NAʼLEBʼ RE TZOLOK 6
BʼICH 18 Bʼanyox Jehobʼa li qakolbʼal
Jwal naqabʼanyoxi naq li Jehobʼa naxkuy qamaak
«Saʼ xkʼabʼaʼ naq li Yos kʼajoʼ kixra li ruuchichʼochʼ kixqʼaxtesi li Ralal li jun ajwiʼ chiru» (JUAN 3:16).
RUʼUJIL LI TZOLOM
Xtawbʼal ru chiʼus kʼaru naxkʼe saʼ ajl li Jehobʼa re xkuybʼal qamaak nokooxtenqʼa chi roxloqʼinkil naq naxkuy qamaak.
1, 2. Kʼaʼut naqaye naq chiqajunilo wanko raj joʼ li saaj li naʼaatinak wiʼ li raqal jun?
KʼOXLA jun li saaj li bʼihom xnaʼ xyuwaʼ. Abʼan saʼ jun kutan narabʼi resil naq xeʼkamk li xnaʼ xyuwaʼ ut moko kaʼaj tawiʼ aʼin, nekeʼxye re naq li xnaʼ xyuwaʼ xeʼxsach chixjunil li tumin ut xeʼxkanabʼ jun li nimla kʼas saʼ xbʼeen. Joʼkan naq moko xrechani ta li tumin, li xrechani bʼan aʼan li kʼas li tento tixtoj saʼ junpaat. Abʼan jwal nim li kʼas ut maajunwa truuq xtojbʼal.
2 Joʼkan ajwiʼ xqakʼul laaʼo. Laj Adán ut li xʼEva tzʼaqalebʼ re ru li xyuʼam ut xeʼwank saʼ jun li chʼinaʼusil naʼajej (Gén. 1:27; 2:7-9). Xeʼruuk wank aran chi junelik chi sahebʼ saʼ xchʼool abʼan saʼ xkʼabʼaʼ naq xeʼmaakobʼk, xjalaak chixjunil. Xeʼisiik saʼ li chʼinaʼusil naʼajej ut inkʼaʼ chik xeʼruuk wank chi junelik. Ut kʼaru xeʼrechani ebʼ li ralal xkʼajol? Li Santil Hu naxye: «Saʼ xkʼabʼaʼ jun chi winq [laj Adán], li maak kiʼok chaq saʼ ruuchichʼochʼ ut saʼ xkʼabʼaʼ li maak kiʼok chaq li kamk. Ut chi joʼkaʼin li kamk kixjekʼi ribʼ saʼ xyanqebʼ li qas qiitzʼin xbʼaan naq chixjunilebʼ xeʼmaakobʼk» (Rom. 5:12). Saʼ xkʼabʼaʼ laj Adán xqechani li maak li naxkʼam chaq li kamk. Li maak li xqechani chanchan jun li nimla kʼas li maaʼani truuq xtojbʼal (Sal. 49:9).
3. Kʼaʼut li Santil Hu naxjuntaqʼeeta li maak rikʼin li kʼas?
3 Li Jesús kixjuntaqʼeeta li maak rikʼin jun li kʼas (Mat. 6:12; Luc. 11:4). Aʼin naraj xyeebʼal naq nokoomaakobʼk, naqakʼe qibʼ saʼ kʼas rikʼin li Jehobʼa. Yal qajunes inkʼaʼ tooruuq xtojbʼal li kʼas ut kaʼajwiʼ tqatoj rix naq tookamq (Rom. 6:7, 23).
4. a) Kʼaru raj tqakʼul wi maaʼani raj xooxtenqʼa? (Salmo 49:8-10). b) Kʼaru xyaalal li aatin maak saʼ li Santil Hu? (Chaawil li kaaxukuut « Li maak»).
4 Yal qajunes inkʼaʼ tooruuq xtojbʼal rix li xeʼxsach laj Adán ut li xʼEva (yaabʼasi Salmo 49:8-10). Wi maaʼani raj xtenqʼank qe inkʼaʼ raj tooruuq wank chi junelik ut wakliik wiʼ chik chi yoʼyo joʼ nakʼulmank rikʼinebʼ li xul (Ecl. 3:19; 2 Ped. 2:12).
