NAʼLEBʼ RE TZOLOK 29
Chookʼanjelaq rochbʼen li Jesukriist, laj jolominel qe
«Kʼeebʼil we chixjunil li wankilal, joʼ saʼ choxa joʼ ajwiʼ saʼ ruuchichʼochʼ» (MAT. 28:18).
BʼICH 10 Qanimaq ru li Qayos Jehobʼa!
RUʼUJIL LI TZOLOM *
1. Kʼaru li rajom li Yos anaqwan?
LI RAJOM li Jehobʼa aʼan naq tpuktesimanq li chaabʼil esilal chirix li Xʼawabʼejilal saʼ chixjunil li Ruuchichʼochʼ (Mar. 13:10; 1 Tim. 2:3, 4). Li kʼanjel aʼin re li Jehobʼa, joʼkan naq wank xwankil naq kixsikʼ li Ralal re naq tixbʼeresi. Saʼ xkʼabʼaʼ naq aʼin wank saʼ ruqʼ li Jesús, chʼolchʼo chiqu naq li Jehobʼa sahaq saʼ xchʼool rikʼin li kibʼaanumank naq tchalq li rosoʼjik (Mat. 24:14).
2. Kʼaru tqil saʼ li tzolom aʼin?
2 Saʼ li tzolom aʼin tqil chanru naq li Jesús, naroksi «li moosej tiik xchʼool ut wank xnaʼlebʼ» re xkʼebʼal li naʼajmank saʼ li qapaabʼal ut xkʼubʼankil li nimla kʼanjel chirix li puktesink li maajunwa ilbʼil chaq (Mat. 24:45). Tqil ajwiʼ, chanru tooʼokenq chirix li Jesús ut li moosej tiik xchʼool.
LI JESÚS YOOK XBʼERESINKIL LI PUKTESINK
3. Kʼaru li wankilal kikʼeheʼk re li Jesús?
3 Li Jesús yook rilbʼal li puktesink. Chanru naqanaw? Naq toj maajiʼ naxik saʼ choxa, kixchʼutubʼ ribʼ rikʼin wiibʼ oxibʼ li xtzolom saʼ li tzuul re Galilea ut kixye rehebʼ: «Kʼeebʼil we chixjunil li wankilal, joʼ saʼ choxa joʼ ajwiʼ saʼ ruuchichʼochʼ». Ut qakʼehaq reetal li kixye moqon: «Ayuqex bʼiʼ, ut kʼehomaqebʼ choʼq intzolom chixjunilebʼ li tenamit» (Mat. 28:18, 19). Joʼkan ajwiʼ, kikʼeheʼk xwankil li Jesús re xbʼeresinkil li puktesink.
4. Kʼaʼut naq chʼolchʼo chiqu naq li Jesús yook rilbʼal li kʼanjel re puktesink?
4 Li Jesús kixye naq li puktesink ut xkʼebʼal choʼq xtzolom ebʼ li kristiʼaan tbʼaanumanq saʼ «chixjunilebʼ li tenamit», ut naq aʼan wanq rikʼinebʼ «chixjunil li kutan toj saʼ rosoʼjik li ruuchichʼochʼ» (Mat. 28:20). Ebʼ li aatin aʼin naxkʼutbʼesi naq li Jesús tixjolomi li kʼanjel re puktesink saʼebʼ li qakutan.
5. Chanru nokooʼokenk sa li xtzʼaqlojik li naxye Salmo 110:3, TNM?
5 Chʼolchʼo chaq chiru li Jesús naq saʼ rosoʼjikebʼ li kutan naabʼalaqebʼ laj kʼanjel chiru. Naxnaw naq ttzʼaqloq ru li propesiiy aʼin: «Laatenamit tixyeechiʼi ribʼ chi anchal xchʼool saʼ xkutankil naq tatxik chi yalok» (Sal. 110:3, TNM). Wi laaʼat nakaapuktesi li chaabʼil esilal yookat xtenqʼankil li Jesús ut li moosej tiik xchʼool, ut yookat chi tzʼaqonk re naq ttzʼaqloq ru li propesiiy aʼin. Li puktesink yook chi bʼaanumank, abʼanan wank wiibʼ oxibʼ li chʼaʼajkilal li naramok re.
