Wankebʼ aj paabʼanel nekeʼroksi li Internet re aatinak malaj re xtaqlankil li esil rehebʼ li xkomon malaj rehebʼ li hermaan. Abʼan, ebʼ li hermaan li kawebʼ xpaabʼal nekeʼxkʼe saʼ ru li naʼlebʼ aweʼ: «Li wank xnaʼlebʼ naril li raaxiikʼ ut naxkol ribʼ chiru; aʼut li maakʼaʼ xnaʼlebʼ tiik nanumeʼk ut naxkʼul li rahilal» (Prov. 27:12).

Naqanaw naq li Jehobʼa naraj qakolbʼal chiru li raaxiikʼ. Joʼkan naq inkʼaʼ nokoowank saʼ komonil rikʼinebʼ li kristiʼaan li nekeʼxyoobʼ li jachok ibʼ, li isinbʼilebʼ saʼ li chʼuut malaj li nekeʼxkʼut li bʼalaqʼil naʼlebʼ (Rom. 16:17; 1 Cor. 5:11; 2 Juan 10, 11). Ut maare wiibʼ oxibʼ li hermaan li inkʼaʼ nekeʼxyuʼami li naxye li Santil Hu (2 Tim. 2:20, 21). Naq naqil ru junaq li kristiʼaan moko nachʼaʼajkoʼk ta chiqu xyeebʼal ma twanq choʼq qamiiw malaj inkʼaʼ, abʼan moko joʼkan ta nakʼulmank saʼ Internet.

Wi naqaj ok saʼ jun li chʼuut bʼarwiʼ naabʼalebʼ nekeʼtaqlank esil, qakʼoxlaq ani aj ikʼin toowanq saʼ komonil. Wankebʼ hermaan xeʼok chi tzʼaqonk saʼ li chʼuut aʼan ut xeʼxtaw li chʼaʼajkilal. Chanru tqabʼaanu weent wi kʼajoʼ xkʼihal ebʼ li kristiʼaan li wankebʼ saʼ jun li chʼuut re taqlank esil? Maajoqʼe tqanaw anihebʼ ut ma kawebʼ li xpaabʼal. Saʼ Salmo 26:4 naxye: «Inkʼaʼ xinhilank saʼ xyanqebʼ laj bʼalaqʼ, chi moko xinjunaji wibʼ rikʼinebʼ laj kaʼpakʼal u». Relik chi yaal, jwal us naq kaʼajwiʼ tqatzʼiibʼa malaj tqabʼoq ebʼ li kristiʼaan li naqanawebʼ ru.

Joʼkan ajwiʼ, usta moko kʼihebʼ ta li kristiʼaan wankebʼ saʼ li chʼuut aʼin, tento tqabʼaan weent jarubʼ hoor naqanumsi chi xtaqlankil li esil ut chirix kʼaru nokooʼaatinak. Miqakʼoxla naq tenebʼanbʼil saʼ qabʼeen xsumenkil chixjunil ebʼ li esil maakʼaʼ naxye chirix kʼaru li naʼlebʼ t-aatinamanq malaj jarubʼ hoor t-oksimanq re xbʼaanunkil. Laj Pablo kixye re laj Timoteo naq xbʼaanuhaq weent rikʼinebʼ li kristiʼaan li «nekeʼmolok [...] aatin» ut li «nekeʼxchʼik ribʼ yalaq bʼar» (1 Tim. 5:13). Joʼkaʼan ajwiʼ nakʼulmank anaqwan rikʼin li Internet.

Ebʼ li hermaan li kawebʼ xpaabʼal inkʼaʼ nekeʼaatinak chirix xjolom anihaq chi moko nekeʼxseeraqʼi li naʼlebʼ li inkʼaʼ naru xyeebʼal chi kutankil (Sal. 15:3; Prov. 20:19). Inkʼaʼ nekeʼrabʼi malaj nekeʼxnumsi li esil li nakʼemank roq ruqʼ chi moko li inkʼaʼ nanawmank ma yaal (Efes. 4:25). Naqakʼul li naʼlebʼ re xkawubʼresinkil li qapaabʼal ut li esil li paabʼajel saʼ li qanaʼaj saʼ Internet jw.org ut saʼebʼ li tustukil kʼanjel re JW Broadcasting^® li naʼelk rajlal po.

Wankebʼ aj Testiiw nekeʼroksi li kʼanjelobʼaal re taqlank esil naq nekeʼloqʼok, nekeʼkʼayink, nekeʼxkʼe resil junaq li kʼaʼaq re ru malaj re xyeechiʼinkil junaq li kʼanjel. Aʼin naʼoksimank re kʼanjelak ut yakok, joʼkan naq moko us ta naq tqajunaji rikʼin li loqʼonink li naqakʼe re li Jehobʼa. Ebʼ li hermaan li inkʼaʼ nekeʼraj xrahinkil ru «li bʼihomal» inkʼaʼ nekeʼroksi ebʼ li rechpaabʼanelil re xtawbʼal xtuminebʼ (Heb. 13:5).

Ut ma us raj naq tqoksi ebʼ li kʼanjelobʼaal aʼin re xchʼutubʼankil li tumin re xtenqʼankilebʼ li hermaan li wankebʼ saʼ rajbʼal ru malaj li nekeʼxkʼul junaq li rahilal? Saʼ xkʼabʼaʼ naq naqara ebʼ li qahermaan, rajlal naqaj xwaklesinkilebʼ xchʼool ut xtenqʼankilebʼ naq naʼajmank chiruhebʼ (Sant. 2:15, 16). Abʼan, ma inkʼaʼ tabʼiʼ tqachʼaʼajki chiru li qamolam malaj chiruhebʼ li cheekel winq xtenqʼankilebʼ li hermaan? Peʼyaal naq ebʼ aʼan teʼruuq raj xbʼaanunkil chiʼus? (1 Tim. 5:3, 4, 9, 10, 16). Ut, peʼyaal naq maajun li hermaan naraj naq tkʼoxlamanq naq xkʼemank saʼ ruqʼ rilbʼalebʼ li rechpaabʼanelil?

Naqaj naq chixjunil li tqabʼaanu tixkʼe xloqʼal li Yos (1 Cor. 10:31). Joʼkan bʼiʼ, naq tqakʼoxla roksinkil junaq li kʼanjelobʼaal re taqlank esil malaj jalan chik li kʼanjelobʼaal saʼ Internet, qakʼehaq reetal li raaxiikʼ li naru naxkʼam chaq ut chiwanq qanaʼlebʼ.