5. Kʼaru akʼ xbʼaanu li Jehobʼa re xtojbʼal rix li kʼas chirix li maak? (Chaawil li jalam u).
5 Qakʼoxlaq wiʼ chik li kixkʼul li saaj li naʼaatinak wiʼ li raqal jun. Chanru trekʼa ribʼ wi jun li winq bʼihom tixtoj li xkʼas? Chʼolchʼo naq tixkʼulubʼa ut tixbʼanyoxi raj li maatan aʼin. Joʼkan ajwiʼ, saʼ xkʼabʼaʼ naq li Jehobʼa nokooxra kixkʼe qe jun xnimal ru maatan li naxtoj li kʼas li xqechani rikʼin laj Adán, aʼ li maak. Li Jesús kixchʼolobʼ kʼaru li maatan aʼin naq kixye: «Saʼ xkʼabʼaʼ naq li Yos kʼajoʼ kixra li ruuchichʼochʼ kixqʼaxtesi li Ralal li jun ajwiʼ chiru re naq li tixkʼutbʼesi naq naxpaabʼ inkʼaʼ tsachq, wanq bʼan xyuʼam chi junelik» (Juan 3:16). Saʼ xkʼabʼaʼ li maatan aʼin naru toowanq choʼq ramiiw li Jehobʼa.
Li Jesús kixkʼe chi naweʼk li chaabʼil esil naq li Jehobʼa naxkuy qamaak saʼ xkʼabʼaʼ li xkamik (Juan 3:16). Moqon kixkʼe li xyuʼam re qakolbʼal. (Chaawil li raqal 5).
6. Kʼaru tqil saʼ li tzolom aʼin ut kʼaʼut?
6 Kʼaru tooruuq xbʼaanunkil re xtawbʼal rusilal li maatan aʼin ut naq tkuyeʼq qamaak? Re xnawbʼal aʼin qilaq wiibʼ oxibʼ li naʼlebʼ li naroksi li Santil Hu ut li naraj xyeebʼal. Xnaʼlebʼankil rix ebʼ li naʼlebʼ aʼin tooxtenqʼa re naq qʼaxal tqabʼanyoxi chixjunil li ak kixbʼaanu li Jehobʼa re xkuybʼal qamaak.
LI JEHOBʼA NARAJ NAQ TOOWANQ CHOʼQ RAMIIW
7. a) Kʼaru chik xeʼxtzʼeq laj Adán ut li xʼEva? b) Joʼ ralal xkʼajol laj Adán ut li xʼEva, kʼaru naʼajmank chiqu? (Romanos 5:10, 11).
7 Naq laj Adán ut li xʼEva xeʼmaakobʼk, xeʼxtzʼeq li maatan re naq teʼwanq xyuʼam chi junelik ut inkʼaʼ chik xeʼwank joʼ ramiiw li Jehobʼa. Naq toj maajiʼ nekeʼmaakobʼk, wankebʼ saʼ xyanq li xjunkabʼal li Jehobʼa (Luc. 3:38). Abʼan naq xeʼmaakobʼk, li Jehobʼa xrisihebʼ saʼ li xjunkabʼal. Aʼin kikʼulmank naq toj maakʼaʼebʼ ralal xkʼajol (Gén. 3:23, 24; 4:1). Joʼkan naq maajun qe naru twanq joʼ xjunkabʼal li Jehobʼa. Naʼajmank naq tooʼeʼxtenqʼa re naq toowanq choʼq ramiiw li Jehobʼa (yaabʼasi Romanos 5:10, 11).
LI KIXBʼAANU LI JEHOBʼA RE NAQ TOOWANQ CHOʼQ RAMIIW
8. Kʼaru kixbʼaanu li Jehobʼa re naq tooruuq wank saʼ amiiwil rikʼin?
8 Li Jehobʼa kixsikʼ jun li naʼlebʼ re naq tooruuq wank joʼ ramiiw usta laaʼo aj maak. Re xtawbʼal wiʼ chik li xsach laj Adán, li Jehobʼa kixkʼe jun li naʼlebʼ li juntaqʼeet xwankil. Li Santil Hu li tzʼiibʼanbʼil saʼ griego naʼaatinak chirix li kixbʼaanu li Jehobʼa re naq tooruuq wank saʼ amiiwil rikʼin (Rom. 3:25).
