1. Kʼaʼut naq ebʼ laj Babilonia xkohebʼ xchʼool chirix laj Daniel?

 NAQ laj Daniel saaj chaq ebʼ laj Babilonia keʼxkʼam joʼ preex najt bʼarwiʼ wank li rochoch. Abʼan usta toj saaj ebʼ laj Babilonia keʼril li xbʼaanuhom laj Daniel. Ebʼ laj Babilonia xkohebʼ xchʼool chirix «chanru naʼilok»: jun saaj li kaw xjunxaqalil ut nachalk saʼ jun li junkabʼal li wank xwankil (1 Sam. 16:7). Joʼkan naq xeʼxtzol re naq tkʼanjelaq rikʼin li awabʼej re Babilonia (Dan. 1:3, 4, 6).

2. Kʼaru naxkʼoxla li Jehobʼa chirix laj Daniel? (Ezequiel 14:14).

² Li Jehobʼa naxra laj Daniel saʼ xkʼabʼaʼ chanru nanaʼlebʼak moko saʼ xkʼabʼaʼ ta chanru naʼilok malaj wi wank xwankil. Wank tana junmay chihabʼ re laj Daniel naq li Jehobʼa kixye naq li xnaʼlebʼ chanchan joʼ laj Noé ut laj Job. Li Jehobʼa kixkʼoxla naq laj Daniel tiik xchʼool joʼebʼ li winq aʼin, li xeʼkʼanjelak chi anchal xchʼoolebʼ chiru naabʼal chihabʼ (Gén. 5:32; 6:9, 10; Job 42:16, 17; taayaabʼasi Ezequiel 14:14). Li Jehobʼa maajunwa kixkanabʼ xraabʼal laj Daniel, li kiwank chiru naabʼal chihabʼ (Dan. 10:11, 19).

3. Kʼaru tqil saʼ li tzolom aʼin?

³ Saʼ li tzolom aʼin tqil wiibʼ li naʼlebʼ li kixbʼaanu naq laj Daniel jwal oxloqʼaq chiru li Jehobʼa. Xbʼeenwa tooʼaatinaq chirixebʼ li naʼlebʼ aʼin ut tqil joqʼe kiroksi laj Daniel. Moqon tqil kʼaru kixbʼaanu laj Daniel re xyuʼaminkil ebʼ li naʼlebʼ aʼin. Ut tooʼaatinaq ajwiʼ chirix kʼaru tooruuq xbʼaanunkil re xkʼambʼal qe rikʼin. Usta li tzolom aʼin choʼq rehebʼ li saaj, chiqajunilo naru tqatzol qanaʼlebʼ rikʼin laj Daniel.

4. Joqʼe kixkʼutbʼesi laj Daniel naq kaw xchʼool?

⁴ Ebʼ li kristiʼaan li kawebʼ xchʼool naru naq teʼxuwaq abʼan inkʼaʼ nekeʼxkanabʼ naq aʼin tixbʼaanu naq inkʼaʼ us teʼnaʼlebʼaq.  Qʼaxal kaw xchʼool laj Daniel. Qilaq wiibʼ li naʼlebʼ bʼarwiʼ kixkʼutbʼesi aʼin. Li xbʼeen maare kikʼulmank naq ak xnumeʼk wiibʼ chihabʼ naq ebʼ laj Babilonia keʼxjukʼ li tenamit Jerusalén. Li awabʼej Nabucodonosor kixmatkʼe jun li jalam u li xuwajel ru. Moqon chik, kixye rehebʼ chixjunilebʼ li wankebʼ xnawom aran Babilonia, saʼ xyanq aʼin wank laj Daniel, naq teʼxye re kʼaru kixmatkʼe ut kʼaru xyaalal. Wi inkʼaʼ teʼxbʼaanu, teʼkamsiiq (Dan. 2:3-5). Laj Daniel tento naq saʼ junpaat tnaʼlebʼaq xbʼaan naq wankebʼ saʼ xiwxiwal li xyuʼam. Joʼkan naq «koho rikʼin li awabʼej re xtzʼaamankil chiru naq chixkuyaq jun kʼamokaq chik, re naq truuq xchʼolobʼankil xyaalal li xmatkʼ» (Dan. 2:16). Re xbʼaanunkil aʼin aajel ru naq wanq xpaabʼal ut kawaq xchʼool. Kʼaʼut? Xbʼaan naq li Santil Hu moko naxye ta naq laj Daniel ak naxchʼolobʼ ebʼ li matkʼ. Laj Daniel kiʼaatinak rikʼin laj Sadrac, laj Mesac ut laj Abednego, b ebʼ li ramiiw ut «kixtzʼaama ajwiʼ chiruhebʼ naq tijoqebʼ chiru li Qaawaʼ, re xpatzʼbʼal xnimal ruxtaan li xYos li choxa chirix li tzʼaptzʼookil naʼlebʼ aʼan» (Dan. 2:18). Li Jehobʼa kixsume ebʼ li xtij ut rikʼin li xtenqʼ, laj Daniel kiruuk xyeebʼal xyaalal li xmatkʼ li awabʼej. Aʼan ut ebʼ li ramiiw moko keʼkamsiik ta!

