Li Santil Hu inkʼaʼ naxye kʼaʼut, abʼan naxchʼolobʼ chiqu kʼaʼut naq inkʼaʼ xeʼraj sutqʼiik Nazaret saʼ li hoonal aʼan.

Naq jun li ánjel kixye re li xMaría naq tkanaaq saʼ yuʼam, aʼan ut laj José wankebʼ chaq Nazaret, jun li tenamit li wank saʼ xteepal Galilea (Luc. 1:26-31; 2:4). Chirix chik aʼan naq xeʼelk chaq Egipto, xeʼkoho Nazaret. Saʼ xkʼabʼaʼ naq aran kikʼiik li Jesús, naru naqaye naq li Jesús aj Nazaret (Mat. 2:19-23). Naq nokooʼaatinak chirix Nazaret naqajultika: laj José, li xMaría ut li Jesús.

Jun li naʼlebʼ li wank xwankil aʼan naq li xMaría naxnaw chiʼus li teep re Judea. Chankiru naqanaw? Xbʼaan naq wankebʼ xkomon saʼ li naʼajej aʼan. Aran wank chaq li xʼElisabet, li rixaqil laj Zacarías laj tij, xnaʼ laj Juan laj Kubʼsihom Haʼ (Luc. 1:5, 9, 13, 36). Li xMaría xkoho rulaʼaninkil li xʼElisabet ut kikanaak oxibʼ po aran, moqon kisutqʼiik chaq Nazaret (Luc. 1:39, 40, 56).

Saʼ xnumik li kutan kiʼelk jun li chaqʼrabʼ re naq chixjunilebʼ teʼxtzʼiibʼa li xkʼabʼaʼ. Re xpaabʼankil li chaqʼrabʼ aʼin, laj José kiʼelk Nazaret ut xkoho Belén, «li xtenamit laj David» bʼarwiʼ kiyeemank naq tyoʼlaaq li Mesiiy (Luc. 2:3, 4; 1 Sam. 17:15; 20:6; Miq. 5:2). Aran kiyoʼlaak li Jesús, laj José inkʼaʼ tixmin ru li xMaría naq tbʼihaajiq rikʼin jun li kʼuulaʼal li tojeʼk kiyoʼlaak. Xeʼkanaak Belén, maare bʼeleebʼ kilómetro chixkʼatq Jerusalén. Aʼin us choʼq rehebʼ xbʼaan naq chi joʼkan teʼruuq chi xikʼ Jerusalén rikʼin li kʼuulaʼal re xyeechiʼinkil li mayej joʼ naxpatzʼ li Xchaqʼrabʼ laj Moisés (Lev. 12:2, 6-8; Luc. 2:22-24).

Joʼkan ajwiʼ, qajultikaq naq li xʼánjel li Jehobʼa kixye re li xMaría naq tkʼeheʼq re li ralal «li xkʼojaribʼaal laj David» ut naq twanq joʼ Awabʼej. Maare laj José ut li xMaría xeʼxkʼoxla naq wank xwankil naq li Jesús kiyoʼlaak saʼ li xtenamit laj David (Luc. 1:32, 33; 2:11, 17). Maare xeʼxkʼoxla naq mas us naq teʼkanaaq aran Belén chi roybʼeninkil kʼaru xkomon li naʼlebʼ tixkʼe li Yos.

Chanchan naq naabʼal kutan xeʼkanaak Belén. Usta inkʼaʼ naqanaw jarubʼ kutan rokikebʼ aran, abʼanan naq ebʼ laj ilol chahim xeʼrulaʼani li Jesús ak xnimank chik ut li junkabʼal xtaw chikan jun rochoch (Mat. 2:11). Joʼkan naq inkʼaʼ chik xeʼsutqʼiik Nazaret, xeʼkanaak bʼan Belén.

Laj Herodes «kixtaqla xkamsinkil chixjunilebʼ li kʼuulaʼal li toj maajiʼ ebʼ aj wiibʼ chihabʼ, ebʼ li wankatqebʼ Belén» (Mat. 2:16). Saʼ xkʼabʼaʼ naq jun li ánjel kixye re laj José naq wankebʼ saʼ xiwxiwal, aʼan ut li xMaría xeʼelelik Egipto rochbʼeen li Jesús ut xeʼkanaak aran toj reetal kikamk laj Herodes. Chirix chik aʼan, laj José kixkʼam xjunkabʼal Nazaret. Kʼaʼut naq inkʼaʼ xkohebʼ Belén? Xbʼaan naq laj Arquelao ralal laj Herodes yook chaq chi awabʼejink Judea ut qʼaxal yibʼru xnaʼlebʼ. Li ánjel kixye re laj José naq wank saʼ xiwxiwal li xyuʼam, saʼ xkʼabʼaʼ aʼin kixkʼam xjunkabʼal Nazaret. Aran maakʼaʼ tixkʼul li Jesús ut tkʼiiq joʼ jun xchaabʼil moos li Yos (Mat. 2:19-22; 13:55; Luc. 2:39, 52).

Chanchan naq laj José kikamk naq li Jesús toj maajiʼ naxqʼaxtesi xyuʼam li tixbʼaanu naq junjunq ebʼ li kristiʼaan teʼxik saʼ choxa. Joʼkan naq laj José twakliiq wiʼ chik chi yoʼyo arin saʼ Ruuchichʼochʼ ut naabʼalebʼ teʼruuq xnawbʼal ru ut xnawbʼal kʼaru kiʼekʼasink re chi kanaak Belén chirix chik naq ak kiyoʼlaak li Jesús.