Saʼebʼ li raqal aʼin natawmank bʼeleebʼ li chaabʼil naʼlebʼ. Li raqal naxye: «Li naruuchin li Musiqʼej aʼan li rahok, sahil chʼoolej, tuqtuukilal, kuyuk, chaabʼilal, usilal, paabʼank, tuulanil, kuyuk ibʼ». Abʼan li santil musiqʼej moko kaʼaj tawiʼ ebʼ li chaabʼil naʼlebʼ aweʼ tooxtenqʼa chi xyuʼaminkil.

Qilaq li kixtzʼiibʼa li apóstol Pablo saʼebʼ li raqal li wankebʼ rubʼelaj: «Nawno chi us kʼaru nachalk rikʼin li tzʼejwalej: koʼbʼeetak yumbʼeetak, muxuk ibʼ, joʼmaajoʼil wank, xloqʼoninkil li yal kʼoxlanbʼil yos, tuulak, xikʼil uuchink, poʼok ru junajil, kaqalik, josqʼink, yoobʼank raaxiikʼ, wechʼij ibʼ, jachok ibʼ, sowenk, kalaak, num waʼak num ukʼak, ut wank chik xkomon joʼkebʼ aʼin» (Gál. 5:19-21). Joʼkan naq li apóstol Pablo kiruuk raj aatinak chirix jalan chik naʼlebʼ li «nachalk rikʼin li tzʼejwalej», joʼ li kixtzʼiibʼa saʼ Colosenses 3:5. Joʼkaʼin ajwiʼ nakʼulmank rikʼin li bʼeleebʼ chi chaabʼil naʼlebʼ li kixtzʼiibʼa saʼ Gálatas 5:22, 23. Saʼebʼ li raqal aʼin moko yook ta chi aatinak chirix chixjunil li chaabʼil naʼlebʼ li naru nokooxtenqʼa chi xyuʼaminkil li santil musiqʼej.

Nachʼolaak chiqu aʼin naq naqajuntaqʼeeta li naʼlebʼ li natawmank saʼ Gálatas rikʼin li naʼlebʼ li kixtzʼiibʼa laj Pablo re li chʼuut re Éfeso: «Li naruuchin li saqenk aʼan chixjunil li chaabʼilal, tiikilal ut li yaal» (Efes. 5:8, 9). Joʼ naqil, li chaabʼilal, li tiikilal ut li yaal, natawmank saʼ xyanq «li naruuchin li saqenk», abʼan natawmank ajwiʼ saʼ xyanq «li naruuchin li Musiqʼej». Joʼkan bʼiʼ, usta saʼ Gálatas 5:22, 23 laj Pablo inkʼaʼ kiʼaatinak chirix li tiikilal ut li yaal, abʼan kiruuk raj xbʼaanunkil.

Kamaʼin ajwiʼ kixbʼaanu laj Pablo re xwaklesinkil xchʼool laj Timoteo chi xyuʼaminkil waqibʼ li chaabʼil naʼlebʼ: «Li tiikilal ut li roxloqʼinkil li Yos; [...] li paabʼank, li rahok, li kuyuk ut li tuulanil» (1 Tim. 6:11). Oxibʼ ajwiʼ rehebʼ li naʼlebʼ aweʼ natawmank saʼ xyanq «li naruuchin li Musiqʼej», li paabʼank, li tuulanil ut li rahok. Abʼan aajel ru naq li santil musiqʼej tixtenqʼa laj Timoteo chi xyuʼaminkil li junchʼol chik chi chaabʼil naʼlebʼ li kixye laj Pablo: li tiikilal, li roxloqʼinkil li Yos ut li kuyuk (juntaqʼeeta rikʼin Colosenses 3:12; 2 Pedro 1:5-7).

Joʼkan utan, saʼ Gálatas 5:22, 23 moko natawmank ta chixjunil li chaabʼil naʼlebʼ li tento teʼxyuʼami laj paabʼanel. Li santil musiqʼej naru nokooxtenqʼa chi xyuʼaminkil li bʼeleebʼ chi chaabʼil naʼlebʼ «li naruuchin li Musiqʼej». Abʼan toj wank naabʼal chik li chaabʼil naʼlebʼ li naru naqayuʼami re naq tookʼiiq saʼ li qapaabʼal ut re naq tqatiqibʼ qibʼ rikʼin «li Akʼ Winq yoobʼtesinbʼil joʼ xjalam u li Yos, saʼ li tiikilal ut santilal li nachalk saʼ xkʼabʼaʼ li yaal» (Efes. 4:24).