5. Joqʼe chik kixkʼutbʼesi laj Daniel naq kaw xchʼool?

⁵ Naq ak kixye xyaalal li matkʼ chirix li jalam u li xuwajel, laj Daniel kixkʼutbʼesi wiʼ chik li xkawilal xchʼool saʼ jun chik li naʼlebʼ. Saʼ jun kutan laj Nabucodonosor kiwank jun chik li xmatkʼ li xuwajel ru, bʼarwiʼ kiril jun li nimla cheʼ li najt xteram. Laj Daniel kixkʼutbʼesi naq kaw xchʼool ut kixchʼolobʼ chiru laj Nabucodonosor li xyaalal li xmatkʼ. Kixye re naq tkanoʼq ru ut naq chiru jun qʼehil tixkanabʼ wank joʼ awabʼej (Dan. 4:25). Laj Nabucodonosor kiruuk raj xkʼoxlankil naq laj Daniel yook xqʼetbʼal ribʼ chiru ut kixtaqla raj xkamsinkil, abʼan laj Daniel kixkʼutbʼesi naq kaw xchʼool ut maakʼaʼ kixmuq chiru li awabʼej.

6. Kʼaru tana kitenqʼank re laj Daniel re naq kawaq xchʼool?

⁶ Kʼaru tana kitenqʼank re laj Daniel re naq junelik kawaq xchʼool? Chʼolchʼo naq chiru li xsaajilal naabʼal li naʼlebʼ kixtzol rikʼin li xnaʼ xyuwaʼ. Ebʼ aʼan keʼabʼink  chiru li naʼlebʼ li kixkʼe li Jehobʼa rehebʼ li naʼbʼej yuwaʼbʼej aj Israel ut keʼxkʼut chiru li Xchaqʼrabʼ li Yos (Deut. 6:6-9). Laj Daniel moko kaʼaj tawiʼ naxnaw li naxye li Lajeebʼ chi Chaqʼrabʼ, chʼolchʼo chiru kʼaru ebʼ li tzekemq teʼruuq xtzekankil ebʼ laj Israel ut kʼaru inkʼaʼ (Lev. 11:4-8; Dan. 1:8, 11-13). c Joʼkan ajwiʼ naxnaw chirix li xtenamit li Yos ut li nakʼulmank naq nekeʼxqʼet li xnaʼlebʼ li Yos (Dan. 9:10, 11). Chixjunil li kixkʼul saʼ li xyuʼam kixkʼutbʼesi chiru naq li Jehobʼa ut ebʼ li ánjel wankebʼ rikʼin re xtenqʼankil (Dan. 2:19-24; 10:12, 18, 19).

7. Kʼaru chik kitenqʼank re laj Daniel re naq kawaq xchʼool? (Chaawil li jalam u).

⁷ Laj Daniel kʼaynaq xtzolbʼal li keʼxtzʼiibʼa ebʼ li xpropeet li Yos joʼ li kixtzʼiibʼa laj Jeremías. Xbʼaan aʼin kixtaw ru naq ebʼ laj judiiy li keʼkʼameʼk Babilonia chi seebʼ t-elq (Dan. 9:2). Naq kixkʼe reetal chanru yook chi tzʼaqlok ru ebʼ li propesiiy, qʼaxal wiʼ chik kixkʼojobʼ xchʼool rikʼin li Jehobʼa. Ut naq junaq li kristiʼaan qʼaxal naxkʼojobʼ xchʼool rikʼin li Jehobʼa, kaw xchʼool (juntaqʼeeta li naʼlebʼ aʼin rikʼin Romanos 8:31, 32, 37-39). Li kitenqʼank ajwiʼ re laj Daniel aʼan naq junelik natijok chiru li xchoxahil Yuwaʼ (Dan. 6:10). Naxye re li maak li naxbʼaanu, chanru narekʼa ribʼ ut naxpatzʼ xtenqʼ re (Dan. 9:4, 5, 19). Moko kaw ta xchʼool laj Daniel naq kiyoʼlaak. Kixkawresi li naʼlebʼ aʼin naq kitzolok, kitijok ut kixkʼojobʼ xchʼool rikʼin li Jehobʼa.

