Maare ani tixkʼoxla li patzʼom aʼin naq tril saʼ junpaat li raqal aʼin. Abʼan wankebʼ chaq wiibʼ laj Mefibóset; ut wi tqatzʼil rix li kikʼulmank tooruuq xtawbʼal qanaʼlebʼ.

Laj Saúl kiwank wuqubʼ ralal ut wiibʼ xrabʼin. Laj Jonatán aʼan li xbʼeen ralal. Moqon, kiyoʼlaak laj Mefibóset rikʼin li xRizpá, li jun chik rixaqil. Ut laj Jonatán kiwank jun ralal, aj Mefibóset ajwiʼ xkʼabʼaʼ. Joʼkan naq li ralal laj Saúl joʼ ajwiʼ li ri, aj Mefibóset xkʼabʼaʼebʼ.

Abʼan, kʼaʼut naq laj David kixqʼaxtesi wiibʼ oxibʼ li winq re naq teʼkamsiiq? Laj Saúl xikʼ kiʼok rilbʼal ebʼ laj Gabaón li wankebʼ chaq saʼ xyanqebʼ laj Israel ut kiraj xkamsinkilebʼ. Maare kixkamsi junjunq rehebʼ aʼin. Moko us ta li kixbʼaanu, xbʼaan naq saʼ xkutankil laj Josué, li nekeʼjolomink rehebʼ laj Israel keʼxkʼe ribʼ saʼ aatin re naq teʼxkʼam ribʼ saʼ usilal rikʼinebʼ laj Gabaón (Jos. 9:3-27).

Aʼin toj wank chaq xwankil saʼ xkutankil laj Saúl. Abʼan, li awabʼej moko kiroxloqʼi ta aʼin, kixyal bʼan xkamsinkilebʼ laj Gabaón. Joʼkan naq, laj Saúl ut li wankebʼ saʼ li rochoch «keʼxkamsihebʼ laj Gabahón» (2 Sam. 21:1). Naq laj David kiʼok choʼq awabʼej, ebʼ laj Gabaón li xeʼkoleʼk keʼxseeraqʼi re li kikʼulmank. Laj David kixpatzʼ rehebʼ kʼaru tixbʼaanu re xtenqʼankilebʼ xbʼaan li kixbʼaanu laj Saúl re naq chi joʼkan li Jehobʼa trosobʼtesi li chʼochʼ. Moko xeʼxpatzʼ ta tumin, xeʼraj bʼan naq tqʼaxtesiiq saʼ ruqʼebʼ li wuqubʼ chi ralal laj Saúl re xkamsinkilebʼ (Núm. 35:30, 31). Ut joʼkan kixbʼaanu laj David (2 Sam. 21:2-6).

Saʼ li kutan aʼan, laj Saúl ut laj Jonatán ak xeʼkamk chik. Abʼan toj yoʼyo laj Mefibóset, li ralal laj Jonatán. Naq kachʼin chaq kixkʼul jun li rahilal ut sik roq kikanaak, joʼkan naq moko kitzʼaqonk ta rikʼin laj Saúl naq kiyalok saʼ xbʼeenebʼ laj Gabaón. Laj David kiwank saʼ amiiwil rikʼin laj Jonatán ut aʼin tixkʼam chaq usilal saʼ xbʼeenebʼ li ralal xkʼajol, joʼ laj Mefibóset (1 Sam. 18:1; 20:42). Li Santil Hu naxye aʼin chirix laj David: «Li rey David kiril xtoqʼobʼaal ru laj Mefi-bʼoset li ralal laj Jonatán li ralal laj Saúl xbʼaan li juramento li keʼxbʼaanu laj David ut laj Jonatán saʼ xkʼabʼaʼ li Dios» (2 Sam. 21:7, Wy).

Laj David kixkʼe rehebʼ laj Gabaón li keʼxpatzʼ. Kixqʼaxtesi saʼ ruqʼebʼ li wiibʼ chi ralal laj Saúl, jun rehebʼ aʼan laj Mefibóset, ut oobʼ li ri laj Saúl (2 Sam. 21:8, 9). Chi joʼkan, laj David kirisi li maajewank saʼ xbʼeen li chʼochʼ xbʼaan li kamsink li kiwank chaq.

Naqataw qanaʼlebʼ rikʼin li kikʼulmank. Wi li wiibʼ chi ralal ut li oobʼ chi ri laj Saúl maakʼaʼebʼ raj xmaak, li Jehobʼa moko kixkʼulubʼa ta raj naq teʼkamsiiq, xbʼaan naq li Xchaqʼrabʼ li Yos naxye naq ebʼ li alal kʼajolbʼej moko teʼkamq ta saʼ xkʼabʼaʼ li xeʼxbʼaanu li xnaʼ xyuwaʼ. Li chaqʼrabʼ naxye ajwiʼ: «Ak xmaak xmaak tixtoj rix li junjunq naq taakamsimanq» (Deut. 24:16). Joʼkan naq, wuqubʼ xkomonebʼ laj Saúl xeʼkamsiik xbʼaan naq xeʼraj xkamsinkil naabʼalebʼ laj Gabaón. Joʼkan bʼiʼ, li wuqubʼ aʼin xeʼxtoj rix li xmaak.

Kʼaru naqatzol chirix aʼin? Maaʼani naru tixye naq kixbʼaanu junaq li maaʼusilal xbʼaan naq yal kitaqlaak. Tento bʼan tixkʼulubʼa li kixbʼaanu. Li Santil Hu naxkʼe li chaabʼil naʼlebʼ aʼin: «Chatiikobʼresi ru laabʼe, re naq maakʼaʼ taakʼul saʼ laabʼeenik. Maajal laabʼe, chi moko saʼ laanim uqʼ chi moko saʼ laatzʼe uqʼ tatxik; ut junelik wanqat saʼ tiikilal» (Prov. 4:24-27; Efes. 5:15).