9. Kʼaru kixbʼanu li Jehobʼa re naq teʼkuyeʼq xmaak ebʼ laj Israel?
9 Saʼ xkutankilebʼ laj Israel, li Jehobʼa kiroksi jun li naʼlebʼ re naq teʼkuyeʼq xmaak ut teʼwanq choʼq ramiiw. Saʼ li Xkutankil li Chʼajobʼresink Maak, li nabʼaanumank jun sut rajlal chihabʼ, li xyuwaʼil aj tij naxyeechiʼi ebʼ li xul re naq tkuyeʼq xmaak li tenamit. Ebʼ li mayej aʼin moko teʼruuq ta xchʼajobʼresinkil chi junajwa li xmaakebʼ laj Israel xbʼaan naq ebʼ li xul moko juntaqʼeet ta xwankil rikʼinebʼ li kristiʼaan. Abʼan li Jehobʼa tixkuyebʼ xmaak wi nekeʼxyeechiʼi li mayej li naxpatzʼ rehebʼ ut wi nekeʼxyotʼ xchʼool (Heb. 10:1-4). Joʼkan ajwiʼ, ebʼ li mayej li nayeechiʼimank saʼ li Xkutankil li Chʼajobʼresink Maak ut saʼ jalan chik sut naxjultika rehebʼ laj Israel naq ebʼ aj maak ut naq naʼajmank jun li naʼlebʼ li qʼaxal nim chiru aʼin re naq teʼkuyeʼq xmaak chi junajwa.
10. Kʼaru kixbʼaanu li Jehobʼa re naq teʼkuyeʼq xmaak li kristiʼaan?
10 Ut kʼaru kixbʼaanu li Jehobʼa re naq teʼkuyeʼq xmaak li kristiʼaan? Kixbʼaanu naq li Ralal tixmayeja ribʼ jun sut ajwiʼ «re riiqaninkil li xmaak naabʼalebʼ li qas qiitzʼin» (Heb. 9:28). Li Jesús kixkʼe «li xyuʼam re xkolbʼal naabʼal li qas qiitzʼin» (Mat. 20:28). Ut kʼaru li mayej kixkʼe li Jesús re qakolbʼal?
LI MAYEJ LI KIXKʼE LI JESÚS RE QAKOLBʼAL
11. a) Kʼaʼut aajel ru naq ttojmanq rix li qamaak? b) Ani truuq xtojbʼal rix li qamaak?
11 Joʼ naxye li Santil Hu, li Jehobʼa kixkʼe reetal naq naʼajmank naq ttojmanq rix li qamaak re naq tooruuq wank choʼq ramiiw. Kʼaru kixbʼaanu li Jehobʼa re naq ebʼ li kristiʼaan teʼxtaw wiʼ chik li kixtzʼeq laj Adán? Qajultikaq naq laj Adán ut li xʼEva tzʼaqalebʼ re ru li xyuʼam ut keʼruuk raj wank chi junelik, joʼkan naq li kristiʼaan li tixmayeja ribʼ re qakolbʼal tento naq juntaqʼeetaq xwankil li xyuʼam rikʼin li xsachmank (1 Tim. 2:6). Ut twanq ajwiʼ oxibʼ li naʼlebʼ: tento naq tzʼaqalaq re ru li xyuʼam, truuq wank xyuʼam chi junelik saʼ Ruuchichʼochʼ ut traj xyeechiʼinkil li xyuʼam re qakolbʼal. Kaʼajwiʼ chi kamaʼan li xyuʼam li qas qiitzʼin naru tkʼemanq choʼq reqaj li xsachmank.
