1. Kʼaru kixkʼul jun li chʼajom naq kirabʼi jun li seeraqʼ li kikʼemank saʼ jun li nimla chʼutam saʼ li chihabʼ 1935?

CHIRU li chihabʼ 1926, jun li chʼajom li wank chaq 18 chihabʼ re kikubʼeek xhaʼ. Li xnaʼ xyuwaʼ xeʼwank saʼ xyanqebʼ li nekeʼtzolok chaq chirix li Santil Hu. Chiruhebʼ li kutan aʼan kamaʼin nawbʼilebʼ chaq ru ebʼ laj testiiw re li Jehobʼa. Wankebʼ chaq oobʼ ralal xkʼajol li xeʼxkʼut chiruhebʼ kʼanjelak chiru li Jehobʼa ut xkʼambʼal rehebʼ rikʼin li Kriist. Li chʼajom aʼan rajlal chihabʼ naxwaʼ li kaxlanwa ut narukʼ li bʼiin naq nanimaak li xkamik li Kriist joʼ nekeʼxbʼaanu chaq chixjunilebʼ li nekeʼtzolok chaq chirix li Santil Hu chiruhebʼ li chihabʼ aʼan. Abʼan li xyuʼam kijalaak chi junajwa naq kirabʼi li seeraqʼ li naxkʼabʼaʼi: «Naabʼalebʼ chi tenamit». Li hermaan Joseph Rutherford kixkʼe li seeraqʼ aʼin saʼ li chihabʼ 1935 saʼ jun li nimla chʼutam li xwank aran Washington (Estados Unidos). Kʼaru li naʼlebʼ kitawmank ru chiʼus saʼ li nimla chʼutam aʼan?

2. Kʼaru li chaabʼil naʼlebʼ kixchʼolobʼ li hermaan Rutherford saʼ li xseeraqʼ?

² Saʼ li seeraqʼ li kixkʼe li hermaan Rutherford, kixchʼolobʼ anihebʼ nekeʼokenk saʼ xyanqebʼ li «naabʼalebʼ chi tenamit» (Li Santil Hu, Wycliffe Bible Translators. Akʼ tzʼiibʼ) malaj «ebʼ li kʼiila tenamit» li naʼaatinak wiʼ Apocalipsis 7:9. Chiruhebʼ li kutan aʼan toj nakʼoxlamank chaq naq li chʼuut aʼan teʼxik saʼ choxa, abʼan moko qʼaxal tiikebʼ ta xchʼool joʼkebʼ li yulbʼilebʼ ru. Li hermaan Rutherford kiroksi li Santil Hu re xchʼolobʼankil naq ebʼ li kʼiila tenamit inkʼaʼ sikʼbʼilebʼ ru re xik saʼ choxa, aʼanebʼ  bʼan li jalan chik karneer * li teʼkoleʼq saʼ li nimla rahilal ut teʼwanq xyuʼam chi junelik arin saʼ Ruuchichʼochʼ (Apoc. 7:14). Li Jesús kixyeechiʼi: «Wankebʼ ajwiʼ jalan chik inkarneer li moko wankebʼ ta saʼ li koral aʼin; aʼanebʼ ajwiʼ tento tinbʼeresihebʼ chaq, ut teʼrabʼi xyaabʼ linkux, ut jun chʼuutaqebʼ aj chik naq teʼwanq, ut junaq ajwiʼ laj kʼaakʼalehom rehebʼ» (Juan 10:16). Li chʼuut aʼin aʼanebʼ laj testiiw re li Jehobʼa li wank roybʼenihomebʼ re wank chi junelik saʼ li Chʼinaʼusil Naʼajej arin saʼ Ruuchichʼochʼ (Mat. 25:31-33, 46). Qakʼehaq reetal chanru naq li akʼ naʼlebʼ aʼin kixjal xyuʼamebʼ naabʼal laj kʼanjel chiru li Yos, joʼwiʼ li chʼajom aʼan li wank chaq 18 chihabʼ re (Sal. 97:11; Prov. 4:18).

3, 4. Saʼ li nimla chʼutam li kiwank saʼ li chihabʼ 1935, kʼaru xeʼxkʼe reetal naabʼalebʼ li hermaan, ut kʼaʼut?

