1. Kʼaru tooxtenqʼa re naq chaabʼilaq qanaʼlebʼ?

 MAAKʼAʼ naxye jarubʼ chihabʼ malaj kutan ak xkubʼeek qahaʼ, chiqajunilo naqaj wank joʼ naraj li Jehobʼa. Re xbʼaanunkil tento naq tookʼoxlaq joʼ naraj aʼan xbʼaan naq tixkʼutbʼesi chanru li qanaʼlebʼ. Wi junelik yooko xkʼoxlankil li naraj li qajunxaqalil, tqaye ut tqabʼaanu li yibʼru aj naʼlebʼ (Efes. 4:17-19). Wi saʼ li qakʼaʼuxl wank li chaabʼil naʼlebʼ, tooʼaatinaq ut toonaʼlebʼaq joʼ nawulak chiru li Jehobʼa (Gál. 5:16).

2. Kʼaru ebʼ li patzʼom tqasume saʼ li tzolom aʼin?

² Joʼ ak xqil saʼ li tzolom rubʼelaj, inkʼaʼ tooruuq risinkil chi junajwa saʼ li qakʼaʼuxl li yibʼru aj naʼlebʼ. Abʼan, laaʼo yal qe ma tqatzʼeqtaana. Naq toj maajiʼ nakubʼeek qahaʼ, tento naq tqakanabʼ li xikʼ naril li Jehobʼa. Aʼin li xbʼeenwa tqabʼaanu ut li qʼaxal wank xwankil re xjalbʼal qanaʼlebʼ. Abʼanan, re naq tqasahobʼresi xchʼool li Jehobʼa, tento naq tqapaabʼ li chaqʼrabʼ aʼin: «[Ch]etiqibʼ eeribʼ rikʼin li akʼ yuʼam» (Col. 3:10). Saʼ li tzolom aʼin, tqasume ebʼ li patzʼom: kʼaru «li akʼ yuʼam»?, chanru tqatiqibʼ qibʼ rikʼin ut inkʼaʼ tqakanabʼ roksinkil?

3. Kʼaru «li akʼ yuʼam», ut chanru tqayuʼami? (Gálatas 5:22, 23).

³ «Li akʼ yuʼam» aʼan kʼoxlak ut naʼlebʼak joʼ li Jehobʼa. Chanru naqatiqibʼ qibʼ rikʼin? Naq naqayuʼami li naruuchi li santil musiqʼej, rikʼin li naqakʼoxla, li naqekʼa ut li naqabʼaanu (taayaabʼasi Gálatas 5:22, 23). Li naxjal xnaʼlebʼ naxra li Jehobʼa ut ebʼ li rechpaabʼanel (Mat. 22:36-39). Sa saʼ xchʼool usta naxkʼul li rahilal (Sant. 1:2-4). Nawank saʼ tuqtuukilal (Mat. 5:9). Wank xkuyum ut chaabʼil (Col. 3:12, 13). Nawulak chiru xbʼaanunkil li usilal (Luc. 6:35). Naxkʼutbʼesi naq kaw xpaabʼal (Sant. 2:18). Inkʼaʼ napoʼk saʼ junpaat naq nekeʼxchiqʼ xjosqʼil (Tito 3:2). Ut naxyal xqʼe re naq inkʼaʼ ttʼaneʼq saʼ li yibʼru aj naʼlebʼ (1 Cor. 9:25, 27).

4. Kʼaʼut naq inkʼaʼ tqayuʼami chixjunqalebʼ li naʼlebʼ li natawmank saʼ Gálatas 5:22 ut 23?

⁴ Re xjalbʼal qanaʼlebʼ tento naq tqayuʼami li natawmank saʼ Gálatas 5:22 ut 23 ut saʼ jalan chik xraqal li Santil Hu. * Li chaabʼil naʼlebʼ aʼin, moko joʼ ta li jalan jalanq chi tʼikr li naqoksi rajlal kutan. Li chaabʼil naʼlebʼ nekeʼxchap ribʼ. Wi relik chi yaal naq naqara ebʼ li junchʼol, tqabʼaanu li usilal rehebʼ ut wanq qakuyum. Ut re naq chaabʼilaqo rikʼinebʼ, tento naq wanq qakuyum ut tuulanaqo.

5. Kʼaru naraj xyeebʼal kʼoxlak joʼ li Kriist ut kʼaʼut naq tento tqatzʼil rix li xyuʼam? (1 Corintios 2:16).

⁵ (Taayaabʼasi 1 Corintios 2:16). Re naq tchaabʼiloʼq li qanaʼlebʼ, tento naq tqakʼam qe rikʼin li «xkʼaʼuxl li Kriist». Li Jesús naxkʼutbʼesi li naruuchi li santil musiqʼej. Joʼ jun li lem, naxkʼutbʼesi chi tzʼaqal re ru li xnaʼlebʼ li Xyuwaʼ (Heb. 1:3). Naq nokookʼoxlak joʼ li Jesús, tchaabʼiloʼq li qanaʼlebʼ ut tqakʼam qe rikʼin (Filip. 2:5).