6. Bʼar wank jun rehebʼ li chʼaʼajkilal li naxram qakʼanjel?
6 Jun li chʼaʼajkilal li naqanumsi aʼan naq nekeʼxram li qakʼanjel. Ebʼ li nekeʼxtzʼeqtaana li Jehobʼa chi junajwa, ebʼ li awabʼej ut ebʼ laj kʼamolbʼe saʼebʼ li paabʼal naabʼal li tikʼtiʼ nekeʼxye chirix li qakʼanjel. Wi ebʼ li qakomon, li naqanawebʼ ru ut ebʼ li qechkʼanjelil nekeʼxpaabʼ aʼin, maare teʼruuq xbʼaanunkil naq tqakanabʼ kʼanjelak chiru li Jehobʼa. Saʼ wiibʼ oxibʼ li tenamit ebʼ li xikʼ nekeʼilok qe, nokooʼeʼxrahobʼtesi, nokooʼeʼxhobʼ ut nokooʼeʼxkʼe saʼ tzʼalam. Moko nasach ta saʼ qachʼool rilbʼal aʼin, xbʼaan naq li Jesús kixye: «Xikʼ texʼileʼq […] saʼ inkʼabʼaʼ» (Mat. 24:9). Joʼkan naq, li xikʼ ilok li nekeʼxbʼaanu qe, naxkʼut naq naqakʼam qe rikʼin li Jesús ut naqataw rusilal li Jehobʼa (Mat. 5:11, 12). Laj Tza nabʼaanunk re chixjunil aʼin, abʼanan maajunwa tixtaw xwankilal li Jesús. Rikʼin xtenqʼ li Kriist, li chaabʼil esilal yook chi wulak saʼ chixjunil li Ruuchichʼochʼ.
7. Kʼaru naxkʼut chaawu naq yook chi tzʼaqlok li naxye Apocalipsis 14:6, 7?
7 Jun chik li chʼaʼajkilal aʼan naq naabʼal li aatinobʼaal. Li Jesús kixkʼutbʼesi chiru laj Juan saʼ jun moy u naq aʼin inkʼaʼ tixram li chaabʼil esilal chiruhebʼ li kristiʼaan (taayaabʼasi Apocalipsis 14:6, 7). Chanru naqaqʼax ru li chʼaʼajkilal aʼin? Naq naabʼal li kristiʼaan naru nekeʼxtaw saʼ jw.org naabʼal li qatasal hu ut li naʼlebʼ li wank saʼ li Santil Hu saʼ numenaq 1,000 chi aatinobʼaal. Joʼkan ajwiʼ, li Nekeʼjolomink re Xmolam li Jehobʼa xkʼe ajwiʼ li leseens re naq t-isimanq saʼ numenaq 700 chi aatinobʼaal li tasal hu Sahaq laachʼool! Wank ajwiʼ li bʼideo rehebʼ li tzʼap xik ut li hu saʼ braille rehebʼ li mutzʼ re xkawresinkilebʼ li xpaabʼal. Anaqwan aʼin li hoonal re naq chi mil ebʼ li kristiʼaan teʼxkʼulubʼa li chaabʼil esilal. Yooko rilbʼal li xtzʼaqlojik li propesiiy aʼin xbʼaan naq: ebʼ li kristiʼaan «li jalan jalanq raatinobʼaal ut xtenamitebʼ» yookebʼ xtzolbʼal li «chaabʼil aatin» malaj li yaal li wank saʼ li Santil Hu (Zac. 8:23; Sof. 3:9). Relik chi yaal naq kamaʼin yook chi kʼulmank saʼ xkʼabʼaʼ naq li Jesukriist chaabʼil naril li kʼanjel.
