Laj Rehoboam ralal laj Salomon, kiwank choʼq awabʼej re Israel chiru 40 chihabʼ (1 Rey. 11:42). Naq kikamk laj Salomon, saʼ li chihabʼ 997 naq toj maajiʼ nachalk li Jesus saʼ Ruuchichʼochʼ, laj Rehoboam xkoho Siquem, saʼ relebʼl iqʼ re Jerusalen, re naq txaqabʼaaq choʼq awabʼej (2 Cron. 10:1). Ma kiʼok tawiʼ xkʼaʼuxl saʼ xkʼabʼaʼ naq wank saʼ xnaʼaj li xyuwaʼ, li nawbʼil ru xbʼaan li xnimal ru xnaʼlebʼ? Maajunwa kixkʼoxla naq yook chaq chi nachʼok xkutankil naq tixkʼutbʼesi ma wank xnaʼlebʼ re xtuqubʼankil ebʼ li nimla chʼaʼajkilal.

Naq laj Rehoboam kixnaʼaji li kʼojaribʼaal, kixtaw tana naabʼal li chʼaʼajkilal saʼ li tenamit Israel. Moqon chik, wiibʼ oxibʼ rehebʼ li wankebʼ xwankil saʼ li tenamit keʼxseeraqʼi re li xkʼaʼuxebʼ wiʼ xchʼool: «Laayuwaʼ kaw kooxtaqla chi kʼanjelak: kotz bʼayaq li kawil kʼanjel saʼ qabʼeen anaqwan ut li iiq kixtenebʼ laayuwaʼ saʼ qabʼeen, ut laaʼo tookʼanjelaq chawu» (2 Cron. 10:3, 4).

Maare laj Rehoboam inkʼaʼ chik naxtaw kʼaru tixbʼaanu. Wi tixbʼaanu li yook chi yeemank re ut tixkubʼsi bʼayaq xminbʼal ru li tenamit, li xjunkabʼal, ut li wankebʼ saʼ li xʼawabʼejilal tento raj teʼxkanabʼ wank saʼ bʼihomal. Abʼan, wi inkʼaʼ tixkʼulubʼa, ebʼ li poyanam naru nekeʼok xqʼetbʼal ribʼ. Kʼaru kixbʼaanu? Xbʼeenwa, kixpatzʼ xnaʼlebʼ rehebʼ li cheekel winq li keʼkʼehok re xnaʼlebʼ laj Salomon. Chirix chik aʼan, kixpatzʼ xnaʼlebʼ rehebʼ li winq li juntaqʼeetebʼ xchihabʼ rikʼin, li keʼyehok re, naq kaw ttaqlanq saʼ xbʼeen li tenamit, ut kixpaabʼ rehebʼ. Joʼkan naq, kixye: «Wi linyuwaʼ kaw xexkʼe chi kʼanjelak, laaʼin qʼaxal wiʼ chik kaw tintaqlanq saʼ eebʼeen; ut wi linyuwaʼ chi tzʼuum xeʼxsakʼ, laaʼin texinsakʼ rikʼin tzʼuum wank chʼiichʼ chi ruʼuj» (2 Cron. 10:6-14).

Kʼaru naqatzol? Naqatzol naq tento tqapaabʼebʼ li numenaqebʼ xchihabʼ chiqu ut kawebʼ saʼebʼ li xpaabʼal. Saʼ xkʼabʼaʼ naq wankebʼ xnaʼlebʼ teʼruuq xkʼebʼal reetal ebʼ li chʼaʼajkilal li tchalq naq inkʼaʼ us toonaʼlebʼaq ut teʼruuq xyeebʼal qe kʼaru tqabʼaanu (Job 12:12).

