Li eetalil aʼin naxkʼut wiibʼ oxibʼ li propesiiy li nakʼulmank saʼ jun chi qʼehil. Chixjunil aʼin naxkʼut naq wanko «saʼ rosoʼjikebʼ li kutan» (Dan. 12:4).

• Xraqal li Santil Hu: Apoc. 11:7; 12:13, 17; 13:1-8, 12.

  Propesiiy: Junxil naʼok chi taqlank saʼ xbʼeenebʼ li poyanam «li josqʼ aj xul». Saʼ rosoʼjikebʼ li kutan, natiqʼeʼk li xwuq xjolom. Moqon, nakʼiraak ut «chixjunil li ruuchichʼochʼ» naxtaqe li josqʼ aj xul. Laj Tza naroksi re «xyalbʼal xmetzʼew rikʼinebʼ li ralal xkʼajol li Ixq, li joʼkʼihal chik keʼkanaak».

  Xtzʼaqlojik ru: Naq ak xnumeʼk li Bʼutʼihaʼ, nekeʼok chi awabʼejink ebʼ li nekeʼxqʼet ribʼ chiru li Yos. Li tenamit Gran Bretaña moko kaw ta chik ribʼ naq ak xnumeʼk li xbʼeen nimla yalok u. Abʼan nakawuuk wiʼ chik naq naxjunaji ribʼ rikʼin Estados Unidos. Ut saʼ rosoʼjikebʼ li kutan, laj Tza naroksi li xʼawabʼejilal li winq re xrahobʼtesinkil li xtenamit li Yos.

• Xraqal li Santil Hu: Dan. 11:25-45.

  Propesiiy: Li awabʼej re relebʼl iqʼ ut li awabʼej re rokebʼl iqʼ nekeʼpleetik chiribʼilebʼ ribʼ re taqlank saʼ xbʼeen li ruuchichʼochʼ.

  Xtzʼaqlojik ru: Li tenamit Alemania nayalok rikʼin Gran Bretaña ut Estados Unidos. Saʼ li chihabʼ 1945, li tenamit Unión Soviética ut li nekeʼxkʼam ribʼ saʼ aatin rikʼin, nekeʼwank joʼ li awabʼej re relebʼl iqʼ. Saʼ li chihabʼ 1991, najukʼeʼk xwankil li tenamit Unión Soviética, ut saʼ xnumikebʼ li chihabʼ, aʼ chik li tenamit Rusia ut li nekeʼxkʼam ribʼ saʼ aatin rikʼin nekeʼkanaak joʼ li awabʼej re relebʼl iqʼ.

• Xraqal li Santil Hu: Is. 61:1; Mal. 3:1; Luc. 4:18.

  Propesiiy: Li Jehobʼa naxtaqla li xtaql re xkawresinkil li xbʼe naq toj maajiʼ naxaqabʼaak li Jesús choʼq Awabʼej. Li chʼuut li nawank joʼ li xtaql li Yos nekeʼok chi xpuktesinkil «li Chaabʼil Esilal rehebʼ li nebʼaʼ».

  Xtzʼaqlojik ru: Chalen li chihabʼ 1870, laj Charles Russell ut ebʼ li ramiiw nekeʼok xtzʼilbʼal rix kʼaru tzʼaqal naxkʼut li Santil Hu. Chiruhebʼ li chihabʼ 1880, nekeʼxkʼe reetal naq aajel ru xpuktesinkil li chaabʼil esilal. Nekeʼrisi chi huhil «Naʼajmank 1,000 aj puktesinel» ut «Yulbʼilebʼ ru re puktesink».

• Xraqal li Santil Hu: Mat. 13:24-30, 36-43.

  Propesiiy: Jun li winq naraw li triiw saʼ li xchʼochʼ. Moqon, nachalk li xikʼ naʼilok re ut naraw li yibʼ aj pim. Nachamoʼk li yibʼ aj pim ut naxmuq li triiw. Saʼ xqʼehil li qʼolok, najachmank li yibʼ aj pim rikʼin li triiw.

