1. Kʼaru naxkʼe xsahil qachʼool?

 LI JEHOBʼA naraj naq sahaq saʼ qachʼool. Naqanaw aʼin xbʼaan naq li sahil chʼoolejil aʼan jun rehebʼ li naruuchi li santil musiqʼej (Gál. 5:22). Xbʼaan naq li sahil chʼoolejil nachalk naq nokookʼehok, joʼkan naq jwal sa naqekʼa qibʼ naq laatzʼ qu saʼ li xkʼanjel li Yos ut naqatenqʼahebʼ li qechpaabʼanel (Hech. 20:35).

2, 3. a) Joʼ naxye saʼ Gálatas 6:4, kʼaru ttenqʼanq qe re naq junelik sahaq saʼ qachʼool? b) Kʼaru tqil saʼ li tzolom aʼin?

² Kʼaru ttenqʼanq qe re naq junelik sahaq saʼ qachʼool? Li apóstol Pablo kixkʼe wiibʼ li naʼlebʼ li tooxtenqʼa. Naqataw aʼin saʼ Gálatas 6:4 (taayaabʼasi). Xbʼeen, wank xyaalal naq sahaq saʼ qachʼool rikʼin li naqabʼaanu saʼ li xkʼanjel li Jehobʼa wi naqakʼe re li qʼaxal chaabʼil. Ut chiqajunilo tento tqabʼaanu aʼin (Mat. 22:36-38). Xkabʼ, inkʼaʼ tqajuntaqʼeeta qibʼ rikʼinebʼ li junchʼol. Wi wank qakawilal, qatzolbʼal malaj qaseebʼal re xbʼaanunkil junaq li naʼlebʼ, qabʼanyoxiq re li Jehobʼa, xbʼaan naq aʼan kikʼehok qe chixjunil aʼin. Abʼanan, wi wankebʼ li qʼaxal seebʼebʼ chiqu re xbʼaanunkil li xkʼanjel li Yos, chisahoʼq saʼ qachʼool xbʼaan naq yookebʼ roksinkil aʼin re xkʼebʼal xloqʼal li Jehobʼa, moko nekeʼxbʼaanu ta re xnimobʼresinkil ribʼebʼ malaj xsikʼbʼal li us kaʼajwiʼ choʼq rehebʼ. Miqajuntaqʼeeta qibʼ rikʼinebʼ, qatzolaq bʼan qanaʼlebʼ rikʼinebʼ.

³ Saʼ li tzolom aʼin, tqil kʼaru tooxtenqʼa re naq inkʼaʼ tchʼinaaq qachʼool wi inkʼaʼ nokooruuk xbʼaanunkil chixjunil li naqaj saʼ li xkʼanjel li Yos. Tqatzʼil ajwiʼ rix chanru tooruuq roksinkil chiʼus li naqanaw xbʼaanunkil ut li tooruuq xtzolbʼal rikʼinebʼ li junchʼol.

4. Kʼaru naru tixchʼina qachʼool? Chʼolobʼ li kixkʼul li xCarol.

⁴ Wankebʼ li hermaan nekeʼchʼinaak xchʼool xbʼaan naq inkʼaʼ nekeʼruuk xbʼaanunkil chixjunil li nekeʼraj saʼ li xkʼanjel li Jehobʼa xbʼaan naq yajebʼ malaj cheekebʼ chik. Aʼan li kixkʼul li xCarol, li kikʼanjelak bʼarwiʼ naʼajmank ebʼ laj puktesinel. Kixtzolebʼ 35 chi poyanam, kixtenqʼahebʼ wiibʼ oxibʼ re xqʼaxtesinkil li xyuʼam chiru li Jehobʼa ut re naq teʼkubʼeeq xhaʼ. Chʼinaʼus aʼin! Abʼan kiyajerk ut inkʼaʼ chik kiruuk chi elk saʼ li rochoch. Aʼan naxye: «Saʼ xkʼabʼaʼ linyajel, inkʼaʼ ninruuk xbʼaanunkil li nekeʼxbʼaanu ebʼ li junchʼol. Nawekʼa naq moko jwal kaw ta chik linpaabʼal joʼebʼ aʼan. Nachʼinaak inchʼool naq ninkʼoxla rix li nawaj raj xbʼaanunkil ut li ninruuk xbʼaanunkil». Li xCarol naraj xbʼaanunkil chixjunil li wank saʼ ruqʼ saʼ li xkʼanjel li Jehobʼa, ut jwal chaabʼil aʼin. Li Jehobʼa naʼuxtaanank u joʼkan naq chʼolchʼooq chiqu naq oxloqʼ chiru li naxbʼaanu.

5. a) Kʼaru tqajultika wi nachʼinaak qachʼool naq inkʼaʼ nokooruuk xbʼaanunkil chixjunil li naqaj? b) Chanru naxkʼe li qʼaxal chaabʼil re li Jehobʼa li hermaan li nakʼutunk saʼebʼ li eetalil?

