»Ebʼ laj Testiiw moko kaʼaj tawiʼ nekeʼxra li kristiʼaan, nekeʼxra ajwiʼ linkokʼ tzʼiʼ. Ut aran wank li xʼElaine, li kixkʼe bʼayaq xwa ebʼ linkokʼ tzʼiʼ. Chirix chik aʼan, rajlal naq nekeʼwisi chi bʼeek, nekeʼraj traj ak xeʼwulak “bʼarwiʼ nekeʼkʼeheʼk xwahebʼ”.

»Naq xeʼnumeʼk li po, ebʼ linkokʼ tzʼiʼ qʼaxal nekeʼsahoʼk saʼ xchʼool naq nekeʼkʼeheʼk xwahebʼ, ut sa ajwiʼ saʼ inchʼool naq ninʼaatinak rikʼinebʼ laj Testiiw. Abʼan moko ninkʼam ta wibʼ saʼ aamiiwil rikʼinebʼ. Ak numenaq 70 chihabʼ wank we ut inkʼaʼ mas ninnaw kʼaru nekeʼxpaabʼ ebʼ laj Testiiw. Xbʼaan naq ebʼ li paabʼal ak xeʼxchʼina inchʼool, joʼkan naq xinkʼoxla naq us naq tintzol li Santil Hu injunes.

»Xwil ajwiʼ ebʼ laj Testiiw rikʼin li kʼanjelobʼaal saʼ jalan jalanq li naʼajej. Sa nekeʼaatinak ut nekeʼxsume linpatzʼom rikʼin li Santil Hu, joʼkan naq xinʼok bʼayaq xpaabʼankil li nekeʼxye.

»Saʼ jun kutan, li xʼElaine kixye: “Ma nakaakʼoxla naq ebʼ li xul xmaatan li Yos?”. Xinye: “Relik chi yaal naq joʼkan”. Kixkʼut chiwu li naxye Isaías 11:6-9. Chalen aran, xwaj xnawbʼal xkomon li naʼlebʼ chirix li Santil Hu, abʼan toj maajiʼ naʼalaak saʼ inchʼool xkʼulbʼal ebʼ li tasal hu li nekeʼxyeechiʼi.

»Moqon xinʼok chi aatinak rikʼin li xʼElaine ut laj Brent, li xbʼeelom, usta junpaat ajwiʼ nokooʼaatinak, abʼan qʼaxal xwulak chiwu li nekeʼxye we. Xeʼxye ajwiʼ naq tinyaabʼasi Mateo toj Hechos re naq tinnaw chanru tinkʼam we rikʼin li Kriist. Joʼkan xinbʼaanu ut moqon xinkʼulubʼa xtzolbʼal li Santil Hu rikʼin laj Brent ut li xʼElaine. Aʼin kikʼulmank saʼ xyitoq li chihabʼ 2016.

»Nawaj traj naq ak xwulak li xamaan re tzolok ut xik saʼebʼ li chʼutam. Kʼajoʼ nasahoʼk saʼ inchʼool ut ninbʼanyoxi li nintzol saʼ li Santil Hu. Naq xnumeʼk jun chihabʼ, kikubʼeek inhaʼ. Anaqwan wank 79 chihabʼ we, ut ninnaw naq xintaw li yaal. Li Jehobʼa xinrosobʼtesi xbʼaan naq wankin saʼ xyanqebʼ li nekeʼkʼanjelak chiru saʼ chixjunil li Ruuchichʼochʼ».