  Xtzʼaqlojik ru: Chalen li chihabʼ 1870, naʼok chi ilmank anihebʼ li tzʼaqal aj paabʼanel ut anihebʼ laj bʼalaqʼ. Saʼ rosoʼjikebʼ li kutan, nekeʼchʼutubʼaak li tzʼaqal aj paabʼanel ut nekeʼisiik saʼ xyanq ebʼ laj bʼalaqʼ.

• Xraqal li Santil Hu: Dan. 2:31-33, 41-43.

  Propesiiy: Li oqej yiijach chʼiichʼ ut yiijach sebʼ aʼan ajwiʼ xchaʼal li jalam u li yiibʼanbʼil rikʼin jalan jalanq chi chʼiichʼ.

  Xtzʼaqlojik ru: Li sebʼ aʼan reetalil ebʼ li poyanam li wankebʼ rubʼel xwankil li tenamit Gran Bretaña ut Estados Unidos li nekeʼxwechʼ rix ut nekeʼxqʼet ribʼ chiru. Saʼ xkʼabʼaʼ aʼin, ebʼ li awabʼej moko nekeʼruuk ta chi taqlank joʼ xkawil li chʼiichʼ.

• Xraqal li Santil Hu: Mat. 13:30; 24:14, 45; 28:19, 20.

  Propesiiy: Naxokmank «li triiw [...] saʼ li kʼuulebʼaal», ut nakʼeheʼk xwankil «li moosej tiik xchʼool ut wank xnaʼlebʼ [...] saʼ xbʼeenebʼ li rech moosil». Naʼok chi puktesimank «li chaabʼil esilal [...] chirix li xnimajwal wankilal li choxa saʼ chixjunil li ruuchichʼochʼ».

  Xtzʼaqlojik ru: Saʼ li chihabʼ 1919, nakʼeheʼk xwankil «li moosej tiik xchʼool ut wank xnaʼlebʼ» saʼ xbʼeen li xtenamit li Yos. Chalen li chihabʼ aʼan, li yookebʼ chi tzolok chirix li Santil Hu, kaw nekeʼok chi puktesink. Saʼebʼ li qakutan, naxqʼax wiibʼ siʼeent chi tenamit ut naʼajej nekeʼpuktesink wiʼ ebʼ laj Testiiw re li Jehobʼa, ut numenaq jun mil chi aatinobʼaal najalmank wiʼ li naʼlebʼ chirix li Santil Hu.

• Xraqal li Santil Hu: Dan. 12:11; Apoc. 13:11, 14, 15.

  Propesiiy: Jun li josqʼ aj xul wiibʼ xxukubʼ naxbʼaanu «naq teʼxyiibʼ jun xjalam u li josqʼ aj xul» ut naxkʼe «xyuʼam».

  Xtzʼaqlojik ru: Li nimla awabʼejilal re Gran Bretaña ut Estados Unidos nekeʼxbʼaanu naq txaqabʼamanq li molam Sociedad de Naciones. Jalan chik tenamit nekeʼokenk chirix. Saʼ xnumikebʼ li chihabʼ, li awabʼej re relebʼl iqʼ naʼokenk ajwiʼ chirix li molam Sociedad de Naciones, abʼan kaʼajwiʼ chiruhebʼ li chihabʼ 1926 toj 1933. Nakʼemank re li molam Sociedad de Naciones li loqʼal li kaʼajwiʼ tento raj xkʼebʼal re li Xʼawabʼejilal li Yos, moqon, joʼkan ajwiʼ nakʼulmank rikʼin li molam Naciones Unidas (ONU).

• Xraqal li Santil Hu: Dan. 8:23, 24.

  Propesiiy: Jun li awabʼej qʼaxal xiwxiw ru ut «qʼaxal kawaq ribʼ chi sachok».

  Xtzʼaqlojik ru: Li nimla awabʼejilal re Gran Bretaña ut Estados Unidos makachʼin li rahilal naxkʼam chaq joʼ maajunwa ilbʼil saʼ xbʼeen li Ruuchichʼochʼ. Jun eetalil, saʼ li xkabʼ nimla yalok u, li tenamit Estados Unidos naxkut wiibʼ li xnaqʼ puubʼ li nasachok chi junwaakaj saʼ xbʼeenebʼ li xikʼ nekeʼilok re.

