Ma nakatruuk xsumenkil ebʼ li patzʼom aʼin chirix li naʼlebʼ li kiʼelk saʼ li hu Laj Kʼaakʼalehom 2019?

Kʼaru naraj xyeebʼal li yeechiʼom aʼin li naxkʼe qe li Yos: «Maakʼaʼ naxye kʼaru li maaʼusilal tkʼubʼamanq chaawix, inkʼaʼ t-elq chiʼubʼej»? (Is. 54:17, TNM).

Naru naqakʼojobʼ qachʼool naq li Yos tooxkol chiru yalaq kʼaru li maaʼusilal li chanchan li kaqsut-iqʼ li nekeʼxkʼubʼ «li josqʼ aj poyanam» (Is. 25:4, 5). Ebʼ li xikʼ nekeʼilok qe maajunwa teʼruuq qarahobʼtesinkil chi junelik (w19.01, perel 6, 7).

Chanru nakʼutunk li xtiikilal li Yos rikʼin li kixbʼaanu rehebʼ laj Canaan ut ebʼ laj Israel li xeʼxqʼet ribʼ chiru?

Li Yos kixkʼehebʼ chi xtojbʼal xmaak li xeʼxyuʼami li tzʼiʼbʼeetalil naʼlebʼ ut li xeʼxrahobʼtesi li ixq ut li kokʼal. Abʼan, kirosobʼtesihebʼ li keʼabʼink chiru ut keʼxyuʼami li tiikilal (w19.02, perel 22, 23).

Chanru toonaʼlebʼaq wi junaq li kristiʼaan li maawaʼ aj Testiiw natijok chiqu?

Tiik maakʼaʼ tqaye ut toowanq saʼ xyaalal, abʼan maajunwa tqaye «joʼkan taxaq» chi moko tqachap li ruqʼ ebʼ li junchʼol. Naru nokootijok saʼ qachʼool (w19.03, perel 31).

Toj bʼar nawulak li maaʼusilal naq nekeʼmuxeʼk ru li kokʼal?

Li muxuk kokʼal aʼan jun li nimla maak chiru li nakʼuluk re li rahilal, chiru li chʼuut, chiruhebʼ li nekeʼtaqlank saʼ li tenamit ut chiru li Yos. Saʼebʼ li naʼaj bʼarwiʼ li xchaqʼrabʼ li tenamit naxye naq teʼjiteʼq li nekeʼqʼabʼaak chi xmuxbʼalebʼ ru li kokʼal, ebʼ li cheekel winq nekeʼxpaabʼ aʼin (w19.05, perel 9, 10).

Chanru tooruuq xjalbʼal malaj xchaabʼilobʼresinkil li wank saʼ xchamal li qaanm ut li qakʼaʼuxl?

Tento tqabʼaanu oxibʼ li naʼlebʼ li wank xwankil: tijok chiru li Jehobʼa, xkʼoxlankil rix li naʼlebʼ re naq tooruuq xtzʼilbʼal rix li wank saʼ xchamal li qachʼool ut xsikʼbʼal chiʼus ebʼ li qamiiw (w19.06, perel 11).

Kʼaru tooruuq xbʼaanunkil re xkawresinkil qibʼ anaqwan choʼq re li rahobʼtesiik?

Tento naq tqakawresi li qawanjik rikʼin li Jehobʼa, kʼojkʼooq qachʼool naq nokooxra ut naq maajunwa tooxkanabʼ, rilbʼal xsaʼ li Santil Hu wulaj wulaj ut rajlal chootijoq. Tento naq tqapaabʼ chi anchal qachʼool naq ttzʼaqloq ru li osobʼtesink li tixkʼam chaq li Xʼawabʼejilal li Yos ut chikanaaq saʼ li qachʼool ebʼ li xraqal li Santil Hu li nawulak chiqu ut ebʼ li bʼich re xnimankil ru li Jehobʼa (w19.07, perel 2-4).

Kʼaru tooruuq xbʼaanunkil re xtenqʼankilebʼ li qakomon re naq teʼkoleʼq?

Aajel ru naq tqakʼutbʼesi li tawok u, naq tqakanabʼ naq li qanaʼlebʼ t-aatinaq chiqix ut naq wanq qakuyum ut tuulanaqo (w19.08, perel 15-17).

Joʼ naxyeechiʼi Mateo 11:28, chanru naxkʼojobʼ malaj naxkʼe xtuqtuukil qachʼool li Jesus?

Li nekeʼjolomink qe kʼajoʼ naq nokooʼeʼxra, jwal chaabʼilebʼ li qechkʼanjel ut qʼaxal chaabʼil li kʼanjel li naqabʼaanu (w19.09, perel 23).

Chanru tixbʼaanu li Yos re naq t-alaaq saʼ qachʼool kʼanjelak ut chanru tixkʼe qe li wankilal re xbʼaanunkil? (Filip. 2:13, Wy).

Naq naqil xsaʼ li Santil Hu ut naqakʼoxla rix li naqatzol, li Yos nokooxkawresi re naq t-alaaq saʼ li qachʼool xbʼaanunkil li rajom ut naxkʼe qe li wankilal re xbʼaanunkil. Li xsantil musiqʼej naru naxchaabʼilobʼresi ru li xseebʼal qachʼool (w19.10, perel 21).

Kʼaru tento tqabʼaanu naq tqaj xbʼaanunkil junaq li naʼlebʼ li wank xwankil?

Wank oobʼ li naʼlebʼ: xtzʼilbʼal rix chiʼus li tqabʼaanu, xpatzʼbʼal re li Yos li choxahil naʼlebʼ, xtzʼilbʼal rix li naʼekʼasink qe, chʼolchʼooq chiqu li tqaj xbʼaanunkil ut chʼolchʼooq chiqu li wank saʼ quqʼ xbʼaanunkil (w19.11, perel 27-29).

Naq laj Tza kiʼaatinak rikʼin li xʼEva, ma aran kitiklaak chaq li naʼlebʼ li naxye naq toj wank nakanaak chi yoʼyo naq nakamk junaq li kristiʼaan?

Chanchan tawiʼ naq inkʼaʼ. Laj Tza moko kixye ta re li xʼEva naq kaʼajwiʼ tkamq li xtibʼel ut naq li xmusiqʼ tkanaaq chi yoʼyo saʼ jalan chik naʼajej. Li kʼaru bʼan kixye re li xʼEva aʼan naq maahoon maawulaj tkamq. Chixjunil li xnaʼlebʼ li bʼalaqʼil paabʼal xsachmank ru saʼ li Bʼutʼihaʼ. Li naʼlebʼ li naxye naq toj wank nakanaak chi yoʼyo naq nakamk junaq li poyanam kitiklaak tana naq li Yos kixchaʼchaʼi ebʼ li kristiʼaan saʼ chixjunil li Ruuchichʼochʼ li yookebʼ chaq xkabʼlankil li nimla ochoch Babel (w19.12, perel 15).