Wiibʼ oxibʼ aj Leví li maawaʼebʼ chaq aj tij, xeʼxbʼaanu jalan jalanq li kʼanjel saʼ li rochoch li Yos, joʼ wank choʼq polisiiy. Li nataqlank chaq saʼ xbʼeenebʼ aʼan li wank choʼq kaporal saʼ li rochoch li Yos. Laj Filón jun aj tzʼiibʼanel li nachalk Israel, kixchʼolobʼ kʼaru chaq xkʼanjelebʼ: «Wankebʼ nekeʼxkʼe ribʼ chiru li rokebʼaal li ochoch re xkʼaakʼalenkil; jun siir chik wankebʼ chisaʼ li ochoch, chiru li loqʼlaj naʼajej, re naq chi joʼkan junaq li kristiʼaan li moko xkʼulubʼ ta ok aran, inkʼaʼ tixchʼik ribʼ saʼ li naʼajej aweʼ chi traj malaj inkʼaʼ traj xchʼool; jalanebʼ chik nekeʼxbʼeni rix li xtzʼakil li ochoch chi qʼeq ut chi kutan, aʼ yaal chanru nakanaak li xkʼanjelebʼ naq nekeʼxbʼuli rix».

Ebʼ li polisiiy aʼin nekeʼkʼanjelak chaq chiruhebʼ li xninqal ru aj raqol aatin saʼ xbʼeenebʼ laj Judiiy. Kaʼajwiʼ li chʼuut chi polisiiy aweʼ kʼebʼilebʼ chaq xleseens xbʼaan ebʼ laj Roma re roksinkil li qʼesnal chʼiichʼ.

Laj Joachim Jeremias jun li winq li naxtzʼil rix li Santil Hu, naxchʼolobʼ: «Naq ebʼ li polisiiy xeʼxchap li Jesús, aʼan kixpatzʼ rehebʼ kʼaʼut naq inkʼaʼ xeʼxchap naq yook chaq chi kʼutuk chire li rochoch li Yos». Li Jesús inkʼaʼ raj kixpatzʼ aʼin «wi traj ebʼ li xeʼchapok re, maawaʼebʼ raj li polisiiy li wankebʼ chaq saʼ li rochoch li Yos» (Mat. 26:55). Naxye ajwiʼ laj Joachim Jeremias naq li xeʼxyal xchapbʼal li Jesús saʼ jun kutan aʼanebʼ ajwiʼ li polisiiy li wankebʼ chaq saʼ li rochoch li Yos (Juan 7:32, 45, 46). Moqon chik, li kaporal ut ebʼ laj kʼanjel chiru xeʼtaqlaak chi xchapbʼal ebʼ li xtzolom li Jesus re xkʼambʼalebʼ chiru ebʼ li xninqal ru aj raqol aatin saʼ xbʼeenebʼ laj Judiiy. Maare aʼanebʼ ajwiʼ li polisiiy aʼin xeʼjukukink re laj Pablo chirix li rochoch li Yos (Hech. 4:1-3; 5:17-27; 21:27-30).