NAʼLEBʼ RE TZOLOK 33
BʼICH 130 Qatzolaq li kuyuk maak
Chanru naraj li Jehobʼa naq tqilebʼ li xeʼxbʼaanu jun li nimla maak
«Wi junaq namaakobʼk, wank jun aj tenqʼahom qe» (1 JUAN 2:1).
RUʼUJIL LI TZOLOM
Kʼaru naqatzol rikʼin li kikʼulmank saʼ li chʼuut re Corinto naq jun li hermaan kixbʼaanu jun li nimla maak.
1. Kʼaru naraj li Jehobʼa?
LI JEHOBʼA xooxyobʼtesi re naq laaʼo yal qe kʼaru tqasikʼ xbʼaanunkil ut rajlal naqabʼaanu aʼin. Xqʼaxtesinkil li qayuʼam chiru li Jehobʼa ut wank joʼ xjunkabʼal aʼan li naʼlebʼ li jwal wank xwankil li naqasikʼ xbʼaanunkil saʼ li qayuʼam. Li Jehobʼa naraj naq chixjunilebʼ teʼxsikʼ xbʼaanunkil aʼin, xbʼaan naq naxra ebʼ li kristiʼaan ut naraj li us choʼq rehebʼ. Naraj naq teʼwanq saʼ amiiwil rikʼin ut teʼxtaw li junelik yuʼam (Deut. 30:19, 20; Gál. 6:7, 8).
2. Kʼaru naraj li Jehobʼa naq teʼxbʼaanu li xeʼxbʼaanu jun li nimla maak ut toj maajiʼ nekeʼxyotʼ xchʼool? (1 Juan 2:1).
2 Li Jehobʼa maaʼani naxmin ru re naq tkʼanjelaq chiru malaj inkʼaʼ. Wi jun laj paabʼanel li kubʼenak xhaʼ naxbʼaanu jun li nimla maak ut inkʼaʼ naxyotʼ xchʼool, naʼisiik saʼ li chʼuut (1 Cor. 5:13). Abʼan, usta nakʼulmank aʼin, li Jehobʼa naraj naq tsutqʼiiq rikʼin. Joʼkan naq jun rehebʼ li xyaalal kʼaʼut kixtaqla li Jesús re naq tkamq saʼ qakʼabʼaʼ, aʼan re naq tsacheʼq chi junajwa li qamaak (yaabʼasi 1 Juan 2:1). Saʼ xkʼabʼaʼ li xnimla rahom li Jehobʼa, naraj naq ebʼ laj maak teʼxyotʼ xchʼool (Zac. 1:3; Rom. 2:4; Sant. 4:8).
3. Kʼaru tqatzol saʼ li tzolom aʼin?
3 Li Jehobʼa naraj naq tqakʼam qe rikʼin chirix chanru naqil ebʼ li maak ut li xeʼxbʼaanu jun li nimla maak. Saʼ li tzolom aʼin tqatzol li kixye laj Pablo naq tixbʼaanu li chʼuut re Corinto naq jun li hermaan kixbʼaanu jun li nimla maak. Moqon tqatzʼil rix li kixye laj Pablo naq tixbʼaanu li chʼuut naq ak xyotʼ xchʼool. Ut tqatzol ajwiʼ li naxkʼoxla li Jehobʼa chirixebʼ li xeʼxbʼaanu jun li nimla maak.