6. Kʼaru tento tqajultika naq yooqo xyalbʼal qaqʼe chi xjalbʼal qanaʼlebʼ?

⁶ Ma tooruuq xkʼambʼal qe rikʼin li Jesús? Maare taakʼoxla: «Li Jesús tzʼaqal re ru li xyuʼam. Maajunwa tinruuq xkʼambʼal we rikʼin!». Wi joʼkan, jultika li oxibʼ chi naʼlebʼ aʼin. Xbʼeen, xatyobʼtesiik re naq taakʼam aawe rikʼin li  Jehobʼa ut li Jesús. Joʼkan naq tatruuq xbʼaanunkil aʼin (Gén. 1:26). Xkabʼ, li xsantil musiqʼej li Jehobʼa jwal wank xwankil ut tatruuq xbʼaanunkil li maajunwa raj xaakʼoxla. Rox, li Jehobʼa inkʼaʼ naroybʼeni naq taayuʼami chi tzʼaqal re ru li naruuchi li santil musiqʼej. Aʼan qʼaxal narahok, joʼkan naq tixkʼe qe 1,000 chihabʼ re naq tzʼaqalaq re ru li qayuʼam (Apoc. 20:1-3). Li Jehobʼa naraj naq anaqwan tqayal qaqʼe chi xjalbʼal li qanaʼlebʼ ut kʼojkʼooq qachʼool naq aʼan tooxtenqʼa.

7. Kʼaru tqatzʼil rix anaqwan?

⁷ Chanru tooruuq xkʼambʼal qe rikʼin li Jesús? Tqatzʼil rix kaahibʼ li chaabʼil naʼlebʼ li naruuchi li santil musiqʼej. Tqil chanru kixkʼutbʼesi li Jesús aʼin ut kʼaru naqatzol. Tqatzʼil ajwiʼ rix ebʼ li patzʼom li tooxtenqʼa chi rilbʼal ma toj wank kʼaru tqajal saʼ li qayuʼam.

8. Chanru kixkʼutbʼesi li xrahom li Jesús?

⁸ Li Jesús qʼaxal naxra chaq li Jehobʼa, joʼkan naq kixyal xqʼe chi xsahobʼresinkil xchʼool ut xooxtenqʼa (Juan 14:31; 15:13). Kixkʼutbʼesi naq naxrahebʼ ut naxtoqʼobʼa ruhebʼ li qas qiitzʼin naq kiwank saʼ li Ruuchichʼochʼ usta xikʼ kiʼileʼk. Kixkʼutbʼesi naq naxrahebʼ naq kiʼaatinak chirix li Xʼawabʼejilal li Yos (Luc. 4:43, 44). Kixkʼutbʼesi ajwiʼ naq naxra li Yos ut ebʼ li qas qiitzʼin naq kirahobʼtesiik ut kikamk saʼ xkʼabʼaʼebʼ. Chi joʼkan kixbʼaanu naq tooruuq chi wank chi junelik.

9. Chanru tooruuq chi rahok joʼ kixbʼaanu li Jesús?

⁹ Xqaqʼaxtesi li qayuʼam chiru li Yos ut xkubʼeek qahaʼ xbʼaan naq naqara. Joʼkan naq tento tqakʼutbʼesi naq naqarahebʼ li qas qiitzʼin joʼ kixbʼaanu chaq li Jesús. Li apóstol Juan kixye: «Li inkʼaʼ naxra li ras riitzʼin li naril ru, moko naru ta tixra li Yos li inkʼaʼ naril ru» (1 Juan 4:20). Kʼoxla: «Ma qʼaxal ninrahebʼ li junchʼol? Ma tuulanin rikʼinebʼ li junchʼol usta xikʼ nikineʼril? Ma nawoksi linhoonal ut li kʼaru we re aatinak chirix li Jehobʼa? Ma ninbʼaanu usta li xkʼihalil xikʼ nikineʼril ut inkʼaʼ nekeʼxbʼanyoxi? Ma tinruuq xkʼebʼal xkomon chik linhoonal re aatinak chirix li Raatin li Yos?» (Efes. 5:15, 16).