Re xchupbʼal ru li chʼaʼajkilal, laj Rehoboam kixchʼutubʼ ebʼ laj puubʼ, abʼan li Jehobʼa kiʼokenk ut kiroksi li Propeet Semaya re raatinankilebʼ: «Mexxik chi yalok rikʼinebʼ laj Israel leerech tenamitul. Sutqʼinqex bʼan chejunjunqal saʼ leerochoch, xbʼaan naq li kʼaru xkʼulmank, laaʼin xinkʼuubʼank re» (1 Rey. 12:21-24). *

Ma kixkanabʼ chi joʼkan laj Rehoboam? Yal kʼoxla kʼajoʼ tana kichalk xjosqʼil. Kʼaru raj teʼxkʼoxla ebʼ li poyanam chirix li awabʼej li kixyeechiʼi xrahobʼtesinkilebʼ «rikʼin tzʼuum wank chʼiichʼ chi ruʼuj», abʼan naxkanabʼ naq teʼxqʼet ribʼ? (Juntaqʼeeta rikʼin 2 Cronicas 13:7). Usta joʼkan, li awabʼej ut ebʼ laj puubʼ «keʼrabʼi li raatin li qaawaʼ, keʼxpaabʼ ut keʼsutqʼiik saʼ rochochebʼ, joʼ kiyeheʼk rehebʼ xbʼaan li Qaawaʼ».

Kʼaru naxkʼut chiqu aʼin? Jwal chaabʼil naq tooʼabʼinq chiru li Yos usta ebʼ li junchʼol tooʼeʼxseʼe. Wi joʼkan tqabʼaanu, tqakʼul rusilal ut rosobʼtesihom li Jehobʼa (Deut. 28:2).

Joʼkan kixkʼul laj Rehoboam. Kiʼabʼink ut inkʼaʼ kiyalok rikʼin li akʼ tenamit. Kixkʼe bʼan xchʼool chi xkawresinkil wiibʼ oxibʼ li tenamit ut toj kixkabʼla wiibʼ oxibʼ chik saʼebʼ li teep bʼarwiʼ yook chi jolomink: Juda ut Benjamin (2 Cron. 11:5-12). Ut li jwal chaabʼil chiru aʼin, naq kixpaabʼ chaq li xchaqʼrabʼ li Jehobʼa chiru jarubʼaq chihabʼ. Usta li awabʼejilal li wank saʼ relebʼl iqʼ, li naxjolomi laj Jeroboan, kitʼaneʼk saʼ maak naq kiʼok xloqʼoninkil li jalanil yos, naabʼal rehebʼ li poyanam li wankebʼ rubʼel li xʼawabʼejilal xkohebʼ Jerusalen chi tzʼaqonk chirix laj Rehoboam ut chirix li tzʼaqal loqʼonink (2 Cron. 11:16, 17). Joʼkan bʼiʼ, saʼ xkʼabʼaʼ naq laj Rehoboam kiʼabʼink, kikawuuk li xʼawabʼejilal.

Abʼanan, naq li xʼawabʼejilal kikʼojlaak chiʼus, laj Rehoboam kixbʼaanu jun li naʼlebʼ li inkʼaʼ naʼoybʼenimank. Kixkanabʼ xpaabʼankil li xchaqʼrabʼ li Jehobʼa ut kiʼok xloqʼoninkil ebʼ li jalanil yos. Abʼan, kʼaʼut kixbʼaanu? Ma kixkanabʼ naq li xnaʼ, aj Amon xtenamit, ttakchiʼinq re? (1 Rey. 14:21). Maakʼaʼ naxye kʼaʼut kixbʼaanu, abʼan chixjunil li tenamit kixkʼam re rikʼin li xyiibʼ aj naʼlebʼ. Joʼkan naq, li Jehobʼa kixkanabʼ naq laj Sisaq, awabʼej re Egipto trechani naabʼal rehebʼ li tenamit re Juda, usta laj Rehoboam kikawresink re (1 Rey. 14:22-24; 2 Cron. 12:1-4).

Jwal kinimank ru aʼin naq laj Sisaq kiwulak Jerusalen, bʼarwiʼ yook chaq chi awabʼejink laj Rehoboam. Saʼ li hoonal aʼan, li propeet Semaya kixkʼe re laj Rehoboam ut ebʼ laj jolominel tenamit, jun li esil li kixye chaq li Jehobʼa: «Laaʼex xineetzʼeqtaana, joʼkan naq laaʼin texinkanabʼ saʼ ruqʼ laj Sosak». Chanru kinaʼlebʼak laj Rehoboam naq kiqʼuseʼk xbʼaan li Jehobʼa? Laj Rehoboam kixkʼulubʼa li xqʼusbʼal. Li Santil Hu naxye: «Li awabʼej rochbʼeenebʼ li xjolomilebʼ laj Israel keʼxkubʼsi xwankilebʼ ut keʼxye: “Tiik xchʼool li Qaawaʼ”». Joʼkan naq, li Jehobʼa kixkol laj Rehoboam ut inkʼaʼ kixkanabʼ naq tsachmanq li tenamit Jerusalen (2 Cron. 12:5-7, 12).