8. Kʼaru yook chi kʼulmank rikʼin li puktesink toj anaqwan?
8 Saʼebʼ li qakutan numenaq 8 miyon ebʼ li qas qiitzʼin saʼ 240 chi tenamit nekeʼokenk saʼ li xmolam li Jehobʼa. Ut rajlal chihabʼ chi mil nekeʼkubʼeek xhaʼ! Abʼanan, moko aʼin ta li tzʼaqal wank xwankil, li kʼaru tzʼaqal wank xwankil aʼan li chaabʼil naʼlebʼ li nekeʼxkʼutbʼesi, malaj joʼ naxye li Santil Hu «li akʼ yuʼam» (Col. 3:8-10). Naabʼal rehebʼ aʼin ak xeʼxkanabʼ li muxuk ibʼ, li rahobʼtesink, li nimobʼresink ibʼ malaj nekeʼxbʼaanu li nekeʼxye li tenamit. Yook chi tzʼaqlok ru li naxye li propesiiy re Isaías 2:4: «Chi moko teʼxkawresi ribʼ re yalok». Saʼ xkʼabʼaʼ naq naqayal qaqʼe chi xchaabʼilobʼresinkil li qanaʼlebʼ, aʼin naxbʼaanu naq naabʼal li kristiʼaan nekeʼraj okenk saʼ li xmolam li Jehobʼa ut naqakʼutbʼesi naq naqakʼam qe rikʼin li Jesús, laj kʼamol qabʼe (Juan 13:35; 1 Ped. 2:12). Ut aʼin inkʼaʼ tooruuq xbʼaanunkil qajunes; li Jesús yook chi qatenqʼankil.
LI JESÚS KIXXAQABʼ LI MOOSEJ TIIK XCHʼOOL
9. Joʼ naxye saʼ Mateo 24:45-47, kʼaru tkʼulmanq saʼebʼ li qakutan?
9 (Taayaabʼasi Mateo 24:45-47). Li Jesús kixye naq saʼ rosoʼjikebʼ li kutan «li moosej tiik xchʼool ut wank xnaʼlebʼ» aʼan teʼkawresinq re li qapaabʼal. Joʼkan naq naʼoybʼenimank naq li moosej tiik xchʼool yook chi kʼanjelak chi kaw saʼebʼ li qakutan. Ut relik chi yaal naq aʼin yook chi kʼulmank. Li Jesús naroksi jun chʼuut li yulbʼilebʼ ru re xkʼebʼal «xwahebʼ saʼ xqʼehil» ebʼ laj kʼanjel chiru li Yos ut choʼq rehebʼ li kristiʼaan li nekeʼraj abʼink. Ebʼ li hermaan aʼin inkʼaʼ «nekeʼtaqlank saʼ xbʼeen» li qapaabʼal (2 Cor. 1:24). Nekeʼxye bʼan naq, li Jesukriist aʼan «aj kʼamol bʼe ut aj jolominel» re li xtenamit li Yos (Is. 55:4).
10. Bʼar wank rehebʼ li hu li wank saʼ jalam u xatxtenqʼa re ok saʼ li yaal?
10 Chalen li chihabʼ 1919, li moosej tiik xchʼool yook xkʼebʼal naabʼal li hu re naq ebʼ li kristiʼaan teʼxkawresi li xpaabʼal. Saʼ li chihabʼ 1921, li moosej tiik xchʼool kirisi saʼ inglés li hu El Arpa de Dios re naq ebʼ li kristiʼaan teʼxtzol li yaal. Naq yook chi jalaak ebʼ li qakutan xeʼjalaak ajwiʼ li tasal hu. Bʼar wank rehebʼ li hu aʼin xatxtenqʼa re xnawbʼal ru ut xraabʼal li Jehobʼa? Maare rikʼin jun rehebʼ aʼin: «Sea Dios veraz», La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Kʼaru tzʼaqal naxchʼolobʼ li Santil Hu? malaj ¿Qué nos enseña la Biblia? Malaj yookat roksinkil li akʼ tasal hu Sahaq laachʼool! Ebʼ li hu aʼin nakʼanjelak re puktesink, ut nakʼulmank tzʼaqal saʼ li xhoonalil.
