1, 2. Kʼaru tqatzʼil rix saʼ li tzolom aʼin?

QAKʼOXLAQ naq yooko roybʼeninkil jun li kʼaʼ re ru li jwal naʼajmank chiqu, abʼan ak xnumeʼk naabʼal kutan ut toj maajiʼ nakʼulunk. Chan raj ru tqekʼa qibʼ? Maare t-oq qakʼaʼuxl. Joʼkan peʼ naq saʼ Proverbios 13:12 naxye: «Li inkʼaʼ naxkʼul li kʼaru naroybʼeni, narahoʼk xchʼool». Abʼan, kʼaru tkʼulmanq wi naqanaw naq wank xyaalal naq kibʼayk chaq? Wi joʼkan, twanq tana qakuyum.

² Saʼ li tzolom aʼin tqil naabʼal li naʼlebʼ li naxkʼe li Santil Hu li tooxtenqʼa re naq wanq qakuyum (Miq. 7:7). Moqon, tooʼaatinaq chirix wiibʼ li naʼlebʼ bʼarwiʼ t-ajmanq naq tqoybʼeni naq li Jehobʼa t-okenq. Chirix chik aʼan, tqil ajwiʼ li osobʼtesihom li teʼxkʼul li wankebʼ xkuyum.

3. Kʼaru li naʼlebʼ wank xwankil natawmank saʼ Proverbios 13:11?

³ Saʼ Proverbios 13:11 naqataw jun li eetalil li naxkʼut chiqu naq wank xwankil naq wanq qakuyum. Aran naxye: «Li bʼihomal li natawmank chi junpaat, saʼ junpaat taaʼosoʼq; li ani naxchʼutubʼ li xtumin chi timil timil, taabʼihomoʼq». Kʼaru li naʼlebʼ naqatzol saʼ li raqal aʼin? Naq us tooʼelq wi naqabʼaanu junaq li naʼlebʼ chi chʼinqil.

4. Kʼaru li naʼlebʼ naqataw saʼ Proverbios 4:18?

⁴ Saʼ Proverbios 4:18 naxye naq «li xyuʼamebʼ li tiikebʼ xchʼool aʼan chanchan xsaqenkil li hikʼeʼk: naʼok chi lemtzʼunk  toj reetal nakutanoʼk ru saʼ waʼlebʼ». Li aatin aʼin naxkʼut chiqu naq li Jehobʼa chi chʼinqil naxkʼut chiru li xtenamit li rajom. Abʼanan, li raqal aʼin nakʼanjelak ajwiʼ re xnawbʼal chanru yook chi kʼiik saʼ li xpaabʼal junaq li hermaan. Naxkʼam hoonal xbʼaanunkil aʼin, moko naru ta xbʼaanunkil saʼ junpaat. Wi naqakʼe qachʼool chi xtzolbʼal ut chi xyuʼaminkil li naʼlebʼ li naqataw saʼ li Raatin li Yos ut li xmolam, chi chʼinqil tooʼoq chi naʼlebʼak joʼ li Kriist ut tqanaw ru chiʼus li Yos. Li Jesús kixchʼolobʼ li naʼlebʼ aʼin rikʼin jun eetalil. Qilaq.

5. Kʼaru eetalil kiroksi li Jesús re xkʼutbʼal naq chi chʼinqil nakʼiik junaq li poyanam saʼ li xpaabʼal?

⁵ Saʼ jun jaljokil ru aatin, li Jesús kixjuntaqʼeeta li chaabʼil esil li naqapuktesi rikʼin jun li chʼina iyaj li nakʼiik chi chʼinqil saʼ xchʼoolebʼ li poyanam li chaabʼilebʼ xnaʼlebʼ. Aʼan kixye: «Li iyaj nayoʼlaak, nakʼiik, chi moko aʼan naxnaw chan ta wiʼ ru. Li chʼochʼ naʼuuchink xjunes ribʼ; xbʼenwa naqʼunqʼutk, chirix aʼan natzʼutujink, moqon naʼuuchink chi naabʼal» (Mar. 4:27, 28). Kʼaru kiraj xyeebʼal? Naq li poyanam li naxkʼulubʼa li chaabʼil esilal chirix li Xʼawabʼejilal li Yos nakʼiik chi chʼinqil saʼ li xpaabʼal joʼ nakʼulmank rikʼin li iyaj. Jun eetalil, aʼin naqil naq li qatzolom naʼok chi jilok chixkʼatq li Jehobʼa ut naʼok chi xjalbʼal xnaʼlebʼ (Efes. 4:22-24). Abʼan chʼolchʼooq chiqu naq aʼ li Jehobʼa nakʼehok re chi kʼiik li iyaj (1 Cor. 3:7).

