1, 2. Kʼaʼut naq li kixbʼaanu li apóstol Pablo tixtenqʼahebʼ li cheekel winq?

 LI APÓSTOL Pablo qʼaxal naxrahebʼ chaq li rechpaabʼanelil, joʼkan naq kixkʼe xchʼool chi xtenqʼankilebʼ (Hech. 20:31). Joʼkan peʼ naq kʼajoʼ naq keʼxra chaq. Naq ebʼ li cheekel winq re Éfeso xeʼxnaw naq inkʼaʼ chik teʼril ru, chixjunilebʼ «keʼok chi yaabʼak» (Hech. 20:37). Joʼkan ajwiʼ nekeʼxbʼaanu ebʼ li cheekel winq, nekeʼxra li rechpaabʼanelil ut nekeʼxkʼe xchʼool chi xtenqʼankilebʼ (Filip. 2:16, 17). Abʼan wank sut nekeʼxkʼul li chʼaʼajkilal. Kʼaru ttenqʼanq rehebʼ?

² Us naq ebʼ li cheekel winq teʼxkʼam re rikʼin laj Pablo xbʼaan naq jwal laatzʼebʼ ru (1 Cor. 11:1). Moko numtajenaq ta chaq xwankil; aj maak ajwiʼ ut wank sut kichʼaʼajkoʼk chiru xbʼaanunkil li us (Rom. 7:18-20). Usta numtajenaq li chʼaʼajkilal kixkʼul, moko kichʼinaak ta xchʼool ut junelik sa chaq saʼ xchʼool. Wi ebʼ li cheekel winq nekeʼxkʼam re rikʼin laj Pablo, teʼkʼanjelaq chiru li Jehobʼa chi sa saʼ xchʼoolebʼ usta wankebʼ xchʼaʼajkilal. Qilaq chanru teʼxbʼaanu.

3. Chirix kʼaru tooʼaatinaq saʼ li tzolom aʼin, ut kʼaru tqatzol?

³ Saʼ li tzolom aʼin tqatzʼil rix kaahibʼ li chʼaʼajkilal li rajlal nekeʼxkʼul ebʼ li cheekel winq: 1) teʼxkʼe xhoonal re puktesink ut teʼxbʼaanu jalan chik li kʼanjel, 2) teʼxkʼe xhoonal re waklesink chʼool, 3) inkʼaʼ teʼchʼinaaq xchʼool naq nekeʼpaltoʼk ut 4) teʼxkuy xpaltilebʼ li junchʼol. Tqatzol chanru kixnumsi li apóstol Pablo li junjunq chi chʼaʼajkilal aʼin ut chanru naq ebʼ li cheekel winq teʼxkʼam re rikʼin.

4. Kʼaʼut wank sut nachʼaʼajkoʼk chiruhebʼ li cheekel winq kʼamok bʼe saʼ li puktesink?

⁴ Kʼaʼut chʼaʼaj? Ebʼ li cheekel winq moko kaʼaj tawiʼ nekeʼkʼamok bʼe chi puktesink, nekeʼxbʼaanu ajwiʼ jalan chik kʼanjel. Qilaq wiibʼ oxibʼ rehebʼ aʼin. Wank sut nekeʼxjolomi li chʼutam saʼ xyanqil xamaan malaj nekeʼxbʼeresi li kʼanjel re Xtzolbʼal li Santil Hu saʼ li chʼuut. Wank ajwiʼ jalan chik xkʼanjelebʼ saʼ li chʼuut malaj xkʼebʼal ebʼ li seeraqʼ. Ut nekeʼxtzolebʼ ajwiʼ laj tenqʼanel saʼ li chʼuut ut nekeʼxwaklesi xchʼool ebʼ li hermaan (1 Ped. 5:2). Wankebʼ chik nekeʼtenqʼank chi xkabʼlankil ut xsaabʼesinkil li Chʼutlebʼaal Kabʼl ut jalan chik naʼajej re loqʼonink. Abʼan, li qʼaxal wank xwankil choʼq rehebʼ li cheekel winq, aʼan aatinak chirix li Raatin li Yos joʼ nekeʼxbʼaanu ebʼ laj puktesinel (Mat. 28:19, 20).