12. Kʼaʼut li Jesús kiruuk xkʼebʼal li xyuʼam re qakolbʼal?
12 Qilaq oxibʼ li naʼlebʼ kʼaʼut li Jesús kiruuk xtojbʼal li qakolbʼal: 1) «maajunwa kimaakobʼk», 2) xbʼaan aʼin kiruuk wank chi junelik saʼ Ruuchichʼochʼ ut 3) kiraj xkʼebʼal xyuʼam saʼ qakʼabʼaʼ (1 Ped. 2:22; Heb. 10:9, 10). Tzʼaqal re ru li xyuʼam li Jesús, joʼ laj Adán naq toj maajiʼ namaakobʼk (1 Cor. 15:45). Joʼkan naq li Jesús kiruuk xkʼebʼal li xyuʼam choʼq reqaj li kixsach laj Adán (Rom. 5:19). Chi joʼkan, li Jesús kiwank joʼ «li xkabʼil Adán». Moko kiʼajmank ta naq junaq chik li kristiʼaan li tzʼaqal re ru xyuʼam tchalq ut tixkʼe li xyuʼam choʼq reqaj li kixsach laj Adán, xbʼaan naq li Jesús kikamk «jun sut ajwiʼ ut maajunwa chik kixbʼaanu aʼin» (Heb. 7:27; 10:12).
13. Kʼaru naxbʼaanu naq tooruuq wank saʼ amiiwil rikʼin li Jehobʼa?
13 Kʼaru naxbʼaanu naq tooruuq wank saʼ amiiwil rikʼin li Jehobʼa? Li Jehobʼa kixkʼe jun li naʼlebʼ re xkuybʼal li qamaak. Li Jesús kixkʼe li xyuʼam li tzʼaqal re ru re xtojbʼal rix li qamaak (Efes. 1:7; Heb. 9:14).
LI JEHOBʼA NOKOOXKOL CHIRU LI MAAK UT LI KAMK UT NAXYE NAQ TIIK QACHʼOOL
14. Kʼaru tqatzʼil rix anaqwan ut kʼaʼut?
14 Kʼaru rusilal naqataw saʼ xkʼabʼaʼ li kixbʼaanu li Jehobʼa chiqix? Re xnawbʼal, tqatzʼil rix wiibʼ li naʼlebʼ li natawmank saʼ li Santil Hu li nokooxtenqʼa chi rilbʼal kʼaru rusilal naqataw saʼ xkʼabʼaʼ naq li Jehobʼa naxkuy qamaak.
15, 16. a) Kʼaru kikʼulmank saʼ xkʼabʼaʼ naq li Jesús kixkʼe li xyuʼam saʼ qakʼabʼaʼ? b) Chanru naqekʼa qibʼ xbʼaan naq kolbʼilo chiru li maak ut li kamk?
15 Li Santil Hu naxye naq kolbʼilo saʼ xkʼabʼaʼ naq kitojmank rix li qamaak. Li apóstol Pedro kixye: «Xbʼaan naq laaʼex xexʼisiik rubʼel xwankil [naraj xyeebʼal kolbʼilex, achʼabʼanbʼilex] li yuʼam li maakʼaʼ naʼok wiʼ li xeʼxkanabʼ eere leexeʼtoon. Abʼan nekeenaw naq aʼin moko kikʼulmank ta rikʼin li kʼaʼaq re ru li naʼosoʼk joʼ li plaat ut li oor. Kibʼaanumank bʼan rikʼin xkikʼel li Kriist, li qʼaxal oxloqʼ, joʼ li xkikʼel li ral karneer li maakʼaʼ xpaltil chi moko xtzʼajnil» (1 Ped. 1:18, 19).
16 Saʼ xkʼabʼaʼ naq li Jesús kixkʼe li xyuʼam, naru tookoleʼq chiru li maak ut li kamk, li kʼajoʼ nokooxrahobʼtesi (Rom. 5:21). Qʼaxal naqabʼanyoxi re li Jehobʼa ut li Jesús li xeʼxbʼaanu re qakolbʼal (1 Cor. 15:22).
17, 18. a) Kʼaru naraj xyeebʼal naq nayeemank naq tiik qachʼool? b) Kʼaru rusilal naqataw naq li Jehobʼa naxye naq tiik qachʼool?