6, 7. Kʼaru naqatzol chirix chanru li Jehobʼa kixyiibʼ li Ruuchichʼochʼ?

⁶ Naq li Jehobʼa naxbʼaanu junaq li naʼlebʼ, wank xkuyum ut naxbʼaanu saʼ xyaalal. Ut naxbʼaanu aʼin re naq tnimaaq ru li xkʼabʼaʼ ut re naq us wanqebʼ li junchʼol. Qilaq li kixbʼaanu naq kixyiibʼ li Ruuchichʼochʼ choʼq rehebʼ li poyanam.

⁷ Re xchʼolobʼankil chanru li Jehobʼa kixyiibʼ li Ruuchichʼochʼ, li Santil Hu naxye naq aʼan «kibʼisok re», kixkʼe «li rubʼelankil» ut aʼan «kikʼojobʼank re li xbʼeen pek» (Job  38:5, 6). Kixkʼe ajwiʼ xhoonal re xkʼoxlankil rix li xyobʼtesihom (Gén. 1:10, 12). Qakʼoxlaq chanru xeʼrekʼa ribʼ ebʼ li ánjel naq xeʼril naq li Jehobʼa yook chi xyiibʼankil li junjunq chi kʼaʼaq re ru. Kʼajoʼ tana naq xeʼsahoʼk saʼ xchʼool, xbʼaan naq saʼ jun kutan «sahebʼ saʼ xchʼool chi bʼichank» (Job 38:7). Kʼaru naqatzol? Naq li Jehobʼa naabʼal chihabʼ kiroksi re xyiibʼankil li Ruuchichʼochʼ, ebʼ li chahim ut chixjunil li wank xyuʼam ut, naq kiril chixjunil li kixyobʼtesi kixye naq «qʼaxal chaabʼil» (Gén. 1:31).

8. Kʼaru tqil anaqwan?

⁸ Joʼ naxkʼut chiqu ebʼ li eetalil li ak xqil, saʼ li Santil Hu wank naabʼal li naʼlebʼ li naxkʼut chiqu naq wank xwankil naq wanq qakuyum. Anaqwan qilaq wiibʼ li naʼlebʼ bʼarwiʼ tento tqoybʼeni naq li Jehobʼa t-okenq.

9. Joqʼe tento tqoybʼeni naq li Jehobʼa t-okenq?

⁹ Naq naqakʼoxla naq li Jehobʼa moko saʼ junpaat ta naxsume li qatij. Wi naqatzʼaama re, naq tooxtenqʼa chi xnumsinkil junaq li chʼaʼajkilal malaj chi xkanabʼankil junaq li yibʼ aj naʼlebʼ, maare tqekʼa naq nabʼayk chi xsumenkil li qatij. Kʼaʼut naq li Jehobʼa moko saʼ junpaat ta naxsume chixjunil li qatij?

10. Kʼaʼut naq tento wanq qakuyum naq tootijoq?

¹⁰ Li Jehobʼa naxkʼe xchʼool chi rabʼinkil li qatij (Sal. 65:3). Naril naq chi joʼkan naqakʼutbʼesi li qapaabʼal (Heb. 11:6). Joʼkan ajwiʼ, naxkʼe xchʼool chi rilbʼal ma relik chi yaal naqaj xyuʼaminkil li xqatzʼaama re ut xbʼaanunkil li rajom (1 Juan 3:22). Joʼkan bʼiʼ, wi yooko xyalbʼal qaqʼe chi xkanabʼankil junaq li yibʼ aj naʼlebʼ, maare tento naq wanq qakuyum ut tqayuʼami li xqatzʼaama saʼ li qatij. Li Jesús xooxtenqʼa chi xtawbʼal ru naq maare wanq sut li Jehobʼa moko saʼ junpaat ta tixsume li qatij, aʼan kixye: «Chextzʼaamanq ut kʼeekʼooq eere; chexsikʼoq ut teetaw; chexbʼoqoq chire kabʼl ut teheʼq cheru. Xbʼaan naq chixjunil li natzʼaamank nakʼuluk; li nasikʼok natawok, ut li nabʼoqok chire kabʼl nateheʼk chiru» (Mat. 7:7, 8). Wi naqayuʼami li naʼlebʼ aʼin ut inkʼaʼ naqakanabʼ tijok, chʼolchʼooq chiqu naq li qachoxahil Yuwaʼ nokoorabʼi ut tixsume li qatij (Col. 4:2).

