1. Chanru naru tqil li Jehobʼa?

LI JEHOBʼA wank jun li xjunkabʼal li naloqʼonink re. Saʼ xyanq wank li Jesús, «li yoʼlajenaq xbʼenwa chiru chixjunil li yoobʼtesinbʼil», ut kʼiila oqʼobʼ chi ánjel (Col. 1:15; Sal. 103:20). Naq li Jesús kiwank saʼ Ruuchichʼochʼ, kixkʼut naq li nekeʼabʼink chiru li Jehobʼa, naru teʼril joʼ Xyuwaʼebʼ. Saʼ jun kutan naq yook chi aatinak rikʼinebʼ li xtzolom, joʼkaʼin kixye chirix li Jehobʼa: «LinYuwaʼ ut eeYuwaʼ ajwiʼ laaʼex» (Juan 20:17). Joʼkan ajwiʼ, naq xqaqʼaxtesi li qayuʼam chiru li Jehobʼa ut xkubʼeek qahaʼ, xooʼok chi wank saʼ jun li junkabʼal bʼarwiʼ wank li rahok (Mar. 10:29, 30).

2. Kʼaru tqil saʼ li tzolom aweʼ?

² Wankebʼ li qechpaabʼanel li nachʼaʼajkoʼk chiruhebʼ rilbʼal li Jehobʼa joʼ jun li Yuwaʼbʼej li qʼaxal narahok. Jalanebʼ chik maare inkʼaʼ nekeʼxnaw chanru xkʼutbʼesinkil naq nekeʼxra ebʼ li rechpaabʼanel. Saʼ li tzolom aweʼ tqil chanru li Jesús nokooxtenqʼa chi rilbʼal li Jehobʼa joʼ jun li Yuwaʼbʼej li nokooxra ut naq tooruuq chi jilok chixkʼatq. Tqil ajwiʼ chanru tooruuq xkʼutbʼesinkil naq naqarahebʼ li qechpaabʼanel joʼ naxbʼaanu li Jehobʼa.

3. Chanru nokooxtenqʼa li tij li kixkʼut li Jesús re naq qʼaxal toojiloq chixkʼatq li Jehobʼa?

³ Li Jehobʼa aʼan jun li Yuwaʼbʼej li qʼaxal narahok, ut li Jesús naraj naq joʼkan tqil ut naq tooruuq chi aatinak rikʼin yalaq joqʼe, moko joʼ ta li junes taqlank naxbʼaanu. Li Jesús chi chʼolchʼo ru kixkanabʼ naq kiroksi li aatin «at qaYuwaʼ» naq kixkʼut  chiruhebʼ li xtzolom chanru teʼtijoq (Mat. 6:9). Li Jesús kiruuk raj xyeebʼal naq tqoksi ebʼ li ruuchil kʼabʼaʼej li natawmank saʼ li Santil Hu naq nokooʼaatinak rikʼin li Jehobʼa, joʼ «li Nimajwal Yos», «laj yoobʼtesihom» malaj «li Rey li wank xwankil chi junelik qʼe kutan» (Gén. 49:25; Is. 45:18; 1 Tim. 1:17). Abʼan, kiroksi li chʼinaʼusil aatin: «At qaYuwaʼ».

4. Chanru naqanaw naq li Jehobʼa naraj naq toojiloq chixkʼatq?

⁴ Ma nachʼaʼajkoʼk chiqu rilbʼal li Jehobʼa joʼ jun li Yuwaʼbʼej li qʼaxal narahok? Maare joʼkan, xbʼaan naq maare li qanaʼ qayuwaʼ inkʼaʼ xooʼeʼxra chaq saʼ qakachʼinal. Qʼaxal naxkʼojobʼ qachʼool xnawbʼal naq li Jehobʼa naxtaw ru li naqekʼa ut naraj jilok chiqakʼatq. Joʼkan naq, saʼ li Raatin naxye qe: «Jilonqex chi xkʼatq li Yos, ut aʼan taajiloq chekʼatq» (Sant. 4:8). Li Jehobʼa nokooxra, ut naxye qe naq maakʼaʼ chik junaq Yuwaʼbʼej joʼ aʼan.

5. Joʼ naxye saʼ Lucas 10:22, kʼaʼut naru tooxtenqʼa li Jesús re naq qʼaxal toojiloq chixkʼatq li Jehobʼa?

⁵ Li Jesús naru tooxtenqʼa re naq qʼaxal toojiloq chixkʼatq li Jehobʼa. Naxnaw ru chiʼus li Xyuwaʼ ut naxkʼutbʼesi chi tzʼaqal re ru chanru li xnaʼlebʼ. Joʼkan naq kixye: «Li xʼilok wu, xril ru li Yuwaʼbʼej» (Juan 14:9). Joʼ jun li asbʼej, li Jesús naxkʼut chiqu roxloqʼinkil ut xpaabʼankil li Qayuwaʼ, xbʼaanunkil li nawulak chiru ut xsahobʼresinkil xchʼool. Abʼan, li kixbʼaanu naq kiwank saʼ Ruuchichʼochʼ naxkʼut tzʼaqal chiqu naq li Jehobʼa jwal chaabʼil ut narahok (taayaabʼasi Lucas 10:22). Qilaq wiibʼ oxibʼ li eetalil chirix aʼin.