³ Kʼajoʼ xchʼinaʼusal li kikʼulmank saʼ li nimla chʼutam aʼan naq li hermaan Rutherford kixpatzʼ rehebʼ li yookebʼ chi rabʼinkil: «Bʼaanumaq usilal, ma texruuq raj chi xaqliik chixjunilex li wank eeroybʼenihom arin saʼ Ruuchichʼochʼ?». Jun li hermaan li kiwulak saʼ li nimla chʼutam aʼan kixye naq kachʼin chik ma chixjunilebʼ xeʼxaqliik. Li hermaan Rutherford kixye: «Wayeʼ ebʼ li kʼiila tenamit!». Tojaʼ naq chixjunilebʼ li wankebʼ aran xeʼxpoqʼpoqʼi saʼ ruqʼ ut xeʼxjap rehebʼ xbʼaan xsahilebʼ xchʼool. Ebʼ li hermaan li xeʼxaqliik xeʼxtaw ru naq moko sikʼbʼilebʼ ta ru re xik saʼ choxa chi moko xeʼyuleʼk ru rikʼin santil musiqʼej. Wulajaq, 840 ebʼ li kristiʼaan xeʼkubʼeek xhaʼ ut li xkʼihalil aʼanebʼ li jalan chik karneer.

⁴ Chalen li kutan aʼan chi mil ebʼ li hermaan, joʼwiʼ li chʼajom li xooʼaatinak wiʼ, xeʼxkanabʼ xwaʼbʼal li kaxlanwa ut rukʼbʼal li bʼiin naq nanimaak li xkamik li Kriist. Naabʼalebʼ xeʼrekʼa ribʼ joʼ kixye jun li hermaan: «Kaʼaj chik saʼ 1935 xinwaʼ li kaxlanwa ut xwukʼ li bʼiin. Xinkʼe reetal naq li Jehobʼa moko kiroksi ta li xsantil musiqʼej re xkʼebʼal li woybʼenihom re xik saʼ choxa. Li woybʼenihom bʼan aʼan wank arin saʼ Ruuchichʼochʼ ut kʼanjelak re naq tchʼinaʼusoʼq wiʼ chik» (Rom. 8:16, 17; 2 Cor. 1:21, 22). Chalen chaq li hoonal aʼan, ebʼ li kʼiila tenamit junelik yookebʼ chi kʼihank ut nekeʼkʼanjelak rochbʼenebʼ li yulbʼilebʼ ru li toj wankebʼ arin saʼ Ruuchichʼochʼ.

5. Chanru narilebʼ li Jehobʼa li hermaan li xeʼxkanabʼ xwaʼbʼal li kaxlanwa ut rukʼbʼal li bʼiin?

⁵ Chalen li chihabʼ 1935, chanru narilebʼ li Jehobʼa li hermaan li xeʼxkanabʼ xwaʼbʼal li kaxlanwa ut rukʼbʼal li bʼiin? Ut, kʼaru naxkʼoxla li Jehobʼa chirix junaq laj Testiiw wi naxwaʼ li kaxlanwa ut narukʼ li bʼiin xbʼaan naq naxkʼoxla naq relik chi yaal naq yulbʼil ru abʼan saʼ xnumikebʼ li kutan naxkʼe reetal naq moko joʼkan ta peʼ? (1 Cor. 11:28). Wiibʼ oxibʼ li hermaan nekeʼxwaʼ chaq li kaxlanwa ut nekeʼrukʼ li bʼiin xbʼaan naq nekeʼxkʼoxla naq teʼxik saʼ choxa. Abʼan, wi ebʼ aʼan chi anchalebʼ xchʼool nekeʼxkʼulubʼa naq moko joʼkan ta, nekeʼxkanabʼ xwaʼbʼal li kaxlanwa ut rukʼbʼal li bʼiin, ut inkʼaʼ nekeʼxkanabʼ kʼanjelak chiru li Jehobʼa, aʼan tixkʼulebʼ saʼ xyanq ebʼ li jalan chik karneer. Usta inkʼaʼ chik nekeʼxwaʼ li kaxlanwa chi moko nekeʼrukʼ li bʼiin, abʼan inkʼaʼ nekeʼxkanabʼ wulak chi xnimankil li xkamik li Kriist xbʼaan naq oxloqʼ chiruhebʼ li kixbʼaanu li Jehobʼa ut li Jesús saʼ xkʼabʼaʼebʼ.

