Ma xaakʼe aachʼool chi rilbʼal ebʼ li hu Laj Kʼaakʼalehom li tojeʼ xeʼelk? Kʼutbʼesi ma nakatruuk xsumenkil ebʼ li patzʼom aʼin:

Chanru tqilebʼ li yulbʼilebʼ ru?

Oxloqʼ chiqu li xpaabʼalebʼ, abʼan moko qʼaxal naqakʼehebʼ ta xwankil. Laaʼo moko naqanima ta ruhebʼ li wankebʼ xwankil. Inkʼaʼ naqapatzʼ rehebʼ chirix li roybʼenihomebʼ (w20.01, perel 29).

Kʼaʼut naqapaabʼ chi anchal qachʼool naq li Jehobʼa naxkʼe xchʼool chiqix?

Li Santil Hu naxkʼut naq li Jehobʼa kixkʼe xchʼool chiqix naq toj maajiʼ nokooyoʼlaak ut narabʼi li qatij. Naxnaw ajwiʼ li wank saʼ li qachʼool ut li yooko xkʼoxlankil, ut li qabʼaanuhom naru naxsahobʼresi malaj naxrahobʼtesi xchʼool (1 Crón. 28:9; Prov. 27:11). Joʼkan ajwiʼ, li Jehobʼa kikʼamok chaq qe rikʼin (w20.02, perel 12).

Joqʼe tento tooʼaatinaq ut joqʼe tento tookanaaq chi chʼanchʼo?

Qʼaxal naxkʼe xsahil qachʼool aatinak rikʼin li Jehobʼa. Nokooʼaatinak ajwiʼ naq jun li hermaan moko us ta chik nanaʼlebʼak. Ebʼ li cheekel winq nekeʼxkʼe xnaʼlebʼ junaq li qechpaabʼanel naq naʼajmank chiru. Inkʼaʼ naqapatzʼ chi moko naqaseeraqʼi chanru yook chi bʼaanumank li qakʼanjel saʼebʼ li naʼajej bʼarwiʼ ramro. Inkʼaʼ naqaseeraqʼi ebʼ li naʼlebʼ li moko naru ta xyeebʼal chi kutankil (w20.03, perel 20 ut 21).

Bʼar wank xjalanil ebʼ li chiliʼ li natawmank resil saʼ li tasal 2 re Joel rikʼin li natawmank saʼ li tasal 9 re Apocalipsis?

Saʼ Joel 2:20-29 naxye naq li Yos naxkʼamebʼ chi najt ebʼ li chiliʼ ut naxye naq tixkʼe reqaj chixjunil li xeʼxsach ru. Chirix chik aʼan, naxhoy li xmusiqʼ. Aweʼ kitzʼaqlok ru naq ebʼ laj Babilonia xeʼrechani li tenamit Israel ut moqon chik. Saʼ Apocalipsis 9:1-11 naʼaatinak chirixebʼ li sikʼbʼilebʼ ru li wankebʼ saʼebʼ li qakutan, ebʼ aʼan, joʼkebʼ li chiliʼ, nekeʼxpuktesi resil li tojbʼamaak li tixkʼam chaq li Yos saʼ xbʼeen li maaʼus aj ruuchichʼochʼ aʼin, ut aweʼ naxchʼiʼchʼiʼi ebʼ li nekeʼokenk chirix (w20.04, perel 3 toj 6).

Ani li awabʼej re relebʼl iqʼ saʼebʼ li qakutan?

Li tenamit Rusia ut li nekeʼxkʼam ribʼ saʼ aatin rikʼin. Nekeʼxchʼiʼchʼiʼi li xtenamit li Yos xbʼaan naq nekeʼxram li puktesink ut xikʼ nekeʼril ebʼ laj testiiw re li Jehobʼa. Li awabʼej re relebʼl iqʼ napleetik rikʼin li awabʼej re rokebʼl iqʼ (w20.05, perel 13).

Ma kaʼaj tawiʼ ebʼ li bʼeleebʼ chi chaabʼil naʼlebʼ li natawmank saʼ Gálatas 5:22, 23 «naruuchin li Musiqʼej»?

Inkʼaʼ, moko joʼkan ta. Li santil musiqʼej nokooxtenqʼa ajwiʼ chi xyuʼaminkil jalan chik li chaabʼil naʼlebʼ, joʼ li tiikilal (Efes. 5:8, 9) (w20.06, perel 17).

Kʼaʼut naq tento tqabʼaanu weent naq tqataqsi saʼ Internet ebʼ li jalam u, ebʼ li bʼideo malaj li naqatzʼiibʼa chiqix?

Li naqataqsi saʼ Internet naru naxbʼaanu naq ebʼ li junchʼol teʼxkʼoxla naq yooko xnimobʼresinkil qibʼ ut naq inkʼaʼ yooko xyuʼaminkil li kubʼsink ibʼ (w20.07, perel 6 ut 7).

Kʼaru naqatzol rikʼinebʼ laj kar li nekeʼxbʼaanu chiʼus li xkʼanjelebʼ?

Ebʼ li nekeʼxnaw karibʼk nekeʼkʼanjelak saʼ li hoonal ut saʼ li naʼajej bʼarwiʼ naru nekeʼxtaw ebʼ li kar, nekeʼxnaw roksinkil chiʼus ebʼ li kʼanjelobʼaal li naʼajmank chiruhebʼ. Laaʼo ajwiʼ naru naqabʼaanu aʼin saʼ li puktesink (w20.09, perel 5).

Chanru tooruuq xtenqʼankil li qatzolom re naq qʼaxal tixra li Yos?

Naru naqawaklesi xchʼool chi xyaabʼasinkil li Santil Hu wulaj wulaj, naru naqatenqʼa chi xkʼoxlankil rix li naril ut naru naqakʼut chiru chanru ttijoq (w20.11, perel 4).

Ani chik kixkʼehebʼ saʼ ajl laj Pablo naq kixye naq «chixjunilebʼ teʼwanq wiʼ chik xyuʼam saʼ xkʼabʼaʼ li Kriist»? (1 Cor. 15:22).

Li apóstol Pablo moko kiraj ta xyeebʼal naq chixjunilebʼ li poyanam teʼwakliiq wiʼ chik chi yoʼyo. Naq kixye: «Chixjunilebʼ», kixkʼehebʼ saʼ ajl li yulbʼilebʼ ru, li santobʼresinbʼilebʼ «saʼ xkʼabʼaʼ li Kristo Jesus» (1 Cor. 1:2; 15:18) (w20.12, perel 5 ut 6).

Kʼaru teʼxbʼaanu li yulbʼilebʼ ru naq teʼjalanoʼq «chiru jun mutzʼul, naq taayaabʼasiiq li tronpeet saʼ rosoʼjik»? (1 Cor. 15:51-53).

Teʼxtenqʼa li Jesús chi xbʼeresinkil ebʼ li tenamit rikʼin bʼaar chʼiichʼ (Apoc. 2:26, 27) (w20.12, perel 12 ut 13).