⁵ Wi wank sut nachʼinaak qachʼool saʼ xkʼabʼaʼ li inkʼaʼ nokooruuk xbʼaanunkil, qakʼoxlaq: «Kʼaru naraj li Jehobʼa naq tinbʼaanu?». Naraj naq tqakʼe re li qʼaxal chaabʼil malaj li wank saʼ quqʼ. Kʼoxla li eetalil aʼin. Jun li hermaan ixq li wank 80 chihabʼ re, narahoʼk saʼ xchʼool xbʼaan naq inkʼaʼ chik naru xbʼaanunkil chixjunil li naraj joʼ naq wank chaq 40 chihabʼ re. Naxkʼoxla naq moko sa ta chik saʼ xchʼool li Jehobʼa rikʼin usta yook xbʼaanunkil chixjunil li wank saʼ ruqʼ. Abʼan, ma yaal aʼin? Qilaq. Wi kixkʼe re li Jehobʼa li qʼaxal chaabʼil naq wank chaq 40 chihabʼ re ut toj yook xbʼaanunkil anaqwan naq wank 80 chihabʼ re, naru naqaye naq toj yook xkʼebʼal re li qʼaxal chaabʼil. Wi nokooʼok xkʼoxlankil naq moko yooko ta xbʼaanunkil chixjunil li wank saʼ quqʼ re xsahobʼresinkil xchʼool li Jehobʼa, qajultikaq naq aʼan yaal re ma tixkʼulubʼa malaj inkʼaʼ. Wi naqakʼe re li qʼaxal chaabʼil, tixye qe: «Chaabʼil» li xaabʼaanu (juntaqʼeeta rikʼin Mateo 25:20-23).

6. Kʼaru naxkʼut chiqu li kixkʼul li xMaría?

⁶ Li tooxtenqʼa re naq junelik sahaq saʼ qachʼool, aʼan xkʼoxlankil li nokooruuk xbʼaanunkil ut maawaʼ li inkʼaʼ nokooruuk xbʼaanunkil. Qilaq li kixkʼul li xMaría, xbʼaan li xyajel inkʼaʼ naru xbʼaanunkil chixjunil li naraj saʼ li xkʼanjel li Jehobʼa. Saʼ xtiklajik kichʼinaak xchʼool ut naxkʼoxla naq maakʼaʼ chik naʼok wiʼ. Abʼan, kixkʼe reetal naq wank jun li hermaan ixq yaj saʼ li xchʼuut ut kixsikʼ chanru xtenqʼankil. Li xMaría naxye: «Xinkʼubʼ naq tinxik rulaʼaninkil re naq toopuktesinq saʼ selular ut xtzʼiibʼankil ebʼ li esilhu. Sa saʼ linchʼool naq ninsutqʼiik saʼ li wochoch xbʼaan naq xinruuk xtenqʼankil li wechpaabʼanel». Qʼaxal tsahoʼq ajwiʼ saʼ qachʼool wi naqakʼoxla li nokooruuk xbʼaanunkil ut maawaʼ li inkʼaʼ nokooruuk xbʼaanunkil. Abʼan, kʼaru tkʼulmanq wi naabʼal nokooruuk xbʼaanunkil ut seebʼ qachʼool saʼ li xkʼanjel li Yos?

7. Kʼaru li chaabʼil naʼlebʼ kixkʼe li apóstol Pedro rehebʼ li rechpaabʼanel?

⁷ Saʼ li xbʼeen hu li kixtzʼiibʼa li apóstol Pedro, kixye rehebʼ li rechpaabʼanel  naq teʼroksi li xmaatan re xkawresinkilebʼ xchʼool li rechpaabʼanel. Kixtzʼiibʼa: «Chekʼe chi kʼanjelak leemaatan cheribʼil eeribʼ, aʼ yaal kʼaʼ chi maatanil xkʼulum li junjunq, joʼqex li chaabʼil aj kʼanjelahom re li rusilal li Yos» (1 Ped. 4:10). Inkʼaʼ tqakanabʼ roksinkil li qamaatan saʼ xkʼabʼaʼ naq inkʼaʼ naqaj naq teʼchʼinaaq xchʼool malaj tooʼeʼxkaqali. Wi tqabʼaanu, inkʼaʼ raj yooqo xkʼebʼal re li Jehobʼa li qʼaxal chaabʼil.

