Li Jesús kixkʼut chiruhebʼ li kristiʼaan naq teʼwanq saʼ tuqtuukilal rikʼinebʼ li junchʼol. Xbʼaan naq saʼ jun kutan kixye rehebʼ li xtzolom: «Meekʼoxla naq xinchalk ta saʼ ruuchichʼochʼ chi xkʼeebʼal li tuqtuukil usilal. Inkʼaʼ xinchalk chi xkʼeebʼal li tuqtuukilal, aʼan bʼan li chʼiichʼ. Xbʼaan naq xinchalk chi xjachbʼal li winq rikʼin li xyuwaʼ, li koʼbʼej rikʼin li xnaʼ ut li alibʼej rikʼin li alibʼom re» (Mat. 10:34, 35). Kʼaru naraj xyeebʼal aʼin?

Li Jesús maajunwa kiraj xjachbʼalebʼ li junkabʼal abʼanan li kixkʼut naru tixbʼaanu aʼin. Li ani nekeʼraj wank choʼq xtzolom li Jesús ut teʼkubʼeeq xhaʼ wank sut tchʼaʼajkoʼq xbʼaan naq ebʼ li xjunkabʼal inkʼaʼ teʼxkʼulubʼa li tixbʼaanu. Yaal, wi junaq tento tixkuy li xik ileʼk xbʼaan li xsumʼaatin malaj li xjunkabʼal aʼin tchʼaʼajkoʼq chiru xtaqenkil chi anchal xchʼool li Kriist.

Li Santil Hu naxye rehebʼ laj paabʼanel: «Chexwanq saʼ usilal rikʼinebʼ chixjunil» (Rom. 12:18). Abʼanan li naxkʼut li Jesús chanchanaq junaq «li chʼiichʼ» choʼq rehebʼ li junkabʼal. Aʼin nakʼulmank rikʼin junaq li qas qiitzʼin li naxkʼulubʼa li naxkʼut li Jesús abʼanan ebʼ li junchʼol inkʼaʼ nekeʼxkʼulubʼa. «Li wankebʼ saʼ li rochoch» aʼanebʼ li xikʼ nekeʼilok re xbʼaan naq yook xtzolbʼal li yaal (Mat. 10:36).

Ebʼ li xtzolom li Kriist li wankebʼ xkomon li jalanebʼ li xpaabʼal wank sut nekeʼxnumsi junaq li naʼlebʼ li naxbʼaanu naq tchʼaʼajkoʼq chiruhebʼ xraabʼal li Jehobʼa ut li Jesús. Maare ebʼ li xkomon teʼxmin ru naq tixbʼaanu junaq li ninqʼe li nachalk saʼ li bʼalaqʼil paabʼal. Saʼ li hoonal aʼan tento tixkʼoxla ani tixsahobʼresi xchʼool. Li Jesús kixye: «Li qʼaxal naxra li xnaʼ malaj li xyuwaʼ chiwu laaʼin, aʼan moko xkʼulubʼ ta wank choʼq intzolom» (Mat. 10:37). Relik chi yaal naq li Jesús moko kixye ta naq re xraabʼal aʼan xikʼ teʼril li xnaʼ xyuwaʼ. Li kʼaru kiraj xkʼutbʼal aʼan naq chʼolchʼooq chiqu li kʼaru wank xwankil saʼ li qayuʼam. Wi junaq li qakomon li maawaʼ aj Testiiw inkʼaʼ naraj naq tqaloqʼoni ru li Jehobʼa usta joʼkan naqara abʼan li qʼaxal wank xwankil chiqu aʼan xraabʼal li Jehobʼa xbʼeenwa.

Relik chi yaal qʼaxal ra naq ebʼ li qakomon inkʼaʼ nekeʼxkʼulubʼa naq nokookʼanjelak chiru li Jehobʼa. Abʼan chʼolchʼo chiqu li kixye li Jesús: «Ani inkʼaʼ naxchap li xkrus [“li xcheʼ”, TNM] ut tinxtaaqe, aʼan moko xkʼulubʼ ta wank choʼq intzolom» (Mat. 10:38). Laaʼo joʼ paabʼanel naqanaw naq wi naqaj xtaqenkil li Jesús tento tqakʼulubʼa naq xik tooʼeʼril ebʼ li qajunkabʼal. Abʼanan naqoybʼeni naq li qabʼaanuhom tixjal li xnaʼlebʼebʼ ut teʼraj xnawbʼal li naxye li Santil Hu (1 Ped. 3:1, 2).