1. Naq nokooʼaatinak chirix jun li kristiʼaan li naʼuxtaanank u, kʼaru nachalk saʼ qachʼool?

NAQ nokooʼaatinak chirix li naʼuxtaanank u, nachalk saʼ qachʼool naq tuulan, qʼun xchʼool ut nawulak chiru kʼehok. Maare nachalk saʼ qachʼool li jaljokil ru aatin li kiʼaatinak wiʼ li Jesús chirix jun li winq aj Samaria li kiruxtaana ru jun aj judiiy li kitʼaneʼk saʼ ruqʼebʼ laj elqʼ. Li winq aj Samaria «kixtoqʼobʼa ru» laj judiiy, ut li rahok kiʼekʼasink re chi xtenqʼankil (Luc. 10:29-37). Li jaljokil ru aatin aʼin naxkʼutbʼesi jun li xchaqʼalil ru xnaʼlebʼ li Qayos Jehobʼa li chalenaq saʼ li rahok li naxkʼutbʼesi rajlal kutan ut yalaq chan re ru: aʼ li uxtaanank u.

2. Chanru nakʼutbʼesimank ajwiʼ li uxtaanank u?

² Li uxtaanank u nakʼutbʼesimank ajwiʼ naq inkʼaʼ nakʼemank chi xtojbʼal xmaak jun li kristiʼaan usta xkʼulubʼ. Joʼkan ajwiʼ naxbʼaanu li Jehobʼa qikʼin, li kitzʼiibʼank re jun li Salmo kixye: «Inkʼaʼ naxbʼaanu qe joʼ qakʼulubʼ xbʼaan li qamaak» (Sal. 103:10). Abʼan, wank sut li Jehobʼa kaw naxqʼus li xmaakobʼk.

3. Kʼaru ebʼ li patzʼom tqatzʼil rix saʼ li tzolom aʼin?

³ Saʼ li tzolom aʼin tqil kʼaru naxye li Santil Hu chirix li oxibʼ chi patzʼom aweʼ: kʼaʼut naʼuxtaanank u li Jehobʼa?, chanru naxkʼam ribʼ li kawil qʼusuk rikʼin li uxtaanank u? ut, kʼaru tooxtenqʼa chi xkʼutbʼesinkil li naʼlebʼ aʼin?

4. Kʼaʼut naʼuxtaanank u li Jehobʼa?

⁴Xbʼaan li rahok. Li apóstol Pablo kixye naq li Yos «qʼaxal nim li ruxtaan». Saʼebʼ li raqal aʼin li apóstol Pablo yook chaq xyeebʼal  naq li Yos tixbʼaanu naq teʼruuq chi wank saʼ choxa li kixsikʼebʼ ru usta moko tzʼaqal ta re ru li xyuʼamebʼ (Efes. 2:4-7). Abʼan li Yos moko kaʼaj tawiʼ naruxtaana ru li yulbʼilebʼ ru. Laj David kixye saʼ jun li Salmo: «Jwal chaabʼil li Qaawaʼ rikʼin chixjunilebʼ; nim li ruxtaan saʼ xbʼeenebʼ chixjunil li xyoobʼtesihom» (Sal. 145:9). Li Jehobʼa naxrahebʼ li kristiʼaan, joʼkan naq naruxtaana ruhebʼ naq wank xyaalalil re xbʼaanunkil.

5. Chanru kixtzol li Jesús naq li Jehobʼa naʼuxtaanank u?

⁵ Li Jesús naxnaw chiʼus naq li Jehobʼa nawulak chiru uxtaanank u. Naq toj maajiʼ nachalk saʼ li Ruuchichʼochʼ, kiwank rikʼin li Xyuwaʼ chiru naabʼal chihabʼ (Prov. 8:30, 31). Naabʼal sut kiril chanru naruxtaana ruhebʼ li kristiʼaan usta aj maakebʼ (Sal. 78:37-42). Naq kixtzolebʼ li junchʼol, li Jesús junelik kixkʼutbʼesi li chaabʼil naʼlebʼ aʼin li chalenaq rikʼin li Jehobʼa.

