JUNXIL qʼe kutan, naq jun li sumal okebʼ re chi sumlaak, li winq naxtoj xtzʼaq re li xjunkabʼal li ixq. Naru xtojbʼal rikʼin tumin malaj xul ut rikʼin kʼaʼaq re ru li terto xtzʼaq. Wank sut, natojmank ajwiʼ rikʼin kʼanjel joʼ kixkʼul laj Jacob naq ok re chaq chi sumlaak rikʼin li xRaquel. Aʼan kixye re li xyuwaʼ li xRaquel naq tkʼanjelaq wuqubʼ chihabʼ chirix (Gén. 29:17, 18, 20). Kʼaʼut nabʼaanumank chaq aʼin?

Li xCarol Meyers, li naxtzʼil rix junjunq li naʼlebʼ li wank saʼ li Santil Hu, naxye: «Li tumin li nakʼemank re li xjunkabʼal li ixq, aʼan reqaj li kʼanjel li tixkanabʼ xbʼaanunkil. Aʼin aajel ru choʼq re li junkabʼal li nekeʼxkʼanjela ru li chʼochʼ». Li tojlebʼ aʼin naʼoksimank ajwiʼ re xkʼutbʼesinkil naq wankebʼ saʼ amiiwil li wiibʼ chi junkabʼal aʼin. Ut, naq nakʼulmank li chʼaʼajkilal naru nekeʼxtenqʼa ribʼ chiribʼilebʼ ribʼ. Li tojlebʼ aʼin naxkʼutbʼesi ajwiʼ naq junaq li ixq ok re chi sumlaak ut inkʼaʼ chik tchʼolaniiq xbʼaan li xyuwaʼ, aʼ bʼan chik li xbʼeelom tchʼolaninq re.

Xkʼebʼal li tumin chirix junaq li ixq moko naraj ta xyeebʼal naq yook chi loqʼeʼk malaj kʼayiik chanchan tawiʼ junaq li kʼaʼaq re ru. Li hu Instituciones del Antiguo Testamento, naxye: «Naq natojmank chaq xtzʼaq re li xjunkabʼal li ixq li ok re chi sumlaak saʼ xyanqebʼ laj Israel, naxkʼutbʼesi naq chanchan tawiʼ yookebʼ xloqʼbʼal li ixq. Abʼan […] moko aʼan ta li xtzʼaq li ixq, re bʼan xtenqʼankil li xjunkabʼal». *

Saʼebʼ li qakutan, toj natojmank xtzʼaq li ixq li ok re chi sumlaak saʼ junjunq li tenamit. Wi ebʼ li naʼbʼej yuwaʼbʼej ebʼ aj paabʼanel, inkʼaʼ jwal terto teʼxpatzʼ xtzʼaq li ixq li ok re chi sumlaak, chi joʼkan ebʼ li poyanam teʼxkʼe reetal naq tuulanebʼ xchʼool (Filip. 4:5; 1 Cor. 10:32, 33). Ut teʼxkʼutbʼesi naq inkʼaʼ nekeʼxrahi ru «li tumin» (2 Tim. 3:2). Joʼkan ajwiʼ, wi inkʼaʼ jwal terto li tumin nekeʼxpatzʼ chirix li ixq li ok re chi sumlaak, li saaj al li naraj sumlaak moko yook ta xjalbʼal xkutankil li xsumlajik re xtawbʼal xtzʼaq li ixq. Ut, wi li saaj al li ok re chi sumlaak aj kʼamolbʼe saʼ li puktesink, moko aajel ta ru naq tixkanabʼ li xkʼanjel chiru li Yos ut troksi naabʼal li hoonal re xsikʼbʼal xtumin.

Saʼ wiibʼ oxibʼ li naʼajej wank li chaqʼrabʼ re xbʼaanunkil li tojlebʼ aʼin. Saʼebʼ li naʼajej aʼan, ebʼ li naʼbʼej yuwaʼbʼej nekeʼroxloqʼi li chaqʼrabʼ aʼin. Nekeʼxpaabʼ xbʼaan naq li Yos naraj naq ebʼ laj paabʼanel teʼxbʼaanu aʼin: «Chexpaabʼanq […] chiruhebʼ li wankebʼ xwankil saʼ qabʼeen», ut teʼxpaabʼ li chaqʼrabʼ li moko naxqʼet ta li xchaqʼrabʼ li Yos (Rom. 13:1; Hech. 5:29).