10. Kʼaru naxbʼaanu chaq li Jesús re xsikʼbʼal li tuqtuukilal?

¹⁰ Li Jesús kixsikʼ li tuqtuukilal. Moko kixkʼe ta reqaj li xeʼxbʼaanu re, wank bʼan kʼaru chik kixbʼaanu. Kikʼamok bʼe chi wank saʼ tuqtuukilal ut kixkʼut chiruhebʼ li junchʼol naq joʼkan teʼxbʼaanu. Kixkʼut naq xbʼeenwa teʼxkʼam ribʼ saʼ usilal rikʼinebʼ li rechpaabʼanelil wi nekeʼraj naq li Jehobʼa tixkanabʼ naq teʼxloqʼoni ru (Mat. 5:9, 23, 24). Ut junelik kixkʼut chiruhebʼ li xʼapóstol naq inkʼaʼ teʼxpleeti ribʼ chirix ani jwal nim xwankil saʼ xyanqebʼ (Luc. 9:46-48; 22:24-27).

11. Chanru tooruuq xsikʼbʼal li tuqtuukilal?

¹¹ Wi naqasikʼ li tuqtuukilal, moko kaʼaj tawiʼ inkʼaʼ tqachʼik qibʼ saʼ chʼaʼajkilal. Laaʼo xbʼeenwa tqatuqubʼ ru li chʼaʼajkilal rikʼinebʼ li junchʼol ut tqabʼaanu ajwiʼ naq ebʼ li junchʼol teʼxsikʼ li tuqtuukilal (Filip. 4:2, 3; Sant. 3:17, 18). Qakʼoxlaq: «Kʼaru tinruuq xbʼaanunkil re xtuqubʼankil ru li chʼaʼajkilal usta moko laaʼin ta wank we? Ma ninxok saʼ inchʼool  li nekeʼxbʼaanu we? Ma nawoybʼeni naq toj teʼxpatzʼ xkuybʼal xmaak chiwu malaj ninpatzʼ xkuybʼal inmaak saʼ junpaat usta ninkʼoxla naq aʼan wank re? Wi naruhank, ma nintenqʼahebʼ re xsikʼbʼal li tuqtuukilal chiribʼilebʼ ribʼ?».

12. Chanru kixkʼutbʼesi li Jesús naq tuulan xchʼool?

¹² Li Jesús tuulan chaq xchʼool (Mat. 11:28-30). Narahok chaq ut natawok u, usta chʼaʼaj li yook chi kʼulmank. Naq jun li ixq aj Fenicia kixye re, naq tixkʼirtasi li xkoʼ, saʼ xtiklajik inkʼaʼ kixbʼaanu. Abʼan kixsume saʼ tuulanil ut kixkʼirtasi li xkoʼ naq kixkʼe reetal naq kaw li xpaabʼal (Mat. 15:22-28). Abʼanan, inkʼaʼ naxbʼaanu junaq li naʼlebʼ yal saʼ xkʼabʼaʼ li narekʼa. Wank sut, saʼ xkʼabʼaʼ li xtuulanil xchʼool kixkʼehebʼ xnaʼlebʼ li naxrahebʼ chaq. Naq laj Pedro kiraj xrambʼal chiru li Jesús xbʼaanunkil li naraj li Jehobʼa, kixqʼus chiruhebʼ li junchʼol (Mar. 8:32, 33). Moko kixbʼaanu ta aʼin re xkʼebʼal saʼ xutaan laj Pedro, kixbʼaanu bʼan re xkʼebʼal xnaʼlebʼ ut xkʼutbʼal chiruhebʼ li junchʼol naq tento teʼxtenqʼa ut naq inkʼaʼ teʼxram chiru xbʼaanunkil li rajom li Yos. Kichalk tana xxutaan, abʼan kikʼanjelak chiru.

13. Wank sut, kʼaru tqabʼaanu re naq tuulanaqo?

¹³ Wi relik chi yaal naq tuulano, tqakʼe xnaʼlebʼ li naqarahebʼ. Naq tqabʼaanu, qakʼamaq qe rikʼin li Jesús ut qoksihaq li Santil Hu re kʼehok naʼlebʼ. Tqarahebʼ ut tqoybʼeni naq teʼxkʼulubʼa li naʼlebʼ xbʼaan naq nokooʼeʼxra ut nekeʼxra li Jehobʼa. Qakʼoxlaq: «Ma ninkʼe xnaʼlebʼ junaq li wamiiw malaj linkomon naq nawil naq inkʼaʼ us yook? Ma ninbʼaanu saʼ tuulanil malaj saʼ josqʼil? Ut, ma ninqʼus xbʼaan naq yook injosqʼil rikʼin malaj xbʼaan naq ninra?».