6. Kʼaru li eetalil kiroksi li Jesús re xkʼutbʼesinkil naq li Xyuwaʼ naʼuxtaanank u?

⁶ Joʼ xqil saʼ li tzolom rubʼelaj, li Jesús kiʼaatinak chirix li alalbʼej li kixsach chixjunil li xjunkabʼlal re xkʼutbʼesinkil naq li Jehobʼa nawulak chiru li uxtaanank u. Li alalbʼej aʼin kixkanabʼ li rochoch ut «kixsach chixjunil, yo xqʼaxbʼal li kutan chi joʼmaajoʼ» (Luc. 15:13). Saʼ xnumikebʼ li kutan, kixyotʼ xchʼool kixjal xkʼaʼuxl xbʼaan li tzʼaj aj naʼlebʼ li yook chaq xbʼaanunkil, kixkubʼsi ribʼ ut kisutqʼiik saʼ rochoch. Kʼaru kixbʼaanu li xyuwaʼ? Moko naabʼal hoonal ta kiroybʼeni li saaj al aʼin re xnawbʼal. Li Jesús kixye: «Toj najt ajwiʼ wan chaq, naq li xyuwaʼ kiril ut kireekʼa xnimal xrahom: koho saʼ aanil, koxqʼalu chi xkux ut kixtzʼubʼ ru». Li yuwaʼbʼej moko kixtzʼeqtaana ta li ralal, kiruxtaana bʼan ru ut kixkuy xmaak ut kixkʼul wiʼ chik saʼ li xjunkabʼal. Li alalbʼej naabʼal li maaʼusilal kixbʼaanu, abʼan kikuyeʼk xmaak xbʼaan li xyuwaʼ xbʼaan naq xyotʼ xchʼool xjal xkʼaʼuxl. Li yuwaʼbʼej li kiʼuxtaanank u aʼan reetalil li Jehobʼa. Rikʼin li eetalil aʼin, li Jesús kixkʼut naq li Xyuwaʼ naraj xkuybʼalebʼ xmaak li nekeʼxyotʼ xchʼool nekeʼxjal xkʼaʼuxl (Luc. 15:17-24).

7. Chanru naxkʼam ribʼ li xchoxahil naʼlebʼ li Jehobʼa rikʼin li uxtaanank u?

⁷Xbʼaan li xchoxahil naʼlebʼ. Li xchoxahil naʼlebʼ li Jehobʼa moko yal naʼekʼamank ta chi moko yal nakʼoxlamank. Li Santil Hu naxye naq «li choxahil naʼlebʼ kʼajoʼ aj uxtaan ut xiikilebʼ li xchaabʼil bʼaanuhom!» (Sant. 3:17). Joʼ jun li yuwaʼbʼej li jwal narahok, li Jehobʼa naxnaw naq li ruxtaan naxtenqʼahebʼ li ralal xkʼajol (Sal. 103:13; Is. 49:15).  Aʼin naxbʼaanu naq wank kʼaru teʼroybʼeni usta aj maakebʼ. Ut xbʼaan li xnimal ru xchoxahil naʼlebʼ, naxkʼutbʼesi li uxtaanank u naq wank xyaalal re xbʼaanunkil. Abʼan naxnaw joqʼe xkʼutbʼesinkil li naʼlebʼ aʼin. Ut xbʼaan aʼin, naq naʼajmank xkʼutbʼesinkil li uxtaanank u, naxbʼaanu; ut naq naʼajmank raqok aatin, naxbʼaanu ajwiʼ.

8. Kʼaru aajel ru xbʼaanunkil joqʼehaq, ut kʼaʼut?

⁸ Qayehaq naq jun xmoos li Yos naʼok chi maakobʼk usta naxnaw naq moko us ta xbʼaanunkil. Joʼkan naq, kʼaru raj tento tbʼaanumanq? Li apóstol Pablo kixtzʼiibʼa: «Meejunaji eeribʼ rikʼinebʼ [...] aʼan» (1 Cor. 5:11). Ebʼ li inkʼaʼ nekeʼxyotʼ xchʼool nekeʼxjal xkʼaʼuxl nekeʼisiik saʼ li chʼuut. Aajel ru xbʼaanunkil aʼin re xkolbʼalebʼ li hermaan ut xkʼutbʼesinkil li xsantilal li Jehobʼa. Abʼan wankebʼ nekeʼxkʼoxla naq, wi naʼisiik saʼ li chʼuut li kimaakobʼk, moko nekeʼxkʼutbʼesi ta li ruxtaan li Yos. Qilaq ma yaal aʼin.