11. Kʼaʼut naq aajel ru naq chiqajunilo tkawresiiq li qapaabʼal?
11 Ebʼ li yookebʼ chi xtzolbʼal li Santil Hu moko kaʼaj tawiʼ ebʼ aʼin nekeʼraj naq teʼkawresiiq li xpaabʼal. Relik chi yaal, chiqajunilo. Li apóstol Pablo kixtzʼiibʼa: «Li kawil tzekemq aʼan choʼq rehebʼ li ak ninqebʼ». Kixye ajwiʼ naq xyuʼaminkil li naʼlebʼ aʼin tooxtenqʼa re «xtawbʼal ru bʼar wank li us ut bʼar wank li inkʼaʼ us» (Heb. 5:14). Anaqwan naq li muxuk ibʼ yalaq bʼar wank, naru nachʼaʼajkoʼk chiqu xpaabʼankil li xchaqʼrabʼ li Jehobʼa. Abʼan li Jesús naʼokenk chi xkawresinkil li qapaabʼal, xbʼaan naq saʼ li Santil Hu naqataw chixjunil aʼin. Li Jesús naril naq li moosej tiik xchʼool naxkawresi ut naxjekʼi chixjunil aʼin.
12. Kʼaru ak xqabʼaanu re roxloqʼinkil li xkʼabʼaʼ li Jehobʼa joʼ li Jesús?
12 Joʼ kixbʼaanu li Jesús, laaʼo ajwiʼ naqoxloqʼi li xkʼabʼaʼ li Jehobʼa (Juan 17:6, 26, TNM). Jun eetalil, saʼ li chihabʼ 1931 xookʼabʼaʼiik testiiw re li Jehobʼa. Chi joʼkaʼin naqakʼutbʼesi naq naqaj xkʼambʼal li xkʼabʼaʼ li qachoxahil Yuwaʼ, xbʼaan wank xwankil choʼq qe (Is. 43:10-12, TNM). Ut, chiru li po octubre re li chihabʼ ajwiʼ aʼan, keʼxkʼe li xkʼabʼaʼ li Jehobʼa chiru li hu Laj Kʼaakʼalehom saʼ inglés. Joʼkan ajwiʼ, saʼ li Santil Hu Traducción del Nuevo Mundo keʼxkʼe wiʼ chik li xkʼabʼaʼ li Jehobʼa bʼarwiʼ tento tkʼemanq. Jalan tzʼaqal aʼin rikʼin li nekeʼxbʼaanu ebʼ li bʼalaqʼil paabʼal, naq nekeʼrisi xkʼabʼaʼ li Jehobʼa saʼebʼ li Xsantil Hu.
LI JESÚS NAXKʼUBʼ EBʼ LAJ KʼANJEL
13. Kʼaʼut naq chʼolchʼo chaawu naq li Jesús naroksi «li moosej tiik xchʼool ut wank xnaʼlebʼ»? (Juan 6:68).
13 Saʼ xkʼabʼaʼ «li moosej tiik xchʼool ut wank xnaʼlebʼ», li Jesús naru xkʼubʼankil ebʼ laj kʼanjel arin saʼ li Ruuchichʼochʼ re naq teʼxloqʼoni ru saʼ junajil. Kʼaru nakaakʼoxla chirix li molam aʼin? Maare nachalk saʼ aachʼool joʼ laj Pedro, naq kixye re li Jesús: «Ani aj ikʼin tooxik? Aawikʼin wank li aatin nakʼehok li junelik yuʼam» (Juan 6:68). Bʼar raj wanko wi maakʼaʼo raj saʼ li xmolam li Jehobʼa? Saʼ xkʼabʼaʼ aʼin, li Jesús naraj naq kawresinbʼilaq li qapaabʼal ut nokooʼeʼxtzol re naq chaabʼil tookʼutuq. Joʼkan ajwiʼ, nokooxtenqʼa re naq tqajal li qanaʼlebʼ re xsahobʼresinkil xchʼool li Jehobʼa (Efes. 4:24).
