1. Kʼaʼut nawulak chaawu wank saʼ xyanqebʼ li wankebʼ xkuyum?

 CHIQAJUNILO nawulak chiqu wank saʼ xyanqebʼ li wankebʼ xkuyum. Kʼaʼut? Jun eetalil, naqoxloqʼihebʼ li nekeʼxnaw oybʼenink chi inkʼaʼ teʼchʼaʼajkoʼq. Joʼkan ajwiʼ nawulak chiqu naq ebʼ li junchʼol teʼwanq xkuyum naq nokoopaltoʼk. Joʼkan ajwiʼ naqabʼanyoxi re li kixkʼe qatzolbʼal chirix li Santil Hu xbʼaan naq kiwank xkuyum qikʼin naq kichʼaʼajkoʼk chiqu xtawbʼal, xkʼulubʼankil malaj xyuʼaminkil junaq li naʼlebʼ li yooko xtzolbʼal. Ut qʼaxal naqabʼanyoxi chiru li Jehobʼa naq wank xkuyum qikʼin (Rom. 2:4).

2. Joqʼe naru nachʼaʼajkoʼk chiqu xkʼutbʼesinkil naq wank qakuyum?

² Chiqajunilo naqabʼanyoxi naq ebʼ li junchʼol wankebʼ xkuyum qikʼin. Abʼan naq aajel ru naq tqakʼutbʼesi li qakuyum wank sut nachʼaʼajkoʼk chiqu xbʼaanunkil. Jun eetalil, maare toojosqʼoʼq naq wanko saʼ li bʼe ut raachisa toonumeʼq xbʼaan naq naabʼal li kaar ut qʼaxal nakʼulmank aʼin wi ak xoobʼayk. Maare toojosqʼoʼq naq junaq tooxchʼiʼchʼiʼi ut wank sut maare tqakʼoxla naq li akʼ ruuchichʼochʼ li kixyeechiʼi li Jehobʼa yook chi bʼayk. Peʼyaal naq chiqajunilo twulaq raj chiqu naq wanq qakuyum? Saʼ li tzolom aʼin tqil kʼaru naraj xyeebʼal naq wank qakuyum ut kʼaʼut aajel ru. Joʼkan ajwiʼ tqatzʼil rix wiibʼ oxibʼ li naʼlebʼ li tooxtenqʼa re naq twanq qakuyum.

3. Chanru nanaʼlebʼak junaq li kristiʼaan li wank xkuyum naq nekeʼxchʼiʼchʼiʼi?

³ Qilaq kaahibʼ li naʼlebʼ li naxkʼutbʼesi jun li kristiʼaan li wank xkuyum. Xbʼeen, moko napoʼk ta saʼ junpaat. Naq yookebʼ xseebʼankil chi xbʼaanunkil junaq li kʼanjel inkʼaʼ najosqʼoʼk saʼ junpaat ut inkʼaʼ naxkʼe reqaj li nekeʼxbʼaanu re. Li naʼlebʼ chirix li kuyum natawmank xbʼeen sutil saʼ li Santil Hu naq nayeemank chirix li Jehobʼa naq aʼan «Yos aj  uxtaan ut tuulan, li nabʼayk chi josqʼoʼk ut makachʼin li xrahom ut li xtiikilal xchʼool!» (Éx. 34:6).

4. Chanru nanaʼlebʼak junaq li kristiʼaan li wank xkuyum naq naʼajmank naq t-oybʼeninq?

⁴ Xkabʼ, li kristiʼaan li wank xkuyum naxnaw oybʼenink. Inkʼaʼ nachalk xkʼaʼuxl chi moko nachʼaʼajkoʼk naq t-ajmanq naq t-oybʼeninq (Mat. 18:26, 27). Wank naabʼal li naʼlebʼ bʼarwiʼ tqakʼutbʼesi naq wank qakuyum chi inkʼaʼ toochʼaʼajkoʼq. Jun eetalil, naq jun li kristiʼaan yook chi aatinak, tento tqakʼe qachʼool chi rabʼinkil ut inkʼaʼ tqachʼik qibʼ (Job 36:2). Joʼkan ajwiʼ naʼajmank naq wanq qakuyum re xtenqʼankil junaq li yook xtzolbʼal li Santil Hu re naq tixkʼulubʼa jun li naʼlebʼ li yook xtzolbʼal malaj tixkanabʼ jun yibʼru aj naʼlebʼ.

