NAʼLEBʼ RE TZOLOK 35
BʼICH 124 Junelik tiikaq qachʼool
Chanru li cheekel winq nekeʼxtenqʼa li xeʼisiik saʼ li chʼuut
«Twanq nimla sahil chʼoolejil saʼ choxa wi jun laj maak naxyotʼ xchʼool ut naxjal xnaʼlebʼ chiru li 99 li tiikebʼ xchʼool li inkʼaʼ chik naʼajmank chiruhebʼ naq teʼxyotʼ xchʼool ut teʼxjal xnaʼlebʼ» (LUC. 15:7).
RUʼUJIL LI TZOLOM
Kʼaʼut aajel ru risinkil saʼ li chʼuut wiibʼ oxibʼ li kristiʼaan ut chanru ebʼ li cheekel winq teʼruuq xtenqʼankilebʼ re naq teʼxyotʼ xchʼool ut teʼwanq wiʼ chik joʼ ramiiw li Jehobʼa.
1, 2. a) Kʼaru naxkʼoxla li Jehobʼa chirixebʼ li kristiʼaan li xeʼxbʼaanu jun li maak ut inkʼaʼ nekeʼxyotʼ xchʼool? b) Kʼaru naraj li Jehobʼa?
LI JEHOBʼA moko naxkʼulubʼa ta li maak (Sal. 5:5-7). Aʼan naroybʼeni naq tqapaabʼ li xchaqʼrabʼ li wank saʼ li Santil Hu. Yaal, li Jehobʼa naxnaw naq laaʼo aj maak joʼkan naq inkʼaʼ naroybʼeni naq maajunwa toopaltoʼq (Sal. 130:3, 4). Abʼan li Yos naxtzʼeqtaanahebʼ ajwiʼ li nekeʼroksi li xnimal rusilal re naq teʼmaakobʼq chi maakʼaʼebʼ xxutaan (Jud. 4). Li Santil Hu naxye naq saʼ li Armagedón teʼsacheʼq «li inkʼaʼ nekeʼroxloqʼi li Yos» (2 Ped. 3:7; Apoc. 16:16).
2 Abʼanan, li Jehobʼa naraj naq maaʼani tsacheʼq. Saʼebʼ li tzolom rubʼelaj xqil naq li Santil Hu naxye naq li Yos naraj naq chixjunilebʼ «teʼxyotʼ xchʼool ut teʼxjal xnaʼlebʼ» (2 Ped. 3:9). Ebʼ li cheekel winq nekeʼxkʼam re rikʼin li Jehobʼa ut nekeʼxkʼutbʼesi naq wankebʼ xkuyum naq nekeʼxtenqʼa li xeʼmaakobʼk re naq teʼxyotʼ xchʼool ut teʼwanq wiʼ chik saʼ amiiwil rikʼin. Abʼanan, moko chixjunilebʼ ta nekeʼxkʼulubʼa li tenqʼ aʼin (Is. 6:9). Wankebʼ inkʼaʼ nekeʼraj xjalbʼal xnaʼlebʼ usta ebʼ li cheekel winq naabʼal sut nekeʼaatinak rikʼinebʼ re naq teʼxyotʼ xchʼool. Kʼaru tbʼaanumanq naq nakʼulmank aʼin?
«ISIHOMAQ [ . . . ] LI WINQ LI MAAʼUS XNAʼLEBʼ»
3. a) Kʼaru naxye li Santil Hu naq tbʼaanumanq rikʼin junaq li kristiʼaan li xbʼaanu jun li nimla maak ut inkʼaʼ naxyotʼ xchʼool? b) Wi junaq li kristiʼaan inkʼaʼ naxyotʼ xchʼool, kʼaʼut naqaye naq aʼan xsikʼok re naq t-isiiq saʼ li chʼuut?