5. Kʼaru eetalil kixkanabʼ li apóstol Pablo chirix li puktesink?

⁵ Li kixbʼaanu laj Pablo. Saʼ Filipenses 1:10 naxye kʼaʼut laj Pablo kixkʼe xchʼool chi puktesink. Kixkʼe li naʼlebʼ aʼin: «Re naq texruuq xsikʼbʼal ru li qʼaxal chaabʼil» ut kixyuʼami ajwiʼ. Kikʼeheʼk jun xkʼanjel ut qʼaxal kixkʼe xwankil saʼ li xyuʼam. Kipuktesink «chiruhebʼ li tenamit joʼ ajwiʼ chire kabʼlal» (Hech. 20:20). Moko kaʼaj tawiʼ kiʼaatinak chirix li Raatin li Yos saʼ li hoonal li naxkʼe ribʼ chiru malaj junsut saʼ li xamaan. Junelik bʼan naxbʼaanu. Saʼ jun kutan, naq yook chi roybʼeninkil ebʼ li rechpaabʼanel aran Atenas, kiʼaatinak chirix li chaabʼil esilal chiruhebʼ li winq li wankebʼ xwankil ut us kiʼelk (Hech. 17:16, 17, 34). Usta wank chaq chi preexil saʼ rochoch, inkʼaʼ kixkanabʼ puktesink (Hech. 28:16-24; Filip. 1:13, 14).

6. Chanru kixtenqʼahebʼ laj Pablo li junchʼol chik chi hermaan?

⁶ Laj Pablo kiroksi chiʼus li xhoonal ut naxbʼoqebʼ li junchʼol re naq teʼrochbʼeni chi puktesink. Naq xkoho xbʼeen sut saʼ jalan chik tenamit re xkʼebʼal resil li Raatin li Yos, kixkʼam chirix laj Juan Marcos ut saʼ li xkabʼ sut kixkʼam laj Timoteo (Hech. 12:25; 16:1-4). Kixyal xqʼe re naq ebʼ li cheekel winq us teʼxbʼeresi li chʼuut, us teʼxbʼaanu li xkʼanjelebʼ ut teʼkʼutuq chiʼus (1 Cor. 4:17).

7. Chanru teʼxyuʼami ebʼ li cheekel winq li kixye laj Pablo saʼ Efesios 6:14, 15?

⁷ Li naqatzol. Ebʼ li cheekel winq naru teʼxkʼam re rikʼin li apóstol Pablo naq moko kaʼaj tawiʼ kipuktesink chirekabʼlal, kixbʼaanu saʼ yalaq kʼaru chi hoonal  (taayaabʼasi Efesios 6:14, 15). Naru nekeʼxbʼaanu naq nekeʼxik chi loqʼok malaj saʼ li xkʼanjelebʼ. Naru ajwiʼ teʼxbʼaanu rikʼinebʼ li rechkabʼal ut ebʼ laj kʼay naq yooqebʼ xkabʼlankil junaq li Chʼutlebʼaal Kabʼl. Joʼ kixbʼaanu li apóstol Pablo, naq yooqebʼ chi puktesink naru teʼxkawresi li junchʼol, joʼebʼ laj tenqʼanel saʼ li chʼuut.

8. Wank sut, kʼaru us tixbʼaanu junaq li cheekel winq?

⁸ Usta ebʼ li cheekel winq jwal laatzʼebʼ ru chi kʼanjelak saʼ li chʼuut, maajunwa raj teʼxkanabʼ puktesink. Re naq us teʼxbʼaanu li xkʼanjel, wank sut inkʼaʼ teʼxkʼulubʼa junaq. Ut, wi ak xeʼtijok chirix aʼin, maare teʼxkʼe reetal bʼar wank li kʼanjel li qʼaxal wank xwankil, joʼ li loqʼonink saʼ junkabʼal rajlal xamaan ut wanqebʼ xhoonal re puktesink malaj xkʼutbʼalebʼ chiruhebʼ li ralal xkʼajol xbʼaanunkil aʼin. Wank sut nachʼaʼajkoʼk chiruhebʼ inkʼaʼ xkʼulubʼankil junaq li kʼanjel, abʼan chʼolchʼooq chiruhebʼ naq li Jehobʼa naxtaw ru naq nekeʼraj xbʼaanunkil chiʼus li xkʼanjelebʼ.

9. Kʼaru naru tchʼaʼajkoʼq chiruhebʼ li cheekel winq xbʼaan naq jwal laatzʼebʼ ru?

⁹ Kʼaʼut chʼaʼaj? Xbʼaan naq wanko saʼ rosoʼjikebʼ li kutan. Joʼkan naq chiqajunilo naʼajmank naq tooʼeʼxtenqʼa ut teʼxkʼojobʼ qachʼool. Wank sut, wiibʼ oxibʼ qe naʼajmank naq teʼxkʼe qanaʼlebʼ re naq inkʼaʼ tqakanabʼ li yaal (1 Tes. 5:14). Usta yaal naq ebʼ li cheekel winq inkʼaʼ nekeʼruuk risinkil chixjunil li qachʼaʼajkilal, abʼan li Jehobʼa naraj naq teʼxyal xqʼe chi xtenqʼankilebʼ ut chi xkʼojobʼankilebʼ xchʼool li rechpaabʼanelil. Saʼ xkʼabʼaʼ naq laatzʼebʼ ru, bʼar teʼrisi xhoonal re xtenqʼankilebʼ?