6. Kʼaru naxye li Jesús rehebʼ li ánjel naq teʼxbʼaanu?

⁶ Nachʼ wank chaq li nimla rahilal. Joʼkan naq us naq tqatzʼil rix chiʼus li naxye Apocalipsis 7 chirixebʼ li yulbʼilebʼ ru ut ebʼ li kʼiila tenamit. Arin naxye naq li Jesús naxtaqlahebʼ li ánjel chi xrambʼal li riqʼul li sachok u. Inkʼaʼ nekeʼxkanabʼ naq li riqʼul li sachok u t-oq saʼ xbʼeen li Ruuchichʼochʼ toj reetal naq li yulbʼilebʼ ru teʼxkʼul li kaaxt chi xpeekemebʼ, malaj naq li Jehobʼa tixkʼulubʼahebʼ (Apoc. 7:1-4). Li maatan li nekeʼxkʼul li yulbʼilebʼ ru saʼ xkʼabʼaʼ naq inkʼaʼ nekeʼxtzʼeqtaana li Yos aʼan wank joʼ awabʼej ut joʼ aj tij rochbʼen li Kriist saʼ choxa (Apoc. 20:6). Li Jehobʼa, li Jesús ut ebʼ li ánjel qʼaxal teʼsahoʼq saʼ xchʼool naq ebʼ li 144,000 teʼxkʼul li xqʼajkamunkilebʼ saʼ choxa.

7. Joʼ naxye saʼ Apocalipsis 7:9, 10, anihebʼ kiril ru laj Juan, ut kʼaru yookebʼ xbʼaanunkil? (Chaawil li jalam u chiru li hu).

⁷ Naq ak xʼaatinak chirixebʼ li 144,000 li teʼwanq joʼ awabʼej ut joʼ aj tij, laj Juan naril jun xnimal ru naʼlebʼ: naq «kʼajoʼ xkʼihalebʼ li tenamit» li nekeʼkoleʼk saʼ li Armagedón. Li xkabʼ chʼuut jalan chiru li xbʼeen xbʼaan naq jwal kʼihebʼ ut maaʼani naruhank rajlankilebʼ (taayaabʼasi Apocalipsis 7:9, 10). «Tiqtookebʼ rikʼin saqi aqʼ», aʼan naraj xyeebʼal naq inkʼaʼ xeʼxmux ribʼ rikʼin li xruuchichʼochʼ laj Tza ut inkʼaʼ xeʼxtzʼeqtaana li Yos ut li Kriist (Sant. 1:27). Nekeʼxjap rehebʼ chi xyeebʼal naq xeʼkoleʼk saʼ xkʼabʼaʼ li kixbʼaanu li Jehobʼa ut li Jesús chirixebʼ. Joʼkan ajwiʼ, wank saʼ ruqʼebʼ li xxaq mokooch, li naraj xyeebʼal naq chi anchalebʼ xchʼool nekeʼxkʼulubʼa naq li Jehobʼa kixxaqabʼ li Jesús choʼq Awabʼej (juntaqʼeeta rikʼin Juan 12:12, 13).

8. Kʼaru naxye Apocalipsis 7:11, 12 chirix li xjunkabʼal li Jehobʼa li wank saʼ choxa?

⁸ Taayaabʼasi Apocalipsis 7:11, 12. Chanru xeʼnaʼlebʼak li xjunkabʼal li Jehobʼa li wank saʼ choxa? Laj Juan naril naq chixjunilebʼ kʼajoʼ naq nekeʼsahoʼk saʼ xchʼool ut nekeʼxkʼe xloqʼal li Yos naq nekeʼril ru ebʼ li kʼiila tenamit. Li Jehobʼa ut li xjunkabʼal li wank saʼ choxa qʼaxal teʼsahoʼq saʼ xchʼool naq ttzʼaqloq ru li moy u aʼin chirix ebʼ li kʼiila tenamit li teʼkoleʼq saʼ li nimla rahilal.

9. Joʼ naxye saʼ Apocalipsis 7:13-15, kʼaru yookebʼ xbʼaanunkil ebʼ li kʼiila tenamit anaqwan?

⁹ Taayaabʼasi Apocalipsis 7:13-15. Laj Juan naxye naq ebʼ li kʼiila tenamit «xeʼxpuchʼ li raqʼebʼ ut xeʼxsaqobʼresi saʼ li xkikʼel li Karneer». Aʼin naraj xyeebʼal naq saq ruhebʼ xchʼool ut naq nekeʼxtaw rusilal li Jehobʼa (Is. 1:18). Ak qʼaxtesinbʼilebʼ xyuʼam chiru li Jehobʼa ut ak kubʼenaqebʼ xhaʼ, ut kawebʼ li xpaabʼal chirix li xkamik li Jesús ut wankebʼ saʼ amiiwil rikʼin li Jehobʼa (Juan 3:36; 1 Ped. 3:21). Saʼ xkʼabʼaʼ aʼin, naru nekeʼwank chiru li xkʼojaribʼaal li Yos ut naru «nekeʼkʼanjelak chiru chi qʼeq ut chi kutan» arin saʼ Ruuchichʼochʼ. Relik chi yaal naq ak yookebʼ xbʼaanunkil jun xnimal ru kʼanjel: puktesink ut xkʼebʼal ebʼ li kristiʼaan choʼq xtzolom li Kriist, ut nekeʼxkʼe chiʼubʼej saʼ xyuʼamebʼ li Xʼawabʼejilal li Yos (Mat. 6:33; 24:14; 28:19, 20).

