Saʼ li tzolom aʼan xqatzol naq jun ajwiʼ li naʼlebʼ nokooxchʼaʼajki ebʼ li kristiʼaan ut ebʼ li ánjel: xsantobʼresinkil li xkʼabʼaʼ li Jehobʼa. Li xkʼulubʼ chi awabʼejink li Jehobʼa, naraj xyeebʼal wi us malaj inkʼaʼ us naʼawabʼejink, naxchap ribʼ rikʼin xsantobʼresinkil li xkʼabʼaʼ. Joʼkan ajwiʼ wi jun li poyanam tiik xchʼool chiru li Jehobʼa malaj inkʼaʼ, naʼokenk ajwiʼ rikʼin li naʼlebʼ re xsantobʼresinkil li xkʼabʼaʼ li Jehobʼa.

Abʼan, kʼaʼut naq anaqwan qʼaxal yook chi kʼemank xwankil li xkʼabʼaʼ li Jehobʼa ut xsantobʼresinkil li xkʼabʼaʼ? Qilaq oxibʼ xyaalal.

Xbʼeen, saʼ li chʼinaʼusil naʼajej Edén, laj Tza kixwechʼ rix li xkʼabʼaʼ li Jehobʼa malaj li nayeemank chirix li xkʼabʼaʼ. Rikʼin li patzʼom li kixbʼaanu laj Tza re li xʼEva kixjalpaqi ru li kixye li Yos ut kiraj xyeebʼal naq li Yos moko chaabʼil ta rikʼinebʼ ut naq kaw nataqlank. Moqon laj Tza kixjal li kixye li Jehobʼa ut chi joʼkan kixkanabʼ joʼ aj tikʼtiʼ. Naq kixbʼaanu aʼin kiyoobʼank tikʼtiʼ chirix li xkʼabʼaʼ li Jehobʼa. Ut chalen aran kikanaak joʼ «laj tza» li naraj xyeebʼal «aj yoobʼanel tikʼtiʼ» (Juan 8:44). Li xʼEva inkʼaʼ kiʼabʼink chiru li Yos xbʼaan naq kixpaabʼ li xtikʼtiʼ laj Tza chi joʼkan kixqʼet ribʼ chiru li xnimajwal wankilal li Jehobʼa (Gén. 3:1-6). Saʼebʼ li qakutan laj Tza toj naxwechʼ rix li xkʼabʼaʼ li Yos, rikʼin li xtikʼtiʼ naxye naq yibʼru li xnaʼlebʼ li Jehobʼa. Ut maare ebʼ li kristiʼaan li nekeʼxpaabʼ li tikʼtiʼ aʼin inkʼaʼ teʼabʼinq chiru li Jehobʼa. Choʼq re laj kʼanjel chiru li Yos jun nimla rahilal rilbʼal naq nayeemank tikʼtiʼ chirix li xkʼabʼaʼ li Jehobʼa. Saʼ xkʼabʼaʼ aʼin wank li rahilal ut li maaʼusilal saʼ ruuchichʼochʼ.

Xkabʼ, re naq chaabʼil twanq chixjunil li xyobʼtesihom li Jehobʼa tixsach chixjunil li tikʼtiʼ li kiyeemank chirix li xkʼabʼaʼ ut tixsantobʼresi. Choʼq re qʼaxal wank xwankil li naʼlebʼ aʼin. Joʼkan naq naxye: «Laaʼin tinkʼut chiruhebʼ li tenamit naq qʼaxal sant linkʼabʼaʼ» (Ezeq. 36:23). Saʼ li tij li kixkʼut li Jesús kixye: «Santobʼresinbʼil taxaq laakʼabʼaʼ». Chi joʼkan kixkʼut chiqu naq qʼaxal wank xwankil tijok chirix li naʼlebʼ aʼin (Mat. 6:9). Naabʼal sut li Santil Hu naxkʼe xwankil xnimankil li xkʼabʼaʼ li Jehobʼa. Qilaq junjunq li eetalil. «Chenimaaq li xkʼabʼaʼ li Qaawaʼ» (1 Crón. 16:29; Sal. 96:8). «Chebʼicha xloqʼal li xkʼabʼaʼ» (Sal. 66:2). «Junelik tinkʼe xloqʼal laakʼabʼaʼ» (Sal. 86:12). Naq li Jehobʼa kiʼaatinak chaq saʼ choxa, li Jesús wank Jerusalén ut kixye re li Xyuwaʼ: «Chanima xloqʼal laakʼabʼaʼ». Li Jehobʼa kixye re: «Ak xinnima xloqʼal ut tinnima wiʼ chik» (Juan 12:28). a