9, 10. a) Joʼ naxye Hebreos 12:5, 6, kʼaʼut naqaye naq nakʼutbʼesimank li uxtaanank u naq naʼisiik saʼ li chʼuut li kimaakobʼk? b) Kʼaru li eetalil nokooxtenqʼa chi xtawbʼal ru?

⁹ Jwal narahoʼk saʼ qachʼool rabʼinkil naq nayeemank saʼ li chʼutam naq «maawaʼ chik aj testiiw re li Jehobʼa» junaq li qakomon malaj qamiiw. Maare naqakʼoxla ma aajel tawiʼ ru naq xʼisiik saʼ li chʼuut. Ma yaal tawiʼ naq nakʼutbʼesimank li uxtaanank u naq naʼisiik saʼ li chʼuut li kimaakobʼk? Kamaʼan tzʼaqal. Wi t-ajmanq naq tqʼuseʼq, aajel ru xbʼaanunkil, xbʼaan naq joʼkan tkʼutbʼesimanq naq naʼuxtaanaak ru ut naq naraheʼk (Prov. 13:24). Ma naru tixyotʼ xchʼool tixjal xkʼaʼuxl li naʼisiik saʼ li chʼuut? Joʼkan tzʼaqal. Naabʼalebʼ li xeʼmaakobʼk xeʼxkʼe reetal naq li kʼaru xeʼxkʼubʼ xbʼaanunkil ebʼ li cheekel winq, aʼan tzʼaqal naʼajmank chaq chiruhebʼ re naq teʼxjal li xnaʼlebʼebʼ ut li xbʼaanuhomebʼ, ut teʼsutqʼiiq rikʼin li Jehobʼa (taayaabʼasi Hebreos 12:5, 6).

¹⁰ Qakʼoxlaq li eetalil aʼin. Laj kʼaakʼalenel naxkʼe reetal naq jun rehebʼ li xkarneer yaj. Naxnaw naq tento trisi saʼ xyanqebʼ li junchʼol re naq tkʼiraaq. Abʼan ebʼ li karneer nekeʼwulak chiru wank saʼ komonil ut moko sa ta nekeʼrekʼa ribʼ naq nekeʼisiik saʼ xyanqebʼ li junchʼol. Joʼkan naq, wi laj kʼaakʼalenel narisi xjunes jun rehebʼ li xkarneer, ma naraj xyeebʼal aʼin naq yook xrahobʼtesinkil? Yaal naq inkʼaʼ. Chʼolchʼo chiru naq tixletz xyajel ebʼ li junchʼol wi inkʼaʼ narisi saʼ xyanqebʼ. Joʼkan naq, narisi re xkolbʼalebʼ li junchʼol chi karneer (juntaqʼeeta rikʼin Levítico 13:3, 4).

11. a) Kʼaʼut naru tqaye naq li naʼisiik saʼ li chʼuut chanchan jun li karneer li yaj? b) Kʼaru li tenqʼ wank chiruhebʼ li nekeʼisiik saʼ li chʼuut?

¹¹ Naru tqaye naq li naʼisiik saʼ li chʼuut chanchan jun li karneer xbʼaan naq yaj saʼ li xpaabʼal (Sant. 5:14). Naq nokooyajerk, naru naqaletz xyajel ebʼ li junchʼol, ut joʼkan ajwiʼ nakʼulmank saʼ li qapaabʼal. Joʼkan naq wank sut naʼajmank risinkil saʼ li chʼuut li yaj saʼ li xpaabʼal. Naq li Jehobʼa naqʼusuk, naxkʼutbʼesi naq naxrahebʼ li junchʼol chik chi karneer ut naru trekʼasi xchʼool li kimaakobʼk ut tixyotʼ xchʼool tixjal xkʼaʼuxl. Naq naʼisiik saʼ li chʼuut, naru twanq saʼebʼ li chʼutam bʼarwiʼ trabʼi li naʼlebʼ li tixkawresi wiʼ chik li xpaabʼal. Naru ajwiʼ tixtaw ebʼ li tasal hu li tkʼanjelaq chiru re tzolok ut rilbʼal li JW Broadcasting^®. Ut naq ebʼ li cheekel winq nekeʼxkʼe reetal naq yook xjalbʼal xnaʼlebʼ, teʼruuq xkʼebʼal xnaʼlebʼ chi joqʼeqil ut naru teʼxtenqʼa re naq kawaq wiʼ chik li xpaabʼal ut twanq wiʼ chik joʼ aj testiiw re li Jehobʼa. *

12. Kʼaru teʼxbʼaanu ebʼ li cheekel winq rikʼin li inkʼaʼ naxyotʼ xchʼool naxjal xkʼaʼuxl re xkʼutbʼesinkil naq naʼuxtaanaak ru ut naraheʼk?

