1. Kʼaʼut naq li Jehobʼa kixkʼe li yuʼam?

KIWANK jun qʼehil bʼarwiʼ li Jehobʼa kiwank xjunes, abʼan maajunwa kirekʼa ribʼ xjunes. Usta maakʼaʼ napaltoʼk chaq chiru, abʼan kiraj naq jalanebʼ chik teʼwanq xyuʼam. Joʼkan naq li rahok kiʼekʼasink re chi xtikibʼankil li yobʼtesink (Sal. 36:10; 1 Juan 4:19).

2. Chanru kirekʼa ribʼ li Jesús ut ebʼ li ánjel naq li Jehobʼa kixyobʼtesi jalan chik kʼaʼaq re ru?

² Li kixyobʼtesi xbʼeenwa li Jehobʼa aʼan li Jesús li Ralal. Moqon, «saʼ xkʼabʼaʼ aʼan kiyoobʼtesiik chixjunil li kʼaʼ re ru», saʼ xyanq aʼan wankebʼ li kʼiila miyon chi ánjel (Col. 1:16). Makachʼin naq kisahoʼk saʼ xchʼool li Jesús naq kiruuk chi kʼanjelak rochbʼen li Xyuwaʼ (Prov. 8:30, TNM). Ut kiwank ajwiʼ xyaalal chiruhebʼ li ánjel re naq teʼsahoʼq saʼ xchʼool, xbʼaan naq aʼanebʼ li xbʼeenwa xeʼilok re, naq li Jehobʼa ut li Jesús laj tenqʼahom re, xeʼxyiibʼ li choxa ut li Ruuchichʼochʼ. Chanru xeʼnaʼlebʼak ebʼ li ánjel? Li Santil Hu naxye naq «sahebʼ saʼ xchʼool chi bʼichank», ut chʼolchʼo naq inkʼaʼ xeʼxkanabʼ xnimankil ru li Jehobʼa saʼ xkʼabʼaʼ chixjunil li kixbʼaanu, ut qʼaxal xeʼxnima ru naq kixyobʼtesi ebʼ li poyanam (Job 38:7; Prov. 8:31). Chixjunil li xyobʼtesihom naxkʼutbʼesi li xrahom ut li xchoxahil naʼlebʼ (Sal. 104:24; Rom. 1:20).

3. Joʼ naxkʼut saʼ 1 Corintios 15:21, 22, kʼaru rusilal naxkʼam chaq li xkamik li Jesús?

³ Li Jehobʼa kiraj naq ebʼ li poyanam teʼwanq chi junelik saʼ  xbʼeen li chʼinaʼusil Ruuchichʼochʼ li kixyiibʼ. Abʼan, naq laj Adán ut li xʼEva xeʼxqʼet ribʼ chiru li Xyuwaʼ li qʼaxal narahok, li maak ut li kamk kichalk saʼ xbʼeen chixjunil li Ruuchichʼochʼ (Rom. 5:12). Kʼaru kixbʼaanu li Jehobʼa? Saʼ junpaat kixsikʼ chanru tixkol ebʼ li poyanam (Gén. 3:15). Kixye naq tixkʼe li xyuʼam li Ralal re naq tixkol chiru li maak ut li kamk ebʼ li ralal xkʼajol laj Adán ut li xʼEva. Chi joʼkan, tixkʼe re li junjunq chi poyanam li hoonal re naq teʼxsikʼ ma teʼkʼanjelaq chiru ut teʼxkʼul li junelik yuʼam (Juan 3:16; Rom. 6:23; taayaabʼasi 1 Corintios 15:21, 22).