17 Li Santil Hu naxchʼolobʼ naq li Jehobʼa naxye naq tiikebʼ xchʼool laj kʼanjel chiru. Aʼin naraj xyeebʼal naq li Jehobʼa inkʼaʼ chik naraj naq tqatoj rix li qamaak. Aʼin moko naraj ta xyeebʼal naq li Jehobʼa naxqʼet li xchaqʼrabʼ. Naxye naq tiik qachʼool moko saʼ xkʼabʼaʼ ta naq wank qakʼulubʼ, li Jehobʼa inkʼaʼ naxkʼulubʼa li maak. Abʼan naraj xkuybʼal qamaak xbʼaan naq naqapaabʼ li kixbʼaanu aʼan ut li Jesús re qakolbʼal (Rom. 3:24; Gál. 2:16).
18 Kʼaru rusilal natawmank naq li Jehobʼa naxye naq tiik qachʼool? Wankebʼ li tiikebʼ xchʼool li sikʼbʼilebʼ ru re naq t-awabʼejinq rochbʼeen li Kriist ut nekeʼkanaak joʼ ralal xkʼajol li Yos (Tito 3:7; 1 Juan 3:1). Joʼkan naq nekeʼkuyeʼk ut nekeʼsacheʼk xmaak. Chanchan tawiʼ naq maajunwa xeʼmaakobʼk. Joʼkan naq nekeʼruuk jolomink saʼ li Xʼawabʼejilal li Yos (Rom. 8:1, 2, 30). Jalanebʼ chik xbʼaan naq nayeemank naq tiikebʼ xchʼool, naru teʼwanq chi junelik saʼ Ruuchichʼochʼ. Li Jehobʼa naxkuyebʼ xmaak ut naru naq teʼwanq choʼq ramiiw (Sant. 2:21-23). Li kʼiila tenamit li teʼkoleʼq saʼ Armagedón maajunwa chik teʼkamq (Juan 11:26). Li «tiikebʼ xchʼool» ut li «inkʼaʼ tiikebʼ xchʼool» li ak kamenaqebʼ chik teʼwakliiq chi yoʼyo (Hech. 24:15; Juan 5:28, 29). Saʼ xnumikebʼ li kutan, ebʼ laj kʼanjel chiru li Jehobʼa li tiikebʼ xchʼool li teʼwanq saʼ Ruuchichʼochʼ «chanchanaqebʼ li ralal xkʼajol li Yos li moko wankebʼ ta [chik joʼ] moos» (Rom. 8:21). Naqoybʼeni naq twulaq li kutan naq toowanq saʼ tzʼaqal amiiwil rikʼin li Jehobʼa.
19. Chanru kichaabʼiloʼk li qawanjik saʼ xkʼabʼaʼ li kixbʼaanu li Jehobʼa ut li Jesús chiqix? (Chaawil li kaaxukuut « Li Jehobʼa naxkuy qamaak»).
19 Maakʼaʼ raj qoybʼenihom, wanko raj joʼ li saaj li kirechani jun li nimla kʼas li maajunwa truuq xtojbʼal. Abʼan, kijalaak li qawanjik xbʼaan naq li Jehobʼa kixkʼe li naʼajmank re naq tkuyeʼq qamaak ut li Jesús kixtoj rix li qamaak. Xpaabʼankil li Jesús naxbʼaanu naq tooʼelq rubʼel xwankil li maak ut li kamk. Naq li Jehobʼa naxkuy qamaak, naxbʼaanu naq chanchan tawiʼ naq maajunwa xoomaakobʼk. Abʼan, li qʼaxal wank xwankil aʼan naq anaqwan nokooruuk wank saʼ amiiwil rikʼin li qachoxahil Yuwaʼ, aʼ li Jehobʼa.
20. Kʼaru tqatzʼil rix saʼ li jun chik tzolom?
20 Naq naqanaʼlebʼa rix chixjunil li kixbʼaanu li Jehobʼa ut li Jesús chiqix, jwal naqabʼanyoxi (2 Cor. 5:15). Wi inkʼaʼ raj xooʼeʼxtenqʼa, maakʼaʼ raj qoybʼenihom. Saʼ li jun chik tzolom tqatzʼil rix ebʼ li eetalil li wank saʼ li Santil Hu li tooxtenqʼa re xtawbʼal ru kʼaru naraj xyeebʼal naq li Jehobʼa naxkuy qamaak.
BʼICH 10 Qanimaq ru li Qayos Jehobʼa!
