CHANRU nakaawekʼa aawibʼ naq jun laawamiiw naxtaqla chaq jun li esilhu li naxwaklesi aachʼool? Li apóstol Pablo kixtaqla jun li esilhu joʼ aʼin re laj Timoteo. Li esilhu aʼin natawmank saʼ li Santil Hu ut nanawmank ru joʼ Xkabʼ Hu choʼq re laj Timoteo. Chʼolchʼo naq laj Timoteo kixsikʼ jun li naʼaj bʼarwiʼ maaʼani tchʼiʼchʼiʼinq re, re rilbʼal xsaʼ li esilhu li kitaqlaak re xbʼaan laj Pablo. Maare laj Timoteo kixkʼoxla: «Chanru wank laj Pablo? Ma kixtaqla chaq we jun chaabʼil naʼlebʼ re xbʼaanunkil chiʼus li kʼanjel kʼebʼil saʼ wuqʼ? Ma naru nikinxtenqʼa li esilhu aʼin re xchaabʼilobʼresinkil ru linkʼanjel chiru li Yos ut re xtenqʼankilebʼ jalan chik?». Li esilhu aweʼ kixsume ebʼ li patzʼom aʼan ut jalan chik patzʼom. Tqajultika wiibʼ oxibʼ li chaabʼil naʼlebʼ li naqataw saʼ li esilhu aʼin.

Naq laj Timoteo kixtikibʼ xyaabʼasinkil li esilhu aweʼ, saʼ junpaat kixkʼe reetal naq qʼaxal nakʼoxlaak chaq xbʼaan li apóstol Pablo. Chi anchal xchʼool laj Pablo kixye re: «Inraarookil alal» (2 Tim. 1:2). Maare chiru li chihabʼ 65 naq laj Timoteo kixkʼul li esilhu aʼin, numenaq tana 30 chihabʼ wank re, abʼan ak naabʼal xnawom joʼ cheekel winq. Numenaq lajeebʼ chihabʼ kikʼanjelak rochbʼen laj Pablo ut kixtzol naabʼal li naʼlebʼ rikʼin.

Chʼolchʼo naq qʼaxal kikawubʼresiik xchʼool laj Timoteo naq kixnaw naq laj Pablo yook chaq xkuybʼal chixjunil li rahilal. Wank saʼ tzʼalam saʼ li tenamit Roma, ut chi seebʼ tkamsiiq (2 Tim. 1:15, 16; 4:6-8). Laj Timoteo kixkʼe reetal naq kaw xchʼool li apóstol Pablo, xbʼaan naq kixtzʼiibʼa re: «Nalaj inkuy chixjunil» (2 Tim. 2:8-13). Li kawil chʼoolej li kixkʼutbʼesi laj Pablo qʼaxal kixkawubʼresi xchʼool laj Timoteo ut joʼkan ajwiʼ naru naxbʼaanu qikʼin.

Laj Pablo kixwaklesi xchʼool laj Timoteo re naq qʼaxal oxloqʼaq chiru li xkʼanjel li Yos. Aʼan kixye re laj Timoteo: «Nintzʼaama chawu naq chatzʼabʼ xxamlel laamaatan kʼeebʼil aawe xbʼaan li Yos» (2 Tim. 1:6). Laj Pablo kiroksi li aatin saʼ griego khárisma re xjalbʼal li aatin «maatan». Li aatin aʼin naraj xyeebʼal naq naqakʼul junaq li kʼaʼaq re ru chi sibʼil usta moko qakʼulubʼ ta ut maakʼaʼ xqabʼaanu re xtawbʼal. Laj Timoteo kixkʼul li maatan aʼin naq kikʼeheʼk saʼ ruqʼ jun li xnimal ru kʼanjel saʼ li chʼuut (1 Tim. 4:14).

Kʼaru raj tento tixbʼaanu laj Timoteo rikʼin li maatan aʼin? Naq kiril li aatin aʼin: «Nintzʼaama chawu naq chatzʼabʼ xxamlel», maare kixkʼoxla li nakʼulmank  rikʼin li xaml saʼ ochoch naq timil timil naʼok chi chupk ut yal kaʼaj chik ru xaml nakanaak. Aajel ru xwalusinkil re naq inkʼaʼ tchupq. Jun li tasal hu naxye naq li aatin li kiroksi laj Pablo (anazōpyréō) saʼ griego, naraj xyeebʼal: «Xlochbʼal wiʼ chik malaj xwalusinkil». Rikʼin wiibʼ oxibʼ li aatin, laj Pablo yook xyeebʼal re laj Timoteo naq chikʼanjelaq chi kaw ut chi sa saʼ xchʼool. Chanchan tawiʼ kixye re: «Bʼaanu chi anchal aachʼool laakʼanjel». Laaʼo ajwiʼ tento tqakʼam qe rikʼin laj Timoteo: chookʼanjelaq chi kaw chiru li Yos ut chi sa saʼ qachʼool.