10. Kʼaru chʼolchʼo chiruhebʼ li kʼiila tenamit, ut kʼaru li yeechiʼom teʼril naq ttzʼaqloq ru?

¹⁰ Ebʼ li kʼiila tenamit chʼolchʼo chiruhebʼ naq li Yos trilebʼ naq ak xraqeʼk li nimla rahilal xbʼaan naq li Santil Hu naxye naq «li kʼojkʼo saʼ li nimajwal kʼojaribʼaal taamuheelanq rehebʼ». Joʼkan ajwiʼ, ttzʼaqloq ru li yeechiʼom li nekeʼxyoʼoni chaq chiru naabʼal chihabʼ ebʼ li jalan chik karneer: li Yos «tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal» (Apoc. 21:3,4).

11, 12. a) Joʼ naxye saʼ Apocalipsis 7:16, 17, kʼaru ebʼ li osobʼtesink nekeʼroybʼeni ebʼ li kʼiila tenamit? b) Naq nanimaak li xkamik li Kriist, kʼaru naru nekeʼxbʼaanu ebʼ li jalan chik karneer, ut kʼaʼut?

 ¹¹ Taayaabʼasi Apocalipsis 7:16, 17. Saʼebʼ li qakutan wankebʼ aj kʼanjel chiru li Jehobʼa yookebʼ xnumsinkil li weʼej saʼ xkʼabʼaʼ li mululij ibʼ, li yalok u ut naq maakʼaʼ li tumin. Jalanebʼ chik nekeʼkʼeheʼk saʼ tzʼalam xbʼaan li xpaabʼalebʼ. Abʼanan, ebʼ li kʼiila tenamit kʼajoʼ nekeʼsahoʼk saʼ xchʼool naq nekeʼxnaw naq, naq ak xeʼkoleʼk chiru li xsachik li ruuchichʼochʼ aʼin, junelik numtajenaqaq li xtzekemqebʼ ut li naʼajmank chiruhebʼ saʼ li xpaabʼal. Naq li Jehobʼa tixsach ru li xruuchichʼochʼ laj Tza, tixkol ebʼ li kʼiila tenamit chiru li xjosqʼil li chanchan li xtiqwal li xaml. Naq ak xraqeʼk li nimla rahilal, li Jesús «tixkʼam xbʼehebʼ [li teʼkoleʼq] toj saʼebʼ xyoʼlebʼaal li yuʼamhaʼ». Peʼyaal naq kʼajoʼ xchʼinaʼusal li roybʼenihomebʼ li kʼiila tenamit? Xbʼaan naq saʼ xyanq chi miyon chi kristiʼaan, maare kaʼajwiʼ aʼanebʼ li maajunwa teʼkamq (Juan 11:26).

¹² Ebʼ li jalan chik karneer kʼajoʼ naq nekeʼxbʼanyoxi re li Jehobʼa ut li Jesús li roybʼenihomebʼ. Usta li Jehobʼa moko kixsikʼ ta ruhebʼ re wank saʼ choxa, abʼan qʼaxal naxrahebʼ ut oxloqʼebʼ chiru joʼ li yulbʼilebʼ ru. Ebʼ li jalan chik karneer ut li yulbʼilebʼ ru naru nekeʼxkʼe xloqʼal li Yos ut li Jesús, ut jun rehebʼ li naʼlebʼ li naru nekeʼxbʼaanu aʼan wulak chi xnimankil li xkamik li Kriist.

13, 14. Kʼaʼut naq chiqajunilo tento tqanima li xkamik li Kriist?

