EQʼLA saʼ li kutan Miercoles 24 re Enero 2018, kikʼemank jun li esil rehebʼ li wankebʼ saʼ Betel re Estados Unidos ut Canada: kixaqabʼaak li qechpaabʼanel Kenneth Cook, alalbʼej, saʼ xyanq li Nekeʼjolomink re Xmolam ebʼ laj Testiiw re li Jehobʼa.

Li hermaan Cook kiyoʼlaak ut kikʼiik Pensilvania (Estados Unidos). Naq ok re xkʼulbʼal ribʼ saʼ li tzolebʼaal jun li rechtzolom kixkʼut chiru li yaal ut kikubʼeek xhaʼ saʼ 7 re Junio 1980. Kixtikibʼ kʼanjelak joʼ aj kʼamolbʼe saʼ li puktesink re 70 hoonal saʼ 1 re Septiembre 1982. Wiibʼ chihabʼ chirix aʼin, keʼxbʼoq chi kʼanjelak saʼ Betel. Kixtikibʼ kʼanjelak saʼ Wallkill (Nueva York) saʼ li 12 re Octubre 1984.

Chirix chik aʼan, chiru 25 chihabʼ li qahermaan Cook kiwank jalan jalanq xkʼanjel, saʼ li naʼaj bʼarwiʼ nekeʼrisi chi huhil ebʼ li hu joʼ ajwiʼ saʼ li Ofisiin re Betel. Saʼ 1996, kisumlaak rikʼin li xJamie, jun li qechpaabʼanel, ut kiʼok chi kʼanjelak rochbʼen saʼ Wallkill. Saʼ Diciembre 2009, keʼtaqlaak saʼ li nimla tzolebʼaal Watchtower li wank Patterson, aran kikʼeheʼk xkʼanjel saʼ li ofisiin bʼarwiʼ nekeʼxsume li patzʼom ut nekeʼxtuqubʼ ru ebʼ li chʼaʼajkilal li nakʼulmank saʼebʼ li chʼuut. Saʼ Abril 2016, naq xeʼsutqʼiik wiibʼ oxibʼ kutan saʼ Wallkill, ebʼ li qahermaan Cook keʼtaqlaak Brooklyn. Ut, oobʼ po chik chirix aʼin xeʼtaqlaak saʼ li nimla molam li wank Warwick. Saʼ Enero 2017, kixaqabʼaak li qechpaabʼanel Cook joʼ jun rehebʼ li natenqʼank saʼ li chʼuut li naxkʼubʼ li naʼlebʼ re li Nekeʼjolomink re Xmolam li Jehobʼa.