3 Naq junaq li kristiʼaan naxbʼaanu jun li nimla maak ut inkʼaʼ naxyotʼ xchʼool, ebʼ li cheekel winq nekeʼxbʼaanu li naxye 1 Corintios 5:13: «Isihomaq saʼ eeyanq li winq li maaʼus xnaʼlebʼ». Aʼin naraj xyeebʼal naq aʼan xsikʼok re naq t-isiiq saʼ li chʼuut, yook xqʼolbʼal li kiraw (Gál. 6:7). Kʼaʼut? Xbʼaan naq inkʼaʼ kixkʼulubʼa li tenqʼ li kikʼeheʼk re naabʼal sut xbʼaanebʼ li cheekel winq (2 Rey. 17:12-15). Li xbʼaanuhom naxkʼutbʼesi naq inkʼaʼ naraj xpaabʼankil li xchaqʼrabʼ li Jehobʼa (Deut. 30:19, 20).
4. Kʼaʼut nayeemank resil naq naʼisimank junaq li kristiʼaan saʼ li chʼuut?
4 Naq naʼisimank saʼ li chʼuut jun li kristiʼaan li kixbʼaanu jun li nimla maak xbʼaan naq inkʼaʼ kixyotʼ xchʼool, nakʼemank jun li esil re xyeebʼal rehebʼ li hermaan naq li kristiʼaan xkanabʼ wank joʼ aj testiiw re li Jehobʼa. Aʼin moko nabʼaanumank ta re xtzʼeqtaanankil, nabʼaanumank bʼan re naq ebʼ li hermaan teʼruuq xpaabʼankil li chaqʼrabʼ li wank saʼ li Santil Hu li naxye naq inkʼaʼ chik teʼxjunaji ribʼ rikʼin chi moko teʼwaʼaq rochbʼeen (1 Cor. 5:9-11). Wank xyaalal kʼaʼut li Jehobʼa kixkʼe li naʼlebʼ aʼin. Laj Pablo kixye: «Li chʼam aj qʼem usta kachʼin naxbʼaanu naq ttzʼubʼoʼq chixjunil li qʼem» (1 Cor. 5:6). Wi li Jehobʼa tixkanabʼ raj naq li kristiʼaan li inkʼaʼ naxyotʼ xchʼool twanq saʼ li chʼuut, ebʼ li junchʼol chik chi hermaan teʼruuq xkʼoxlankil naq maakʼaʼ aj e naq nekeʼxkʼe xchʼool chi xyuʼaminkil li xchaqʼrabʼ li Jehobʼa (Prov. 13:20; 1 Cor. 15:33).
5. Chanru tqil junaq li maawaʼ chik aj testiiw re li Jehobʼa ut kʼaʼut?
5 Abʼanan, chanru tqil junaq li kristiʼaan li xkanabʼ wank joʼ aj testiiw re li Jehobʼa? Usta inkʼaʼ naqajunaji qibʼ rikʼin, inkʼaʼ naqakʼoxla naq maakʼaʼ chik naʼok wiʼ, naqil bʼan joʼ jun li karneer li kisach ut naru tsutqʼiiq rikʼinebʼ li xkomon. Us raj naq tqajultika naq ak xqʼaxtesi li xyuʼam chiru li Jehobʼa abʼan moko yook ta chik xyuʼaminkil li kixyeechiʼi (Ezeq. 18:31). Abʼanan naq toj wank xhoonal ut li Jehobʼa naraj ruxtaanankil ru, naqoybʼeni naq tixjal xnaʼlebʼ. Joʼkan naq, chanru ebʼ li cheekel winq teʼruuq xtenqʼankilebʼ li xeʼisiik saʼ li chʼuut?