14. Chanru nakatxtenqʼa wank saʼ xmolam li Jehobʼa chiru li COVID-19?
14 Naq naqakʼul ebʼ li chʼaʼajkilal, li Jesús naxkʼe xchʼool chi qabʼeresinkil. Ut aʼin kiʼilmank chiru li COVID-19. Naabʼalebʼ li kristiʼaan inkʼaʼ nekeʼxtaw ru kʼaru teʼxbʼaanu, abʼan li Jesús kixkʼe qanaʼlebʼ chanru tqakol qibʼ. Keʼxye qe naq tqoksi li maskariiy ut naq inkʼaʼ toowanq saʼ komonil rikʼinebʼ li qas qiitzʼin. Keʼyeheʼk re li cheekel winq naq teʼxkʼe xchʼool chirixebʼ laj puktesinel ut naq teʼril ajwiʼ li naʼajmank saʼ li xjunxaqalil ut saʼ li xpaabʼalebʼ (Is. 32:1, 2). Ut li esilkʼanjel re li Nekeʼjolomink re Xmolam li Jehobʼa nekeʼxye qe kʼaru chik xbʼaanunkil ut nekeʼxwaklesi qachʼool.
15. Kʼaru chik li naʼlebʼ xqakʼul chiru li nimla kaqi yajel, ut kʼaru li rusilal natawmank?
15 Chiru li kaqi yajel, keʼxye ajwiʼ chanru tqabʼaanu ebʼ li chʼutam ut li puktesink. Sa junpaat xooʼok xbʼaanunkil li nimla chʼutam ut ebʼ li chʼutam saʼ videoconferencia, ut xooʼok chi puktesink rikʼin ebʼ li esilhu ut saʼ selular. Ut li Jehobʼa narosobʼtesi li qakʼanjel. Naabʼal li qamolam nekeʼxye naq xeʼtamk laj kʼanjel chiru li Jehobʼa. Chiru li nimla yajel aʼin, ebʼ li qahermaan us yookebʼ chi elk saʼ li xkʼanjel (chaawil li kaaxukuut « Li Jehobʼa narosobʼtesi li qakʼanjel»).
16. Kʼaru chʼolchʼooq chiqu?
16 Maare wiibʼ oxibʼ li hermaan nekeʼxkʼoxla naq li qamolam qʼaxal naxkʼe wiʼ chik xbʼeen li tbʼaanumanq. Abʼan, naabʼal sut nakʼutbʼesimank naq li esil li nekeʼxkʼe qe qʼaxal wank xwankil (Mat. 11:19). Wi naqanaʼlebʼa rix chanru li Jehobʼa ut li Jesús nokooʼeʼxbʼeresi, maakʼaʼ naxye li tkʼulmanq, ebʼ aʼan junelik wanqebʼ qikʼin (taayaabʼasi Hebreos 13:5, 6).
17. Chanru nakaawekʼa aawibʼ kʼanjelak rubʼel xwankil li Jesús?
17 Kʼajoʼ nasahoʼk saʼ qachʼool naq nokookʼanjelak rubʼel xwankil li Jesús! Wanko saʼ jun li molam bʼarwiʼ maakʼaʼ naru najachok qe chi moko li qaatinobʼaal, li qanaʼlebʼ malaj li qatenamit. Chʼoolaninbʼilo saʼ li qapaabʼal ut kawresinbʼilo re xyeebʼal li chaabʼil esilal. Chiqajunqal naqayal qaqʼe chi xyuʼaminkil li chaabʼil naʼlebʼ ut xraabʼalebʼ li junchʼol. Kʼajoʼ nasahoʼk saʼ qachʼool rikʼin li Jesukriist, laj jolominel qe!
BʼICH 67 «Chapuktesi li Aatin»
^ Saʼebʼ li qakutan, chi miyon ebʼ li winq, ixq ut kokʼal nekeʼxpuktesi li chaabʼil esilal chi anchalebʼ xchʼool. Ma laaʼat jun rehebʼ? Wi joʼkan, yookat xtaqenkil li Jesukriist. Saʼ li tzolom aʼin, tqil chanru li Jesukriist yook xbʼeresinkil li puktesink saʼebʼ li qakutan. Xkʼoxlankil aʼin, tooxtenqʼa chi kʼanjelak chiru li Jehobʼa rubʼel xwankil li Kriist.
