʼan nekeʼxkʼe xchʼool chi aatinak rikʼin li xbʼeelom. Moqon chik, naʼochbʼeniik xbʼaan li xbʼeelom chi xnimankil li xkamik li Kriist.