 ¹² Us xjultikankil naq kaʼajwiʼ nekeʼisiik saʼ li chʼuut li inkʼaʼ nekeʼxyotʼ xchʼool nekeʼxjal xkʼaʼuxl. Ebʼ li cheekel winq nekeʼxnaw naq aʼin aajel ru xtzʼilbʼal rix chiʼus. Ut nekeʼxnaw naq li Jehobʼa naqʼusuk «joʼ chanru» xkʼulubʼ li kimaakobʼk (Jer. 30:11). Nekeʼxra ebʼ li rechpaabʼanel ut inkʼaʼ nekeʼraj xbʼaanunkil junaq li naʼlebʼ li tixbʼaanu naq teʼxkanabʼ wank choʼq ramiiw li Jehobʼa. Abʼan, wank sut, naʼajmank naq t-isiiq saʼ li chʼuut li xmaakobʼk re xkʼutbʼesinkil naq naʼuxtaanaak ru ut naraheʼk.

13. Kʼaʼut kiʼisiik saʼ li chʼuut jun aj paabʼanel re Corinto?

¹³ Qilaq kʼaru kixbʼaanu li apóstol Pablo rikʼin jun li kristiʼaan li inkʼaʼ kixyotʼ xchʼool kixjal xkʼaʼuxl. Laj paabʼanel aʼin re li chʼuut Corinto maaʼus chaq xnaʼlebʼ, xbʼaan naq kixmaqʼ li rixaqil li xyuwaʼ. Kʼajoʼ xyibʼal ru aʼin! Li Jehobʼa ak kixye re li tenamit Israel: «Wi junaq winq taawanq rikʼin rixaqil li xyuwaʼ, tixmux xwankil li xyuwaʼ. Joʼkan naq teʼkamsiiq li winq ut li ixq» (Lev. 20:11). Yaal, laj Pablo moko kiruuk ta xyeebʼal re li chʼuut Corinto naq teʼxkamsi li winq aʼan; abʼan kixye rehebʼ naq cheʼrisiiq saʼ xyanqebʼ. Li xyibʼ aj naʼlebʼ li winq aʼin yook chaq xkʼebʼal saʼ chʼaʼajkilal li chʼuut. Wankebʼ keʼxkʼoxla naq moko nimla maak ta li kʼaru yook xbʼaanunkil (1 Cor. 5:1, 2, 12, 13).

14. Chanru kixkʼutbʼesi laj Pablo naq kiruxtaana ru li winq li kiʼisiik saʼ li chʼuut re Corinto, ut kʼaʼut? (2 Corintios 2:5-8, 11).

¹⁴ Moqon, li apóstol Pablo kirabʼi naq li winq aʼin relik chi yaal kixyotʼ xchʼool kixjal xkʼaʼuxl, ut kixjal xnaʼlebʼ. Usta li winq aʼin kixtzʼajni li xkʼabʼaʼ li chʼuut, laj Pablo kixye rehebʼ li cheekel winq naq moko us ta naq jwal kaw teʼxqʼus li winq aʼin. Joʼkan naq kixye rehebʼ: «Qʼaxal us raj naq anaqwan teekuy xmaak ut teekʼojobʼ xchʼool». Kixchʼolobʼ chiruhebʼ kʼaʼut: «Mare anchal chinumtaaq saʼ xbʼeen li xnimal xrahil xchʼool». Laj Pablo kiril xtoqʼobʼaal ru li winq aʼin li kixyotʼ xchʼool kixjal xkʼaʼuxl. Moko kiraj ta naq li winq aʼin tnumtaaq xrahil xchʼool xbʼaan li kixbʼaanu chi moko naq tixkanabʼ xsikʼbʼal naq tkuyeʼq xmaak (taayaabʼasi 2 Corintios 2:5-8, 11).