4. Kʼaru ebʼ li patzʼom tqatzʼil rix saʼ li tzolom aweʼ?

⁴ Li xyeechiʼom li Yos chirix naq teʼwakliiq wiʼ chik chi yoʼyo ebʼ li kamenaq naxbʼaanu naq tchalq wiibʼ oxibʼ li patzʼom saʼ qachʼool. Jun eetalil, chanruhaq li wakliik wiʼ chik chi yoʼyo? Naq teʼwakliiq wiʼ chik chi yoʼyo ebʼ li qakomon ut ebʼ li qamiiw, ma tqanawebʼ ru? Kʼaʼut naq jwal tixkʼe xsahil qachʼool naq teʼwakliiq wiʼ chik chi yoʼyo ebʼ li kamenaq? Ut, chanru nokooxtenqʼa li wakliik wiʼ chik chi yoʼyo chi roxloqʼinkil li xrahom, li xchoxahil naʼlebʼ ut li xkuyum li Jehobʼa? Qilaq.

5. Kʼaʼut naq wank xyaalal chiqu re xpaabʼankil naq moko saʼ jun ta chi qʼehil teʼwaklesiiq chi yoʼyo chixjunilebʼ li kristiʼaan?

⁵ Li Jehobʼa troksi li Ralal re xwaklesinkilebʼ wiʼ chik chi yoʼyo chi miyon ebʼ li kristiʼaan. Abʼan, moko saʼ jun tana chi qʼehil teʼwaklesiiq chi yoʼyo chixjunilebʼ. Kʼaʼut naq inkʼaʼ? Xbʼaan naq, wi ebʼ li poyanam teʼxnujobʼresi li Ruuchichʼochʼ saʼ junpaat, twanq li poʼoj ibʼ. Aʼut li Jehobʼa nawulak chiru xbʼaanunkil chixjunil chi tustu ru. Naxnaw naq, re naq wanq li tuqtuukilal, aajel ru naq maakʼaʼaq li poʼoj ibʼ (1 Cor. 14:33, Wy). Li Jehobʼa kixkʼutbʼesi naq wank xnaʼlebʼ ut xkuyum naq chi timil timil kixyiibʼ li Ruuchichʼochʼ rochbʼen li Jesús choʼq rehebʼ li  poyanam. Ut chiru li jun mil chihabʼ naq li Jesús t-awabʼejinq, tixkʼutbʼesi ebʼ li chaabʼil naʼlebʼ aweʼ rikʼinebʼ li poyanam li teʼkoleʼq saʼ li Armagedón naq tixtenqʼahebʼ chi xyiibʼankil li Ruuchichʼochʼ re xkʼulbʼalebʼ li teʼwakliiq wiʼ chik chi yoʼyo.

6. Joʼ naxye saʼ Hechos 24:15, anihebʼ chik teʼwakliiq wiʼ chik chi yoʼyo?

⁶ Abʼan, li jwal wank xwankil li teʼxbʼaanu li teʼkoleʼq saʼ li Armagedón aʼan xkʼutbʼal chiruhebʼ li teʼwakliiq wiʼ chik chi yoʼyo chirix li Xʼawabʼejilal li Yos ut li xchaqʼrabʼ. Kʼaʼut naq t-ajmanq xbʼaanunkil aʼin? Xbʼaan naq li xkʼihalil li teʼwakliiq wiʼ chik chi yoʼyo aʼanebʼ li naxkʼabʼaʼi li Santil Hu joʼ aj «maak» (taayaabʼasi Hechos 24:15). Ebʼ aʼan tento naq teʼxjal li xyuʼam re naq teʼxtaw rusilal li xkamik li Jesús. Relik chi yaal, xkʼutbʼal li yaal chirix li Yos chiruhebʼ chi miyon li poyanam li inkʼaʼ nekeʼxnaw ru, tixtzʼaama naabʼal li kʼanjel. Ma tqatzolebʼ li kristiʼaan chirix li Santil Hu chi junjunqal joʼ naqabʼaanu anaqwan? Ma teʼtaqlaaq saʼ jalan jalanq chi chʼuut ut ma teʼkawresiiq re naq teʼruuq chi kʼutuk chirix li Santil Hu chiruhebʼ li teʼwakliiq moqon? Tento naq tqoybʼeni re xnawbʼal aʼin. Li kʼaru naqanaw aʼan naq «chixjunil li ruchichʼochʼ nujenaq[aq] rikʼin li xnaʼlebʼ li Qaawaʼ joʼ naq nanujak li palaw rikʼin haʼ» naq traqeʼq chi awabʼejink li Jesús chiru li jun mil chihabʼ (Is. 11:9, Wy. Akʼ tzʼiibʼ). Kʼajoʼaq li kʼanjel chiru li jun mil chihabʼ ut kʼajoʼaq xchʼinaʼusal!

