Ra xyeebʼal, abʼan naq wank tana 13 chihabʼ we xinnajtoʼk rikʼin li Jehobʼa. Ninkʼoxla naq ebʼ li wechtzolom nekeʼruuk xbʼaanunkil chixjunil li nekeʼraj, ut joʼkan raj ajwiʼ nawaj wank laaʼin. Xinkʼoxla naq li nekeʼxtenebʼ saʼ inbʼeen linnaʼ linyuwaʼ ut li naxye li Santil Hu tik maakʼaʼ nikinxkanabʼ xbʼaanunkil, ut chanchan tawiʼ naq jun nimla iiq xloqʼoninkil ru li Jehobʼa. Usta junelik xinpaabʼ naq wank li Jehobʼa, abʼan xinkanabʼ wank choʼq ramiiw.

Maajunwa xinkanabʼ xik saʼebʼ li chʼutam chi moko saʼ li puktesink, abʼan joqʼeqil ninbʼaanu yal re, naq teʼril naq wankin aran. Naq ninxik chi puktesink maajunwa ninkawresi wibʼ, joʼkan naq inkʼaʼ ninnaw chanru xtikibʼankil aatinak malaj seeraqʼik rikʼinebʼ li kristiʼaan. Saʼ xkʼabʼaʼ aʼin, maaʼani nawulaʼani wiʼ chik chi moko wank junaq intzolom, joʼkan naq maakʼaʼ chik nawaj xnawbʼal chirix li xkʼanjel li Yos. Xinkʼoxla: «Chan put ru naq junaq li hermaan naxkuy xbʼaanunkil aʼin rajlal xamaan ut rajlal po?».

Naq wank 17 chihabʼ we, nawaj naq maaʼani chik ttaqlanq we. Joʼkan naq xinchap linmaleet ut  xkohin Australia. Xeʼok xkʼaʼuxl linnaʼ linyuwaʼ, abʼan xeʼxkʼoxla naq saʼ li tenamit aʼan inkʼaʼ tinkanabʼ kʼanjelak chiru li Jehobʼa.

Aran Australia tik maakʼaʼ chik rusil linpaabʼal. Naabʼal sut xinkol ebʼ li chʼutam ut nawochbʼeni ebʼ li saaj li nekeʼnaʼlebʼak joʼ laaʼin, nokoowulak saʼebʼ li chʼutam ut wulajaq nokooxik chi ukʼak ut chi xajok. Anaqwan ninkʼe reetal naq saʼ li hoonal aʼan nawaj wank saʼ li yaal ut saʼ li ruuchichʼochʼ, abʼan maabʼar sa nawekʼa wibʼ.

Naq ak xnumeʼk wiibʼ chihabʼ, xinnaw ru jun li hermaan ixq li kixkʼut chiwu jun chaabʼil naʼlebʼ, usta aʼan inkʼaʼ kixkʼe reetal, xinxtenqʼa chi xkʼoxlankil kʼaru yookin xbʼaanunkil saʼ linyuʼam. Waqibʼo chaq chi ixq li wanko qajunes ut yooko chi wank saʼ jun ajwiʼ chi ochoch. Ut xqakʼe rochochnal li cheekel winq li naʼulaʼanink chʼuut rochbʼen li xTamara li rixaqil. Naq li cheekel winq naril li naʼajmank saʼ li chʼuut, li xTamara nakanaak qikʼin ut chajchoʼ qe chi seʼek. Ut aʼin makachʼin kiwulak chiwu! Maajunwa xinkʼoxla naq junaq li hermaan li kaw nakʼanjelak chiru li Yos nawulak ajwiʼ chiru bʼatzʼunk ut wank saʼ komonil rikʼinebʼ li junchʼol.

Li xTamara qʼaxal naxra li yaal ut kʼanjelak chiru li Yos, ut aʼin kirekʼasi linchʼool. Li xTamara qʼaxal sa saʼ xchʼool naq naxyal xqʼe chi kʼanjelak chiru li Jehobʼa, ut laaʼin inkʼaʼ sa nawekʼa wibʼ xbʼaan naq inkʼaʼ ninyal inqʼe. Junelik ninjultika li xchaabʼil naʼlebʼ ut li xsahil xchʼool. Li kixbʼaanu kixjultika chiwu jun li xnimal ru naʼlebʼ: li Jehobʼa naraj naq tookʼanjelaq chiru chi qʼaxal sa ut chi anchal qachʼool (Sal. 100:2, Wy).