5. Bʼar wank jun chik li naʼlebʼ bʼarwiʼ tqakʼutbʼesi naq wank qakuyum?

⁵ Rox, li wank xkuyum inkʼaʼ naxbʼaanu saʼ junpaat junaq li kʼanjel. Yaal naq wank sut naq saʼ junpaat tqabʼaanu junaq li kʼanjel. Abʼan naq naʼajmank xbʼaanunkil junaq li kʼanjel li wank xwankil, li kristiʼaan li wank xkuyum moko naxseebʼa ta ribʼ chi moko naxbʼaanu saʼ junpaat. Naxkʼe bʼan xhoonal re xkʼubʼankil chiʼus li kʼanjel ut naxkʼe ajwiʼ li xhoonal re xbʼaanunkil chi chaabʼil.

6. Chanru nanaʼlebʼak li wank xkuyum chiru junaq li chʼaʼajkilal?

⁶ Xka, li kristiʼaan li wank xkuyum naxkʼe xchʼool chi xkuybʼal li aaleek chi inkʼaʼ nawechʼink. Joʼkan naq li kuyum naxkʼam ribʼ rikʼin li kuyuk. Yaal, moko maak ta naq tqaye kʼaru xqakʼul re junaq li qamiiw ut chanru naqekʼa qibʼ naq naqanumsi junaq li chʼaʼajkilal. Abʼan li kristiʼaan li wank xkuyum naxyal xqʼe chi naʼlebʼak chi chaabʼil ut kʼanjelak chiru li Jehobʼa chi sa saʼ xchʼool (Col. 1:11). Ebʼ laj paabʼanel tento tqakʼutbʼesi li qakuyum saʼ chixjunil li naʼlebʼ aʼin. Kʼaʼut? Qilaq wiibʼ oxibʼ xyaalal.

7. Joʼ naxye Santiago 5:7, 8, kʼaʼut jwal wank xwankil li kuyum? (Chaawil ebʼ li jalam u).

⁷ Re naq tookoleʼq aajel ru naq twanq qakuyum. Joʼ li xmoos li Jehobʼa re li najter qʼe kutan, tento naq wanq qakuyum chi roybʼeninkil naq li Yos tixbʼaanu chixjunil li xyeechiʼom (Heb. 6:11, 12). Li Santil Hu nokooxjuntaqʼeeta rikʼin jun laj awinel (taayaabʼasi Santiago 5:7, 8). Laj awinel kaw nakʼanjelak re rawbʼal ut xchʼolaninkil li rawimq, abʼan moko naxnaw ta joqʼe ta kʼiik. Joʼkan naq wank xkuyum ut naroybʼeni naq t-uuchinq li rawimq. Joʼkan ajwiʼ nekeʼxbʼaanu ebʼ laj paabʼanel: kaw nekeʼkʼanjelak chiru li Jehobʼa usta inkʼaʼ nekeʼxnaw kʼaru kutankil tolʼelq li Qaawaʼ (Mat. 24:42). Joʼkan bʼiʼ, wanq qakuyum chi roybʼeninkil naq li Jehobʼa saʼ xhoonal tixbʼaanu chixjunil li ak xyeechiʼi. Wi maakʼaʼ raj qakuyum naru tootitzʼq chi oybʼenink ut tqakanabʼ li yaal. Naru raj taaxik qachʼool chi xsikʼbʼal li kʼaʼaq re ru li tixkʼe bʼayaq xsahil qachʼool. Abʼanan, wi wanq qakuyum, tqakuy xnumsinkil chixjunil toj saʼ rosoʼjik ut tookoleʼq (Miq. 7:7; Mat. 24:13).