• Xraqal li Santil Hu: Dan. 11:31; Apoc. 17:3, 7-11.

  Propesiiy: «Li josqʼ aj xul kaq rix» lajeebʼ xxukubʼ li naʼelk chaq saʼ li siwan aʼan li xwaqxaq awabʼej. Li xhu laj Daniel naxjuntaqʼeeta li awabʼej aʼin rikʼin «li xnimal tzʼiʼbʼeetal [“li nasachok u”, TNM]».

  Xtzʼaqlojik ru: Saʼ li xkabʼ nimla yalok u, najukʼmank li molam Sociedad de Naciones. Naq ak xraqeʼk li yalok u, naxaqabʼamank li molam ONU. Ut joʼ nakʼulmank rikʼin li molam Sociedad de Naciones, joʼkan ajwiʼ nakʼulmank rikʼin li molam ONU, xbʼaan naq nakʼeheʼk re li loqʼal li kaʼajwiʼ tento xkʼebʼal re li Xʼawabʼejilal li Yos. Ebʼ li tenamit li nekeʼokenk chirix li molam ONU teʼxsach li xmolamil li bʼalaqʼil paabʼal.

• Xraqal li Santil Hu: 1 Tes. 5:3; Apoc. 17:16.

  Propesiiy: Ebʼ li tenamit nekeʼxye: «Wanko saʼ tuqtuukilal ut maakʼaʼ chik qakʼaʼuxl». Chirix chik aʼan, «li josqʼ aj xul ut ebʼ li lajeebʼ chi xukubʼ» nekeʼxrahobʼtesi «laj yumbʼeet» ut nekeʼxsach ru. Moqon chik, ebʼ li tenamit nekeʼsacheʼk ajwiʼ ru.

  Xtzʼaqlojik ru: Ebʼ li tenamit nekeʼxye naq xeʼxtaw li tuqtuukilal ut maakʼaʼ chik nakʼehok re xkʼaʼuxebʼ. Moqon chik, ebʼ li tenamit li nekeʼokenk chirix li molam ONU nekeʼxsach ru li xmolamil li bʼalaqʼil paabʼal. Kamaʼin naq natiklaak li nimla rahilal. Li nimla rahilal naraqeʼk saʼ li Armagedón naq nasachmank ruhebʼ li nekeʼokenk chirix laj Tza.

• Xraqal li Santil Hu: Ezeq. 38:11, 14-17; Mat. 24:31.

  Propesiiy: Laj Gog naʼok saʼ li xtenamit li Yos. Chirix aʼan, ebʼ li ánjel nekeʼxchʼutubʼ «li sikʼbʼilebʼ ru».

  Xtzʼaqlojik ru: Li awabʼej re relebʼl iqʼ ut chixjunil li xʼawabʼejilal li ruuchichʼochʼ nekeʼok chi xrahobʼtesinkil li xtenamit li Yos. Naq ak xeʼxtikibʼ chik xrahobʼtesinkil li xtenamit li Yos, nekeʼkʼameʼk saʼ choxa chixjunilebʼ li yulbʼilebʼ ru li toj wankebʼ saʼ Ruuchichʼochʼ.

• Xraqal li Santil Hu: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Propesiiy: Li naxik saʼ xbʼeen «li saqi kawaay» naqʼaxok u naq naxsach ru laj Gog ut ebʼ laj puubʼ. Nakuteʼk «li josqʼ aj xul [...] saʼ xxamlel li palaw» ut kokʼputzʼ nakanaak li nimla jalam u.

  Xtzʼaqlojik ru: Li Jesús joʼ Awabʼej saʼ li Xʼawabʼejilal li Yos nachalk chi xkolbʼal li xtenamit li Jehobʼa. Ebʼ li 144,000 ut ebʼ li ánjel nekeʼxtenqʼa li Jesús chi xsachbʼal ru ebʼ li tenamit li nekeʼrahobʼtesink re ebʼ li xmoos li Jehobʼa, aʼan aʼin li rosoʼjik li ruuchichʼochʼ li naxjolomi laj Tza.