Li xMary ut laj John a aʼan jun li sumal li wankebʼ saʼ jun li tenamit bʼarwiʼ wankebʼ naabʼal li kristiʼaan re Filipinas li nekeʼqʼaxonk aran re kʼanjelak ut aʼanebʼ nekeʼxwotz li chaabʼil esil rehebʼ. Naq kiwank li COVID-19, li xMary kixtikibʼ xtzolbʼalebʼ li qas qiitzʼin li wankebʼ saʼ jalan jalanq chi tenamit. Chanru xbʼaanu?

Li xMary naxpatzʼ rehebʼ li xtzolom: «Ma nakaanaw ani raj twulaq chiru xtzolbʼal li Santil Hu?». Wi naxye naq naxnaw, naxpatzʼ re naq xkʼutaq chiru. Li patzʼom aʼin kʼajoʼ kixtenqʼa li xMary. Kʼaʼut? Xbʼaan naq ebʼ li qas qiitzʼin li nekeʼroxloqʼi li Raatin li Yos nekeʼraj xwotzbʼal rikʼinebʼ li xkomon ut li ramiiw li yookebʼ xtzolbʼal. Qilaq li kixkʼul li xMary.

Li xJasmin jun rehebʼ kristiʼaan li naxtzol li Santil Hu rikʼin, kixye re naq kaahibʼ li kristiʼaan nekeʼraj xtzolbʼal li Santil Hu. Jun rehebʼ naxkʼabʼaʼi Kristine, kʼajoʼ nawulak chiru xtzolbʼal li Santil Hu joʼkan naq kiʼok chi tzolok wiibʼ sut chiru li xamaan. Naq li xMary kixpatzʼ re wi naxnaw ru junaq chik li kristiʼaan li naraj xtzolbʼal li Santil Hu li xKristine kixye re: «Heeheʼ, wankebʼ li wamiiw li nekeʼraj tzolok». Chiru wiibʼ oxibʼ xamaan li xKristine kixye re li xMary naq wankebʼ li kristiʼaan li nekeʼraj xtzolbʼal li Santil Hu ut ebʼ li qas qiitzʼin aʼin keʼxye re li xMary naq nekeʼxnaw ru jalanebʼ chik li kristiʼaan li nekeʼraj tzolok.

Naq ak kixye re li xMary, naq ebʼ li ramiiw nekeʼraj xtzolbʼal li Santil Hu li xKristine kiraj ajwiʼ naq li xjunkabʼal li wankebʼ Filipinas teʼxtzol li Santil Hu. Joʼkan naq kiʼaatinak rikʼin li xʼAndrea li xkoʼ. Saʼ xtiklajik li xʼAndrea kixkʼoxla: «Ebʼ laj Testiiw aj bʼalaqʼ. Inkʼaʼ nekeʼxpaabʼ li Jesús ut kaʼajwiʼ nekeʼroksi li Najter Chaqʼrabʼ». Abʼan li xbʼeen sut naq xtzol li Santil Hu kixkʼe reetal naq moko yaal ta li naxpaabʼ. Naq naxtzol li Santil Hu naxye: «Chʼolchʼo naq paabʼajel xbʼaan naq wank saʼ li Santil Hu!».

Moqon chik li xʼAndrea kixye re li xMary naq wiibʼ li ramiiw ut jun li rechkʼanjel nekeʼraj xtzolbʼal li Santil Hu. Joʼkan ajwiʼ li xʼAndrea wank jun li rikanaʼ mutzʼ aʼ li xʼAngela li narabʼi li esil naq li xʼAndrea yook xtzolbʼal li Santil Hu, abʼan li xMary inkʼaʼ naxnaw chaq aʼin. Saʼ jun kutan li xʼAngela kixye re li xʼAndrea naq naraj xnawbʼal ru li xMary xbʼaan naq naraj xtzolbʼal li Santil Hu. Kʼajoʼ kiwulak chiru li xʼAngela li kixtzol saʼ li Santil Hu. Jayeʼq ma chiru jun po ak naxnaw naabʼal li xraqal li Santil Hu ut kixye ajwiʼ naq naraj xtzolbʼal li Santil Hu kaahibʼ sut chiru li xamaan! Rikʼin xtenqʼ li xʼAndrea, li xʼAngela kixtikibʼ wulak saʼebʼ li chʼutam saʼ videoconferencia.

 Naq li xKristine naxtzol li Santil Hu, laj Joshua li xsumʼaatin nakanaak aran chi rabʼinkil. Naq li xMary kixkʼe reetal aʼin kixpatzʼ re wi naraj xtzolbʼal li Santil Hu. Aʼan kixye: «Usaq, abʼan kaʼajwiʼ nawaj rabʼinkil. Joʼkan naq maabʼaanu we junaq li patzʼom, wi taabʼaanu tinxik». Maajiʼ nanumeʼk oobʼ kʼasal ut aʼan ak xbʼaanu naabʼal li patzʼom chiru li kixbʼaanu li xKristine ut kixye naq naraj ajwiʼ xtzolbʼal li Santil Hu.

Naabʼalebʼ li qas qiitzʼin xeʼxtikibʼ xtzolbʼal li Santil Hu saʼ xkʼabʼaʼ li patzʼom li kixbʼaanu li xMary. Joʼkan naq li xMary kixpatzʼ usilal re jalanebʼ chik li hermaan re naq teʼxkʼe xtzolbʼal wiibʼ oxibʼ rehebʼ li kristiʼaan aʼin. Saʼ xkʼabʼaʼ aʼin 28 chi qas qiitzʼin li chalenaqebʼ saʼ kaahibʼ chi tenamit xeʼxtikibʼ xtzolbʼal li Santil Hu rikʼin li xMary!

Li xJasmin, li xooʼaatinak wiʼ xbʼeenwa kikubʼeek xhaʼ saʼ abril 2021. Li xKristine kikubʼeek xhaʼ saʼ mayo 2022 ut anaqwan wank rikʼin li xjunkabʼal aran Filipinas. Wiibʼ chik li kristiʼaan li kixnaw ru li xMary saʼ xkʼabʼaʼ li xKristine xeʼok xtzolbʼal li Santil Hu ut xeʼkubʼeek xhaʼ. Wiibʼ oxibʼ po moqon, li xʼAngela kikubʼeek ajwiʼ xhaʼ ut anaqwan wank joʼ aj kʼamolbʼe saʼ li puktesink joʼ li nekeʼxbʼaanu 50 hoor. Laj Joshua li xsumʼaatin li xKristine, li xʼAndrea li xkoʼ ut jalanebʼ chik li nekeʼxtzol li Santil Hu yookebʼ chi kʼiik saʼ li xpaabʼal.

Saʼ xkutankilebʼ li apóstol, li chaabʼil esil kijekʼimank ajwiʼ saʼ junpaat saʼ xkʼabʼaʼ naq ebʼ li kristiʼaan keʼxye resil rehebʼ li xkomon ut rehebʼ li ramiiw (Juan 1:​41, 42a; Hech. 10:​24, 27, 48; 16:​25-33). Naru taapatzʼ rehebʼ li nekeʼtzolok aawikʼin malaj jalanebʼ chik li kristiʼaan aʼin: «Ma nakaanaw ru jalan chik li kristiʼaan li naraj xtzolbʼal li Santil Hu?». Li patzʼom aʼin moko chʼaʼaj ta xbʼaanunkil, wi taabʼaanu, maare naabʼalebʼ li qas qiitzʼin teʼraj xtzolbʼal li Santil Hu aawikʼin.