CHANRU EBʼ LI CHEEKEL WINQ NEKEʼXTENQʼA LI XEʼISIIK SAʼ LI CHʼUUT
6. Kʼaru nekeʼxbʼaanu ebʼ li cheekel winq re xtenqʼankil li xʼisiik saʼ li chʼuut?
6 Kʼaru nekeʼxbʼaanu ebʼ li cheekel winq naq naʼisimank junaq saʼ li chʼuut? Ma nekeʼxtzʼeqtaana chi junajwa ut inkʼaʼ chik nekeʼxyal xtenqʼankil re naq tsutqʼiiq rikʼin li Jehobʼa? Inkʼaʼ. Naq ebʼ li cheekel winq teʼxye re naq t-isiiq saʼ li chʼuut, teʼxchʼolobʼ ajwiʼ chiru kʼaru tixbʼaanu re naq tsutqʼiiq wiʼ chik. Abʼan moko kaʼaj tawiʼ aʼin nekeʼxbʼaanu. Nekeʼxye ajwiʼ re, naq chiru wiibʼ oxibʼ po teʼaatinaq wiʼ chik rikʼin re rilbʼal wi ak xjal xnaʼlebʼ. Wi li kristiʼaan naxkʼulubʼa, ebʼ li cheekel teʼxye re naq naru tixyotʼ xchʼool ut tsutqʼiiq saʼ li chʼuut. Ut wi saʼ li hoonal aʼan toj maajiʼ naxjal xnaʼlebʼ? Moqon ebʼ li cheekel winq nekeʼxchʼutubʼ wiʼ chik ribʼ rikʼin re naq tixyotʼ xchʼool.
7. Chanru ebʼ li cheekel winq nekeʼxkʼutbʼesi naq nekeʼtoqʼobʼank u joʼ li Jehobʼa naq nekeʼaatinak rikʼin li kristiʼaan li xʼisiik saʼ li chʼuut? (Jeremías 3:12).
7 Naq nekeʼaatinak rikʼin li kristiʼaan li xʼisiik saʼ li chʼuut ebʼ li cheekel winq tento teʼtoqʼobʼanq u joʼ naxbʼaanu li Jehobʼa. Joʼ eetalil, naq ebʼ laj Israel inkʼaʼ xeʼabʼink, li Jehobʼa moko kiroybʼeni ta naq teʼxyotʼ xchʼool, kixsikʼebʼ bʼan xbʼeenwa usta moko yookebʼ ta xkʼutbʼal naq nekeʼraj xjalbʼal xnaʼlebʼ. Joʼ xqil saʼ li tzolom 32, li Jehobʼa kiroksi li propeet Oseas re xkʼutbʼesinkil chanru natoqʼobʼank u. Kixye re laj Oseas naq tixkuy xmaak li rixaqil usta toj yook chi maakobʼk (Os. 3:1; Mal. 3:7). Joʼ li Jehobʼa, ebʼ li cheekel winq nekeʼraj chi anchal xchʼool naq li kristiʼaan tixyotʼ xchʼool ut tsutqʼiiq saʼ li chʼuut ut moko nekeʼxbʼaanu ta naq tchʼaʼajkoʼq chiru laj maak sutqʼiik (yaabʼasi Jeremías 3:12).
8. Chanru li jaljokil ru aatin chirix li alalbʼej li kisach nokooxtenqʼa chi xtawbʼal ru chanru natoqʼobʼank u li Jehobʼa? (Lucas 15:7).
8 Qajultikaq ajwiʼ li jaljokil ru aatin chirix li alalbʼej li kisach li xooʼaatinak wiʼ saʼ li tzolom 32. Naq li xyuwaʼ kiril «xkoho saʼ aanil chi xtawbʼal, kixqʼalu ut kixtzʼubʼ ru» (Luc. 15:20). Saʼ xkʼabʼaʼ naq li yuwaʼbʼej kʼajoʼ naxra li ralal moko kiroybʼeni ta naq aʼan tixpatzʼ xkuybʼal xmaak. Joʼkan ajwiʼ nekeʼrekʼa ribʼ li cheekel winq, nekeʼxkʼe xqʼe re xkʼambʼal rehebʼ rikʼin li Jehobʼa, joʼkan naq nekeʼxtenqʼahebʼ re naq teʼsutqʼiiq saʼ li chʼuut (Luc. 15:22-24, 32). Naq jun laj maak naxyotʼ xchʼool, kʼajoʼ li sahil chʼoolejil wank saʼ choxa. . . joʼwiʼ saʼ Ruuchichʼochʼ! (Yaabʼasi Lucas 15:7).