Nawaj raj naq sahaq saʼ linchʼool joʼ li xTamara, abʼan re xbʼaanunkil aʼin tento raj tinjal wiibʼ oxibʼ li naʼlebʼ saʼ linyuʼam. Naabʼal li hoonal kiʼajmank chiwu, abʼan chi chʼinqil xinʼok xbʼaanunkil. Xinʼok xkawresinkil wibʼ re xbʼaanunkil li xkʼanjel li Yos ut joqʼehaq ninbʼaanu 30 malaj 50 hoor saʼ li puktesink. Aʼin xinxtenqʼa re naq inkʼaʼ chik tinxuwaq ut re naq sa twekʼa wibʼ. Xbʼaan naq rajlal nawoksi li Santil  Hu saʼ li puktesink, qʼaxal sa saʼ linchʼool. Joʼkan naq inkʼaʼ xinbʼayk chi xbʼaanunkil rajlal po 50 hoor saʼ li puktesink.

Xinʼok chi wank saʼ amiiwil rikʼinebʼ li hermaan li kawebʼ xpaabʼal ut sahebʼ saʼ xchʼool chi kʼanjelak chiru li Jehobʼa maakʼaʼ naxye li xchihabʼebʼ. Li xbʼaanuhomebʼ xinxtenqʼa chi rilbʼal kʼaru ninkʼe chiʼubʼej saʼ linyuʼam ut re naq rajlal kutan tinkʼe inchʼool chi rilbʼal xsaʼ li Santil Hu. Xintaw wiʼ chik xsahil inchʼool saʼ li puktesink, joʼkan naq xinʼok xbʼaanunkil 70 hoor. Najter chik inkʼaʼ nawekʼa li sahil chʼoolejil li yookin rekʼankil anaqwan saʼ li chʼuut.

Jun chihabʼ chirix aʼan, xinnaw ru laj Alex jun li chaabʼil hermaan li naxra li Jehobʼa ut sa saʼ xchʼool chi kʼanjelak chiru. Aj tenqʼanel chaq saʼ li chʼuut ut 6 chihabʼ rokik joʼ aj kʼamolbʼe saʼ li puktesink. Chiru wiibʼ oxibʼ po kipuktesink ajwiʼ saʼ li tenamit Malaui, bʼarwiʼ naʼajmank chaq aj puktesinel. Aran kixnaw ruhebʼ ut kirochbʼenihebʼ wiibʼ oxibʼ li hermaan li taqlanbʼilebʼ chi puktesink saʼ jalan chik tenamit li xeʼxkʼe re jun chaabʼil eetalil ut xeʼxwaklesi xchʼool re naq junelik tixkʼe chiʼubʼej saʼ li xyuʼam li Xʼawabʼejihom li Yos.

Saʼ li chihabʼ 2003 xoosumlaak ut qakabʼichal naqakʼe chixjunil li qahoonal saʼ xkʼanjel li Yos. Xqatzol naabʼal li chaabʼil naʼlebʼ ut kʼajoʼ naq xoorosobʼtesi li Jehobʼa.

Saʼ li chihabʼ 2009 xooʼeʼxtaqla chi puktesink saʼ li tenamit Timor Oriental, li wank chixkʼatq Indonesia. Naq xqanaw aʼin, xsach ut xsahoʼk qachʼool, ut xooxuwak ajwiʼ. Oobʼ po chirix aʼan xoowulak Dili, li xjolomil li tenamit.

Toj xqatzol wank rikʼinebʼ xbʼaan naq jalan li xnaʼlebʼebʼ, li raatinobʼaalebʼ, li xtzekemqebʼ ut li xwanjikebʼ. Naq nokoopuktesink, rajlal naqataw ebʼ li kristiʼaan li nebʼaʼebʼ, li maakʼaʼebʼ xtzolbʼal ut li nekeʼrahobʼtesiik. Ut xqanaw ajwiʼ ruhebʼ li kristiʼaan li ra xeʼkanaak saʼ li xchʼool ut li ra xeʼkanaak  saʼ li xjunxaqalil xbʼaan li yalok u ut li maaʼusilal. *