15. Chanru nekeʼxkʼutbʼesi ebʼ li cheekel winq naq nekeʼqʼusuk ut nekeʼuxtaanank u?

¹⁵ Ebʼ li cheekel winq nekeʼwulak chiru uxtaanank u joʼ naxbʼaanu li Jehobʼa. Nekeʼqʼusuk naq naʼajmank, abʼan nekeʼuxtaanank u wi naruhank ut wi wank xyaalal re xbʼaanunkil.  Wi inkʼaʼ teʼxqʼus li yook chi maakobʼk, moko yooqebʼ ta ruxtaanankil ru, yooqebʼ bʼan xkʼulubʼankil li maaʼusilal li yook xbʼaanunkil. Abʼanan, ma kaʼajwiʼ ebʼ li cheekel winq tento teʼxkʼutbʼesi li uxtaanank u?

16. Joʼ naxye Proverbios 21:13, kʼaru naxbʼaanu li Jehobʼa rikʼinebʼ li inkʼaʼ nekeʼuxtaanank u?

¹⁶ Chiqajunilo naqaj uxtaanank u joʼ naxbʼaanu li Jehobʼa. Kʼaʼut? Jun xyaalalil aʼan naq inkʼaʼ narabʼi ebʼ li inkʼaʼ nekeʼruxtaana ru ebʼ li junchʼol (taayaabʼasi Proverbios 21:13). Wi inkʼaʼ naqaj naq li Jehobʼa tixkanabʼ rabʼinkil li qatij, tento tqakʼe reetal ma yooko ruxtaanankil ru ebʼ li junchʼol. Inkʼaʼ naqaj xtzʼapbʼal li qaxik chiru «li nebʼaʼ naq wank saʼ rahilal», naqaj bʼan xkʼebʼal qachʼool chi rabʼinkil li qechpaabʼanel li wank saʼ rahilal. Naqaj ajwiʼ xkʼebʼal saʼ qachʼool li qʼusuk aʼin li naxkʼe li Santil Hu: «Maakʼaʼaq uxtaanal saʼ li raqbʼa aatin choʼq re li inkʼaʼ kiʼuxtaanank u» (Sant. 2:13). Wi naqakubʼsi qawankil ut wank saʼ qachʼool naq naʼajmank naq teʼruxtaana qu, aʼin toorekʼasi chi ruxtaanankil ru ebʼ li junchʼol. Numtajenaq wiʼ chik naqaj xbʼaanunkil rikʼin li xsutqʼiik saʼ li chʼuut xbʼaan naq kixyotʼ xchʼool kixjal xkʼaʼuxl.

17. Chanru kixkʼutbʼesi li awabʼej David li uxtaanank u?

¹⁷ Saʼ li Santil Hu naqataw ebʼ li eetalil li tooxtenqʼa chi xkʼutbʼesinkil li uxtaanank u ut inkʼaʼ raqok aatin saʼ junpaat saʼ xbʼeenebʼ li junchʼol. Qakʼoxlaq li awabʼej David li rajlal kiʼuxtaanank u. Usta laj Saúl kiraj xkamsinkil, laj David junelik kiruxtaana ru li awabʼej aʼin xbʼaan naq xaqabʼanbʼil xbʼaan li Yos ut maajunwa kiraj xkʼebʼal reqaj li maaʼusilal li kibʼaanuuk re chi moko xrahobʼtesinkil (1 Sam. 24:9-12, 18, 19).

18, 19. Joqʼe inkʼaʼ kiʼuxtaanank u laj David?

¹⁸ Abʼanan, laj David moko junelik ta kiʼuxtaanank u. Naq laj Nabal, jun li winq li yibʼ ru xnaʼlebʼ, kixhobʼ ut inkʼaʼ kiraj xkʼebʼal xtzekemq chi moko rehebʼ li winq li nekeʼochbʼenink re, laj David kijosqʼoʼk ut kiraj xkamsinkil laj Nabal ut ebʼ li winq li wankebʼ saʼ rochoch. Saʼ xkʼabʼaʼ naq li xʼAbigaíl, li rixaqil laj Nabal, chaabʼil xnaʼlebʼ, wank xkuyum ut saʼ junpaat kixsikʼ kʼaru tixbʼaanu, joʼkan naq laj David moko kixkamsihebʼ ta (1 Sam. 25:9-22, 32-35).

