Chiqajunilo moko naabʼal ta qahoonal re tzolok saʼ junesal. Joʼkan bʼiʼ, chanru taawoksi chiʼus laahoonal? Xbʼeenwa, oksi chiʼus li hoonal li nakaawoksi re tzolok. Taataw rusilal naq moko naabʼal ta taatzol, chiru naq saʼ aanil taabʼaanu.

Moqon sikʼ kʼaru taatzol xbʼeenwa (Efes. 5:15, 16). Arin wank wiibʼ oxibʼ li naʼlebʼ:

• Yaabʼasi li Santil Hu wulaj wulaj (Sal. 1:2). Re xtiqibʼankil naru taawil li xtasal li Santil Hu li t-ilmanq saʼ li chʼutam saʼ xyanqil xamaan.

• Kawresi aawibʼ chirix li t-ilmanq saʼ li chʼutam, joʼ saʼ xyanqil xamaan ut naq ttzolmanq li hu Laj Kʼaakʼalehom. Kawresi aawibʼ re naq tattzʼaqonq (Sal. 22:23).

• Wi wank chik bʼayaq laahoonal re tzolok, yal rilbʼal xkomon li naʼlebʼ re xkawresinkil laapaabʼal joʼebʼ li hu li najekʼimank, ebʼ li bʼideo ut li wank saʼ jw.org.

• Tzol li nawulak chaawu. Naru nakaasikʼ xkomon laanaʼlebʼ chirix junaq li chʼaʼajkilal li yookat xnumsinkil, jun li patzʼom li inkʼaʼ nakaataw ru malaj jun li naʼlebʼ li wank saʼ li Santil hu li twulaq chaawu xtawbʼal ru.