7. Kʼaʼut naq ebʼ laj kʼanjel chiru li Yos teʼxtenqʼa saʼ tuulanil ebʼ li teʼwakliiq wiʼ chik chi yoʼyo?

⁷ Chiru li jun mil chihabʼ, chixjunilebʼ laj kʼanjel chiru li Jehobʼa tento teʼxjal li xyuʼam re xsahobʼresinkil xchʼool. Joʼkan naq saʼ tuulanil teʼxtenqʼa ebʼ li teʼwakliiq wiʼ chik chi yoʼyo re naq inkʼaʼ chik teʼmaakobʼq ut re naq teʼwanq joʼ naraj li Jehobʼa (1 Ped. 3:8). Relik chi yaal, naq ebʼ aʼan teʼril naq ebʼ laj kʼanjel chiru li Yos nekeʼxkubʼsi ribʼ ut joʼ nekeʼxbʼaanu aʼan, nekeʼxyal ajwiʼ xqʼe chi xjalbʼal li xnaʼlebʼebʼ ut xsahobʼresinkil xchʼool li Jehobʼa, aʼin t-ekʼasinq rehebʼ chi xloqʼoninkil ajwiʼ ru li Yos (Filip. 2:12).

8. Kʼaʼut naq wank xyaalal re xpaabʼankil naq ebʼ li teʼwakliiq wiʼ chik chi yoʼyo teʼnaweʼq ru xbʼaan ebʼ li xkomon ut ebʼ li ramiiw?

⁸ Wank naabʼal xyaalal chiqu re xpaabʼankil naq teʼnaweʼq wiʼ chik ru xbʼaan ebʼ li ramiiw ut ebʼ li xkomon li teʼwakliiq wiʼ chik chi yoʼyo. Jun eetalil, chanchan tawiʼ naq li Jehobʼa tixyobʼtesi wiʼ chik ebʼ li poyanam joʼ chanru nekeʼilok, nekeʼaatinak ut nekeʼkʼoxlak naq jayeʼq chik ma nekeʼkamk, xbʼaan naq joʼkan naxkʼut ebʼ li eetalil li natawmank saʼ li Santil Hu. Joʼkan ajwiʼ, qajultikaq naq li Jesús kixye naq wi nakamk junaq li kristiʼaan chanchan tawiʼ naq yook chi wark, ut naq twaklesiiq chi yoʼyo chanchan tawiʼ naq t-ajq ru (Mat. 9:18, 24; Juan 11:11-13). Naq junaq li kristiʼaan naʼajk ru, li rilobʼaal, li xyaabʼ xkux ut li naxkʼoxla juntaqʼeet ajwiʼ naq xkoho chi wark. Qajultikaq li kixkʼul laj Lázaro. Naq kiwaklesiik wiʼ chik chi yoʼyo xbʼaan li Jesús, ak kaahibʼ kutan chik xkamik ut ak yook chi qʼaak li xtibʼel. Abʼan ebʼ li ranabʼ saʼ junpaat keʼxnaw ru, ut chʼolchʼo naq aʼan inkʼaʼ ajwiʼ kisach saʼ xchʼool naq aʼanebʼ li ranabʼ (Juan 11:38-44; 12:1, 2).