9. Kʼaru naxye li Jehobʼa rehebʼ li kristiʼaan li xeʼxbʼaanu jun li nimla maak?
9 Chixjunil li ak xqatzol nokooxtenqʼa chi rilbʼal naq li Jehobʼa inkʼaʼ naxkʼulubʼa naq junaq li kristiʼaan li kixbʼaanu jun li nimla maak ut inkʼaʼ naxyotʼ xchʼool twanq saʼ li chʼuut. Abʼan usta joʼkan, li Jehobʼa inkʼaʼ naxtzʼeqtaana, naraj bʼan naq tsutqʼiiq. Saʼ Oseas 14:4 naqakʼe reetal chanru naril li Jehobʼa ebʼ li nekeʼxyotʼ xchʼool: «Twisi chixjunil li xqʼetqʼetil laj Israel, ut qʼaxal tinra chi anchal inchʼool; xbʼaan naq maakʼaʼ chik injosqʼil». Jwal aajel ru naq ebʼ li cheekel winq yoʼon wanqebʼ re rilbʼal wi junaq li kristiʼaan ak xtikibʼ xyotʼbʼal xchʼool. Ut wank xwankil naq ebʼ li kristiʼaan li xeʼxkanabʼ li Jehobʼa teʼxbʼaanu li naʼajmank re naq teʼsutqʼiiq wiʼ chik rikʼin.
10, 11. Kʼaru nekeʼxbʼaanu li cheekel winq re xtenqʼankilebʼ li ak junxil xeʼisiik saʼ li chʼuut?
10 Kʼaru nakʼulmank rikʼinebʼ li kristiʼaan li ak junxil xeʼisiik saʼ li chʼuut? Naabʼalebʼ maare inkʼaʼ chik yookebʼ xbʼaanunkil li maak li kixbʼaanu naq teʼisiiq saʼ li chʼuut ut wankebʼ maare inkʼaʼ chik nekeʼxjultika kʼaʼut naq xeʼisiik saʼ li chʼuut. Aʼ yaal li xkʼulmank, ebʼ li cheekel winq tento teʼxkʼe xqʼe re xtawbʼalebʼ ut rulaʼaninkilebʼ. Ut naq teʼxbʼaanu, naru naq teʼtijoq rikʼinebʼ ut teʼxwaklesi xchʼool re naq teʼsutqʼiiq saʼ li chʼuut. Abʼanan ebʼ li kristiʼaan aʼin moko kawebʼ ta saʼ xpaabʼal xbʼaan naq chiru naabʼal chihabʼ inkʼaʼ xeʼwank saʼ li chʼuut. Joʼkan naq wi li kristiʼaan naraj sutqʼiik saʼ li chʼuut, ebʼ li cheekel winq naru teʼxkʼubʼ naq ttzoleʼq wiʼ chik rikʼin li Santil Hu usta toj maajiʼ nasutqʼiik saʼ li chʼuut. Abʼanan ebʼ li cheekel winq tento teʼxsikʼ ani ttzoloq re.
11 Ebʼ li cheekel winq nekeʼraj toqʼobʼank u joʼ naxbʼaanu li Jehobʼa. Joʼkan naq nekeʼxsikʼ chixjunilebʼ li xeʼisiik saʼ li chʼuut ut nekeʼxye re naq naru teʼsutqʼiiq saʼ li chʼuut. Wi jun li kristiʼaan naxkʼutbʼesi naq kixyotʼ xchʼool ut kixjal xnaʼlebʼ, ebʼ li cheekel winq moko teʼbʼayq ta chi xkʼulubʼankil wiʼ chik saʼ li chʼuut (2 Cor. 2:6-8).
12. a) Joqʼe weent teʼxbʼaanu ebʼ li cheekel winq? b) Kʼaʼut inkʼaʼ tqaye naq li Jehobʼa maajunwa truxtaana ru wiibʼ oxibʼ laj maak? (Chaawil li xyaalal).