¹⁹ Saʼ jun chik kutan, li propeet Natán kixseeraqʼi re laj David naq jun li winq bʼihom kirelqʼa li xkarneer jun li winq nebʼaʼ, li jwal raaro xbʼaan. Laj David kijosqʼoʼk ut kixye re: «Saʼ xkʼabʼaʼ li yoʼyookil Yos ninye aawe naq xkʼulubʼ kamk li winq li xbʼaanunk re aʼan» (2 Sam. 12:1-6). Laj David naxnaw naq li Xchaqʼrabʼ laj Moisés naxye naq, wi junaq li kristiʼaan narelqʼa jun li karneer, tento tixkʼe kaahibʼ chik choʼq reqaj (Éx. 22:1). Abʼan laj David jwal kaw kiraqok aatin naq kixye naq tento raj tkamsiiq li winq aʼan. Laj Natán kiroksi li eetalil aʼan re xtenqʼankil laj David chi xtawbʼal ru naq aʼan qʼaxal yibʼ wiʼ chik ru li kixbʼaanu. Ut li Jehobʼa numtajenaq wiʼ chik kiruxtaana ru laj David chiru li kiruuk raj xbʼaanunkil laj David re li winq li kixye laj Natán (2 Sam. 12:7-13).

20. Kʼaru naxkʼut chiqu li kixkʼul laj David?

 ²⁰ Qakʼehaq reetal aʼin, naq laj David kijosqʼoʼk, kixye naq laj Nabal ut chixjunilebʼ li winq tento raj teʼkamq. Ut moqon saʼ junpaat kixye naq tento tkamsiiq li winq li kixseeraqʼi laj Natán. Rikʼin aʼin, maare tqakʼoxla kʼaʼut tawiʼ naq jun li winq li chaabʼil xnaʼlebʼ kaw kiraqok aatin. Abʼan qakʼoxlaq kʼaru tawiʼ yook xkʼulbʼal laj David. Saʼ li hoonal aʼan moko sa ta chik narekʼa li xchʼool ut li xkʼaʼuxl. Naq kaw nokooraqok aatin saʼ xbʼeenebʼ li junchʼol, naxkʼutbʼesi naq moko kaw ta chik li qapaabʼal. Li Jesús kixye: «Mexraqok aatin re naq inkʼaʼ taaraqmanq aatin saʼ eebʼeen. Xbʼaan naq joʼ chanru nekexraqok aatin laaʼex, joʼkan ajwiʼ naq taaraqmanq aatin saʼ eebʼeen» (Mat. 7:1, 2). Joʼkan naq mooraqok aatin saʼ kawilal saʼ xbʼeenebʼ li junchʼol ut qakʼehaq qachʼool chi uxtaanank u joʼ naxbʼaanu li Qayos Jehobʼa.

21, 22. Chanru tooruuq xkʼutbʼesinkil li uxtaanank u?

²¹ Li uxtaanank u moko naraj ta xyeebʼal yal rekʼankil, naraj bʼan xyeebʼal xtenqʼankilebʼ li junchʼol. Chiqajunilo naru tqakʼoxla ani naru tqatenqʼa saʼ li qajunkabʼal, saʼ li qachʼuut malaj saʼ li qateep. Chʼolchʼo naq tooruuq xtawbʼal chanru xbʼaanunkil aʼin. Ma naqanaw ani naʼajmank naq tkʼojobʼaaq xchʼool? Ma tooruuq xkʼambʼal xtzekemq malaj xtenqʼankil rikʼin jalan chik naʼlebʼ? Ma naʼajmank naq tkʼojobʼaaq xchʼool malaj ttenqʼaaq xbʼaan junaq li ramiiw li kiʼok wiʼ chik joʼ aj Testiiw? Ma naru tqakʼam li chaabʼil esilal rehebʼ li junchʼol? Chi joʼkaʼin tooruuq xkʼutbʼesinkil naq naquxtaana ruhebʼ li junchʼol (Job 29:12, 13; Rom. 10:14, 15; Sant. 1:27).

²² Wi naqakʼe reetal li nakʼulmank saʼ li qasutam, tooruuq xtawbʼal li hoonal re ruxtaanankil ruhebʼ li junchʼol. Wi naqakʼutbʼesi li chaabʼil naʼlebʼ aʼin, tooruuq xsahobʼresinkil xchʼool li qachoxahil Yuwaʼ, li Yos li «qʼaxal nim li ruxtaan».