9. Kʼaʼut naq moko tzʼaqalaq ta re ru li xkʼaʼuxl ut li xjunxaqalil ebʼ li teʼwakliiq wiʼ chik chi yoʼyo?

⁹ Li Jehobʼa naxyeechiʼi naq saʼ li Chʼinaʼusil Naʼajej maaʼani chik tixye: «Yajin» (Is. 33:24; Rom. 6:7). Joʼkan bʼiʼ, naq li Yos tixwaklesi wiʼ chik chi yoʼyo ebʼ li kamenaq, inkʼaʼ chik teʼyajerq. Abʼanan, moko saʼ junpaat ta tzʼaqalaq re ru li xyuʼamebʼ. Wi tzʼaqal raj re ru li xyuʼamebʼ, maare inkʼaʼ chik teʼnaweʼq ru xbʼaanebʼ li xkomon ut ebʼ li ramiiw. Chanchan tawiʼ naq rubʼel li xʼawabʼejilal li Kriist chiru li jun mil chihabʼ, ebʼ li poyanam rajlal kutan yooqebʼ chi xtawbʼal  li yuʼam li tzʼaqal re ru. Naq traqeʼq li jun mil chihabʼ, li Jesús tixqʼaxtesi wiʼ chik li Awabʼejilal aʼin saʼ ruqʼ li Xyuwaʼ. Tojaʼ naq li kixyeechiʼi chaq li Yos chirix li Awabʼejilal aweʼ ttzʼaqloq ru, saʼ xyanq aʼin naq ebʼ li poyanam tzʼaqalaq chik re ru li xyuʼamebʼ (1 Cor. 15:24-28; Apoc. 20:1-3).

10. Chanru tqekʼa qibʼ naq teʼwakliiq wiʼ chik chi yoʼyo ebʼ li kamenaq?

¹⁰ Qakʼoxlaq chanru tqekʼa qibʼ naq tqilebʼ wiʼ chik ru ebʼ li qamiiw ut ebʼ li qakomon. Ma tooseʼeq malaj tooyaabʼaq xbʼaan xsahil qachʼool? Ma toobʼichanq chiru li Jehobʼa saʼ xkʼabʼaʼ naq numtajenaqaq xsahil qachʼool? Li chʼolchʼo chiqu aʼan naq qʼaxal tqara li Jehobʼa ut li Jesús li jwal nekeʼrahok saʼ xkʼabʼaʼ naq xeʼxwaklesi wiʼ chik chi yoʼyo ebʼ li kamenaq.

11. Joʼ kixye li Jesús saʼ Juan 5:28, 29, kʼaru teʼxkʼul li teʼwakliiq wiʼ chik chi yoʼyo wi nekeʼxpaabʼ li xloqʼlaj chaqʼrabʼ li Yos?

¹¹ Qakʼoxlaq li sahil chʼoolejil li teʼrekʼa li teʼwakliiq wiʼ chik chi yoʼyo naq teʼxjal li xnaʼlebʼebʼ ut teʼoq xpaabʼankil li xloqʼlaj chaqʼrabʼ li Yos. Ebʼ li teʼxjal li xnaʼlebʼ «teʼwakliiq chi yoʼyo re li yuʼam». Abʼanan, ebʼ li teʼxqʼet ribʼ chiru li Yos, teʼsacheʼq ru re naq inkʼaʼ teʼchʼiʼchʼiʼinq saʼ li Chʼinaʼusil Naʼajej (taayaabʼasi Juan 5:28, 29; Is. 65:20).