11. Chanru nokooxtenqʼa Hebreos 4:16 naq naqakʼoxla naq li Jehobʼa nabʼayk chi xsumenkil li qatij?

¹¹ Maare tqakʼoxla naq yook chi bʼayk chi xsumenkil li qatij, abʼan li Jehobʼa naxye naq tooxsume «tzʼaqal saʼ xqʼehil» (taayaabʼasi Hebreos 4:16). Joʼkan naq maajunwa tqakʼoxla naq li Jehobʼa napaltoʼk wi inkʼaʼ naxsume li qatij saʼ li hoonal li naqaj raj naq tixbʼaanu. Jun eetalil, chiru naabʼal chihabʼ naabʼalebʼ yookebʼ xtzʼaamankil re li Jehobʼa naq teʼruuq rilbʼal chanru li Xʼawabʼejilal tixsach ru li maaʼus aj ruuchichʼochʼ aʼin. Li Jesús kixye ajwiʼ naq tento tqatzʼaama naq chichalq ta li Xʼawabʼejilal li Yos (Mat. 6:10). Abʼan toontil wi naʼok chi kehoʼk li qapaabʼal chirix li Yos xbʼaan naq toj maajiʼ nawulak li rosoʼjik joʼ naqaj raj laaʼo (Hab. 2:3; Mat. 24:44). Jwal us bʼan naq tqoybʼeni naq li Jehobʼa t-okenq chi raqok aatin ut naq tqakʼul li naqatzʼaama saʼ li qatij. Li rosoʼjik twulaq tzʼaqal saʼ li xhoonalil xbʼaan naq li Jehobʼa ak kixxaqabʼ «li kutan aʼan malaj li xhonalil». Ut kʼajoʼaq rusilal choʼq qe naq twulaq li kutan aʼan (Mat. 24:36; 2 Ped. 3:15).

12. Joqʼe tana qʼaxal tchʼaʼajkoʼq chiqu xkʼutbʼesinkil naq wank qakuyum?

¹² Naq naqakʼul junaq li maaʼusilal chi maakʼaʼ  xyaalal. Saʼebʼ li qakutan, ebʼ li kristiʼaan nekeʼxrahobʼtesi li jalanebʼ chiru maare saʼ xkʼabʼaʼ naq ixqebʼ malaj winqebʼ, li rilobʼaalebʼ, li raatinobʼaalebʼ, li xwanjikebʼ, li xtenamitebʼ malaj moko tzʼaqal ta ru li xjunxaqalilebʼ malaj li xkʼaʼuxebʼ. Naabʼalebʼ laj kʼanjel chiru li Yos nekeʼrahobʼtesiik chi maakʼaʼ xyaalal saʼ xkʼabʼaʼ naq nekeʼxpaabʼ li naxye li Santil Hu. Wi joʼkan naqakʼul, wanq saʼ qachʼool li aatin aʼin li kixye li Jesús: «Ani tixkʼe xchʼool toj saʼ rosoʼjik, aʼan taakoleʼq» (Mat. 24:13). Abʼan, kʼaru tqabʼaanu wi naqanaw naq junaq li hermaan kitʼaneʼk saʼ jun li nimla maak? Wi ebʼ li cheekel winq ak xeʼxnaw, ma wanq qakuyum ut kʼojkʼooq qachʼool naq teʼxtuqubʼ ru joʼ naraj li Jehobʼa? Kʼaru teʼxbʼaanu li cheekel winq?