8. Kʼaru ttenqʼanq qe re naq kawaq qachʼool?

⁸ Usta ebʼ li qanaʼ qayuwaʼ kawebʼ xchʼool ut tooʼeʼxkawresi re naq joʼkan toonaʼlebʼaq moko naqechani ta li naʼlebʼ aʼin rikʼinebʼ, tento bʼan naq laaʼo tqakawresi. Li kawil chʼoolej chanchan xtzolbʼal jun akʼ kʼanjel. Re naq tqatzol chiʼus, aajel ru naq tqakʼe reetal li naxbʼaanu li nakʼutuk chiqu ut xkʼambʼal qe rikʼin. Re naq kawaq qachʼool tento tqakʼe reetal ani nekeʼnaʼlebʼak chi joʼkan ut xkʼambʼal qe rikʼinebʼ. Kʼaru xqatzol rikʼin laj Daniel? Aajel ru naq tqatzol chiʼus li Santil Hu, naq toowanq saʼ amiiwil rikʼin li Jehobʼa rikʼin tijok chi anchal qachʼool ut xkʼojobʼankil qachʼool naq maajunwa tooxkanabʼ qajunes. Wi naqabʼaanu aʼin, kawaq qachʼool naq tyaleʼq rix li qapaabʼal.

9. Kʼaru rusilal naqataw naq kaw qachʼool?

⁹ Naabʼal rusilal naqataw naq kaw qachʼool. Qilaq li kixkʼul laj Ben, d li wank Alemania. Saʼ li xtzolebʼaal chixjunilebʼ nekeʼxpaabʼ naq chixjunil kiyoʼlaak xjunes ut nekeʼxkʼoxla naq li naxye li Santil Hu chirix li yobʼtesihom moko yaal ta. Saʼ jun kutan keʼxkʼe xhoonal re naq truuq xyeebʼal kʼaʼut chʼolchʼo chiru naq li Yos kiyobʼtesink re li yuʼam ut chi maakʼaʼ xxiw kixchʼolobʼ li xpaabʼal. Kʼaru rusilal kixtaw? Aʼan naxye: «Laj kʼutunel kixkʼe xchʼool chi wabʼinkil ut kixjekʼi rehebʼ li wechtzolom reetalil li hu li xinkawresi re xchʼolobʼankil linpaabʼal». Chanru keʼnaʼlebʼak ebʼ li rechtzolom? Laj Ben naxye: «Naabʼalebʼ keʼxkʼe xchʼool chi wabʼinkil ut keʼxye we naq chaabʼil innaʼlebʼ». Li kixkʼul naxkʼutbʼesi naq ebʼ li kristiʼaan li kawebʼ xchʼool nekeʼoxloqʼiik xbʼaanebʼ li junchʼol ut nekeʼxbʼaanu naq ebʼ li junchʼol teʼraj xnawbʼal xkomon xnaʼlebʼ chirix li Jehobʼa. Chʼolchʼo naq wank rusilal xyalbʼal qaqʼe re naq kawaq qachʼool.

10. Kʼaru li tiikil chʼoolej?

¹⁰ Saʼ li Santil Hu li aatin saʼ hebreo li najalmank joʼ «tiikil chʼoolej» malaj «tzʼaqal rahok» naraj xyeebʼal li rahok li maajoqʼe naʼosoʼk. Li aatin aʼin naabʼal sut naʼoksimank re aatinak chirix li rahom li narekʼa li Yos chirixebʼ laj kʼanjel chiru. Naʼoksimank ajwiʼ re aatinak chirix li rahok li nekeʼxkʼutbʼesi chiribʼilebʼ ribʼ laj kʼanjel chiru li Yos (2 Sam. 9:6, 7). Li Jehobʼa naroybʼeni naq tiikaq qachʼool chiru. Ut aʼin qʼaxal nakawuuk saʼ xnumikebʼ li kutan. Aʼin kikʼutunk rikʼin laj Daniel.