12. Chanru trosobʼtesi li Jehobʼa ebʼ li poyanam li teʼwanq saʼ xbʼeen li Ruuchichʼochʼ?

¹² Rubʼel li Xʼawabʼejilal li Yos chixjunilebʼ laj kʼanjel chiru teʼxkʼe reetal naq tzʼaqal yaal li naxye saʼ Proverbios 10:22: «Li rosobʼtesihom li Qaawaʼ nabʼihomobʼresink ut inkʼaʼ naxkʼam chaq rahil chʼoolej». Rikʼin li xtenqʼ li xsantil musiqʼej li Jehobʼa, ebʼ li kristiʼaan teʼbʼihomoʼq saʼ li xpaabʼal, naraj xyeebʼal naq rajlal teʼnaʼlebʼaq joʼ li Kriist ut yooqebʼ xtawbʼal li yuʼam li tzʼaqal re ru (Juan 13:15-17; Efes. 4:23, 24). Rajlal kutan yooq chi chaabʼiloʼk ru li xnaʼlebʼebʼ ut qʼaxal teʼkawuuq li xjunxaqalil. Jwal sahaqebʼ saʼ xchʼool! (Job 33:25). Abʼanan, chanru nokooxtenqʼa anaqwan xkʼoxlankil rix naq teʼwakliiq wiʼ chik chi yoʼyo ebʼ li kamenaq?

13. Joʼ naxye saʼ Salmo 139:1-4, chanru naxkʼutbʼesi li wakliik wiʼ chik chi yoʼyo naq li Jehobʼa naxnaw qu chiʼus?

¹³ Joʼ xqakʼe reetal, naq li Jehobʼa tixwaklesi wiʼ chik chi yoʼyo ebʼ li poyanam, tixbʼaanu naq teʼkʼoxlaq ut teʼnaʼlebʼaq joʼ chanru nekeʼxbʼaanu chaq naq toj maajiʼ nekeʼkamk. Qakʼoxlaq li naraj xyeebʼal aʼin. Makachʼin naq nokooxra li Jehobʼa chiqajunqal, joʼkan naq naxkʼe reetal li naqakʼoxla, li naqekʼa, li naqaye ut li naqabʼaanu. Joʼkan utan, wi tento raj tooxwaklesi wiʼ chik chi yoʼyo, moko tchʼaʼajkoʼq traj chiru xbʼaanunkil naq tqajultika li xqakʼul chaq ut naq toonaʼlebʼaq ut tookʼoxlaq joʼ chanru naqabʼaanu chaq naq toj maajiʼ nokookamk. Li awabʼej David naxnaw chaq naq li Jehobʼa naxnaw chiʼus chanru nokoonaʼlebʼak chiqajunqal (taayaabʼasi Salmo 139:1-4). Chanru naqekʼa qibʼ naq naqakʼe reetal naq qʼaxal naxkʼe xchʼool chiqix?

14. Chan raj ru tqekʼa qibʼ xnawbʼal naq li Jehobʼa naxnaw qu chiʼus?

¹⁴ Us raj naq inkʼaʼ tixkʼe qakʼaʼuxl xnawbʼal naq li Jehobʼa naxnaw qu chiʼus. Kʼaʼut? Qajultikaq naq jwal nokooxra ut naxkʼe xchʼool chiqix chiqajunqal. Naxkʼe ajwiʼ reetal li xqakʼul chaq li nakʼutbʼesink re li qanaʼlebʼ. Peʼyaal naq naxkʼojobʼ qachʼool xnawbʼal aʼin? Maajunwa raj tqakʼoxla naq wanko qajunes, xbʼaan naq li Jehobʼa junelik wank qikʼin ut yoʼon wank re qatenqʼankil (2 Crón. 16:9).

15. Chanru naq li xwaklijikebʼ wiʼ chik chi yoʼyo li kamenaq naxkʼut chi tzʼaqal li xchoxahil naʼlebʼ li Jehobʼa?

¹⁵ Li xxuwankil ru li kamk aʼan jun li raʼal. Li wankebʼ rubʼel xwankil laj Tza nekeʼroksi li xiw  aʼin re xminbʼalebʼ ru li kristiʼaan chi xtzʼeqtaanankil ebʼ li ramiiw ut chi xtzʼeqtaanankil li nekeʼxpaabʼ. Abʼan laaʼo, inkʼaʼ nokootʼaneʼk saʼ ruqʼebʼ. Naqanaw naq, wi ebʼ li xikʼ nekeʼilok qe tooʼeʼxkamsi, li Jehobʼa tooxwaklesi wiʼ chik chi yoʼyo (Apoc. 2:10). Naqapaabʼ chi anchal qachʼool naq maakʼaʼ naru teʼxbʼaanu re qajachbʼal rikʼin li Yos (Rom. 8:35-39). Li Jehobʼa naxkʼutbʼesi tzʼaqal li xchoxahil naʼlebʼ naq naxyeechiʼi naq teʼwakliiq wiʼ chik chi yoʼyo ebʼ li kamenaq. Chi joʼkaʼin, naxsach xwankil jun li kʼanjelobʼaal li naxnaw roksinkil chiʼus laj Tza ut naxkʼe xkawubʼ qachʼool.