KʼARU KIKʼULMANK NAQ JUN LI HERMAAN KIXBʼAANU JUN LI NIMLA MAAK
4. Kʼaru kikʼulmank saʼ li chʼuut re Corinto? (1 Corintios 5:1, 2).
4 (Yaabʼasi 1 Corintios 5:1, 2). Saʼ li rox bʼihaaj li kixbʼaanu laj Pablo, kixnaw naq yook chi bʼaanumank jun li yibʼru aj naʼlebʼ saʼ li chʼuut re Corinto: jun laj paabʼanel yook xmuxbʼal ribʼ rikʼin li rixaqil li xyuwaʼ. Laj Pablo kixye naq «li muxuk ibʼ aʼin qʼaxal yibʼ wiʼ chik ru chiru li nekeʼxbʼaanu ebʼ li inkʼaʼ nekeʼpaabʼank». Abʼan wankebʼ xeʼxkʼoxla naq moko tento ta t-isiiq saʼ li chʼuut li hermaan. Junchʼol chik xeʼxkʼoxla naq yook chi uxtaanaak ru joʼ chanru naʼuxtaanank u li Jehobʼa. Abʼan li Jehobʼa inkʼaʼ naxkʼulubʼa li naʼlebʼ aʼin. Relik chi yaal naq rikʼin li xnaʼlebʼ, li hermaan aʼin yook xbʼaanunkil naq moko us ta teʼaatinaq chirix li chʼuut. Ut truuq ajwiʼ xbʼaanunkil naq ebʼ li junchʼol teʼraj naʼlebʼak chi joʼkaʼan. Joʼkan bʼiʼ, kʼaru kixye laj Pablo naq tento teʼxbʼaanu li hermaan re Corinto?
5. Kʼaru kixtzʼiibʼa laj Pablo re li chʼuut ut kʼaru kiraj xyeebʼal? (1 Corintios 5:13; chaawil li jalam u).
5 (Yaabʼasi 1 Corintios 5:13). Rikʼin xtenqʼ li santil musiqʼej, laj Pablo kixtzʼiibʼa jun li esilhu re li chʼuut ut kixchʼolobʼ naq laj maak li inkʼaʼ naxyotʼ xchʼool tento t-isiiq saʼ li chʼuut. Kixye ajwiʼ rehebʼ li hermaan naq inkʼaʼ chik teʼxjunaji ribʼ rikʼin chi moko teʼwaʼaq rikʼin (1 Cor. 5:11). Naq nokoowaʼak rikʼin jun li kristiʼaan naqanumsi hoonal rikʼin ut nokooʼaatinak rikʼin. Joʼkan naq laj Pablo kixye naq inkʼaʼ chik teʼxjunaji ribʼ rikʼin. Chi joʼkan li chʼuut inkʼaʼ tixkʼam re rikʼin li xnaʼlebʼ (1 Cor. 5:5-7). Aʼin tixbʼaanu naq laj maak tixkʼe reetal naq xrahobʼtesi xchʼool li Jehobʼa, txutaanaq xbʼaan li kixbʼaanu ut tixyotʼ xchʼool.
Li Jehobʼa kixbʼaanu naq laj Pablo tixtzʼiibʼa rehebʼ laj Corinto naq teʼrisi saʼ li chʼuut li winq li inkʼaʼ kixyotʼ xchʼool. (Chaawil li raqal 5 ).
6. Kʼaru rusilal kixtaw li chʼuut ut laj maak rikʼin li esilhu?
6 Naq ak xtaqla li esilhu re li chʼuut re Corinto, laj Pablo kiʼok xkʼoxlankil chan tawiʼ ru xeʼnaʼlebʼak li hermaan. Moqon, laj Tito kixye re jun li naʼlebʼ li kixsahobʼresi xchʼool laj Pablo: ebʼ li hermaan xeʼxkʼulubʼa li kixye ut xeʼok xyuʼaminkil li naʼlebʼ (2 Cor. 7:6, 7). Chirix chik naq laj Pablo kixtaqla li esilhu, li winq kixyotʼ xchʼool, kixjal xnaʼlebʼ ut kiʼok xyuʼaminkil li xchaqʼrabʼ li Jehobʼa (2 Cor. 7:8-11). Kʼaru kixye laj Pablo naq tixbʼaanu li chʼuut?