8. Chanru nokooxtenqʼa li kuyum re xkʼambʼal qibʼ saʼ usilal rikʼinebʼ li junchʼol? (Colosenses 3:12, 13).

⁸ Li kuyum nokooxtenqʼa re naq tqakʼam qibʼ saʼ usilal rikʼinebʼ li junchʼol. Wi wank qakuyum, tqakʼe qachʼool chi rabʼinkilebʼ li junchʼol (Sant. 1:19). Joʼkan ajwiʼ tooʼokenq re naq twanq li tuqtuukilal. Inkʼaʼ toopoʼq saʼ junpaat chi moko tqaye junaq li aatin li tixtochʼ xchʼool junaq naq yookebʼ qaseebʼankil re xbʼaanunkil junaq li kʼanjel. Joʼkan ajwiʼ wi naxye junaq li aatin li naxtochʼ qachʼool inkʼaʼ toopoʼq saʼ junpaat chi moko tqakʼe reqaj li xbʼaanu qe. Tqakʼe bʼan qachʼool chi xkuybʼal li xeʼxbʼaanu qe (taayaabʼasi Colosenses 3:12, 13).

9. Chanru nokooxtenqʼa li kuyum naq naqasikʼ kʼaru xbʼaanunkil? (Proverbios 21:5).

⁹ Li kuyum nokooxtenqʼa re naq chaabʼil li tqasikʼ xbʼaanunkil. Inkʼaʼ naqabʼaanu junaq li kʼanjel saʼ junpaat naqakʼe bʼan qachʼool chi xnawbʼal kʼaru tooruuq xbʼaanunkil ut naqasikʼ bʼar wank re li jwal chaabʼil (taayaabʼasi Proverbios 21:5). Jun eetalil, wi yooko xsikʼbʼal li qakʼanjel, maare tqakʼulubʼa junaq li kʼanjel saʼ junpaat, usta aʼin naraj xyeebʼal naq tqakol li chʼutam malaj inkʼaʼ chik toopuktesinq. Abʼan wi wank qakuyum, tqakʼe saʼ ajl bʼar wank li kʼanjel, jarubʼ hoonal tookʼanjelaq ut chanru tixchʼaʼajki aʼin li qajunkabʼal ut li qamiiwil rikʼin li Jehobʼa. Li kuyum tooxtenqʼa re naq chaabʼil li tqasikʼ xbʼaanunkil.

10. Kʼaru tooruuq xbʼaanunkil re naq junelik twanq qakuyum?

¹⁰ Qatzʼaamaq re li Jehobʼa naq tixkʼe qakuyum. Li kuyum aʼan jun li naʼlebʼ li naruuchi li santil musiqʼej (Gál. 5:22, 23). Joʼkan naq tooruuq xpatzʼbʼal re li Jehobʼa naq tixkʼe qe li xsantil musiqʼej re naq tooxtenqʼa chi xyuʼaminkil li naʼlebʼ li naruuchi. Wi yooko xnumsinkil jun li chʼaʼajkilal ut nachʼaʼajkoʼk chiqu xkʼutbʼesinkil naq wank qakuyum, miqakanabʼ xpatzʼbʼal re li Jehobʼa li xsantil musiqʼej (Luc. 11:9, 13). Joʼkan ajwiʼ tooruuq xyeebʼal re li Jehobʼa naq tooxtenqʼa chi naʼlebʼak joʼ aʼan. Ut naq ak xootijok, qabʼaanuhaq chixjunil li wank saʼ quqʼ re xkʼutbʼesinkil li kuyum wulaj wulaj. Wi inkʼaʼ naqakanabʼ xpatzʼbʼal xtenqʼ li Jehobʼa ut naqayal qaqʼe chi xkʼutbʼesinkil  li qakuyum, tqakʼe reetal naq timil timil tqayuʼami chik li kuyum.

11, 12. Chanru kixkʼutbʼesi li Jehobʼa naq nim li xkuyum?

¹¹ Qakʼoxlaq rix ebʼ li eetalil li wank saʼ li Santil Hu. Saʼ li Santil Hu naqataw naabʼal li eetalil chirixebʼ li kristiʼaan li xeʼxkʼutbʼesi naq wankebʼ xkuyum. Wi naqakʼoxla rix ebʼ li eetalil aʼin, tooruuq xkʼutbʼesinkil li chaabʼil naʼlebʼ aʼin. Tqatzʼil rix junjunq li eetalil, abʼan xbʼeenwa tooʼaatinaq chirix li Jehobʼa, li qʼaxal nim xkuyum.