16. Kʼaru ebʼ li patzʼom tento tqakʼoxla rix, ut kʼaru tixkʼutbʼesi li xsumenkil?

¹⁶ Wi ebʼ li xikʼ nekeʼilok qe nekeʼraj qakamsinkil, ma kʼojkʼo qachʼool naq li Jehobʼa tooxwaklesi wiʼ chik chi yoʼyo? Re xnawbʼal aweʼ, qakʼoxlaq: «Ma naxkʼutbʼesi ebʼ li kokʼ naʼlebʼ li ninbʼaanu saʼ linyuʼam wulaj wulaj naq kʼojkʼo inchʼool rikʼin li Jehobʼa?» (Luc. 16:10). «Ma ninkʼutbʼesi rikʼin linnaʼlebʼ naq ninpaabʼ naq li Jehobʼa tixkʼe we li naʼajmank wi ninkʼe xbʼeenwa li Xʼawabʼejilal saʼ linyuʼam?» (Mat. 6:31-33). Wi joʼkan, aʼin tooxtenqʼa chi xkuybʼal yalaq kʼaru li yalbʼaʼix li tchalq saʼ qabʼeen (Prov. 3:5, 6).

17. a) Kʼaʼut naq li hoonal li ak kixxaqabʼ li Jehobʼa re xwaklesinkil wiʼ chik chi yoʼyo ebʼ li kamenaq naxkʼutbʼesi li xkuyum? b) Chanru tqakʼutbʼesi naq oxloqʼ chiqu li xkuyum li Jehobʼa?

¹⁷ Li Jehobʼa ak kixxaqabʼ li kutan ut li hoonal re xsachbʼal ru li ruuchichʼochʼ li naxjolomi laj Tza (Mat. 24:36). Usta naraj raj naq ak xwulak xhoonalil re xwaklesinkil wiʼ chik chi yoʼyo ebʼ li kamenaq, abʼan toj wanq xkuyum ut tixbʼaanu tzʼaqal saʼ xhoonalil (Job 14:14, 15). Yook roybʼeninkil li hoonal aʼan (Juan 5:28). Wank xyaalal re naq oxloqʼaq chiqu li xkuyum Jehobʼa. Jun eetalil, saʼ xkʼabʼaʼ aʼin, naabʼalebʼ xeʼwank xhoonal re naq teʼxjal li xnaʼlebʼebʼ ut saʼ xyanqebʼ wanko laaʼo (2 Ped. 3:9). Li Jehobʼa naraj naq naabʼalebʼ li kristiʼaan teʼwanq xyuʼam chi junelik. Joʼkan utan, qakʼutbʼesihaq naq oxloqʼ chiqu li xkuyum li Jehobʼa rikʼin xbʼaanunkil chixjunil li wank saʼ quqʼ re xtawbʼal «li nekeʼxkʼutbʼesi rikʼin li xnaʼlebʼebʼ naq nekeʼraj xtawbʼal li junelik yuʼam» ut rikʼin xtenqʼankilebʼ chi xraabʼal li Jehobʼa ut chi kʼanjelak chiru (Hech. 13:48, TNM). Chi joʼkan, ebʼ aʼan teʼruuq ajwiʼ xtawbʼal rusilal li xkuyum li Jehobʼa.