CHANRU TEʼNAʼLEBʼAQ LI HERMAAN RIKʼIN LAJ MAAK LI XYOTʼ XCHʼOOL
7. Kʼaru kikʼulmank naq xʼisiik saʼ li chʼuut laj maak? (2 Corintios 2:5-8).
7 (Yaabʼasi 2 Corintios 2:5-8). Laj Pablo kixye: «Tzʼaqal li qʼuseʼk kixkʼul li winq saʼ ruqʼebʼ li komonil». Kiraj xyeebʼal naq li qʼuseʼk kixbʼaanu naq li winq tixyotʼ xchʼool. Moko naʼajmank ta chik naq tqʼuseʼq xbʼaan li chʼuut (Heb. 12:11).
8. Kʼaru kixye laj Pablo re li chʼuut?
8 Saʼ xkʼabʼaʼ naq li winq kixyotʼ xchʼool, laj Pablo kixye rehebʼ li cheekel winq naq teʼxkʼanabʼ naq tsutqʼiiq wiʼ chik saʼ li chʼuut. Kixye ajwiʼ rehebʼ: «Anaqwan tento teekuy xmaak chi anchal eechʼool ut teekʼojobʼ xchʼool». Ut moqon kixye: «Nawaj xyeebʼal eere naq teekʼutbʼesi chiru naq qʼaxal nekeera». Laj Pablo moko kaʼaj tawiʼ kiraj naq tsutqʼiiq saʼ li chʼuut, kixye naq tento ajwiʼ teʼxkʼutbʼesi ut teʼxye re naq chi anchal xchʼool xeʼxkuy xmaak ut naq nekeʼxra. Chi joʼkan li winq tixkʼe reetal naq li chʼuut sa xchʼool xbʼaan naq xsutqʼiik wiʼ chik.
9. Kʼaʼut wankebʼ xeʼchʼaʼajkoʼk chiru xkuybʼal xmaak li winq li kixyotʼ xchʼool?
9 Maare saʼ xtiklajik wankebʼ inkʼaʼ xeʼsahoʼk xchʼool naq xeʼxnaw naq li winq tsutqʼiiq wiʼ chik saʼ li chʼuut. Kʼaʼut naqaye aʼin? Xbʼaan naq wankebʼ maare yookebʼ xjosqʼil xbʼaan li chʼaʼajkilal li kixbʼaanu saʼ li chʼuut. Ut junchʼol chik inkʼaʼ sa nekeʼrekʼa ribʼ xbʼaan naq kixrahobʼtesi xchʼoolebʼ. Ebʼ li hermaan xeʼxkʼe xchʼool chi xyuʼaminkil li xchaqʼrabʼ li Jehobʼa, joʼkan naq wankebʼ xeʼxkʼoxla naq moko us ta naq xkʼulubʼaak wiʼ chik saʼ li chʼuut li winq li xmaakobʼk (juntaqʼeeta rikʼin Lucas 15:28-30). Abʼan, kʼaʼut wank xwankil naq teʼxkʼutbʼesi naq nekeʼxra li winq aʼin li kixyotʼ xchʼool?
10, 11. Kʼaru raj kikʼulmank wi ebʼ cheekel winq inkʼaʼ raj xeʼxkuy xmaak li winq li kixyotʼ xchʼool?
10 Kʼaru raj xkʼulmank rikʼin laj maak wi ebʼ li cheekel winq inkʼaʼ raj xeʼxkanabʼ naq tsutqʼiiq saʼ li chʼuut usta ak kixyotʼ xchʼool malaj wi ebʼ li hermaan inkʼaʼ raj xeʼxkʼutbʼesi chiru naq nekeʼxra? Maare qʼaxal kirahokʼ raj xchʼool «toj reetal naq maakʼaʼ chik traj». Maare xruuk raj xkʼoxlankil naq li Jehobʼa maajunwa truuq xkuybʼal xmaak ut naq moko wank ta xyaalal re naq tixjal xnaʼlebʼ.