Rox, li rajom li Jehobʼa aʼan naq li xsantil xkʼabʼaʼ tnimaaq ru chi junelik. Qakʼoxlaq li xwankilal li xkʼabʼaʼ li Jehobʼa naq ak xraqeʼk chi Awabʼejink li Jesús chiru li Jun Mil Chihabʼ, naq ak xraqeʼk li yalbʼaʼix. Kʼaru teʼxkʼoxla ebʼ li kristiʼaan ut ebʼ li ánjel chirix xsantobʼresinkil li xkʼabʼaʼ li Jehobʼa? Re xnawbʼal, aatinaqo chirix wiibʼ li naʼlebʼ  bʼarwiʼ naʼokenk li wechʼink aʼin: li xtiikilal xchʼool ebʼ li poyanam ut li xkʼulubʼ chi awabʼejink li Jehobʼa. Inkʼaʼ chik tyaleʼq rix li xtiikilal xchʼool ebʼ li poyanam. Kʼaʼut? Xbʼaan naq ak tzʼaqalaqebʼ chik re ru li xyuʼam ut xeʼxqʼax ru li yalbʼaʼix li t-uxmanq saʼ xraqik li jun mil chihabʼ. Teʼruuq wank chi junelik. Kʼaru tkʼulmanq chirix li naʼlebʼ naq kaʼajwiʼ li Jehobʼa wanq xkʼulubʼ chi awabʼejink? Li naʼlebʼ aʼin inkʼaʼ chik tixkʼe qakʼaʼuxl chi moko jachok ibʼ. Kʼaʼut? Xbʼaan naq ak xkʼutbʼesimank naq kaʼajwiʼ li Jehobʼa naru chi awabʼejink chiʼus. Abʼan, kʼaru tkʼulmanq rikʼin li xkʼabʼaʼ li Jehobʼa?

Li xkʼabʼaʼ li Jehobʼa ak santobʼresinbʼilaq chik ut maakʼaʼ chik ttzʼajninq re. Abʼan li xkʼabʼaʼ li Jehobʼa qʼaxal twanq xwankil chiruhebʼ laj kʼanjel chiru joʼ saʼ choxa joʼ saʼ ruuchichʼochʼ. Kʼaʼut? Xbʼaan naq teʼril naq li Jehobʼa tixbʼaanu xninqal ru bʼaanuhom. Jun eetalil, xbʼaan naq li Jesús tixkubʼsi ribʼ ut tixqʼaxtesi li wankilal re li Xyuwaʼ, li Yos «aʼanaq chixjunil saʼ chixjunil» (1 Cor. 15:28). Moqon chik li teʼwanq saʼ Ruuchichʼochʼ teʼxyal xsahil «li xnimal xloqʼal ebʼ li ralal xkʼajol li Yos» (Rom. 8:21). Ut ttzʼaqloq ru li kixye li Jehobʼa naq ebʼ li ralal xkʼajol li wankebʼ saʼ choxa ut saʼ Ruuchichʼochʼ teʼwanq saʼ junajil joʼ junkabʼal (Efes. 1:10).

Kʼaru teʼrekʼa li xjunkabʼal li Jehobʼa naq ttzʼaqloq ru aʼin? Chixjunilebʼ saʼ choxa ut saʼ Ruuchichʼochʼ teʼxamamnaq saʼ xchʼool xbʼaan naq junelik teʼraj xkʼebʼal xloqʼal li xkʼabʼaʼ li Jehobʼa. Laj David kixtzʼiibʼa: «Usilaatinanbʼil taxaq li Qaawaʼ […]! Usilaatinanbʼil taxaq li xloqʼlaj kʼabʼaʼ chi junelik» (Sal. 72:18, 19). Naq twanq li qajunelik yuʼam tqoksi li qahoonal re xnawbʼal ut rilbʼal li xninqal ru xbʼaanuhom li Jehobʼa li tixbʼaanu naq tqaj xkʼebʼal xloqʼal li xkʼabʼaʼ li Jehobʼa.

Li xkʼabʼaʼ li Jehobʼa naxkʼutbʼesi chixjunil li xnaʼlebʼ. Joʼkan naq, naq naqakʼoxla rix li xkʼabʼaʼ naqajultika li xrahom (1 Juan 4:8). Junelik tqajultika naq li Jehobʼa xooxyobʼtesi xbʼaan naq nokooxra, kixqʼaxtesi li Ralal saʼ qakʼabʼaʼ xbʼaan li xrahom ut naq li rahok kiʼekʼasink re chi xkʼutbʼesinkil naq chaabʼil naʼawabʼejink. Ut tqil chanru li Jehobʼa naxkʼutbʼesi li xrahom rikʼin li xyobʼtesihom. Ut tqataw naabʼal xyaalal re naq junqʼe junqʼe kutan toojiloq chixkʼatq li qachoxahil Yuwaʼ ut toobʼichanq re xkʼebʼal xloqʼal li xkʼabʼaʼ (Sal. 73:28).