14. Chanru kixkʼutbʼesi li Jesús li chaabʼilal?

¹⁴ Li Jesús moko kaʼaj tawiʼ naxnaw li us, naxbʼaanu ajwiʼ. Naxra li Jehobʼa, joʼkan naq junelik naraj xsahobʼresinkil xchʼool. Li chaabʼil xnaʼlebʼ junelik naxtenqʼa ebʼ li junchʼol. Moko kaʼaj tawiʼ naqanaw li us; tento naq tqabʼaanu joʼ naʼajmank. Maare junaq tixkʼoxla: «Ma naruhank xbʼaanunkil junaq li chaabʼil naʼlebʼ yal re xkʼutbʼesinkil?». Naruhank xbʼaan naq li Jesús kixye naq wankebʼ nekeʼxkʼe xlemoox ebʼ li nebʼaʼ yal re naq teʼileʼq. Abʼan aʼin moko nawulak ta chiru li Jehobʼa (Mat. 6:1-4).

15. Chanru tooruuq xkʼutbʼesinkil naq chaabʼilo?

¹⁵ Chaabʼilaqo wi naqabʼaanu li usilal re xtenqʼankil li junchʼol ut maawaʼ yal re naq tooʼeʼril. Naru tqakʼoxla: «Ma naru ninye naq moko kaʼaj tawiʼ ninnaw li us, ninbʼaanu bʼan ajwiʼ? Kʼaʼut naq ninbʼaanu li usilal?».

16. Kʼaru tento tqabʼaanu rajlal kutan, ut kʼaʼut?

¹⁶ Inkʼaʼ tqakʼoxla naq maakʼaʼ chik tqajal saʼ li qayuʼam naq nakubʼeek qahaʼ. Li akʼ yuʼam chanchan jun li tʼikr li naqara ru. Joʼkan naq, rajlal kutan tento naq tqakʼutbʼesi li chaabʼil naʼlebʼ li naruuchi li santil musiqʼej xbʼaan naq li Yos junelik nokooxtenqʼa (Gén. 1:2). Li junjunq chi naʼlebʼ li naruuchi li xsantil musiqʼej li Yos naru nokooxtenqʼa chi xjalbʼal qanaʼlebʼ. Laj Santiago kixtzʼiibʼa: «Li paabʼaal chi maakʼaʼ xbʼaanuhom kamenaq»  (Sant. 2:26). Ut joʼkan ajwiʼ naxbʼaanu ebʼ li junchʼol chik chi naʼlebʼ li naruuchi li santil musiqʼej. Naq naqayuʼami aʼin, naqakʼutbʼesi naq li santil musiqʼej yook qatenqʼankil.

17. Kʼaru tqabʼaanu wi wank sut inkʼaʼ naqayuʼami chiʼus li naruuchi li santil musiqʼej?

¹⁷ Usta wankebʼ ak naabʼal chihabʼ xeʼkubʼeek xhaʼ, wank sut inkʼaʼ nekeʼxyuʼami li naruuchi li santil musiqʼej, abʼan tento naq teʼxyal xqʼe chi xbʼaanunkil. Qakʼoxlaq aʼin, wi napejeʼk junaq li qatʼikr li naqara ru, peʼyaal naq moko saʼ junpaat ta tqatzʼeq? Tqabʼoj bʼan ut tqil chiʼus. Joʼkan bʼiʼ, wi inkʼaʼ naqakʼutbʼesi chiʼus li chaabʼilal, li kuyuk ut li rahok, michʼinaak qachʼool. Ut wi naqapatzʼ xkuybʼal qamaak chi anchal qachʼool, aʼin tooxtenqʼa re naq toowanq wiʼ chik saʼ tuqtuukilal rikʼinebʼ li junchʼol. Ut saʼ junaq chik kutan tqabʼaanu chiʼus.

18. Kʼaru chʼolchʼooq chiqu?

¹⁸ Qʼaxal naqabʼanyoxi naq li Jesús kixkʼut chiqu chanru xbʼaanunkil! Naq naqakʼam qe rikʼin, moko nachʼaʼajkoʼk ta chiqu naʼlebʼak joʼ aʼan. Ut chi joʼkan naqakʼutbʼesi naq xjalaak li qanaʼlebʼ. Saʼ li tzolom aʼin, kaʼajwiʼ xqatzʼil rix kaahibʼ li naʼlebʼ li naruuchi li santil musiqʼej. Abʼan, aajel ru naq tqakʼe qahoonal chi xtzʼilbʼal rix jalan chik li naʼlebʼ li naruuchi li santil musiqʼej re rilbʼal ma tooruuq xyuʼaminkil chiʼus. Tqataw jalan jalanq li naʼlebʼ saʼ Li hu li natenqʼank rehebʼ laj Testiiw re li Jehobʼa, saʼ li naʼlebʼ «Li xwanjik li tzʼaqal aj paabʼanel» ut li «Naruuchin li musiqʼej». Chʼolchʼooq chiqu naq li Jehobʼa tooxtenqʼa wi naqayal qaqʼe re naq inkʼaʼ tqakanabʼ «li akʼ yuʼam».