13. Chanru naraj li Jehobʼa naq ttuqubʼaaq ru junaq li nimla maak?

¹³ Naq ebʼ li cheekel winq nekeʼxnaw naq junaq li hermaan kitʼaneʼk saʼ jun li nimla maak, nekeʼxtzʼaama chiru li Jehobʼa «li choxahil naʼlebʼ» re naq teʼruuq rilbʼal li chʼaʼajkilal joʼ naril aʼan (Sant. 3:17). Wi naruhank, nekeʼraj xtenqʼankil «li yo chi sachk» re naq tixkanabʼ li xmaak (Sant. 5:19, 20). Nekeʼraj ajwiʼ xbʼaanunkil chixjunil li wank saʼ ruqʼebʼ re xkolbʼal li chʼuut ut re xkʼojobʼankil xchʼoolebʼ li ra wankebʼ (2 Cor. 1:3, 4). Naq ebʼ li cheekel winq nekeʼxnaw naq junaq li hermaan kitʼaneʼk saʼ jun li nimla maak, tento naq xbʼeenwa teʼxtzʼil rix chixjunil li kikʼulmank. Aʼin moko nabʼaanumank ta saʼ junpaat. Moqon, tento teʼtijoq, teʼroksi li Santil Hu re xkʼebʼal xnaʼlebʼ li poyanam saʼ tuulanil ut teʼxqʼus joʼ chanru xkʼulubʼ (Jer. 30:11). Yaal, inkʼaʼ teʼbʼayq chi raqok aatin, abʼan moko teʼxbʼaanu ta ajwiʼ saʼ junpaat. Naq ebʼ li cheekel winq nekeʼxsikʼ li xtenqʼ li Jehobʼa, us teʼwanq chixjunilebʼ li wankebʼ saʼ li chʼuut. Usta joʼkan, maare li kiʼuxk re li maaʼusilal chi maakʼaʼ xyaalal, toj trahoʼq saʼ xchʼool. Wi joʼkan yooko xkʼulbʼal, kʼaru tooruuq xbʼaanunkil re naq tkotzq xrahil qachʼool?

14. Kʼaru li eetalil li wank saʼ li Santil Hu naru tooxtenqʼa wi jun li hermaan kixbʼaanu qe junaq li maaʼusilal?

¹⁴ Ma kixbʼaanu qe li maaʼusilal junaq li kristiʼaan malaj junaq li hermaan? Wi joʼkan, saʼ li Santil Hu naqataw li eetalil li  tooxtenqʼa chi roybʼeninkil naq li Jehobʼa tixtuqubʼ ru. Laj José maajunwa kixkanabʼ naq li maaʼusilal ut li maak li kiʼuxk re xbʼaanebʼ li ras, tchʼinanq re xchʼool. Kixkʼe bʼan xchʼool chi kʼanjelak chiru li Jehobʼa, ut kiʼosobʼtesiik xbʼaan naq inkʼaʼ kititzʼ ut kiwank xkuyum (Gén. 39:21). Moqon, laj José kiruuk xkuybʼal xmaakebʼ li ras ut kiril chanru kiʼosobʼtesiik xbʼaan li Jehobʼa (Gén. 45:5). Joʼ kixkʼul laj José, naru ajwiʼ naq tqataw xkʼojobʼankil qachʼool naq toojiloq chixkʼatq li Jehobʼa ut naq tqakanabʼ naq aʼan traqoq aatin (Sal. 7:17; 73:28).

15. Kʼaru kitenqʼank re jun li hermaan chi xkuybʼal li maaʼusilal li kiʼuxk re?

¹⁵ Maare inkʼaʼ tqakʼul junaq li nimla maaʼusilal joʼ kixkʼul laj José, abʼan chiqajunilo ra naqekʼa naq inkʼaʼ sa nokooʼeʼril. Abʼanan, wi wank qachʼaʼajkilal rikʼin junaq li hermaan malaj junaq li poyanam, jwal us naq tqayuʼami li naxye li Santil Hu (Filip. 2:3, 4). Qilaq li kixbʼaanu jun li hermaan ixq naq kixnaw naq jun li rechkʼanjel ixq kixyoobʼ aatin chirix. Usta jwal ra saʼ xchʼool, moko kipoʼk ta, kiʼok bʼan xkʼoxlankil li kixbʼaanu li Jesús, naq moko kixkʼe ta reqaj naq kihobʼeʼk (1 Ped. 2:21, 23). Joʼkan naq, li hermaan moko kixkʼe ta saʼ xchʼool li kikʼulmank. Moqon kixnaw naq li rechkʼanjelil kichapeʼk xbʼaan jun nimla yajel ut junelik naparpotk. Li hermaan kixkʼe reetal naq li rechkʼanjel maare moko saʼ maaʼusilal ta naq kiʼaatinak chirix. Joʼkan naq, sa chik kirekʼa ribʼ ut kisahoʼk saʼ xchʼool naq kiwank xkuyum naq keʼxbʼaanu re li maaʼusilal.