8. Joʼ naxye saʼ 1 Corintios 4:6, 7, kʼaʼut inkʼaʼ tqanimobʼresi qibʼ xbʼaan li qaseebʼal?

⁸ Us naq tqoksi li xseebʼal qachʼool, abʼan weent tqabʼaanu re naq inkʼaʼ tqanimobʼresi qibʼ (taayaabʼasi 1 Corintios 4:6, 7). Maare inkʼaʼ nachʼaʼajkoʼk chaawu xtikibʼankil xtzolbʼal junaq li kristiʼaan. Maakanabʼ xbʼaanunkil aʼin! Abʼan qajultikaq naq roksinkil chiʼus li naqanaw xbʼaanunkil, moko naraj ta xyeebʼal naq tqanimobʼresi qibʼ. Kʼoxla naq us xat-elk saʼ li puktesink ut xat-ok xtzolbʼal junaq li kristiʼaan. Ut taawaj xseeraqʼinkil aʼin rehebʼ li xeʼelk chi puktesink abʼan nakaawabʼi naq jun li hermaan yook xseeraqʼinkil naq kixkanabʼ jun li hu re jun li poyanam. Aʼan xkanabʼ jun li hu, abʼan laaʼat xat-ok xtzolbʼal jun li kristiʼaan. Kʼaru raj taabʼaanu? Nakaanaw naq li xaakʼul tixwaklesi xchʼool ebʼ li hermaan, abʼan inkʼaʼ nakaaseeraqʼi re naq inkʼaʼ tchʼinaaq xchʼool li jun chik hermaan. Kʼajoʼ xchaabʼilal li xaabʼaanu! Abʼan maakanabʼ xyeechiʼinkil xtzolbʼalebʼ li kristiʼaan, xbʼaan naq aʼin li nakaanaw xbʼaanunkil chiʼus.

9. Chanru tqoksi li qaseebʼal?

⁹ Qajultikaq naq li Yos kikʼehok re li qaseebʼal. Qoksihaq aʼin re xwaklesinkilebʼ xchʼool li hermaan ut maawaʼ re xnimobʼresinkil qibʼ (Filip. 2:3). Naq naqoksi li qametzʼew ut li qaseebʼal re xbʼaanunkil li naraj li Jehobʼa, naxkʼe xsahil qachʼool. Xbʼaan naq yooko roksinkil chixjunil li kʼebʼil qe re xkʼebʼal xloqʼal li Jehobʼa ut maawaʼ re xnimobʼresinkil qibʼ.

10. Kʼaʼut naq inkʼaʼ us xjuntaqʼeetankil qibʼ rikʼinebʼ li junchʼol?

¹⁰ Weent tqabʼaanu xbʼaan naq naru tooʼoq xjuntaqʼeetankil li nokooruuk xbʼaanunkil rikʼin li nachʼaʼajkoʼk chiruhebʼ li junchʼol. Qakʼoxlaq li eetalil aʼin. Maare jun li hermaan naxnaw chiʼus xkʼebʼal li seeraqʼ xbʼaan naq aʼin li xseebʼal. Abʼan, maare naxkʼoxla naq jwal us naxbʼaanu chiru junaq li hermaan li nachʼaʼajkoʼk  chiru xkʼebʼal li seeraqʼ. Abʼan maare li hermaan aʼin, wank chik kʼaru us naxbʼaanu. Maare naxwotz li kʼaru re, naxkʼiresi chiʼus li xkokʼal malaj napuktesink chi sa saʼ xchʼool. Kʼajoʼ naqabʼanyoxi naq wankebʼ naabʼal li hermaan li nekeʼroksi li xseebʼal re kʼanjelak chiru li Jehobʼa ut re xtenqʼankil li junchʼol.

11. Kʼaʼut naq tqayal qaqʼe chi xkʼambʼal qe rikʼin li Jesús?

¹¹ Usta inkʼaʼ us xjuntaqʼeetankil qibʼ rikʼinebʼ li junchʼol, abʼan naqataw qanaʼlebʼ rikʼinebʼ li nekeʼkʼanjelak chiru li Jehobʼa. Qakʼamaq qe rikʼin li Jesús. Usta inkʼaʼ tzʼaqal re ru li qayuʼam joʼ li Jesús, abʼan tooruuq xkʼambʼal qe rikʼin li xchaabʼil naʼlebʼ ut xbʼaanuhom (1 Ped. 2:21). Wi naqayal qaqʼe chi xkʼambʼal qe rikʼin, us tookʼanjelaq chiru li Jehobʼa.

12, 13. Kʼaru naqatzol rikʼin li awabʼej David?

¹² Li Santil Hu naʼaatinak chirixebʼ li xeʼxkanabʼ jun chaabʼil eetalil, usta ebʼ aj maak (Heb. 6:12). Jun rehebʼ aʼin, aʼan laj David. Li Jehobʼa kixye chirix laj David: «Xintaw […] jun li winq chaabʼil joʼ naraj linchʼool» (Hech. 13:22). Abʼan moko tzʼaqal ta re ru li xyuʼam laj David xbʼaan naq wank sut kimaakobʼk. Usta joʼkan, kixkanabʼ jun chaabʼil eetalil. Naq kiqʼuseʼk, kixkʼulubʼa ut kixyotʼ xchʼool. Joʼkan naq kikuyeʼk xmaak xbʼaan li Jehobʼa (Sal. 51:5, 6, 12-14).