¹² Saʼ li chʼinaʼusil naʼajej Edén, laj Tza kixtzʼajni xkʼabʼaʼ li Jehobʼa ut kixwechʼ rix chanru naʼawabʼejink. Abʼan li Jehobʼa moko kixsach ta chi junajwa laj Tza, kixkʼutbʼesi li xkuyum xbʼaan naq naxnaw naq naʼajmank hoonal re xkʼutbʼesinkil naq chaabʼil naʼawabʼejink. Ut naq yook chi oybʼenink, nim xkuyum usta yookebʼ xtzʼajninkil li xkʼabʼaʼ. Joʼkan ajwiʼ xbʼaan naq nim xkuyum li Jehobʼa chi miyon ebʼ li kristiʼaan xeʼok xnawbʼal ru ut naru teʼxtaw li junelik yuʼam (2 Ped. 3:9, 15). Wi naqakʼoxla chixjunil li chaabʼilal li kitawmank saʼ xkʼabʼaʼ li xkuyum li Jehobʼa moko tchʼaʼajkoʼq ta chiqu roybʼeninkil naq tchalq li rosoʼjik.

13. Chanru kixkʼutbʼesi li Jesús chi tzʼaqal re ru li xkuyum li Xyuwaʼ naq kiwank saʼ Ruuchichʼochʼ? (Chaawil li jalam u).

¹³ Li Jesús kixkʼutbʼesi chi tzʼaqal re ru li xkuyum li Xyuwaʼ ut qʼaxal kixkʼutbʼesi naq kiwank saʼ Ruuchichʼochʼ. Wank sut kichʼaʼajkoʼk chiru xkʼutbʼesinkil li xkuyum, qʼaxal wiʼ chik rikʼinebʼ laj tzʼiibʼ ut ebʼ aj pariseey, xbʼaan naq ebʼ aj kaʼpakʼal u (Juan 8:25-27). Abʼan joʼ li Xyuwaʼ, li Jesús moko saʼ junpaat ta najosqʼoʼk. Inkʼaʼ kihobʼok chi moko kixkʼe reqaj li xeʼxbʼaanu re li xikʼ nekeʼilok re (1 Ped. 2:23). Kixkuy bʼan  li aaleek rikʼin kuyum ut chi maakʼaʼ kixye. Joʼkan peʼ naq li Santil Hu naxye: «Chekʼoxla rix li Jesus li kixkuy xnimal tzʼeqtaanaak xbʼaanebʼ laj maak» (Heb. 12:2, 3). Rikʼin xtenqʼ li Jehobʼa, tooruuq xkuybʼal rikʼin kuyum yalaq kʼaru chi aaleek li tchalq chiqu.

14. Kʼaru naqatzol rikʼin xkuyum laj Abrahán? (Hebreos 6:15; chaawil ebʼ li jalam u).

¹⁴ Kʼaru tooxtenqʼa re naq twanq qakuyum chi roybʼeninkil naq tchalq li rosoʼjik? Maare naqakʼoxla naq ak xkʼulunk raj chik li rosoʼjik ut maare naqakʼoxla naq inkʼaʼ chik tqil. Joʼkan naq qakʼehaq reetal li kixkʼul laj Abrahán. Naq li Jehobʼa kixyeechiʼi re laj Abrahán «aawikʼin twisi jun xnimal ru tenamit» ak wank 75 chihabʼ re ut moko wank ta ralal xkʼajol (Gén. 12:1-4). Ma kiril laj Abrahán naq kitzʼaqlok ru li yeechiʼom aʼin? Kiril bʼayaq. Naq ak kixqʼax li nimaʼ Éufrates, kiroybʼeni 25 chihabʼ. Tojaʼ naq kiyoʼlaak laj Isaac. Ut 60 chihabʼ chirix aʼin xeʼyoʼlaak laj Esaú ut laj Jacob, ebʼ li ri (taayaabʼasi Hebreos 6:15). Abʼan laj Abrahán moko kiril ta naq li ralal xkʼajol twanq joʼ jun nimla tenamit ut teʼrechani li Chʼochʼ li Yeechiʼinbʼil rehebʼ. Usta joʼkan laj Abrahán li tiik xchʼool kiwank saʼ amiiwil rikʼin li Jehobʼa (Sant. 2:23). Ma nakaakʼoxla li sahil chʼoolejil li trekʼa laj Abrahán naq twakliiq wiʼ chik chi yoʼyo? Tixkʼe reetal naq saʼ xkʼabʼaʼ li xkuyum ut li xpaabʼal chixjunilebʼ li tenamit keʼosobʼtesiik (Gén. 22:18). Kʼaru naqatzol? Maare inkʼaʼ tqil chanru ttzʼaqloq ru chixjunil li xyeechiʼom li Jehobʼa saʼ li qakutan. Abʼan wi wanq qakuyum joʼ laj Abrahán, chʼolchʼooq chiqu naq li Jehobʼa toorosobʼtesi anaqwan ut qʼaxal wiʼ chik saʼ li akʼ ruuchichʼochʼ (Mar. 10:29, 30).

15. Kʼaru naru naqatzʼil rix naq tootzoloq saʼ junesal?

 ¹⁵ Saʼ li Santil Hu wank jalan jalanq li eetalil chirixebʼ li kristiʼaan li xeʼwank xkuyum (Sant. 5:10). Kʼe aachʼool chi xtzolbʼal ebʼ li eetalil aʼin. b Jun eetalil, laj David toj saaj chaq naq kiyuleʼk ru re naq twanq joʼ awabʼej re Israel, abʼan kiroybʼeni naabʼal chihabʼ re naq t-oq chi awabʼejink. Laj Simeón ut li xʼAna xeʼkʼanjelak chi kaw chiru li Jehobʼa naq yookebʼ roybʼeninkil li Mesiiy (Luc. 2:25, 36-38). Naq taatzol ebʼ li eetalil aʼin, kʼoxla rix: «Kʼaru kitenqʼank re li kristiʼaan aʼin re naq twanq xkuyum? Kʼaru rusilal kixtaw naq kixkʼutbʼesi li naʼlebʼ aʼin? Chanru tinkʼam we rikʼin?». Joʼkan ajwiʼ naru taatzol naabʼal li naʼlebʼ chirixebʼ li inkʼaʼ xeʼwank xkuyum (1 Sam. 13:8-14). Kʼoxla rix: «Kʼaʼut inkʼaʼ xeʼwank xkuyum? Kʼaru li chʼaʼajkilal xeʼxtaw naq inkʼaʼ xeʼxkʼutbʼesi li xkuyum?».

16. Ye junjunq li rusilal li taataw naq wank aakuyum.

¹⁶ Qakʼoxlaq rix li rusilal li tqataw naq twanq qakuyum. Li kuyum nokooxtenqʼa re naq sahaq ut tuqtu ru li qachʼool. Joʼkan naq tooruuq xyeebʼal naq us choʼq re li qajunxaqalil ut li qakʼaʼuxl. Joʼkan ajwiʼ, nokooxtenqʼa re xkʼambʼal qibʼ chiʼus rikʼinebʼ li junchʼol ut re naq twanq saʼ junajil li chʼuut. Wi inkʼaʼ nokoojosqʼoʼk saʼ junpaat naq nokooʼeʼxchʼiʼchʼiʼi, tooruuq xbʼaanunkil naq inkʼaʼ tnimanq ru li chʼaʼajkilal (Sal. 37:8; Prov. 14:29). Abʼan li rusilal li naqataw naq wank qakuyum, aʼan naq naqakʼam qe rikʼin li qachoxahil Yuwaʼ ut nokoojilok chixkʼatq.

17. Kʼaru tqaj xbʼaanunkil?

¹⁷ Joʼ ak xqatzol li kuyum aʼan jun li chʼinaʼusil naʼlebʼ ut naqataw rusilal naq naqakʼutbʼesi. Usta wank sut nachʼaʼajkoʼk chiqu xkʼutbʼesinkil, li Jehobʼa tooxtenqʼa re naq tqabʼaanu. Naq naqoybʼeni rikʼin kuyum naq tchalq li akʼ ruuchichʼochʼ, chʼolchʼooq chiqu naq «li Qaawaʼ naxkʼaakʼalehebʼ li nekeʼxiwank ru, ebʼ li wankebʼ roybʼenihom rikʼin li xrahom» (Sal. 33:18). Joʼkan naq qakʼehaq qachʼool chi xkʼutbʼesinkil li kuyum.