Kʼajoʼ rusilal li puktesink Timor Oriental! Jun eetalil, saʼ jun kutan xintaw li xMaría li wank 13 chihabʼ re ut qʼaxal ra saʼ xchʼool. * Wiibʼ oxibʼ chihabʼ chik xkamik li xnaʼ, ut joqʼeqil ajwiʼ naril ru li xyuwaʼ. Joʼ nekeʼxkʼul naabʼalebʼ li kokʼal li juntaqʼeetebʼ xchihabʼ rikʼin li xMaría, inkʼaʼ naxnaw kʼaru xbʼaanunkil saʼ li xyuʼam. Jultik we naq saʼ jun kutan tyaabʼaq naq kixseeraqʼi we chanru narekʼa ribʼ. Abʼan laaʼin inkʼaʼ nintaw ru chiʼus li naxye we xbʼaan naq toj maajiʼ ninʼaatinak chiʼus saʼ li raatinobʼaal. Joʼkan naq xintijok ut xintzʼaama intenqʼankil re li Jehobʼa re naq tinruuq xwaklesinkil xchʼool. Tojaʼ naq xinyaabʼasi re wiibʼ oxibʼ xraqal li Santil Hu re xkʼojobʼankil xchʼool. Saʼ xnumikebʼ li chihabʼ xwil chanru naq li yaal kixjal li xnaʼlebʼ, li xwanjik ut li xyuʼam. Ak xkubʼeek xhaʼ li xMaría ut anaqwan naxtzolebʼ li kristiʼaan chirix li Santil Hu. Anaqwan ebʼ li rechpaabʼanel wankebʼ choʼq xjunkabʼal ut sa narekʼa ribʼ rikʼinebʼ.

Chʼolchʼo naq li Jehobʼa yook rosobʼtesinkil li puktesink aran Timor Oriental. Usta li xkʼihalil ebʼ laj puktesinel moko ak naabʼal chihabʼ ta rokikebʼ joʼ aj Testiiw, naabʼalebʼ wankebʼ joʼ aj kʼamolbʼe saʼ li puktesink, aj tenqʼanel saʼ li chʼuut malaj joʼ cheekel winq. Jalanebʼ chik nekeʼkʼanjelak saʼ li ochoch bʼarwiʼ najalmank ebʼ li qahu saʼ jalan jalanq chi aatinobʼaal re li tenamit aʼan. Makachʼin nasahoʼk saʼ inchʼool rabʼinkil naq nekeʼbʼichank saʼ li chʼutam, chanru nekeʼseʼek ut nekeʼkʼiik saʼ li xpaabʼal.

Jalan li wank Timor Oriental chiru li wank Australia. Abʼan maabʼar raj chik qʼaxal kisahoʼk saʼ inchʼool. Wank sut nokooxik saʼ jun li bʼelebʼaal chʼiichʼ li nujenaq chi kristiʼaan li xeʼwulak saʼ kʼayil chi xloqʼbʼal li chaqikar ut naabʼal li xeʼpim (verdura). Wank sut naqatzolebʼ chaq li kristiʼaan chirix li Santil Hu saʼebʼ li kokʼ ochoch bʼarwiʼ jwal tiq, chʼochʼ ru ut nekeʼyakʼyot chi numeʼk li xan kaxlan. Usta chʼaʼaj bʼayaq aʼin, naabʼal sut xinkʼoxla: «Kʼajoʼ xchʼinaʼusal wank arin!».

Naq ninkʼoxla rix li xinkʼul ut xinbʼaanu chaq saʼ linyuʼam, qʼaxal oxloqʼ chiwu naq linnaʼ linyuwaʼ xeʼxkʼe xchʼool re naq tinnaw ru li Jehobʼa joʼwiʼ naq xineʼxtenqʼa saʼ linsaajilal naq inkʼaʼ sa chaq saʼ linchʼool chi kʼanjelak chiru li Jehobʼa. Xtzʼaqlok ru saʼ linyuʼam li naxye saʼ Proverbios 22:6. Makachʼin nekeʼsahoʼk saʼ xchʼool linnaʼ linyuwaʼ rikʼin laj Alex ut wikʼin ajwiʼ! Kʼajoʼ naq nekeʼsahoʼk saʼ xchʼool naq nekeʼril chanru li Jehobʼa nokooroksi saʼ li xkʼanjel! Chalen li chihabʼ 2016 naqulaʼani ebʼ li chʼuut li naril li qamolam re Australasia.

Inkʼaʼ ninpaabʼ naq junxil ninkʼoxla chaq naq jun nimla iiq kʼanjelak chiru li Jehobʼa, xbʼaan naq anaqwan, kʼajoʼ nawulak chiwu puktesink! Xinkʼe reetal naq li sahil chʼoolejil natawmank naq nokookʼanjelak chi anchal qachʼool chiru li Jehobʼa maakʼaʼ naxye kʼaru li chʼaʼajkilal tqanumsi saʼ li qayuʼam. Qʼaxal sa saʼ linchʼool chiru li 18 chihabʼ li ak xinnumsi chi kʼanjelak chiru li Jehobʼa rochbʼen laj Alex. Joʼkan peʼ naq laj David kixye re li Jehobʼa: «Cheʼsahoʼq saʼ xchʼool ebʼ li nekeʼmuhenk aawikʼin, chiwanq xnimal sahil chʼoolej chi junelik! [...], ut kʼajoʼ nekeʼsahoʼk saʼ xchʼool li nekeʼrahok aawe» (Sal. 5:12).