Laj Pablo kixtzʼiibʼa: «Xbʼaan li Chaqʼrabʼ xinkamk chiru li Chaqʼrabʼ re naq yoʼyooqin choʼq re li Yos» (Gál. 2:19).

Naq laj Pablo kixtzʼiibʼa aʼin yook chaq xchʼolobʼankil jun li xnimal ru naʼlebʼ chiruhebʼ li chʼuut li wankebʼ Galacia, xweentil Roma. Wankebʼ aj paabʼanel xeʼok xpaabʼankil ebʼ li bʼalaqʼ aj kʼutunel, ebʼ aʼan nekeʼxkʼut naq teʼkoleʼq wi nekeʼxpaabʼ chixjunil li Xchaqʼrabʼ laj Moisés, joʼ xsetbʼal xtzʼuumal li xtzʼejwal li winq. Abʼan laj Pablo naxnaw naq li Yos moko naxpatzʼ ta chik naq ebʼ laj kʼanjel chiru teʼxbʼaanu li naʼlebʼ aweʼ. Chi chʼolchʼo ru kixkʼutbʼesi naq moko yaal ta ebʼ li kʼutum aʼan ut kixkawresi li xpaabʼalebʼ li rechpaabʼanel chirix li xkamik li Jesukriist (Gál. 2:4; 5:2).

Kutan saqenk naxkʼut li Santil Hu naq maakʼaʼ chik naxkʼoxla ut maakʼaʼ chik narekʼa junaq li kristiʼaan naq nakamk (Ecl. 9:5). Naq laj Pablo kixye: «Xinkamk chiru li Chaqʼrabʼ», yook xyeebʼal naq maakʼaʼ chik xwankil saʼ xbʼeen li Xchaqʼrabʼ laj Moisés. Abʼanan, xbʼaan li xpaabʼal chirix li xkamik li Jesús, kixye: «Yoʼyooqin choʼq re li Yos».

«Xbʼaan li Chaqʼrabʼ» kijalaak li xwanjik laj Pablo. Chanru? Aʼan tojaʼ kixchʼolobʼ chaq naq «maaʼani natiikobʼresiik xchʼool rikʼin xbʼaanunkil li naxye li xChaqʼrabʼ laj Moisés, kaʼaj bʼan wiʼ rikʼin xpaabʼankil li Jesukriist» (Gál. 2:16). Relik yaal, li Chaqʼrabʼ kikʼanjelak chaq, joʼkan naq laj Pablo kixye rehebʼ laj Galacia: «Xbʼaan li qʼetok aatin naq kikʼeemank, toj reetal taakʼulunq li alalbʼej, aʼ li taaʼeechaninq re li ak yeechiʼinbʼil chaq» (Gál. 3:19). Joʼkan bʼiʼ, xbʼaan naq laaʼo aj maak, li Chaqʼrabʼ kixkʼutbʼesi naq inkʼaʼ tooruuq xpaabʼankil chi tzʼaqal re ru ut naq naʼajmank jun li mayej li tzʼaqal re ru li tixtoj rix li qamaak chi junajwa. Chi joʼkan li Chaqʼrabʼ kixtenqʼahebʼ laj Israel chi xkʼebʼal reetal naq li Jesús aʼan «li alalbʼej». Wi junaq li kristiʼaan naxpaabʼ li Jesukriist, naru ttiikobʼresiiq xchʼool xbʼaan li Yos (Gál. 3:24). Li Yos kixye naq tiik xchʼool laj Pablo xbʼaan naq saʼ xkʼabʼaʼ li Chaqʼrabʼ kixkʼulubʼa li Jesús ut kixpaabʼ. Joʼkan naq kixye: «Xinkamk chiru li Chaqʼrabʼ re naq yoʼyooqin choʼq re li Yos». Yaal naq li Chaqʼrabʼ maakʼaʼ chik xwankil saʼ xbʼeen, abʼan wank rubʼel xwankil li Yos.

Laj Pablo kixye ajwiʼ aʼin saʼ li esilhu li kixtzʼiibʼa choʼq rehebʼ laj Roma: «Ex was wiitzʼin, laaʼex ajwiʼ xexkanaak chi kamenaq chiru xChaqʼrabʼ laj Moisés saʼ xkʼabʼaʼ xkamik li Kriist [...]. Aʼut anaqwan isinbʼilo chik rubʼel xwankil li Chaqʼrabʼ: xookamk chiru chixjunil li chapchooko wiʼ chaq» (Rom. 7:4, 6). Saʼebʼ li raqal aʼin ut saʼ Gálatas 2:19, laj Pablo moko yook ta chi aatinak chirix li kamk li naxtenebʼ li Chaqʼrabʼ xbʼaan junaq li maak. Yook bʼan xyeebʼal naq xʼisiik rubʼel xwankil li Chaqʼrabʼ. Joʼkan naq li Chaqʼrabʼ maakʼaʼ chik xwankil saʼ xbʼeen laj Pablo chi moko saʼ xbʼeenebʼ li junchʼol. Anaqwan moko wankebʼ ta chik rubʼel xwankil li Chaqʼrabʼ saʼ xkʼabʼaʼ li xpaabʼalebʼ chirix li xkamik li Kriist.