MA AAWILOM naq naabʼalebʼ li kristiʼaan nekeʼxkʼoxla naq xkʼulubʼebʼ naq us teʼileʼq malaj teʼkʼeheʼq xwankil? Maakʼaʼ naxye wi nakʼeheʼk xloqʼal, junelik nekeʼraj xkomon. Ut moko nasach ta qachʼool rilbʼal aʼin xbʼaan naq saʼ li Santil Hu ak naxye naq saʼ rosoʼjikebʼ li kutan ebʼ li kristiʼaan qʼetqʼetaqebʼ ut inkʼaʼ teʼxnaw bʼanyoxink (2 Tim. 3:2).

Chalen junxil ebʼ li kristiʼaan nekeʼnaʼlebʼak saʼ qʼetqʼetil. Laj Adán ut li xʼEva xeʼxkʼoxla naq xkʼulubʼebʼ naq teʼxye bʼar wank li us ut li inkʼaʼ us choʼq rehebʼ ut anaqwan chiqajunilo yooko xkʼulbʼal li rahilal saʼ xkʼabʼaʼ chanru xeʼnaʼlebʼak. Naabʼal chihabʼ chirix aʼin li awabʼej Uzías re Judá kixbʼaanu jun li nimla maak, kixkʼoxla naq naru xkʼatbʼal insiʼeens saʼ rochoch li Yos usta moko wank ta xwankil re xbʼaanunkil (2 Crón. 26:​18, 19). Ut saʼ xkʼabʼaʼ naq ebʼ laj pariseey ut laj saduseey chalenaqebʼ saʼ xjunkabʼal laj Abrahán xeʼxkʼoxla naq xkʼulubʼebʼ naq us teʼileʼq xbʼaan li Yos (Mat. 3:9).

Saʼ xkʼabʼaʼ naq wanko saʼ xyanqebʼ li kristiʼaan aj qʼetqʼet ut qʼaxal nekeʼxnimobʼresi xwankil naru tooʼoq chi naʼlebʼak joʼebʼ aʼan (Gál. 5:26). Naru tooʼoq xkʼoxlankil naq qakʼulubʼ naq teʼxkʼe junaq li kʼanjel choʼq qe. Kʼaru tqabʼaanu re naq inkʼaʼ toonaʼlebʼaq chi joʼkaʼin? Tento naq tqataw ru chanru naril li naʼlebʼ aʼin li Jehobʼa. Qatzʼilaq rix wiibʼ li naʼlebʼ re li Santil Hu.

Li Jehobʼa naxye kʼaru qakʼulubʼ xkʼulbʼal. Qatzʼilaq rix wiibʼ oxibʼ li eetalil.

• Saʼ li junkabʼal, li Jehobʼa naroybʼeni naq li bʼeelomej t-oxloqʼiiq ut li ixaqilbʼej xkʼulubʼ naq traheʼq xbʼaan li xbʼeelom (Efes. 5:33).  Li sumsukebʼ xkʼulubʼ naq li xsumʼaatin txik xchʼool chirix ut maawaʼ chirix junaq li maawaʼ li xsumʼaatin (1 Cor. 7:3). Ebʼ li naʼbʼej yuwaʼbʼej xkʼulubʼebʼ naq ebʼ li alal kʼajolbʼej teʼabʼinq chiru ut li alal kʼajolbʼej xkʼulubʼebʼ naq teʼileʼq xbʼaan xnaʼ xyuwaʼ ut teʼxkʼutbʼesi chiru naq nekeʼraheʼk (2 Cor. 12:14; Efes. 6:2).

• Saʼ li chʼuut ebʼ li cheekel winq xkʼulubʼebʼ naq tqoxloqʼihebʼ xbʼaan naq kaw nekeʼkʼanjelak (1 Tes. 5:12). Abʼanan moko tenebʼanbʼil saʼ xbʼeenebʼ taqlank saʼ xbʼeenebʼ li rechpaabʼanel (1 Ped. 5:​2, 3).

• Li Jehobʼa kixye naq tooʼabʼinq chiruhebʼ li awabʼej naq teʼxpatzʼ li toj li nachʼutubʼamank choʼq rehebʼ ut naq tqoxloqʼihebʼ (Rom. 13:​1, 6, 7).