Naq laj Timoteo yook rilbʼal li esilhu li kitaqlaak re xbʼaan laj Pablo kixtaw wiibʼ oxibʼ li aatin li ttenqʼanq re, re naq jwal us t-elq saʼ li xkʼanjel li Yos. Laj Pablo kixtzʼiibʼa re laj Timoteo: «Rikʼin xwankil li Santil Musiqʼej li wank qikʼin chakʼuula saʼ laachʼool li yaal qʼaxtesinbʼil aawe» (2 Tim. 1:14). Kʼaru li xnimal ru maatan kiqʼaxtesiik saʼ ruqʼ laj Timoteo? Saʼ li raqal rubʼelaj, laj Pablo kiʼaatinak chirix «li chaabʼil aatin» malaj li yaal li natawmank saʼ li Santil Hu (2 Tim. 1:13). Saʼ xkʼabʼaʼ naq laj Timoteo aʼan chaq jun aj kʼanjel chiru li Yos, tento raj naq tixkʼut li yaal saʼ li chʼuut ut chiruhebʼ jalan chik poyanam (2 Tim. 4:1-5). Joʼkan ajwiʼ, kixaqabʼaak chaq joʼ cheekel winq re rilbʼal chiʼus ebʼ li xkarneer li Yos (1 Ped. 5:2). Chan raj ru truuq laj Timoteo rilbʼal chiʼus li xnimal ru maatan li kʼebʼil saʼ ruqʼ, aʼ li yaal li tento tixkʼut? Rikʼin xtenqʼ li xsantil musiqʼej li Jehobʼa ut li Raatin (2 Tim. 3:14-17).

Laaʼo ajwiʼ kʼebʼil saʼ quqʼ jun li xnimal ru maatan, li yaal li naqakʼut chiruhebʼ li poyanam (Mat. 28:19, 20). Misach saʼ qachʼool naq jwal wank xwankil li yaal li naqakʼut, joʼkan naq aajel ru naq wulaj wulaj tootijoq ut tqatzol li Raatin li Yos (Rom. 12:11, 12; 1 Tim. 4:13, 15, 16). Joʼkan ajwiʼ, maare laaʼat cheekel winq malaj nakaakʼe chixjunil laahoonal saʼ li xkʼanjel li Yos. Wi kʼebʼil saʼ quqʼ jun li maatan joʼ aʼan, tento raj tooxtenqʼa chi xyuʼaminkil li kubʼsink ibʼ ut chi xkʼojobʼankil qachʼool rikʼin li Yos. Joʼkan bʼiʼ, tooruuq rilbʼal chiʼus li qamaatan wi oxloqʼ chiqu ut naqasikʼ li xtenqʼ li Jehobʼa.

Saʼ xyanq li xkʼanjel laj Timoteo, kʼebʼil saʼ ruqʼ xkawresinkil jalanebʼ chik. Joʼkan naq laj Pablo kixye: «Joʼchʼinal joʼnimal li xawabʼi wikʼin [...] chaqʼaxtesi rehebʼ winq aj paabʼanel li teʼxnaw moqon xtzolbʼal jalanebʼ chik» (2 Tim. 2:2). Laj Pablo kixjultika re laj Timoteo naq chixkʼutaq chiruhebʼ li junchʼol chixjunil li kixtzol. Saʼebʼ li qakutan, aajel ru naq ebʼ li cheekel winq teʼxkʼe xqʼe chi xtenqʼankil li chʼuut joʼ kixbʼaanu laj Timoteo. Jun li hermaan li najolomink chiʼus inkʼaʼ naxmuq chiru ebʼ li junchʼol chanru xbʼaanunkil junaq li kʼanjel, naxkʼut bʼan chiruhebʼ chanru xbʼaanunkil. Inkʼaʼ naxkʼoxla naq junaq li rechpaabʼanel tixbʼaanu chiʼus li kʼanjel chiru aʼan. Joʼkan naq moko bʼabʼay ta ajwiʼ li naʼlebʼ naxkʼut chirix junaq li kʼanjel. Aʼan naraj naq ebʼ li hermaan li naxkawresihebʼ chaabʼilaqebʼ xnaʼlebʼ ut kawaqebʼ saʼ li xpaabʼal. Chi joʼkan, ebʼ li «winq aj paabʼanel» aʼan, qʼaxal us teʼkʼanjelaq saʼ li chʼuut.

Relik chi yaal naq qʼaxal oxloqʼ chaq chiru laj Timoteo li esilhu li kitaqlaak re xbʼaan laj Pablo. Kokʼaj xsaʼ tana kiril li chaabʼil naʼlebʼ li kikʼeheʼk re ut kixkʼoxla rix chanru tixyuʼami.

Laaʼo ajwiʼ naqaj xyuʼaminkil li chaabʼil naʼlebʼ aʼin. Chanru tooruuq xbʼaanunkil? Rikʼin xkʼebʼal qachʼool chi xtzʼabʼal xxamlel li maatan li kʼebʼil qe xbʼaan li Yos, rilbʼal chiʼus li yaal li qʼaxtesinbʼil saʼ quqʼ ut xkʼutbʼal chiruhebʼ li junchʼol li naqanaw. Chi joʼkan, joʼ kixye laj Pablo re laj Timoteo, tooruuq xbʼaanunkil chi tzʼaqal re ru li qakʼanjel (2 Tim. 4:5).