10. Joʼ naxye saʼ 1 Tesalonicenses 2:7, chanru kirilebʼ laj Pablo li rechpaabʼanelil?

¹⁰ Li kixbʼaanu laj Pablo. Aʼan junelik naxsikʼ xhoonal re xtenqʼankilebʼ ut xwaklesinkilebʼ xchʼool li rechpaabʼanel. Us naq ebʼ li cheekel winq teʼxkʼam re rikʼin laj Pablo chi xraabʼalebʼ li rechpaabʼanelil (taayaabʼasi 1 Tesalonicenses 2:7). Laj Pablo kixye rehebʼ naq qʼaxal naxrahebʼ joʼ naxbʼaanu li Jehobʼa (2 Cor. 2:4; Efes. 2:4, 5). Narilebʼ joʼ ramiiw ut naxkʼe xhoonal chirixebʼ. Naxkʼutbʼesi naq kʼojkʼo chaq xchʼool rikʼinebʼ xbʼaan naq naxye rehebʼ chixjunil li narekʼa ut li nachʼaʼajkoʼk chaq chiru (2 Cor. 7:5; 1 Tim. 1:15). Abʼanan, moko xkʼe ta xchʼool chirix li chʼaʼajkilal li naxkʼul, kixtenqʼahebʼ bʼan li rechpaabʼanelil.

11. Kʼaʼut laj Pablo kixkʼe xnaʼlebʼebʼ li rechpaabʼanelil?

¹¹ Wank sut, laj Pablo kixkʼe xnaʼlebʼebʼ li rechpaabʼanel. Abʼan moko kirisi  ta xjosqʼil saʼ xbʼeenebʼ, kixrahebʼ bʼan ut kiraj xtenqʼankilebʼ re naq inkʼaʼ teʼxchʼik ribʼ saʼ chʼaʼajkilal. Naxyal chaq xqʼe re naq li naʼlebʼ li tixkʼe teʼxtaw ru ut naraj naq teʼxkʼulubʼa. Naq kixtzʼiibʼa li esilhu rehebʼ laj Corinto, kixqʼusebʼ. Moqon chik kixtaqla laj Tito re xnawbʼal ma keʼxkʼulubʼa li esil. Ut kʼajoʼ naq kisahoʼk saʼ xchʼool xnawbʼal naq xeʼxkʼulubʼa! (2 Cor. 7:6, 7).

12. Kʼaru teʼruuq xbʼaanunkil ebʼ li cheekel winq re xwaklesinkilebʼ xchʼool li hermaan?

¹² Li naqatzol. Ebʼ li cheekel winq naru teʼxkʼam re rikʼin laj Pablo wi nekeʼxkʼe xhoonal chirixebʼ li hermaan. Teʼruuq xbʼaanunkil wi nekeʼwulak naq toj maajiʼ natiklaak li chʼutam re naq teʼxwaklesi xchʼoolebʼ. Moko naabʼal hoonal ta naʼajmank re xwaklesinkilebʼ xchʼool ut xyeebʼal rehebʼ naq nekeʼraheʼk (Rom. 1:12; Efes. 5:16). Ebʼ li cheekel winq li nekeʼxkʼam re rikʼin laj Pablo nekeʼroksi li Santil Hu re xwaklesinkilebʼ xchʼool ut xyeebʼal rehebʼ naq nekeʼraheʼk xbʼaan li Jehobʼa. Nekeʼxkʼutbʼesi ajwiʼ naq nekeʼxrahebʼ naq nekeʼaatinak rikʼinebʼ ut nekeʼxwaklesi xchʼoolebʼ. Wi li cheekel winq tkʼehoq naʼlebʼ, tento naq troksi li Santil Hu. Chʼolchʼo ru tixye ut rikʼin rahok xbʼaan naq naraj naq teʼxyuʼami li naʼlebʼ li tixkʼe rehebʼ (Gál. 6:1).

