LI XYOMARA, laj Marcelo ut laj Hiver riitzʼinebʼ ribʼ, mutzʼebʼ ut wankebʼ saʼ jun li kʼalebʼaal re Guatemala. Li xYomara kixtikibʼ xtzolbʼal li Santil Hu moqon chik ebʼ li riitzʼin. Abʼan wank jun li chʼaʼajkilal: inkʼaʼ nekeʼruuk ilok ru hu saʼ braille. Joʼkan naq li natzolok rikʼinebʼ naxyaabʼasi li raqal ut xraqal li Santil Hu.

Nachʼaʼajkoʼk ajwiʼ chiruhebʼ xik saʼebʼ li chʼutam. Li Chʼutlebʼaal Kabʼl li nachʼ rikʼinebʼ wank 40 kʼasal xnajtil ut aʼanebʼ inkʼaʼ nekeʼruuk chi xik xjunesebʼ. Joʼkan naq ebʼ li hermaan xeʼxtenqʼahebʼ re wulak saʼebʼ li chʼutam. Ut naq xeʼok chi tzʼaqonk saʼ li chʼutam saʼ xyanqil xamaan ebʼ li hermaan nekeʼtenqʼank rehebʼ re naq teʼxtzol kʼaru teʼxye.

Saʼ mayo re 2019, ebʼ laj Testiiw xeʼok xbʼaanunkil li chʼutam saʼebʼ li xkʼalebʼaal ut jun sumal li nekeʼxbʼaanu 70 hoor xeʼqʼaxonk aran. Li sumal aʼin xeʼxkʼubʼ naq teʼxkʼut chiruhebʼ li oxibʼ chi hermaan aʼin ilok ru hu ut tzʼiibʼak saʼ braille, usta aʼanebʼ inkʼaʼ ajwiʼ nekeʼruuk. Joʼkan naq xeʼkoho saʼ jun li naʼajej bʼarwiʼ naxokmank wiʼ ebʼ li hu re xtzolbʼal chanru nakʼutmank braille chiruhebʼ li junchʼol.

Chiru wiibʼ oxibʼ po li hermaan aʼin xeʼxtzol chiʼus ilok ru hu saʼ braille ut aʼin kixbʼaanu naq teʼkʼiiq saʼebʼ li xpaabʼal. a Anaqwan li xYomara, laj Marcelo ut laj Hiver wankebʼ choʼq aj kʼamolbʼe saʼ li puktesink li naxbʼaanu 70 hoor ut aj Marcelo wank joʼ aj tenqʼanel saʼ li chʼuut. Rajlal xamaan nekeʼxkʼe naabʼal li hoonal re kʼanjelak chiru li Jehobʼa. Nekeʼxkʼe xchʼool chi kʼanjelak chiru li Jehobʼa ut ebʼ li hermaan nekeʼraj xkʼambʼal re rikʼinebʼ.

Oxloqʼ chiruhebʼ li hermaan aʼin, li tenqʼ ut li rahok li naxkʼutbʼesi li chʼuut. Li xYomara naxye: «Chalen naq xqanawebʼ ru xeʼxkʼutbʼesi li tzʼaqal rahok». Ut laj Marcelo naxye: «Naabʼal li qamiiw saʼ li chʼuut ut wanko saʼ xyanqebʼ li kristiʼaan li qʼaxal wankebʼ saʼ junajil saʼ chixjunil li ruuchichʼochʼ». Li xYomara ut ebʼ li riitzʼin nekeʼraj rilbʼal naq li Ruuchichʼochʼ twanq joʼ jun chʼinaʼusil naʼajej (Sal. 37:10, 11; Is. 35:5).