Naq ak xnumeʼk aʼin, laj Rehoboam inkʼaʼ kixkanabʼ jolomink saʼ li wiibʼ chi teep li wank saʼ relebʼl iqʼ. Naq toj maajiʼ nakamk, kirusila chixjunil li ralal xkʼajol ut kixkʼe naabʼal xmaatanebʼ, maare re naq ebʼ li ras ut ebʼ li riitzʼin laj Abias inkʼaʼ teʼxqʼet ribʼ chiru naq moqon chik tkanaaq choʼq awabʼej (2 Cron. 11:21-23). Naq kinaʼlebʼak chi joʼkan, kixkʼutbʼesi bʼayaq xnaʼlebʼ li inkʼaʼ kixkʼutbʼesi chaq junxil.

Usta laj Rehoboam kixbʼaanu li chaabʼil naʼlebʼ, inkʼaʼ kixtaw rusilal chiru li Yos. Li Santil Hu naxye: «Kixbʼaanu li inkʼaʼ nawulak chiru li Qaawaʼ». Kʼaʼut nayeemank aʼin chirix li xʼawabʼejilal? Xbʼaan naq inkʼaʼ kixsikʼ li Jehobʼa chi anchal xchʼool (2 Cron. 12:14).

Us naq toonaʼlebʼaq chirix aʼin: usta wank sut laj Rehoboam kiʼabʼink chiru li Yos ut kixbʼaanu li us choʼq re li xtenamit, maajunwa kiwank chiʼus saʼ amiiwil rikʼin li Jehobʼa chi moko kixrahi ru xsahobʼresinkil xchʼool. Joʼkan naq, inkʼaʼ kinaʼlebʼak  chiʼus ut kixloqʼoni ru ebʼ li jalanil yos. Ma xkʼulubʼa laj Rehoboam li xqʼusbʼal rikʼin li Jehobʼa xbʼaan naq yaal naq xyotʼ xchʼool ut kiraj xsahobʼresinkil xchʼool li Yos, malaj jalanebʼ chik keʼyehok re, li tixbʼaanu? (2 Cron. 11:3, 4; 12:6). Moqon chik, laj Rehoboam kixbʼaanu wiʼ chik li inkʼaʼ us. Laj David li xyuwaʼchin jalan chiru aʼan! Yaal naq laj David kimaakobʼk, abʼan junelik kixra li Jehobʼa, kixkol rix li tzʼaqal loqʼonink ut xyotʼ xchʼool ut xjal xnaʼlebʼ (1 Rey. 14:8; Sal. 51:3, 19; 63:2).

Li kixkʼul chaq laj Rehoboam naxkʼut chiqu jun li chaabʼil naʼlebʼ. Re xtawbʼal rusilal li Yos, moko tzʼaqal ta rikʼin xwenteninkil li qajunkabʼal chi moko xyalbʼal qaqʼe chirix wiibʼ oxibʼ li kʼanjel, li wank tzʼaqal wankil aʼan xkʼebʼal xbʼeenwa li tzʼaqal loqʼonink.

Tooruuq xbʼaanunkil aʼin wi maajunwa tqakanabʼ li xnimal ru li qarahom li naqekʼa chirix li Jehobʼa. Joʼ naqabʼaanu naq naqakʼe xsiʼul li xaml re naq inkʼaʼ tchupq, joʼkan ajwiʼ tqabʼaanu re naq inkʼaʼ tchupq li qarahom chirix li Jehobʼa, tento tqil li Raatin rajlal kutan, tqakʼoxla rix li naxye ut junelik tootijoq (Sal. 1:2; Rom. 12:12). Joʼkan ajwiʼ, li qarahom chirix li Jehobʼa toorekʼasi chi xbʼaanunkil li nawulak chiru. Ut, wi nokoomaakobʼk, li rahok aʼin tixbʼaanu naq tqayotʼ qachʼool ut tqajal qanaʼlebʼ. Laaʼo moko chanchano ta laj Rehoboam, laaʼo maajunwa tqatzʼeqtaana li Jehobʼa (Jud. 20, 21).