13. Kʼaru naru trekʼa junaq li cheekel winq naq tpaltoʼq?

¹³ Kʼaʼut chʼaʼaj? Ebʼ li cheekel winq ebʼ aj maak, joʼkan naq nekeʼpaltoʼk (Rom. 3:23). Abʼan, tento naq teʼxyal xqʼe re naq inkʼaʼ teʼchʼinaaq xchʼool naq nekeʼpaltoʼk. Maare wankebʼ nekeʼrahoʼk xchʼool naq nekeʼril naq wank kʼaru inkʼaʼ nekeʼruuk xbʼaanunkil. Wankebʼ chik maare maakʼaʼ nekeʼraj re li xpaltilebʼ ut nekeʼxkʼoxla naq maakʼaʼ tento teʼxjal.

14. Joʼ naxye saʼ Filipenses 4:13, chanru kitenqʼaak laj Pablo naq kixkubʼsi ribʼ?

¹⁴ Li kixbʼaanu laj Pablo. Chʼolchʼo chiru naq xjunes moko truuq ta xkanabʼankil li nachʼaʼajkoʼk chiru. Chʼolchʼo bʼan chiru naq naʼajmank naq ttenqʼaaq xbʼaan li Yos. Kʼajoʼ naq kixrahobʼtesi chaq ebʼ li tzʼaqal aj paabʼanel. Abʼan kixkʼe reetal naq moko us ta li kixbʼaanu ut kixjal xnaʼlebʼ (1 Tim. 1:12-16). Li Jehobʼa kixtenqʼa re naq tixrahebʼ li rechpaabʼanel, tixtoqʼobʼa ruhebʼ ut tixkubʼsi ribʼ. Narahoʼk chaq saʼ xchʼool naq napaltoʼk, abʼan chʼolchʼo chiru naq kikuyeʼk xmaak xbʼaan li Jehobʼa, joʼkan naq inkʼaʼ  chik kixjultika li xpaltil (Rom. 7:21-25). Chʼolchʼo chiru naq aj maak, joʼkan naq kixyal xqʼe chi xjalbʼal xnaʼlebʼ ut kixkanabʼ naq li Jehobʼa ttenqʼanq re chi xbʼaanunkil li xkʼanjel (1 Cor. 9:27; taayaabʼasi Filipenses 4:13).

15. Chanru naru tril li cheekel winq li xpaltil?

¹⁵ Li naqatzol. Ebʼ li cheekel winq moko nekeʼxaqabʼaak ta saʼebʼ li xkʼanjel xbʼaan naq tzʼaqal re ru li xyuʼamebʼ, abʼan li Jehobʼa naraj naq teʼxkʼe reetal li xpaltilebʼ ut teʼxjal xnaʼlebʼ (Efes. 4:23, 24). Tento naq teʼroksi li Santil Hu re xnawbʼal kʼaru tento teʼxjal saʼ li xyuʼamebʼ. Chi joʼkan teʼtenqʼaaq xbʼaan li Jehobʼa re naq sahaqebʼ saʼ xchʼool ut teʼxbʼaanu li xkʼanjel chiʼus (Sant. 1:25).

16. Kʼaru tkʼulmanq wi ebʼ li cheekel winq kaʼajwiʼ nekeʼril li xpaltilebʼ li rechpaabʼanel?

¹⁶ Kʼaʼut chʼaʼaj? Maare ebʼ li cheekel winq teʼril li xpaltilebʼ li rechpaabʼanel naq teʼkʼanjelaq rikʼinebʼ. Wi kaʼajwiʼ nekeʼril li xpaltilebʼ, naru teʼchʼinaaq xchʼool, maare kaw teʼraqoq aatin saʼ xbʼeenebʼ malaj teʼxwechʼ rixebʼ. Laj Pablo kixye rehebʼ laj paabʼanel naq aʼan tzʼaqal li naraj laj Tza (2 Cor. 2:10, 11).

17. Chanru kiril laj Pablo ebʼ li rechpaabʼanelil?

¹⁷ Li kixbʼaanu laj Pablo. Aʼan junelik kiril li xchaabʼilal xnaʼlebʼ li rechpaabʼanelil. Aʼin moko naraj ta xyeebʼal naq inkʼaʼ naril li xpaltilebʼ, xbʼaan naq wank sut li keʼxbʼaanu kixchʼina xchʼool. Abʼan, chʼolchʼo chiru naq li xpaltilebʼ moko naraj ta xyeebʼal naq maaʼusebʼ xnaʼlebʼ. Kixrahebʼ ut kixkʼe xchʼool chi rilbʼal li xchaabʼilal xnaʼlebʼ. Ut wi naril naq wank ani nachʼaʼajkoʼk chiru xbʼaanunkil li us, naxkʼoxla naq chaabʼil xnaʼlebʼ ut yal kachʼin aj chik ttenqʼaaq.

