SAʼ LI qʼe kutan, li moosej li najolomink naril li rochoch malaj li xjunkabʼlal junaq chik kristiʼaan.

Naq laj Jose, jun rehebʼ li ralal xkʼajol laj Jacob, kiwank chaq choʼq moos saʼ li tenamit Egipto, laj echal re kixkʼe chi xjolominkil li rochoch. Relik chi yaal, li winq aʼin aj Ejiipt «joʼchʼinal joʼnimal li wank re» kixqʼaxtesi «saʼ ruqʼ laj José» (Gen. 39:2-6). Moqon, naq laj Jose kiwank joʼ jun xnimal ru awabʼej re li tenamit Egipto, kiwank ajwiʼ ani kijolomink chaq re li rochoch (Gen. 44:4).

Saʼ xkutankil li Jesus, ebʼ laj echal naʼaj nekeʼwank saʼ xjolomil li tenamit. Joʼkan naq nekeʼxxaqabʼ aj jolominel re rilbʼal li kʼanjel li teʼxbʼaanu ebʼ li moos rajlal kutan.

Chanruhaq raj xnaʼlebʼ li moosej li najolomink? Laj Columela, jun aj tzʼiibʼ re Roma li kiwank chaq saʼ xkutankilebʼ li Apostol, kixye naq li moos li txaqabʼaaq chaq choʼq kaporal malaj choʼq aj jolominel tento naq tixkʼutbʼesi naq wank xnawom chirix li kʼanjel aʼin. Tento naq «tixyuʼami li chaabʼil naʼlebʼ re naq inkʼaʼ ttaqlanq chi moko saʼ qʼunil chi moko saʼ kawilal». Laj Columela kixye ajwiʼ: «Li xbʼeen xbʼeen li naʼajmank chirix li qakaporal aʼan naq inkʼaʼ tixkʼoxla naq naxnaw li maajunwa rabʼihom ut tixyal xqʼe chi xtzolbʼal li kʼaru inkʼaʼ naxnaw».

Li Raatin li Yos naroksi jun eetalil chirix li moosej li najolomink re xchʼolobʼankil li junjunq chi kʼanjel li nabʼaanumank saʼ li xtenamit li Yos. Jun eetalil, li Apostol Pedro naxwaklesi xchʼool ebʼ laj paabʼanel re naq teʼroksi li xseebʼalebʼ kʼebʼil xbʼaan li Yos re kʼanjelak joʼ «chaabʼil aj kʼanjelahom re li rusilal li Yos» (1 Ped. 4:10).

Li Jesus kiroksi ajwiʼ li eetalil chirix li moosej li najolomink naq kixchʼolobʼ li jaljookil ru aatin li natawmank saʼ Lucas 16:1-8. Joʼkan ajwiʼ, saʼ li propesiiy li naʼaatinak chirix naq ak wanq chik choʼq Awabʼej, li Jesus kixyeechiʼi rehebʼ li xtzolom naq tixxaqabʼ «laj kʼanjel chaabʼil ut wank xnaʼlebʼ» malaj «li moosej tiik xchʼool ut wank xnaʼlebʼ». Li kʼanjel li wank tzʼaqal xwankil choʼq re li moosej tiik xchʼool ut wank xnaʼlebʼ, aʼan xkʼebʼal rehebʼ laj paabʼanel chixjunil li naʼlebʼ li naʼajmank saʼebʼ li xpaabʼal saʼ rosoʼjikebʼ li kutan (Mat. 24:45-47, Wy; Luc. 12:42). Naqabʼanyoxi naq naqakʼul ebʼ li tasal hu li naxkʼubʼ ut naxjekʼi saʼ chixjunil li Ruuchichʼochʼ li moosej tiik xchʼool ut wank xnaʼlebʼ re xkawresinkil li qapaabʼal.