11. Kʼaru chʼaʼajkilal kixnumsi laj Daniel naq ak numenaq 90 chihabʼ wank re? (Chaawil li jalam u chiru li hu).

¹¹ Chiru li xyuʼam laj Daniel kixkʼutbʼesi naabʼal sut naq tiik xchʼool chiru li Jehobʼa. Abʼan naq ak numenaq 90 chihabʼ wank re, kixnumsi jun li nimla chʼaʼajkilal. Chiruhebʼ li kutan aʼan li tenamit Babilonia wank rubʼel xwankil ebʼ laj medo ut ebʼ laj persa ut laj Darío yook chi awabʼejink. Wiibʼ oxibʼ li nekeʼkʼanjelak chiru li awabʼej xikʼ nekeʼril laj Daniel ut inkʼaʼ nekeʼroxloqʼi li Jehobʼa. Joʼkan naq keʼxkʼubʼ chanru teʼxkamsi laj Daniel. Keʼxbʼaanu naq laj Darío tixjuchʼ jun li chaqʼrabʼ li tixkʼe saʼ chʼaʼajkilal laj Daniel: tento tixkʼutbʼesi ma tiik xchʼool chiru li Yos malaj chiru li awabʼej. Re xkʼutbʼesinkil naq tiik xchʼool chiru li awabʼej kaʼajwiʼ tixkanabʼ tijok chiru li Yos chiru 30 kutan. Laj Daniel kixkʼutbʼesi naq tiik xchʼool chiru li Jehobʼa joʼkan naq kikʼuteʼk saʼ xyanqebʼ li kaqkoj. Abʼan li Jehobʼa kixkol ut chi joʼkan kixqʼajkamu xbʼaan naq junelik tiik xchʼool (Dan. 6:12-15, 20-22). Kʼaru ttenqʼanq qe re naq junelik tiikaq qachʼool joʼ laj Daniel?

12. Kʼaru kixbʼaanu laj Daniel re xkawubʼresinkil li xtiikilal chiru li Jehobʼa?

¹² Re naq tiikaq qachʼool chiru li Jehobʼa aajel ru xraabʼal chi anchal qachʼool. Laj Daniel junelik kiwank chi tiik xchʼool chiru li xchoxahil Yuwaʼ xbʼaan naq naxra chi anchal xchʼool. Li xrahom chirix li Jehobʼa kikʼiik naq kixkʼoxla rix li xchaabʼil naʼlebʼ ut chanru naxkʼutbʼesi (Dan. 9:4). Laj Daniel kixnaʼlebʼa rix chixjunil li chaabʼil naʼlebʼ li kixbʼaanu li Jehobʼa chirix ut chirix li xtenamit (Dan. 2:20-23; 9:15, 16).

13. a) Kʼaru ebʼ li chʼaʼajkilal nekeʼxnumsi ebʼ li saaj re xkʼutbʼesinkil naq tiikebʼ xchʼool? Kʼe jun eetalil. (Chaawil li jalam u). b) Kʼaru tooruuq xyeebʼal re junaq li kristiʼaan naq tixpatzʼ qe wi ebʼ laj Testiiw nekeʼxkʼulubʼa li xnaʼlebʼebʼ li ixqiwinq? (Chaawil saʼ jw.org li bʼideo «Li xkʼanjel li tiikilal aʼan li wank saʼ tuqtuukilal»).