¹³ Chiruhebʼ li chihabʼ li tojeʼ xeʼnumeʼk, saʼ xyanq 1,000 chi kristiʼaan jun tana ajwiʼ naxwaʼ li kaxlanwa ut narukʼ li bʼiin naq nanimaak li xkamik li Kriist. Aʼin naraj xyeebʼal naq kachʼin chik ma saʼ chixjunil ebʼ li chʼuut li wank saʼ Ruuchichʼochʼ maaʼani naxwaʼ li kaxlanwa chi moko narukʼ li bʼiin naq nanimaak li xkamik li Kriist. Joʼkan naq li xkʼihalil li nekeʼwulak chi xnimankil li xkamik li Kriist wankebʼ roybʼenihom re wank arin saʼ Ruuchichʼochʼ. Joʼkan utan, kʼaʼut naq nekeʼwulak? Qakʼehaq jun eetalil. Qakʼoxlaq kʼaʼut naq ebʼ li kristiʼaan nekeʼwulak saʼ jun li sumlaak. Nekeʼxbʼaanu saʼ xkʼabʼaʼ naq nekeʼraj xkʼutbʼesinkil naq nekeʼxra li yookebʼ chi sumlaak. Kamaʼin ajwiʼ nekeʼxbʼaanu ebʼ li jalan chik karneer, nekeʼwulak chi xnimankil li xkamik li Kriist re  xkʼutbʼesinkil naq nekeʼxra aʼan ut li sikʼbʼilebʼ ru. Joʼkan ajwiʼ, nekeʼxkʼutbʼesi naq oxloqʼ chiruhebʼ li xkamik li Kriist, xbʼaan naq saʼ xkʼabʼaʼ aʼan naru nekeʼwank xyuʼam chi junelik arin saʼ Ruuchichʼochʼ.

¹⁴ Jun chik xyaalal naq ebʼ li jalan chik karneer nekeʼwulak chi xnimankil li xkamik li Kriist aʼan naq nekeʼraj xpaabʼankil li xchaqʼrabʼ. Naq li Jesús kixxaqabʼ li waʼak rikʼinebʼ li xʼapóstol, kixye: «Chebʼaanu aʼin re xnimankil injultikankil» (1 Cor. 11:23-26). Joʼkan utan, ebʼ li jalan chik karneer inkʼaʼ teʼxkanabʼ xnimankil li xkamik li Kriist naq toj wanqebʼ wiibʼ oxibʼ li yulbʼilebʼ ru saʼ Ruuchichʼochʼ. Joʼkan ajwiʼ, nekeʼxyal xqʼe chi xbʼoqbʼalebʼ chixjunil li kristiʼaan re wulak saʼ li chʼutam aʼan.

15. Naq naqanima li xkamik li Kriist, chanru naru naqakʼe xloqʼal aʼan ut li Yos?

¹⁵ Naq naqanima li xkamik li Kriist, naru naqakʼe xloqʼal aʼan ut li Yos rikʼin bʼichank ut tijok. Aʼan aʼin li xkʼabʼaʼ li seeraqʼ re li chihabʼ aʼin: «Qakʼutbʼesihaq naq naqabʼanyoxi li keʼxbʼaanu choʼq qe li Yos ut li Kriist». Naq tqabʼi li seeraqʼ aʼin, qʼaxal choobʼanyoxinq chiru li Jehobʼa ut li Jesús. Naq tnumsimanq li kaxlanwa ut li bʼiin, tqajultika li naraj xyeebʼal: li xtibʼel ut li xkikʼel li Jesús. Tqajultika ajwiʼ naq li Jehobʼa kixkanabʼ naq tkamsiiq li Ralal saʼ qakʼabʼaʼ re naq twanq qayuʼam (Mat. 20:28). Chixjunilebʼ li nekeʼxra li qachoxahil Yuwaʼ ut li Ralal teʼwulaq chi xnimankil li xkamik li Kriist.

16. Kʼaʼut naru nayeemank naq juntaqʼeetebʼ li yulbʼilebʼ ru rikʼin ebʼ li jalan chik karneer?

¹⁶ Li Yos juntaqʼeet naril li yulbʼilebʼ ru ut ebʼ li jalan chik karneer. Juntaqʼeet naxrahebʼ li wiibʼ chi chʼuut aʼan xbʼaan naq kixkʼe li jun chi Ralal re xloqʼbʼal li yulbʼilebʼ ru ut ebʼ li jalan chik karneer. Li xjalanil li wiibʼ chi chʼuut aʼin aʼan naq moko juntaqʼeet ta li roybʼenihomebʼ, abʼan tento naq tiikaqebʼ xchʼool chiru li Yos ut li Kriist (Sal. 31:24). Ut jultikaq qe naq li xsantil musiqʼej li Yos juntaqʼeet naru nakʼanjelak saʼ xbʼeen chixjunil laj kʼanjel chiru. Li Jehobʼa naxkʼe li xsantil musiqʼej saʼ xbʼeen li junjunq joʼ naʼajmank chiru, maakʼaʼ naxye ma yulbʼil ru malaj inkʼaʼ.