11 Kʼaru raj chik kikʼulmank wi ebʼ li hermaan inkʼaʼ raj xeʼxkʼulubʼa xkuybʼal xmaak li winq li kixyotʼ xchʼool? Maare xeʼruuk raj xtzʼeqbʼal li ramiiwil rikʼin li Jehobʼa. Kʼaʼut? Xbʼaan naq inkʼaʼ xeʼnaʼlebʼak joʼ li Jehobʼa li naxkuy xmaak li nekeʼxyotʼ xchʼool. Xeʼxkʼam raj re rikʼin laj Tza li yibʼru xnaʼlebʼ ut inkʼaʼ naʼuxtaanank u. Xeʼxkanabʼ raj naq laj Tza troksihebʼ re xchʼinankil xchʼool li winq aʼin (2 Cor. 2:10, 11; Efes. 4:27).
12. Kʼaru raj kixbʼaanu li chʼuut re Corinto re naq teʼxkʼam re rikʼin li Jehobʼa?
12 Joʼkan bʼiʼ, kʼaru raj kixbʼaanu li chʼuut re Corinto re naq teʼxkʼam re rikʼin li Jehobʼa ut inkʼaʼ rikʼin laj Tza? Naq teʼxkuyebʼ xmaak li nekeʼxyotʼ xchʼool joʼ naxbʼaanu li Jehobʼa. Qakʼehaq reetal kʼaru keʼxye chirix li Yos wiibʼ oxibʼ li keʼtzʼiibʼank re li Santil Hu. Laj David kixye saʼ Salmo 86:5: «Qʼaxal chaabʼilat, at Qaawaʼ, ut aj kuyulat maak». Laj Miqueas kixye: «Maajun chik junaq Yos joʼ laaʼat, at Qaawaʼ, xbʼaan naq laaʼat nakakuy nakasach li xmaakebʼ» (Miq. 7:18). Ut laj Isaías kixye: «Li inkʼaʼ us xchʼool xkanabʼaq xbʼaanunkil li maaʼusilal, ut li yibʼru xnaʼlebʼ mixkʼoxla chik li inkʼaʼ us. Sutqʼiiq chaq rikʼin li Qaawaʼ ut Aʼan taaruxtaana ru, sutqʼiiq chaq rikʼin li qaYos li jwal chaabʼil chi kuyuk maak» (Is. 55:7).
13. Kʼaʼut us naq xkʼuleʼk wiʼ chikʼ saʼ li chʼuut li winq? (Chaawil li kaaxukuut « Joqʼe kikʼuleʼk wiʼ chik saʼ li chʼuut li winq re Corinto?»).
13 Re naq li chʼuut re Corinto tixkʼam re rikʼin li Jehobʼa, tento naq tixkʼul chi anchal xchʼool li winq li kixyotʼ xchʼool ut teʼxkʼutbʼesi chiru naq nekeʼxra. Laj Pablo kixye naq wi nekeʼxkuy xmaak, teʼxkʼutbʼesi naq nekeʼpaabʼank saʼ chixjunil (2 Cor. 2:9). Usta tojeʼ xʼisiik saʼ li chʼuut, li qʼuseʼk kixbʼaanu naq tixyotʼ xchʼool. Joʼkan naq moko wank ta xyaalal re naq ebʼ li cheekel winq teʼxram chiru naq tsutqʼiiq wiʼ chik saʼ li chʼuut.
KʼARU NAQATZOL RIKʼIN LI JEHOBʼA NAQ NAʼUXTAANANK U UT TIIK XCHʼOOL
14, 15. Kʼaru naqatzol chirix chanru kituqubʼaak ru jun li nimla maak saʼ li chʼuut re Corinto? (2 Pedro 3:9; chaawil li jalam u).
