Li apóstol Pablo kixye rehebʼ laj paabʼanel re Tesalónica: «Wi junaq eere inkʼaʼ naxpaabʼ li naqaye eere saʼ li esilhu aʼin, weent teebʼaanu rikʼin li qas qiitzʼin aʼin» (2 Tes. 3:14). Junxil nayeemank naq li naʼlebʼ aʼin choʼq rehebʼ li cheekel winq. Wi junaq inkʼaʼ naxyuʼami li naxye li Santil Hu usta naabʼal sut nakʼeheʼk xnaʼlebʼ, ebʼ li cheekel winq nekeʼxkʼe jun li seeraqʼ saʼ li chʼuut re xyeebʼal naq li kristiʼaan aʼin inkʼaʼ naʼabʼink. Chalen aran, ebʼ li hermaan nekeʼxkanabʼ xjunajinkil ribʼ rikʼin, kaʼaj chik nekeʼxbʼaanu naq wankebʼ saʼ li chʼutam ut saʼ li puktesink.

Anaqwan naqataw ru naq li yook xyeebʼal laj Pablo aʼan jun li naʼlebʼ li tento tixbʼaanu li junjunq chi hermaan naq t-ajmanq. Joʼkan naq moko aajel ta chik ru naq ebʼ li cheekel winq teʼxkʼe jun li seeraqʼ saʼ li chʼuut re xyeebʼal naq li kristiʼaan inkʼaʼ naʼabʼink. Kʼaʼut xjalaak chanru naqataw ru aʼin? Qatzʼilaq rix chirix kʼaru yook chi aatinak laj Pablo naq kixkʼe li naʼlebʼ aʼin.

Laj Pablo kixye naq saʼ li chʼuut wankebʼ li hermaan li inkʼaʼ chik nekeʼabʼink. Inkʼaʼ nekeʼxpaabʼ li naʼlebʼ li kixkʼe laj Pablo rehebʼ li chalenaq saʼ li Santil Hu. Naq kirulaʼanihebʼ kixye rehebʼ: «Wi junaq eere inkʼaʼ naraj kʼanjelak, miwaʼak». Usta joʼkan, wankebʼ inkʼaʼ nekeʼraj kʼanjelak re xwenteninkil ribʼebʼ usta nekeʼruuk xbʼaanunkil. Joʼkan ajwiʼ nekeʼxchʼik ribʼ bʼarwiʼ inkʼaʼ nekeʼbʼoqeʼk. Chanru ebʼ laj paabʼanel teʼril li inkʼaʼ chik naʼabʼink? (2 Tes. 3:​6, 10-12).

Laj Pablo kixye: «Weent teebʼaanu rikʼin li qas qiitzʼin aʼin». Li aatin saʼ griego li kiʼoksimank naraj xyeebʼal naq teʼreetali li kristiʼaan ut weent teʼxbʼaanu xbʼaan naq naru teʼxpoʼ li xnaʼlebʼ. Li naʼlebʼ aʼin kikʼemank re li chʼuut moko kaʼaj tawiʼ rehebʼ li cheekel winq (2 Tes. 1:1; 3:6). Wi jun li hermaan naxkʼe reetal naq jun li rechpaabʼanel yook xqʼetbʼal li naxye li Santil Hu, li hermaan aʼin tixkʼoxla chiʼus wi toj traj «wank choʼq ramiiw» li rechpaabʼanel.

Aʼin moko naraj ta xyeebʼal naq teʼril li kristiʼaan joʼ naʼileʼk li xʼisiik saʼ li chʼuut, xbʼaan naq laj Pablo kixye: «Junelik bʼan teekʼe xnaʼlebʼ joʼ eerechpaabʼanel». Joʼkan naq li junjunq aj paabʼanel kaʼajwiʼ truuq xjunajinkil ribʼ rikʼin saʼ li chʼutam ut saʼ li puktesink, inkʼaʼ chik tixnumsi xhoonal rikʼin naq teʼxchʼutubʼ ribʼ chixjunilebʼ malaj naq teʼelq chi rajsinkil ruhebʼ. Laj Pablo kixye naq aʼin nabʼaanumank: «Re naq txutaanaq». Naq inkʼaʼ chik teʼxjunaji ribʼ rikʼin, li inkʼaʼ naʼabʼink naru txutaanaq ut tixjal li xnaʼlebʼ (2 Tes. 3:​14, 15).

Ut laaʼo, chanru tqayuʼami li naʼlebʼ aʼin? Joʼ kixye laj Pablo, xbʼeenwa chʼolchʼooq chiqu naq li kristiʼaan «inkʼaʼ chik naʼabʼink». Laj Pablo inkʼaʼ yook chi aatinak chirixebʼ li hermaan li inkʼaʼ nekeʼkʼoxlak joʼ laaʼo chirix junaq li naʼlebʼ. Ut inkʼaʼ ajwiʼ yook chi aatinak chirixebʼ li hermaan li xeʼxtochʼ qachʼool, yook bʼan chi aatinak chirixebʼ li hermaan li naabʼal sut xeʼkʼeheʼk xnaʼlebʼ abʼan inkʼaʼ xeʼraj abʼink.

Wi naqakʼe reetal naq jun li hermaan inkʼaʼ chik naxpaabʼ li naxye li Santil Hu, a tqakʼubʼ naq inkʼaʼ chik tqajunaji qibʼ rikʼin. Saʼ xkʼabʼaʼ naq laaʼo xqasikʼ xbʼaanunkil aʼin, inkʼaʼ tqaye rehebʼ li maawaʼebʼ qajunkabʼal. Abʼan toj tqajunaji qibʼ rikʼin saʼebʼ li chʼutam ut saʼ li puktesink. Ut naq li kristiʼaan aʼin tixjal xnaʼlebʼ naru tqajunaji wiʼ chik qibʼ rikʼin joʼ naqabʼaanu junxil.