18. Kʼaʼut naq tento wanq qakuyum rikʼinebʼ li junchʼol?

¹⁸ Saʼ xkʼabʼaʼ li xkuyum, li Jehobʼa troybʼeni  toj reetal traqeʼq li jun mil chihabʼ re naq tzʼaqalaq chik re ru li qayuʼam. Toj saʼ li kutan aʼan, tixkanabʼ xkuybʼal qamaak. Joʼkan utan, qakʼamaq qe rikʼin li Jehobʼa ut qakʼehaq saʼ qu ebʼ li xchaabʼil naʼlebʼ li junchʼol ut wanq qakuyum rikʼinebʼ. Qilaq li kixkʼul jun li hermaan. Li xbʼeelom qʼaxal kiʼok xkʼaʼuxl ut xxiw, ut kixkanabʼ xik saʼebʼ li chʼutam. Aʼan naxye: «Jwal ra xwekʼa naq xinkʼul aʼin. Li xqakʼubʼ chaq rochbʼen linbʼeelom choʼq re li kutan chalk re, inkʼaʼ chik xqabʼaanu». Usta joʼkan, li hermaan naxra ut wank xkuyum rikʼin li xbʼeelom. Kaw chaq xpaabʼal rikʼin li Jehobʼa ut maajunwa kichʼinaak xchʼool. Joʼ naxbʼaanu li Jehobʼa, inkʼaʼ kixkʼe saʼ ru li chʼaʼajkilal, kixkʼe bʼan xchʼool chirix li xchaabʼil naʼlebʼ li xbʼeelom. Naxye: «Linsumʼaatin chaabʼil xnaʼlebʼ ut naxbʼaanu li wank saʼ ruqʼ re xxokbʼal ribʼ usta timil timil». Jwal aajel ru naq wanq qakuyum rikʼinebʼ li qakomon malaj rikʼinebʼ li hermaan li yookebʼ xnumsinkil ebʼ li chʼaʼajkilal.

19. Kʼaru tento tqakawresi qibʼ chi xbʼaanunkil?

¹⁹ Li Jesús ut ebʼ li ánjel qʼaxal xeʼsahoʼk saʼ xchʼool naq kiyiibʼamank li Ruuchichʼochʼ. Peʼyaal naq kʼajoʼ teʼsahoʼq saʼ xchʼool chi rilbʼal naq saʼ li Ruuchichʼochʼ wankebʼ li poyanam li tzʼaqal re ru li xyuʼamebʼ, nekeʼxra ut nekeʼkʼanjelak chiru li Jehobʼa? Ut, peʼyaal naq kʼajoʼ teʼsahoʼq saʼ xchʼool ebʼ li teʼawabʼejinq rochbʼen li Jesús saʼ choxa naq teʼxkʼe reetal naq li kʼanjel li yookebʼ xbʼaanunkil aʼan, ebʼ li poyanam nekeʼxtaw rusilal? (Apoc. 4:4, 9-11; 5:9, 10). Ut qakʼoxlaq chanruhaq li yuʼam naq ebʼ li kristiʼaan inkʼaʼ chik teʼyaabʼaq xbʼaan xrahilebʼ xchʼool, teʼyaabʼaq bʼan xbʼaan xsahilebʼ xchʼool, ut naq tsachmanq ru chi junajwa li yajel, li rahil chʼoolej ut li kamk (Apoc. 21:4). Abʼan, anaqwan qakʼehaq qachʼool chi xkʼambʼal qe rikʼin li xrahom, li xchoxahil naʼlebʼ ut li xkuyum li qachoxahil Yuwaʼ. Wi joʼkan naqabʼaanu, junelik sahaq saʼ qachʼool maakʼaʼ naxye kʼaru li yalbʼaʼix tchalq saʼ qabʼeen (Sant. 1:2-4). Qʼaxal oxloqʼ chiqu li xyeechiʼom li Jehobʼa naq «teʼwakliiq wiʼ chik chi yoʼyo» ebʼ li kamenaq (Hech. 24:15).