14 Li Jehobʼa kixkanabʼ naq ttzʼiibʼamanq saʼ li Santil Hu li kikʼulmank saʼ li chʼuut re Corinto «re qatzolbʼal» (Rom. 15:4). Aʼin naxkʼut chiqu naq li Jehobʼa inkʼaʼ naxkʼulubʼa li nimla maak saʼ li xtenamit. Wankebʼ nekeʼxkʼoxla naq saʼ xkʼabʼaʼ naq naʼuxtaanank u, naxkanabʼ naq twanq saʼ li chʼuut junaq li kristiʼaan li inkʼaʼ xyotʼ xchʼool. Abʼan aʼin moko yaal ta. Usta li Jehobʼa naʼuxtaanank u inkʼaʼ naxkʼulubʼa naq ebʼ li hermaan joʼkan teʼnaʼlebʼaq. Li xchaqʼrabʼ chirix li us ut li inkʼaʼ us inkʼaʼ najalaak (Jud. 4). Li Jehobʼa moko tixkʼutbʼesi ta naq naʼuxtaanank u wi naxkanabʼ saʼ li xtenamit li kristiʼaan li inkʼaʼ naxyotʼ xchʼool xbʼaan naq li xnaʼlebʼ naru tixpoʼ li xnaʼlebʼ li junchʼol chik chi hermaan (Prov. 13:20; 1 Cor. 15:33).
15 Li naʼlebʼ aʼin naxkʼut naq li Jehobʼa naraj naq maaʼani tsacheʼq, naraj bʼan naq chixjunilebʼ li kristiʼaan teʼkoleʼq. Naxkʼutbʼesi naq naruxtaana ruhebʼ li nekeʼxjal xnaʼlebʼ ut nekeʼxbʼaanu chixjunil re wank wiʼ chik saʼ amiiwil rikʼin (Ezeq. 33:11; yaabʼasi 2 Pedro 3:9). Naq li winq re Corinto kixyotʼ xchʼool ut kixkanabʼ li yibʼru aj naʼlebʼ, li Jehobʼa kiroksi laj Pablo re xyeebʼal re li chʼuut naq tento teʼxkuy xmaak ut teʼxkʼul wiʼ chik saʼ li chʼuut.
Naq naqakʼulebʼ chi anchal qachʼool li xeʼisiik saʼ li chʼuut naqakʼutbʼesi naq nokoorahok ut nokooʼuxtaanank u joʼ li Jehobʼa. (Chaawil li raqal 14 ut 15).
16. Kʼaru nakaawekʼa chirix li Jehobʼa naq nakaanaʼlebʼa rix chanru kituqubʼaak ru li kikʼulmank saʼ li chʼuut re Corinto?
16 Xtzolbʼal li kikʼulmank saʼ li chʼuut re Corinto nokooxtenqʼa chi rilbʼal li xrahom ut naq li Jehobʼa naraqok aatin saʼ tiikilal (Sal. 33:5). Xtzolbʼal aʼin naxbʼaanu naq qʼaxal wiʼ chik tqaj xkʼebʼal xloqʼal. Jwal naqabʼanyoxi re li Jehobʼa naq naʼuxtaanank u xbʼaan naq laaʼo aj maak ut naʼajmank naq tkuyeʼq qamaak. Joʼkan ajwiʼ naqabʼanyoxi naq xkʼe li Ralal re qakolbʼal re naq chi joʼkan tkuyeʼq ut tsacheʼq li qamaak. Naxkʼojobʼ ajwiʼ qachʼool xnawbʼal naq li Jehobʼa naxra chi anchal xchʼool ebʼ laj kʼanjel chiru ut naraj li us choʼq rehebʼ.
17. Kʼaru tqatzʼil rix saʼ li tzolom 34 ut 35?
17 Wi junaq naxbʼaanu jun li nimla maak saʼ li qakutan, chanru teʼruuq ebʼ li cheekel winq xkʼambʼal rehebʼ rikʼin li xrahom li Jehobʼa ut xtenqʼankil li kristiʼaan re naq tixyotʼ xchʼool? Ut chanru toonaʼlebʼaq naq ebʼ li cheekel winq nekeʼxkʼubʼ risinkil malaj xkʼulubʼankil wiʼ chik saʼ li chʼuut jun li kristiʼaan? Tqatzʼil rix ebʼ li patzʼom aʼin saʼ li tzolom 34 ut 35.
BʼICH 109 Choorahoq chi anchal qachʼool