 ¹³ Joʼ laj Daniel, ebʼ li saaj wankebʼ saʼ xyanqebʼ li kristiʼaan li inkʼaʼ nekeʼroxloqʼi li Jehobʼa chi moko li xnaʼlebʼ. Maare ebʼ li kristiʼaan aʼin xikʼ nekeʼril ebʼ li nekeʼxye naq nekeʼxra li Yos ut nekeʼxmin ruhebʼ li saaj re naq inkʼaʼ chik tiikaqebʼ xchʼool chiru li Jehobʼa. Aʼan li kixkʼul laj Gabriel, li wank Australia. Naq saaj chaq kixkʼul jun li nimla aaleek saʼ li xtzolebʼaal. Laj kʼutunel kixpatzʼ rehebʼ kʼaru teʼxbʼaanu wi jun rehebʼ li ramiiw tixseeraqʼi rehebʼ naq ixqiwinq. Kixye rehebʼ naq teʼxkʼe ribʼ saʼ wiibʼ li chʼuut, jun li nekeʼxkʼulubʼa chanru nanaʼlebʼak ebʼ li ramiiw ut jun chik li inkʼaʼ nekeʼxkʼulubʼa. Laj Gabriel naxye: «Chixjunilebʼ keʼxkʼulubʼa chanru nanaʼlebʼak kaʼajwiʼ laaʼin ut jun chik laj Testiiw inkʼaʼ xooʼokenk chirix». Li kikʼulmank moqon kixyal rix li xtiikilal xchʼool. Laj Gabriel naxjultika: «Toj maajiʼ naraqeʼk li tzolok ut ebʼ li qechtzolonel ut laj kʼutunel xeʼok qahobʼal ut qaseʼenkil. Xinbʼaanu chixjunil li wank saʼ wuqʼ re naʼlebʼak chi chaabʼil ut xchʼolobʼankil rehebʼ linpaabʼal. Abʼan inkʼaʼ keʼraj wabʼinkil». Chanru kirekʼa ribʼ laj Gabriel? Aʼan naxye: «Inkʼaʼ kiwulak chiwu naq yookebʼ inhobʼal abʼan sa inchʼool xbʼaan naq xinkʼutbʼesi naq tiik inchʼool chiru li Jehobʼa ut xinkol rix linpaabʼal».

14. Kʼaru tqabʼaanu re naq junelik tiikaq qachʼool chiru li Jehobʼa?

¹⁴ Joʼ laj Daniel naru naq tiikaq qachʼool chiru li Jehobʼa wi naqara chi anchal qachʼool. Re naq tkʼiiq li qarahom chirix li Jehobʼa tento naq tqatzol li xchaabʼil naʼlebʼ ut tooruuq xbʼaanunkil aʼin rikʼin xtzolbʼal li xyobʼtesihom (Rom. 1:20). At saaj, kʼaru li tenqʼ wank re naq li oxloqʼink ut laarahom chirix li Jehobʼa qʼaxal tkʼiiq? Saʼ li naʼaj «Ma wank ani kiyobʼtesink re?» wank ebʼ li bʼideo li tatruuq rilbʼal. Joʼkan ajwiʼ tatruuq rilbʼal ebʼ li hu ¿Es la vida obra de un Creador? ut Oobʼ li patzʼom li tento xtzʼilbʼal rix chirix li xtiklajik li yuʼam, maakʼaʼ saʼ qʼeqchiʼ. Kʼe reetal li kixye li xʼEsther, li wank Dinamarca: «Nawulak chiwu ebʼ li naʼlebʼ li wank saʼ li hu aʼin. Moko naxye ta aawe kʼaru taapaabʼ, naxkʼutbʼesi bʼan chaawu ebʼ li naʼlebʼ re naq tchʼolaaq chaawu kʼaru xpaabʼankil». Laj Ben, li xooʼaatinak chirix saʼ li raqal bʼeleebʼ naxye: «Ebʼ li hu aʼin qʼaxal xeʼxkawubʼresi linpaabʼal. Kixkʼut chiwu naq li Yos kiyobʼtesink re li yuʼam». Naq ak xaatzol li naʼlebʼ aʼin maare taakʼulubʼa li naxye Apocalipsis 4:11: «Aakʼulubʼ, at Qaawaʼ, at qaYos, xkʼulbʼal laanimal laaloqʼal, li loqʼonink ut laawankilal, xbʼaan naq laaʼat katyoobʼtesink re chixjunil». e