6. Kʼaʼut naru tqaye naq li Jehobʼa kixkʼe xchʼool chi rabʼinkil li Jesús?

⁶Li Jehobʼa narabʼi ebʼ li ralal xkʼajol. Qilaq chanru kixkʼe xchʼool chi rabʼinkil li xbʼeen Ralal. Chʼolchʼo naq kirabʼi chixjunil li tij li kixbʼaanu li Jesús naq kiwank saʼ Ruuchichʼochʼ (Luc. 5:16). Kirabʼi li Jesús naq kixtzʼaama re, naq ttenqʼanq chi xbʼaanunkil junaq li nimla naʼlebʼ, joʼ naq kixsikʼebʼ ru li 12 chi apóstol (Luc. 6:12, 13). Kirabʼi ajwiʼ li Jesús naq qʼaxal yook chaq xkʼaʼuxl. Naq ok ok re chi qʼaxtesiik xbʼaan laj Judas, kixtzʼaama re li Xyuwaʼ naq  chixtenqʼaq chi xkuybʼal ebʼ li nimla rahilal li ok re xkʼulbʼal. Li Jehobʼa moko kaʼaj tawiʼ kirabʼi li Ralal li qʼaxal raaro xbʼaan, kixtaqla ajwiʼ jun li ánjel chi xkawubʼresinkil xchʼool (Luc. 22:41-44).

7. Kʼaru nakaawekʼa naq nakaanaw naq li Jehobʼa narabʼi laatij?

⁷ Li Jehobʼa nokoorabʼi ajwiʼ naq nokootijok chiru ut nokooxsume naq jwal naʼajmank chiqu ut naxbʼaanu joʼ maajunwa nanumeʼk saʼ qachʼool (Sal. 116:1, 2). Aʼan tzʼaqal kixkʼul jun li qechpaabʼanel ixq re li tenamit India, qʼaxal yook chaq xkʼaʼuxl ut kixtzʼaama re li Jehobʼa naq ttenqʼaaq xbʼaan. Naxye: «Li JW Broadcasting^® re mayo 2019 kiʼaatinak chirix chanru xqʼaxbʼal ru ebʼ li chʼaʼajkilal ut li qʼaxal naxkʼe qakʼaʼuxl. Aʼan tzʼaqal li naʼajmank chaq chiwu. Chi joʼkaʼin kixsume lintij li Jehobʼa».

8. Chanru kixkʼutbʼesi li Jehobʼa naq naxra li Jesús?

⁸ Li Jehobʼa naxkʼutbʼesi ajwiʼ naq nokooxra joʼ naq kixra li Ralal naq kixbʼaanu li xkʼanjel arin saʼ Ruuchichʼochʼ (Juan 5:20). Kixtenqʼa re naq kawaq li xpaabʼal, kixkʼojobʼ xchʼool ut kixkʼe re li naʼajmank chiru saʼ li xyuʼam. Ut junelik kixye re, naq naxra ut naq sa saʼ xchʼool rikʼin (Mat. 3:16, 17). Li Jesús maajunwa kirekʼa ribʼ xjunes, xbʼaan naq naxnaw naq junelik ttenqʼaaq xbʼaan li xchoxahil Yuwaʼ (Juan 8:16).

9. Chanru naqanaw naq li Jehobʼa nokooxra?

⁹ Joʼ kirekʼa li Jesús, laaʼo ajwiʼ naabʼal sut ak xqekʼa li xrahom li Jehobʼa. Qakʼoxlaq aweʼ: li Jehobʼa xooxkʼam chaq saʼ li xmolam ut kixkʼe choʼq qajunkabʼal ebʼ li qechpaabʼanel li jwal nekeʼrahok ut wankebʼ saʼ junajil, ut aʼin naxsahobʼresi ut naxwaklesi qachʼool (Juan 6:44). Joʼkan ajwiʼ, naxkʼe qe naabʼal li naʼlebʼ re xkawubʼresinkil li qapaabʼal. Ut naxkʼe ajwiʼ qe chixjunil li naʼajmank re xnumsinkil li junjunq chi kutan (Mat. 6:31, 32). Naq naqil chanru nokooxra li Jehobʼa, nanimank li qarahom chirix.

10. Chanru tooruuq xraabʼal ebʼ li qechpaabʼanel joʼ naxbʼaanu li Jehobʼa?

¹⁰ Li Jehobʼa naxrahebʼ li qechpaabʼanel. Abʼan maare wank sut nachʼaʼajkoʼk chiqu xraabʼalebʼ ut xkʼutbʼesinkil aʼin. Maare saʼ xkʼabʼaʼ naq jalan jalanq li qawanjik malaj chanru kiresinbʼilo chaq. Ut chiqajunilo nokoopaltoʼk, joʼkan naq naru tqarahobʼtesihebʼ xchʼool malaj teʼpoʼq qikʼin ebʼ li junchʼol. Usta joʼkan, wi naqarahebʼ joʼ naxbʼaanu li Jehobʼa, naru tootzʼaqonq re naq wanq li rahok saʼ xyanqebʼ li qechpaabʼanel (Efes. 5:1, 2; 1 Juan 4:19). Qilaq kʼaru naru tqatzol rikʼin li Jehobʼa.

11. Chanru kixkʼutbʼesi li Jesús naq li Jehobʼa natoqʼobʼank u?

¹¹Li Jehobʼa naxkʼutbʼesi li «xnimal ruxtaan» malaj natoqʼobʼank u (Luc. 1:78). Li natoqʼobʼank u inkʼaʼ nawulak chiru rilbʼal naq ebʼ li junchʼol nekeʼxkʼul li rahilal ut naxsikʼ chanru xtenqʼankilebʼ ut xkʼojobʼankilebʼ xchʼool. Naq li Jesús kixtoqʼobʼa ruhebʼ li kristiʼaan, kixkʼutbʼesi li narekʼa li Jehobʼa chirixebʼ (Juan 5:19). Li Santil Hu naxye: «Naq kirilebʼ li kