1. Kʼaru chʼolchʼo chiqu ut kʼaʼut?

 MA NACHʼAʼAJKOʼK chaawu rilbʼal chanru wank li ruuchichʼochʼ anaqwan? Saʼ naabʼal li junkabʼal maakʼaʼ chik li rahok. Li xkʼihalil li kristiʼaan maaʼusebʼ xnaʼlebʼ, nekeʼrahobʼtesink ut kaʼajwiʼ re nekeʼraj xsikʼbʼal. Naabʼal li kristiʼaan nekeʼchʼaʼajkoʼk chiru xkʼojobʼankil xchʼool rikʼin li wankebʼ xwankil. Abʼan aʼin nokooxtenqʼa chi xkʼojobʼankil qachʼool naq saʼ jun kutan tchaabʼiloʼq chixjunil. Kʼaʼut? Xbʼaan naq ebʼ li poyanam nekeʼnaʼlebʼak joʼ chanru naxye 2 Timoteo 3:1-5 chirix li «rosoʼjikebʼ li kutan». Maaʼani naru tixye naq inkʼaʼ yook chi tzʼaqlok ru li propesiiy aʼin. Li xtzʼaqlojik ru naxkʼutbʼesi naq li Jesukriist ak yook chi Awabʼejink saʼ Xʼawabʼejilal li Yos. Abʼan, wank naabʼal chik li propesiiy chirix li Awabʼejilal aʼin. Ok qe xtzʼilbʼal rix ebʼ li propesiiy li ak xeʼtzʼaqlok ru saʼ li chihabʼ xeʼnumeʼk ut naxkawresi li qapaabʼal.

2. Kʼaru tqatzʼil rix saʼ li tzolom aʼin, ut chanru tooxtenqʼa? (Chʼolobʼ li jalam u chiru li hu).

² Kʼaru tqatzʼil rix saʼ li tzolom aʼin? Xbʼeen, tqil jun li propesiiy li nokooxtenqʼa chi xnawbʼal joqʼe kixaqabʼaak li Xʼawabʼejilal li Yos. Xkabʼ, tqatzʼil rix wiibʼ oxibʼ li propesiiy li tooxtenqʼa chi rilbʼal naq li Jesús ak wank joʼ Awabʼej saʼ li Xʼawabʼejilal li Yos. Rox, tqatzʼil rix ebʼ li propesiiy li naxkʼut chanru naq teʼosoʼq li xikʼ nekeʼilok re  Xʼawabʼejilal li Yos. Tqatzʼil ajwiʼ rix chanru naq ebʼ li propesiiy aʼin naxchap ribʼ ut tooxtenqʼa chi rilbʼal kʼaru li hoonal wanko wiʼ.

3. Kʼaru naxkʼut chiqu li propesiiy re Daniel 7:13, 14 chirix li T-awabʼejinq saʼ li Xʼawabʼejilal li Yos?

³ Saʼ Daniel 7:13, 14 naqataw jun li propesiiy li naxkʼut kʼaʼut naq li Jesukriist wank xkʼulubʼ chi Awabʼejink saʼ Xʼawabʼejilal Yos. Naxye naq chixjunilebʼ li kristiʼaan teʼkʼanjelaq chiru chi anchalebʼ xchʼool ut maajun chik li awabʼej t-oq saʼ xnaʼaj. Ut joqʼe t-oq chi awabʼejink li Jesús? Joʼ naxye saʼ jun chik li xpropesiiy laj Daniel, aʼin tkʼulmanq saʼ xraqik li xqʼehil li wuqubʼ chihabʼ. Qilaq joqʼe kitzʼaqlok ru li propesiiy aʼin.

4. Chanru nokooxtenqʼa Daniel 4:10-17 chi xnawbʼal joqʼe ttiklaaq chi awabʼejink li Jesús? (Chaawil ajwiʼ li xyaalal).

⁴ (Taayaabʼasi Daniel 4:10-17). Li «wuqubʼ chihabʼ» reetalil 2,520 chihabʼ. Aʼin kitiklaak saʼ li chihabʼ 607 naq toj maajiʼ nachalk li Jesús saʼ Ruuchichʼochʼ, naq ebʼ laj Babilonia keʼrisi li awabʼej li wank saʼ xkʼojaribʼaal li Jehobʼa, aran Jerusalén. Li qʼehil aʼin kiraqeʼk saʼ li chihabʼ 1914, naq li Jehobʼa kixkʼe saʼ li Xʼawabʼejilal, li Jesús li xaqabʼanbʼil chi «raqok aatin» (Ezeq. 21:25-27). *

5. Kʼaru rusilal naqataw chi xtawbʼal ru li propesiiy chirix li «wuqubʼ chihabʼ»?

⁵ Chanru nokooxtenqʼa li propesiiy aʼin? Xtawbʼal ru li propesiiy aʼin chirix li «wuqubʼ chihabʼ» nokooxtenqʼa chi rilbʼal chanru naq li Jehobʼa naxbʼaanu li naxyeechiʼi saʼ li xhoonalil. Aʼan kixye joqʼe tixxaqabʼ li Xʼawabʼejilal. Ut joʼkan kixbʼaanu naq xwulak li hoonal. Joʼkan ajwiʼ, li Jehobʼa tixbʼaanu naq ttzʼaqloq ru chixjunil li propesiiy saʼ li xhoonalil. Joʼkan naq li xkutankil li Jehobʼa inkʼaʼ «taabʼayq» (Hab. 2:3).

6. a) Chanru naqanaw naq li Kriist ak yook chi awabʼejink saʼ choxa? b) Chanru naxkʼut li propesiiy re Apocalipsis 6:2-8 naq yaal aʼin?

⁶ Naq ak raqeʼk re li xkʼanjel, li Jesús kixye rehebʼ li xtzolom li kʼaru tkʼulmanq saʼ chixjunil li ruuchichʼochʼ re naq teʼxnaw naq kiʼok chi awabʼejink saʼ choxa. Kixye naq twanq ninqi hiik, weʼej, yalok u. Joʼ ajwiʼ twanq ebʼ li yajel «saʼ naabʼal chi naʼajej», joʼ li COVID-19. Li Santil Hu naxye naq chixjunil aʼin, aʼan reetalil li xkʼulunik li Kriist (Mat. 24:3, 7; Luc. 21:7, 10, 11). Naq ak xnumeʼk 60 chihabʼ naq xkoho saʼ choxa, li Jesús kixye re li apóstol Juan naq chixjunil aʼin tkʼulmanq (taayaabʼasi Apocalipsis 6:2-8). Chixjunil aʼin kikʼulmank chalen naq li Jesús kiʼok joʼ Awabʼej saʼ 1914.

7. Kʼaʼut xnumtaak li chʼaʼajkilal saʼ Ruuchichʼochʼ naq li Jesús kiʼok chi awabʼejink?

⁷ Kʼaʼut kinumtaak li chʼaʼajkilal saʼ Ruuchichʼochʼ naq li Jesús kiʼok joʼ awabʼej? Saʼ Apocalipsis 6:2 naxkʼe jun li naʼlebʼ: li kixbʼaanu xbʼeenwa li Awabʼej aʼin, aʼan pleetik. Rikʼin anihebʼ kipleetik? Rikʼin laj Tza ut ebʼ li maaʼus aj musiqʼej. Saʼ Apocalipsis tasal 12, naxye naq laj Tza ut ebʼ li maaʼus aj musiqʼej keʼkuteʼk chaq saʼ Ruuchichʼochʼ. Saʼ xkʼabʼaʼ aʼin kirisi xjosqʼil saʼ xbʼeenebʼ li poyanam. Joʼkan naq  li Santil Hu naxye: «Ra chaalel saʼ eebʼeen laaʼex li ruuchichʼochʼ ut palaw» (Apoc. 12:7-12).

8. Chanru nokooxtenqʼa xnawbʼal naq yook chi tzʼaqlok ru ebʼ li propesiiy chirix li Xʼawabʼejilal li Yos?

⁸ Chanru nokooxtenqʼa ebʼ li propesiiy aʼin? Li yook chi kʼulmank ut rilbʼal li xnaʼlebʼebʼ li poyanam naxkʼutbʼesi naq li Jesús ak wank joʼ Awabʼej. Joʼkan naq inkʼaʼ naʼok qakʼaʼuxl chi rilbʼal naq ebʼ li kristiʼaan xikʼ nekeʼilok ut kaʼajwiʼ nekeʼxkʼoxla li nekeʼraj. Wank bʼan saʼ qachʼool naq rikʼin aʼin natzʼaqlok ru li naxye li Santil Hu. Chʼolchʼo naq li Xʼawabʼejilal li Yos ak yook chi awabʼejink! (Sal. 37:1). Naqanaw ajwiʼ naq tnumtaaq li xmaaʼusilal li ruuchichʼochʼ naq yook chaq chi nachʼok li Armagedón (Mar. 13:8; 2 Tim. 3:13). Li Jehobʼa, li Qayuwaʼ, kʼajoʼ nokooxra ut nokooxtenqʼa chi rilbʼal kʼaʼut jwal chʼaʼaj ebʼ li kutan aʼin. Peʼyaal naq naqaj xbʼanyoxinkil re aʼin?

9. Kʼaru naxye Daniel 2:28, 31-35, chirix li xnimal ru awabʼejilal ut joqʼe kitiklaak?

⁹ (Taayaabʼasi Daniel 2:28, 31-35). Anaqwan yooko rilbʼal li xtzʼaqlojik li propesiiy aʼin. Saʼ jun li matkʼ, laj Nabucodonosor kiril li tkʼulmanq «saʼ rosoʼjikebʼ li kutan», naq li Jesús t-oq chi awabʼejink. Jun rehebʼ li xikʼ nekeʼilok re li Jesús arin saʼ Ruuchichʼochʼ aʼan li xnimal ru awabʼejilal li naʼaatinak wiʼ li Santil Hu. Li xnimal ru awabʼejilal aʼin ak wank chik, reetalil «li roq […] yiijach chʼiichʼ ut yiijach sebʼ». Kitiklaak saʼ li xbʼeen nimla yalok u, naq li tenamit Reino Unido ut Estados Unidos keʼxkʼe ribʼ saʼ aatin. Li jalam u li kixmatkʼe laj Nabucodonosor  naxkʼe wiibʼ li naʼlebʼ chirix li xnimal ru awabʼejilal aʼin li naxkʼutbʼesi naq jalan chiruhebʼ li junchʼol.

10. a) Kʼaru naxye li xpropesiiy laj Daniel chirix li xnimal ru awabʼejilal bʼarwiʼ naʼokenk Reino Unido ut Estados Unidos? b) Kʼaru tento tqakʼe reetal? (Chaawil li kaaxukuut « Weent taabʼaanu rikʼin li sebʼ!»).

¹⁰ Qilaq li xbʼeen naʼlebʼ li naxkʼutbʼesi naq jalan li xnimal ru awabʼejilal bʼarwiʼ naʼokenk Reino Unido ut Estados Unidos. Li xjalanil rikʼinebʼ li junchʼol chik chi awabʼejilal, aʼan naq moko yiibʼanbʼil ta rikʼin jun ajwiʼ chi chʼiichʼ, joʼ li oor malaj li plaat, yukʼinbʼil bʼan rikʼin chʼiichʼ ut sebʼ. Li sebʼ reetalil naq «teʼxkʼamatq ribʼ saʼ aatin» rikʼinebʼ li kristiʼaan (Dan. 2:43). Chʼolchʼo naq li xnimal ru awabʼejilal aʼin nachʼaʼajkoʼk chiru xbʼaanunkil li naraj saʼ xkʼabʼaʼ li naxbʼaanu li tenamit naq nekeʼok xsikʼbʼal ani t-awabʼejinq, naq nekeʼok xpatzʼbʼal naq teʼtenqʼaaq, nekeʼxmululi ribʼ ut nekeʼxpatzʼ naq us teʼwanq saʼ li xkʼanjel.

11. Kʼaru naxkʼutbʼesi naq wanko saʼ rosoʼjikebʼ li kutan?

¹¹ Li xkabʼ naʼlebʼ aʼan naq li xnimal ru awabʼejilal aʼin reetalil li roq li jalam u. Li xnimal ru awabʼejilal aʼin bʼarwiʼ naʼokenk Reino Unido ut Estados Unidos, aʼan li xraqik li awabʼejilal li kixye li Santil Hu. Aʼin naraj xyeebʼal naq maakʼaʼaq chik junaq xnimal ru awabʼejilal joʼ aʼin. Xbʼaan naq li Xʼawabʼejilal li Yos tixsachebʼ li xʼawabʼejilal li winq saʼ li Armagedón (Apoc. 16:13, 14, 16; 19:19, 20). *

12. Kʼaru chik naxkʼutbʼesi li xpropesiiy laj Daniel ut chanru naxkʼojobʼ qachʼool ut naxkʼe qoybʼenihom?

¹² Chanru nokooxtenqʼa li propesiiy aʼin? Li propesiiy li kixye laj Daniel naxkʼutbʼesi naq wanko saʼ rosoʼjikebʼ li kutan. Ak numenaq 2,500 chihabʼ kixye chaq, naq tsachmanq li tenamit Babilonia, twanq kaahibʼ chik xnimal ru awabʼejilal li twanq xwankil saʼ xbʼeen li xtenamit li Yos. Kixye ajwiʼ naq li xraqik li xnimal ru awabʼejilal bʼarwiʼ naʼokenk Reino Unido ut Estados Unidos, kaʼaj chik aʼan twanq. Aʼin naxkʼojobʼ qachʼool ut naxkʼe qoybʼenihom, xbʼaan naq naqanaw naq chi seebʼ li Xʼawabʼejilal li Yos tixsachebʼ chixjunil li xʼawabʼejilal li winq ut t-awabʼejinq saʼ xbʼeen li Ruuchichʼochʼ (Dan. 2:44).

13. Anihebʼ «li xwaqxaq awabʼej» ut «li lajeebʼ chi awabʼej» li naxye Apocalipsis 17:9-12, ut chanru kitzʼaqlok ru li propesiiy aʼin?

¹³ (Taayaabʼasi Apocalipsis 17:9-12). Li xbʼeen nimla yalok u kixkʼam chaq naabʼal li rahilal ut aʼin kixbʼaanu naq ttzʼaqloq jun chik li propesiiy chirix li rosoʼjik li kutan. Saʼ xkʼabʼaʼ naq li xʼawabʼejilal li winq nekeʼraj naq twanq li tuqtuukilal saʼ chixjunil li ruuchichʼochʼ keʼxkʼubʼ li Sociedad de Naciones, saʼ enero re li chihabʼ 1920 ut saʼ li po octubre re li chihabʼ 1945 kikanaak choʼq reqaj li Naciones Unidas. Li Santil Hu naxye naq li molam aʼin «aʼan li xwaqxaq awabʼej». Abʼan maawaʼ li xnimal ru awabʼejilal. Ebʼ li awabʼej nekeʼkʼehok re li xwankilal. Li Santil Hu naxye naq ebʼ li awabʼejilal aʼin, aʼanebʼ «li lajeebʼ chi awabʼej».

14, 15. a) Kʼaru naxye Apocalipsis 17:3-5 chirix «li Babilonia, li Nimla Tenamit»? b) Kʼaru yook chi kʼulmank rikʼin li tenqʼ li nekeʼxkʼul li bʼalaqʼil paabʼal?

¹⁴ (Taayaabʼasi Apocalipsis 17:3-5). Li Jehobʼa kixkʼut jun li moy u re li apóstol Juan bʼarwiʼ kiril jun li ixq aj yumbʼeet li naxkʼabʼaʼi «Babilonia, li Nimla  Tenamit». Li ixq aʼin reetalil ebʼ li bʼalaqʼil paabʼal, li wank saʼ chixjunil li ruuchichʼochʼ. Kʼaru naxkʼut li moy u aʼin? Ebʼ li xmolam li bʼalaqʼil paabʼal chiru naabʼal chihabʼ nekeʼxkʼam ribʼ saʼ usilal rikʼin li xʼawabʼejilal li ruuchichʼochʼ ut nekeʼxtenqʼahebʼ. Abʼan, chi seebʼ li Jehobʼa tixkʼe saʼ xchʼoolebʼ li awabʼej «xbʼaanunkil li naraj». Kʼaru tixkʼam chaq aʼin? Naq «li lajeebʼ chi awabʼej», malaj, ebʼ li awabʼejilal, teʼxrahobʼtesi li bʼalaqʼil paabʼal ut teʼxsach chi junajwa (Apoc. 17:1, 2, 16, 17).

¹⁵ Chanru naqanaw naq chi seebʼ tsacheʼq li Babilonia li Nimla Tenamit? Li tooxtenqʼa chi xnawbʼal aʼin, aʼan xjultikankil naq li nakolok re li najteril tenamit Babilonia aʼan li nimaʼ Éufrates. Li hu Apocalipsis naxye naq ebʼ li miyon chi kristiʼaan li teʼtzʼaqonq rikʼin li Babilonia li Nimla Tenamit chanchanebʼ «li haʼ» li nakolok rehebʼ (Apoc. 17:15). Abʼan naxye ajwiʼ naq li haʼ aʼin tchaqiq, ut aʼin naxkʼut naq naabʼalebʼ li kristiʼaan inkʼaʼ chik teʼxtenqʼa li bʼalaqʼil paabʼal (Apoc. 16:12). Li propesiiy aʼin ak yook chi tzʼaqlok ru: naabʼalebʼ li kristiʼaan ak xeʼxkanabʼ li bʼalaqʼil paabʼal ut rikʼin jalanebʼ chik nekeʼxsikʼ xtenqʼ.

16. Chanru nokooxtenqʼa xtawbʼal ru li propesiiy chirix naq kixaqabʼamank li Naciones Unidas ut li xsachik li Babilonia, li Nimla Tenamit?

 ¹⁶ Chanru nokooxtenqʼa ebʼ li propesiiy aʼin? Naq kixaqabʼamank li Naciones Unidas ut naq maakʼaʼ chik xwankil li bʼalaqʼil paabʼal naxkʼutbʼesi naq wanko saʼ rosoʼjikebʼ li kutan. Usta yaal naq «li haʼ» li nakolok re Babilonia, li Nimla Tenamit yook chi chaqik, abʼan moko aʼan ta tsachoq re. Joʼ ak xqil, li Jehobʼa tixkʼe saʼ xchʼoolebʼ «li lajeebʼ chi awabʼej», li nekeʼtzʼaqonk rikʼin li Naciones Unidas, «xbʼaanunkil li naraj». Ebʼ li tenamit teʼxsach li bʼalaqʼil paabʼal, ut aʼin tkʼulmanq chi maakʼaʼaqebʼ saʼ xchʼool (Apoc. 18:8-10). * Sachso xchʼool tkanaaq li ruuchichʼochʼ naq tril naq tsacheʼq li bʼalaqʼil paabʼal ut aʼin tixkʼam chaq ebʼ li chʼaʼajkilal. Abʼan, laaʼo li nokooloqʼonink re li Jehobʼa wank wiibʼ xyaalalil re naq sahaq saʼ qachʼool. Tsachmanq chi junajwa li bʼalaqʼil paabʼal li xikʼ naʼilok re li Jehobʼa. Ut, tooʼisiiq rubʼel xwankil li xmaaʼusilal li ruuchichʼochʼ aʼin (Luc. 21:28).

17, 18. a) Kʼaru tento tqabʼaanu re xkawresinkil li qapaabʼal? b) Chirix kʼaru tooʼaatinaq saʼ li jun chik tzolom?

¹⁷ Laj Daniel kixye: «Teʼxtaw xtzʼaqobʼ li xnaʼlebʼebʼ». Ut joʼkan kikʼulmank. Naqataw ru chiʼus ebʼ li propesiiy li naʼaatinak chirixebʼ li qakutan (Dan. 12:4, 9, 10). Saʼ xkʼabʼaʼ naq ebʼ li propesiiy aʼin tzʼaqal re ru naxbʼaanu naq tqoxloqʼi li Jehobʼa ut li Raatin (Is. 46:10; 55:11). Joʼkan naq, miqakanabʼ xkawresinkil li qapaabʼal. Tooruuq xbʼaanunkil aʼin wi naqakʼe qachʼool chi xtzolbʼal li Santil Hu ut tqatenqʼahebʼ li junchʼol chi wank choʼq ramiiw li Jehobʼa. Li Yos tixtenqʼahebʼ chixjunil li nekeʼxkʼe xchʼool chirix ut tixbʼaanu naq teʼwanq «saʼ tuqtuukilal» (Is. 26:3).

¹⁸ Saʼ li jun chik tzolom tqatzʼil rix wiibʼ oxibʼ li propesiiy chirix li xchʼuut li Yos li wank saʼ rosoʼjikebʼ li kutan. Tqil ajwiʼ, chanru naxchap ribʼ aʼin rikʼinebʼ li propesiiy chirix ebʼ li rosoʼjik li kutan. Tqatzʼil ajwiʼ rix ebʼ li eetalil li naxkʼutbʼesi naq li Jesús, li Qaʼawabʼej saʼ choxa, yook xbʼeresinkilebʼ li xtzolom.