15. Kʼaru chik tqabʼaanu re naq tkawuuq li qamiiwil rikʼin li Jehobʼa?

¹⁵ Jun chik li naʼlebʼ li tooxtenqʼa re naq qʼaxal wiʼ chik tqara li Jehobʼa aʼan xtzʼilbʼal rix li xyuʼam li Ralal, aʼ li Jesús. Aʼan li kixbʼaanu li xSamira, jun li saaj li wank Alemania. Aʼan naxye: «Xinnaw ru chiʼus li Jehobʼa xbʼaan li Jesús». Saʼ xkachʼinal, li xSamira nachʼaʼajkoʼk chiru xtawbʼal ru naq li Jehobʼa narekʼa li naqekʼa abʼan moko naxkʼul ta aʼin rikʼin li Jesús. Aʼan naxye: «Nawulak chiwu li xnaʼlebʼ li Jesús xbʼaan naq naxrahebʼ li kokʼal ut moko chʼaʼaj ta wank choʼq ramiiw». Naq naxtzol  xkomon xnaʼlebʼ chirix, qʼaxal nakawuuk li ramiiwil rikʼin li Jehobʼa. Kʼaʼut? Li xSamira naxye: «Timil timil xintaw ru naq li Jesús naxkʼam re rikʼin li Xyuwaʼ chi tzʼaqal re ru. Ut xinkʼe reetal naq jun rehebʼ li xyaalal kʼaʼut li Jehobʼa kixtaqla chaq li Ralal saʼ Ruuchichʼochʼ, aʼan re naq tooruuq xnawbʼal ru chiʼus li Jehobʼa» (Juan 14:9). At saaj, wi taawaj xkawubʼresinkil laaʼamiiwil rikʼin li Jehobʼa, kʼaʼut naq inkʼaʼ nakaatzol xkomon aanaʼlebʼ chirix li Jesús? Wi taabʼaanu, laarahom chirix li Jehobʼa ut li xtiikilal laachʼool chiru qʼaxal tkawuuq.

16. Kʼaʼut us naq tiikaq qachʼool? (Salmo 18:26; Miqueas 6:8).

¹⁶ Wi tiik qachʼool chiruhebʼ li junchʼol, ebʼ li qamiiw tiikaqebʼ ajwiʼ xchʼool qikʼin (Rut 1:14-17). Joʼkan ajwiʼ, wi tiik qachʼool chiru li Jehobʼa sa tqekʼa qibʼ. Kʼaʼut? Xbʼaan li Jehobʼa naxye naq tiik xchʼool rikʼinebʼ li tiikebʼ xchʼool (taayaabʼasi Salmo 18:26; Miqueas 6:8). Peʼyaal naq kʼajoʼ xchʼinaʼusal naq laj Yobʼtesinel traj wank choʼq qamiiw usta laaʼo maakʼaʼ qawankil? Ut naq wanko saʼ amiiwil rikʼin li Jehobʼa maakʼaʼ naru tooxnajtobʼresi rikʼin chi moko li kamk (Dan. 12:13; Luc. 20:37, 38; Rom. 8:38, 39). Joʼkan bʼiʼ, wank xyaalal xkʼambʼal qe rikʼin laj Daniel ut naq junelik tiikaq qachʼool chiru li Jehobʼa.

17, 18. Kʼaru chik naqatzol chirix laj Daniel?

¹⁷ Saʼ li tzolom aʼin kaʼajwiʼ xooʼaatinak chirix wiibʼ li xchaabʼil naʼlebʼ laj Daniel. Abʼan naabʼal chik tooruuq xtzolbʼal chirix li xyuʼam. Jun eetalil, li Jehobʼa kixbʼaanu naq laj Daniel tril ebʼ li matkʼ ut ebʼ li moy u joʼ ajwiʼ kixbʼaanu naq tixye xyaalal ebʼ li propesiiy. Naabʼal rehebʼ li propesiiy aʼin ak xeʼtzʼaqlok ru ut junchʼol chik nekeʼxkʼe xkomon li naʼlebʼ chirix li tkʼulmanq saʼebʼ li kutan chalk re ut chanru tixchʼaʼajki aʼin ebʼ li kristiʼaan li wankebʼ saʼ Ruuchichʼochʼ.

¹⁸ Li jun chik tzolom t-aatinaq chirix wiibʼ li propesiiy li wank saʼ li hu Daniel. Xtawbʼal ru chiʼus tooxtenqʼa chiqajunilo, joʼ saaj joʼ cheek, re naq anaqwan us li tqasikʼ xbʼaanunkil saʼ li qayuʼam. Ebʼ li propesiiy aʼin tooxtenqʼa ajwiʼ re naq qʼaxal kawaq ut tiikaq qachʼool chiru li Jehobʼa, re naq chi joʼkan kawresinbʼilaqo re xnumsinkil li yalbʼaʼix li chi seebʼ tchalq.