18. Kʼaru naqatzol naq laj Pablo kixtenqʼa li xʼEvodia ut li xSíntique? (Filipenses 4:1-3).

¹⁸ Qilaq li kixbʼaanu laj Pablo re xtenqʼankilebʼ wiibʼ li hermaan re li chʼuut Filipos (taayaabʼasi Filipenses 4:1-3). Maare li xʼEvodia ut li xSíntique keʼwank xchʼaʼajkilal chiribʼilebʼ ribʼ. Abʼan laj Pablo moko kixwechʼ ta rixebʼ. Kiril bʼan naq chaabʼil xnaʼlebʼebʼ ut naq keʼxyal xqʼe chi kʼanjelak chiru li Jehobʼa. Chʼolchʼo chiru naq li Jehobʼa naxrahebʼ. Saʼ xkʼabʼaʼ naq kiril li xnaʼlebʼebʼ, kixye rehebʼ naq teʼxtuqubʼ ru li xchʼaʼajkilalebʼ. Naq laj Pablo kiril naq chaabʼil xnaʼlebʼebʼ li rechpaabʼanel, aʼin kixbʼaanu naq junelik sahaq saʼ xchʼool ut twanq ramiiwebʼ saʼ li chʼuut aʼan.

19. a) Kʼaru ttenqʼanq rehebʼ li cheekel winq chi rilbʼal naq chaabʼilebʼ xnaʼlebʼ li hermaan? b) Joʼ naqil saʼ li jalam u, kʼaru nakaatzol chirix li cheekel winq li naxsaabʼesi li Chʼutlebʼaal Kabʼl?

¹⁹ Li naqatzol. Ebʼ li cheekel winq tento teʼril naq chaabʼilebʼ xnaʼlebʼ ebʼ li hermaan.  Usta yaal naq ebʼ aj maak, abʼan naru teʼxkʼam re rikʼinebʼ (Filip. 2:3). Wank sut teʼxkʼe xnaʼlebʼ junaq li hermaan. Abʼan, wi nekeʼxkʼam re rikʼin laj Pablo, weent teʼxbʼaanu re naq li raatinebʼ ut li xbʼaanuhomebʼ li hermaan inkʼaʼ tixchʼina xchʼoolebʼ. Teʼxjultika naq ebʼ li hermaan nekeʼxra li Jehobʼa, nekeʼkʼanjelak chi anchalebʼ xchʼool ut naru teʼxchaabʼilobʼresi li xnaʼlebʼebʼ. Naq ebʼ li cheekel winq nekeʼril li xchaabʼilal xnaʼlebʼ li junchʼol, nawank li rahok saʼ li chʼuut.

20. Kʼaru naru teʼxbʼaanu li cheekel winq re naq teʼxkʼam re rikʼin laj Pablo?

²⁰ Naru tkʼanjelaq chiruhebʼ li cheekel winq xtzʼilbʼal rix li kixbʼaanu laj Pablo. Teʼruuq rilbʼal saʼ Xhuhil li qachʼutam Qayuʼam ut Qakʼanjel joʼ aj Paabʼanel ebʼ li naʼlebʼ aʼin: «Cherilaq eeribʼ joʼ ajwiʼ cherilaqebʼ chixjunil li karneer», re diciembre 2018 ut li kaaxukuut «Reetalil li Santil Hu li nokooxkʼe chi kʼoxlak», re octubre 2018 perel 8. Naq teʼxtzʼil rix aʼin, naru teʼxkʼoxla: «Chanru nikinxtenqʼa li kixbʼaanu laj Pablo re naq tinkʼanjelaq chi sa saʼ inchʼool?».

21. Kʼaru chʼolchʼooq chiruhebʼ li cheekel winq?

²¹ Ex cheekel winq, jultikaq eere naq li Jehobʼa inkʼaʼ naroybʼeni naq tzʼaqalaq re ru leeyuʼam; abʼan naraj naq junelik yooqex chi kʼanjelak chiru (1 Cor. 4:2). Oxloqʼ kiril li Jehobʼa chixjunil li kixbʼaanu laj Pablo saʼ li xkʼanjel. Chʼolchʼooq cheeru naq oxloqʼ ajwiʼ chiru li Jehobʼa li kʼanjel li nekeebʼaanu, joʼ naxye saʼ Hebreos 6:10, «moko hoon ta nasachk saʼ xchʼool leechaabʼil kʼanjel ut chanru xetenqʼahebʼ chaq laj santil paabʼanel, ut toj yookex chi xtenqʼankilebʼ anaqwan».