12 Wi junaq li kristiʼaan xʼisiik saʼ li chʼuut saʼ xkʼabʼaʼ naq kixmuxebʼ li kokʼal malaj kixrahobʼtesihebʼ, kixmajewa li Jehobʼa malaj kixkʼubʼ chanru xraqbʼal jun li sumlajik, ebʼ li cheekel winq weent teʼxbʼaanu naq yookebʼ rilbʼal wi li kristiʼaan aʼin truuq sutqʼiik saʼ li chʼuut. Tento teʼril chiʼus wi relik chi yaal ak xyotʼ xchʼool (Mal. 2:14; 2 Tim. 3:6). Ebʼ li cheekel winq tento teʼxkol ebʼ li hermaan, abʼan tento tqajultika naq li Jehobʼa tixkʼulubʼa wiʼ chik saʼ li xtenamit yalaq ani li naxyotʼ xchʼool chi anchal xchʼool ut naxkanabʼ xbʼaanunkil li inkʼaʼ us. Joʼkan naq, usta ebʼ li cheekel winq weent teʼxbʼaanu rikʼinebʼ li kristiʼaan li junxil xeʼxbʼaanu jun li nimla maaʼusilal, maajunwa teʼxye naq li Jehobʼa inkʼaʼ truxtaana ruhebʼ (1 Ped. 2:10). a
KʼARU TRUUQ XBʼAANUNKIL LI CHʼUUT
13. Chanru naqilebʼ li xeʼqʼuseʼk ut chanru naqilebʼ li xeʼisiik saʼ li chʼuut?
13 Saʼ li tzolom rubʼelaj, xqatzol naq wank sut nayeemank resil saʼ li chʼuut naq jun li hermaan xeʼxqʼus (censurado). Naq nakʼulmank aʼin, naraj xyeebʼal naq li hermaan kixyotʼ xchʼool ut kixjal xnaʼlebʼ joʼkan naq toj naru tqajunaji qibʼ rikʼin (1 Tim. 5:20). Li hermaan aʼin toj wank saʼ li chʼuut ut naʼajmank chiru naq twaklesiiq xchʼool re naq inkʼaʼ tixkanabʼ xbʼaanunkil li us (Heb. 10:24, 25). Abʼanan, moko juntaqʼeet ta nakʼulmank naq junaq naʼisiik saʼ li chʼuut. Naq nakʼulmank aʼin, inkʼaʼ chik naqajunaji qibʼ rikʼin ut inkʼaʼ chik nokoowaʼak rikʼin (1 Cor. 5:11).
14. Wi inkʼaʼ nachʼiʼchʼiʼiik xbʼaan li xchʼool, chanru jun laj paabʼanel truuq rilbʼal li kristiʼaan li xʼisiik saʼ li chʼuut? (Chaawil ebʼ li jalam u).
14 Ma naraj xyeebʼal aʼin naq inkʼaʼ chik tqabʼoq saʼ li chʼutam malaj inkʼaʼ chik tqakʼe xsahil xchʼool li kristiʼaan li xʼisiik saʼ li chʼuut? Inkʼaʼ. Yaal naq inkʼaʼ chik tqajunaji qibʼ rikʼin. Abʼan, wi li xʼisiik saʼ li chʼuut aʼan jun li qakomon malaj jun li qamiiw, naru tqabʼoq saʼ li chʼutam wi inkʼaʼ nokooxchʼiʼchʼiʼi li qachʼool. Ut chanru tqil wi nawulak saʼ li chʼutam? Junxil inkʼaʼ raj xqakʼe xsahil xchʼool, abʼanan anaqwan wi jun laj paabʼanel inkʼaʼ nachʼiʼchʼiʼiik xbʼaan li xchʼool naru tixkʼe xsahil xchʼool. Abʼan li inkʼaʼ tooruuq xbʼaanunkil aʼan seeraqʼik rikʼin malaj xjunajinkil qibʼ rikʼin.