17. Kʼaru nekeʼxyoʼoni naq tkʼulmanq li yulbʼilebʼ ru?

¹⁷ Li yulbʼilebʼ ru moko ak nekeʼyoʼlaak ta re xik saʼ choxa, li Yos bʼan nakʼehok saʼ xchʼoolebʼ li roybʼenihomebʼ. Junelik nekeʼxkʼoxla rix li roybʼenihomebʼ, nekeʼxye saʼ li xtij ut chi anchalebʼ xchʼool nekeʼroybʼeni li kutan naq teʼxkʼul li xmaatan saʼ choxa. Usta inkʼaʼ nekeʼxnaw chanruhaq li xjunxaqalilebʼ saʼ choxa, abʼan nekeʼxyoʼoni li kutan naq teʼril ru li Jehobʼa, li Jesús, ebʼ li ánjel ut ebʼ li junchʼol  chik li yulbʼilebʼ ru, ut naq teʼkʼojlaaq saʼ li Xnimajwal Awabʼejilal li Yos (Filip. 3:20, 21; 1 Juan 3:2).

18. Kʼaru nekeʼroybʼeni chi anchalebʼ xchʼool li jalan chik karneer?

¹⁸ Ebʼ li jalan chik karneer nekeʼroybʼeni wank chi junelik arin saʼ Ruuchichʼochʼ, aʼin jun li naʼlebʼ li ak re, naq naxrahi ru junaq li kristiʼaan (Ecl. 3:11, TNM). Nekeʼroybʼeni li kutan naq teʼtenqʼanq chi xchaabʼilobʼresinkil ru li Ruuchichʼochʼ, xkabʼlankil li rochochebʼ, awk ut xyalbʼal xsahil li xyuʼamebʼ rochbʼen li xjunkabʼal (Is. 65:21-23). Nekeʼroybʼeni li kutan naq teʼbʼihajiq saʼ chixjunil li Ruuchichʼochʼ, naq teʼril ebʼ li tzuul, li kʼicheʼ, li palaw ut xnawbʼal xkomon li xyobʼtesihom li Jehobʼa. Abʼan, li qʼaxal naxsahobʼresi xchʼoolebʼ aʼan naq nekeʼxnaw naq rajlal kutan teʼwanq saʼ tzʼaqal amiiwil rikʼin li Jehobʼa.

19. Kʼaru naru tqabʼaanu naq tnimaaq li xkamik li Kriist ut saʼ kʼaru kutan tbʼaanumanq chiru li chihabʼ aʼin?

¹⁹ Li Jehobʼa kixkʼe jun chaabʼil oybʼenihom choʼq re li junjunq chi aj kʼanjel chiru (Jer. 29:11). Naq nanimaak li xkamik li Kriist, chiqajunilo naru naqakʼe xloqʼal aʼan ut li Yos xbʼaan li xeʼxbʼaanu saʼ qakʼabʼaʼ re naq wanq qayuʼam chi junelik. Relik chi yaal, li xnimankil li xkamik li Kriist aʼan li qʼaxal wank xwankil rajlal chihabʼ chiruhebʼ li tzʼaqal aj paabʼanel. Saʼ li chihabʼ 2021, tnimaaq li xkamik li Kriist saʼ li kutan sábado 27 re marzo naq ak xʼok li Saqʼe. Chiru li chihabʼ aʼin, saʼebʼ li naʼajej bʼarwiʼ moko ramro ta li qakʼanjel naabʼalebʼ teʼruuq xnimankil li xkamik li Kriist, jalanebʼ chik teʼxbʼaanu usta nekeʼxkʼul li xikʼ ileʼk ut wankebʼ ajwiʼ teʼxnima li xkamik li Kriist saʼ tzʼalam. Naqoybʼeni bʼiʼ naq chixjunilebʼ li chʼuut, li kokʼ chʼuut ut ebʼ li kristiʼaan teʼxtaw rusilal li chʼutam aʼin xbʼaan naq li Jehobʼa, li Jesús ut li xjunkabʼal li Yos li wank saʼ choxa yooqebʼ chaq chi rilbʼal li yooq chi kʼulmank.