¹³ Li kixbʼaanu laj David naru tooxtenqʼa wi naqakʼoxla ebʼ li patzʼom aʼin: «Chanru ninnaʼlebʼak naq nikineʼxqʼus? Ma ninkʼulubʼa saʼ junpaat malaj inkʼaʼ? Ma ninkʼe saʼ xbʼeenebʼ li junchʼol linmaak malaj ninyal inqʼe re naq inkʼaʼ chik tinbʼaanu?». Qakʼoxlaq ajwiʼ ebʼ li patzʼom joʼ aʼin, naq naqatzʼil rix li xyuʼam ebʼ li ixq ut li winq li naʼaatinak wiʼ li Santil Hu. Ma xeʼxkʼul ajwiʼ li chʼaʼajkilal joʼ naqakʼul laaʼo? Kʼaru li chaabʼil naʼlebʼ xeʼxyuʼami? Chirix li junjunq chi eetalil aʼin, qakʼoxlaq: «Chanru tinkʼam we rikʼin?».

14. Kʼaru rusilal naqataw naq naqakʼam qe rikʼinebʼ li qechpaabʼanel?

¹⁴ Tooruuq ajwiʼ xtzolbʼal qanaʼlebʼ rikʼinebʼ li qechpaabʼanel, maakʼaʼ naxye ma saajebʼ malaj cheekebʼ chik. Maare saʼ li qachʼuut wank junaq li saaj li yook chi mineʼk ru, junaq li hermaan li xikʼ naʼileʼk xbʼaan li xjunkabʼal malaj junaq chik li hermaan yaj. Ma naxkʼutbʼesi junaq  li chaabʼil naʼlebʼ bʼarwiʼ tooruuq xkʼambʼal qe rikʼin? Wi naqakʼam qe rikʼin, tqataw li naʼlebʼ li tooxtenqʼa chi xnumsinkil li chʼaʼajkilal. Peʼyaal naq naqabʼanyoxi naq kawebʼ saʼ li xpaabʼal? Relik chi yaal naq wank naabʼal xyaalal re naq sahaq saʼ li qachʼool (Heb. 13:7; Sant. 1:2, 3).

15. Kʼaru kixye li apóstol Pablo re naq tookʼanjelaq chi sa saʼ qachʼool?

¹⁵ Wi chiqajunilo naqayal qaqʼe chi xkʼebʼal re li Jehobʼa li qʼaxal chaabʼil, toowanq saʼ tuqtuukilal ut saʼ junajil saʼ li chʼuut, joʼ xeʼxbʼaanu chaq saʼ xkutankilebʼ li apóstol. Jalan jalanq chaq li xmaatanebʼ ut xkʼanjelebʼ (1 Cor. 12:4, 7-11). Abʼan moko xeʼxbʼaanu ta naq twanq li qʼetqʼetil chi moko li jachok ibʼ. Laj Pablo kixye bʼan rehebʼ laj Éfeso naq li junjunq tixbʼaanu chixjunil li wank saʼ ruqʼ «re xkabʼlankil li xtzʼejwal li Kriist». Ut kixye ajwiʼ: «Aʼ yaal chanru li junjunq chi chaʼalej, taakʼiiq joʼ tzʼejwalej re xkabʼlankil ribʼ saʼ li rahok» (Efes. 4:1-3, 11, 12, 16). Rikʼin aʼin, xeʼxbʼaanu naq twanq li tuqtuukilal ut li junajil, joʼ naqil anaqwan saʼebʼ li qachʼuut.

16. Kʼaru us naq taayal aaqʼe chi xbʼaanunkil? (Hebreos 6:10).

¹⁶ Yal aaqʼe re naq inkʼaʼ taajuntaqʼeeta aawibʼ rikʼinebʼ li junchʼol. Kʼe bʼan reetal li xnaʼlebʼ li Jesús ut kʼam aawe rikʼin. Kʼam aawe rikʼinebʼ li kawebʼ chaq xpaabʼal junxil ut li wankebʼ anaqwan. Kʼe re li Jehobʼa li qʼaxal chaabʼil, xbʼaan naq li Santil Hu naxye: «Tiik xchʼool li Yos, moko hoon ta nasachk saʼxchʼool leechaabʼil kʼanjel» (taayaabʼasi Hebreos 6:10). Maakanabʼ kʼanjelak chiru li Jehobʼa chi sa saʼ laachʼool, xbʼaan naq aʼan naroxloqʼi li nakaabʼaanu re xsahobʼresinkil xchʼool.