16. Kʼaru naru tixkʼojobʼ qachʼool wi yooko xkuybʼal junaq li maaʼusilal? (1 Pedro 3:12).

¹⁶ Wi yooko xkuybʼal junaq li maaʼusilal malaj junaq li chʼaʼajkilal li naxkʼe xrahil qachʼool, qajultikaq naq li Jehobʼa nachʼ wank «rikʼinebʼ li nekeʼmaynak xchʼool» (Sal. 34:19). Aʼan nokooxra xbʼaan naq wank qakuyum ut naqakanabʼ chixjunil li qachʼaʼajkilal saʼ ruqʼ (Sal. 55:22). Aʼan laj Raqol Aatin saʼ chixjunil li Ruuchichʼochʼ ut naril chixjunil li nakʼulmank (taayaabʼasi 1 Pedro 3:12). Joʼkan naq, wi yooko xnumsinkil junaq li chʼaʼajkilal li inkʼaʼ nokooruuk xtuqubʼankil  ru, qajultikaq naq tento tqoybʼeni naq li Jehobʼa t-okenq chi xtuqubʼankil ru.

17. Kʼaru naxyeechiʼi qe li Jehobʼa saʼ Isaías 30:18?

¹⁷ Chi seebʼ, li qachoxahil Yuwaʼ troksi li Xʼawabʼejilal re qosobʼtesinkil. Isaías 30:18 naxye: «Li Qaawaʼ yo roybʼeninkil li honal re rusilankil eeru. Taawakliiq chaq chi xtoqʼobʼankil eeru, xbʼaan naq tiik xchʼool li Qaawaʼ. Us xaq rehebʼ li kʼojkʼo xchʼoolebʼ rikʼin». Li yookebʼ roybʼeninkil chi anchalebʼ xchʼool naq li Jehobʼa tixtenqʼahebʼ teʼxkʼul naabʼal li osobʼtesihom anaqwan ut saʼ li akʼ ruuchichʼochʼ.

18. Kʼaru ebʼ li osobʼtesihom tqakʼul?

¹⁸ Saʼ li akʼ ruuchichʼochʼ, maajunwa chik tqakuy ebʼ li chʼaʼajkilal ut li xkʼaʼuxl wiʼ qachʼool li naqakʼul anaqwan. Maakʼaʼaq chik li maaʼusilal chi moko li rahilal (Apoc. 21:4). Inkʼaʼ chik t-oq qakʼaʼuxl chi xsikʼbʼal li t-ajmanq chiqu saʼ li qayuʼam, xbʼaan naq numtajenaqaq chixjunil (Sal. 72:16; Is. 54:13). Kʼajoʼaq xchʼinaʼusal aʼin!

19. Kʼaʼut yook qakawresinkil li Jehobʼa chi chʼinqil?

¹⁹ Abʼanan, anaqwan naq li Jehobʼa yook chi qatenqʼankil re xkanabʼankil li yibʼ aj naʼlebʼ ut chi xyuʼaminkil li chaabʼil naʼlebʼ, yook qakawresinkil naq toowanq saʼ li akʼ ruuchichʼochʼ rubʼel li Xʼawabʼejilal. Michʼinaak qachʼool ut miqakanabʼ kʼanjelak chiru li Jehobʼa xbʼaan naq ok qe xkʼulbʼal li chaabʼil yuʼam. Kʼajoʼ xchʼinaʼusal li osobʼtesihom li tqakʼul, joʼkan naq miqakanabʼ chi roybʼeninkil naq li Jehobʼa tixbʼaanu chixjunil li kixyeechiʼi qe.