Li Jehobʼa jwal nokooxra ut moko qakʼulubʼ ta xkʼulbʼal li naxkʼe qe. Saʼ xkʼabʼaʼ naq laaʼo aj maak li qakʼulubʼ aʼan kamk (Rom. 6:23). Abʼanan xbʼaan li xnimla rahom, li Jehobʼa naxkʼe qe naabʼal li chaabʼil naʼlebʼ (Sal. 103:​10, 11). Saʼ xkʼabʼaʼ li xnimla rusilal li Yos naqakʼul chixjunil (Rom. 12:​6-8; Efes. 2:8).

Weent tqabʼaanu re naq inkʼaʼ tookʼoxlaq joʼ li ruuchichʼochʼ. Maare tooʼoq xkʼoxlankil naq tooʼeʼroxloqʼi ut inkʼaʼ tqakʼe reetal. Saʼ jun kutan li Jesús kiʼaatinak chirix jun li eetalil bʼarwiʼ kixchʼolobʼ naq moko chʼaʼaj ta naq tooʼoq xkʼoxlankil chi kamaʼin. Kiʼaatinak chirix jun laj echal re li awimq li kixsikʼebʼ aj kʼanjel re naq teʼkʼanjelaq chiru jun kutan ut teʼtojeʼq rehebʼ jun denario. Moqon chik kiʼok xsikʼbʼal xkomon aj kʼanjel, wankebʼ jun hoor ajwiʼ xeʼkʼanjelak. Naq kiqʼoqyinoʼk kixtoj jun denario rehebʼ li junjunq. Abʼan li xeʼok chi kʼanjelak chalen eqʼla xeʼroybʼeni naq naabʼal teʼtojeʼq xbʼaan naq naabʼal hoor xeʼkʼanjelak rubʼel saqʼe (Mat. 20:​1-16). Tojaʼ naq li Jesús kiroksi li eetalil aʼin, re xkʼutbʼesinkil rehebʼ li xtzolom naq tento naq sahaqebʼ saʼ xchʼool rikʼin li kʼaru naxkʼe rehebʼ li Yos.

Bʼanyoxink ut inkʼaʼ xpatzʼbʼal li inkʼaʼ nekeʼruuk xkʼebʼal ebʼ li hermaan (1 Tes. 5:18). Qakʼamaq qe rikʼin li apóstol Pablo, aʼan moko kixpatzʼ ta rehebʼ li qechpaabʼanel re  Corinto li tenqʼ tumin usta truuq xbʼaanunkil (1 Cor. 9:​11-14). Miqapatzʼ rehebʼ li qechpaabʼanel li inkʼaʼ teʼruuq xkʼebʼal, qabʼanyoxiq bʼan chixjunil li nekeʼxkʼe qe.

Kubʼsink ibʼ. Naq junaq naxnimobʼresi ribʼ naxkʼoxla naq xkʼulubʼ naq tkʼeheʼq xloqʼal. Aʼin najuntaqʼeetamank rikʼin li bʼeneen aʼut li xbʼanol aʼan li kubʼsink ibʼ.

Laj Daniel kixkanabʼ jun chaabʼil eetalil chirix li kubʼsink ibʼ. Aʼan chalenaq saʼ jun chaabʼil junkabʼal, chʼinaʼus naʼilok, wank xnaʼlebʼ ut li xseebʼal. Joʼkan naq kiruuk raj xkʼoxlankil naq li kʼanjel ut li wankil li kikʼeheʼk re xkʼulubʼ naq tkʼeheʼq re (Dan. 1:​3, 4, 19, 20). Abʼan aʼan kixkubʼsi ribʼ joʼkan naq li Jehobʼa kixye naq jwal loqʼ chiru (Dan. 2:30; 10:​11, 12).

Miqakanabʼ naq li xnaʼlebʼ li ruuchichʼochʼ joʼ li nimobʼresink ibʼ ut xkʼoxlankil qibʼ qajunes tooxbʼon. Sahaq bʼan qachʼool rikʼin li osobʼtesihom li naxkʼe qe li Jehobʼa saʼ xkʼabʼaʼ naq nokoorusila usta moko qakʼulubʼ ta naq tixkʼe qe.