Wi inkʼaʼ nachʼiʼchʼiʼiik xbʼaan li xchʼool, jun laj paabʼanel naru tixbʼoq saʼ li chʼutam jun li kristiʼaan li xʼisiik saʼ li chʼuut malaj truuq xkʼebʼal xsahil xchʼool saʼ li chʼutam. (Chaawil li raqal 14).
15. Chirix anihebʼ naʼaatinak 2 Juan 9-11? (Chaawil li kaaxukuut « Ma juntaqʼeet li maak li xeʼaatinak wiʼ laj Juan ut laj Pablo?»).
15 Maare tqakʼoxla: «Ma inkʼaʼ naxye li Santil Hu naq li naxkʼe xsahil xchʼool ebʼ li kristiʼaan aʼin “natzʼaqonk chirix li xmaaʼusilal”?» (yaabʼasi 2 Juan 9-11). Ebʼ li raqal li wank rubʼelaj naxkʼutbʼesi naq laj Juan yook chi aatinak chirixebʼ li xeʼxtzʼeqtaana li Jehobʼa ut li nekeʼxqʼunbʼesi li junchʼol re naq teʼxbʼaanu li maaʼusilal (Apoc. 2:20). Joʼkan naq, ebʼ li cheekel winq maajunwa teʼrulaʼani junaq li kristiʼaan li yook xbʼaanunkil naq ebʼ li junchʼol teʼmaakobʼq. Yaal naq naru tixjal xnaʼlebʼ, abʼan naq toj maajiʼ naxjal xnaʼlebʼ inkʼaʼ tqakʼe xsahil xchʼool chi moko tqaye re naq twulaq saʼ li chʼutam.
TOOTOQʼOBʼANQ U UT TOOʼUXTAANANQ U JOʼ LI JEHOBʼA
16, 17. a) Kʼaru naraj li Jehobʼa naq teʼxbʼaanu laj maak? (Ezequiel 18:32). b) Chanru ebʼ li cheekel winq nekeʼtzʼaqonk rikʼin li Jehobʼa?
16 Saʼ li oobʼ chi tzolom aʼin xqatzol naq li Jehobʼa naraj naq maaʼani tsacheʼq (yaabʼasi Ezequiel 18:32). Naraj bʼan naq ebʼ laj maak teʼxyotʼ xchʼool (2 Cor. 5:20). Joʼkan naq saʼ xnumikebʼ li chihabʼ li Jehobʼa naxtzʼaama rehebʼ li xeʼmaakobʼk naq teʼxyotʼ xchʼool ut teʼsutqʼiiq wiʼ chik rikʼin. Ebʼ li cheekel winq nekeʼtzʼaqonk rikʼin li Jehobʼa re xtenqʼankilebʼ li kristiʼaan li xeʼxbʼaanu jun li nimla maak re naq teʼxyotʼ xchʼool (Rom. 2:4; 1 Cor. 3:9).
17 Kʼajoʼ li sahil chʼoolejil wank saʼ choxa naq jun laj maak naxyotʼ xchʼool! Li qachoxahil Yuwaʼ Jehobʼa jwal nasahoʼk saʼ xchʼool naq jun laj maak nasutqʼiik saʼ li chʼuut. Miqakanabʼ xkʼoxlankil chanru li Jehobʼa natoqʼobʼank u, naʼuxtaanank u ut naxkʼutbʼesi li xnimal rusilal, wi joʼkan naqabʼaanu li qarahom chirix jwal tkawuuq (Luc. 1:78).
BʼICH 111 Li xyaalal li xsahil qachʼool
a Li Santil Hu naxye naq li maak li maajunwa nakuyeʼk, maawaʼ yalaq kʼaru chi maak, aʼan bʼan li naxbʼaanu jun li kristiʼaan li naxye li inkʼaʼ us chirix li Yos ut yal naraj xqʼetbʼal ribʼ chiru. Kaʼajwiʼ li Jehobʼa ut li Jesús teʼruuq xyeebʼal ani inkʼaʼ chik tkuymanq xmaak (Mar. 3:29; Heb. 10:26, 27).
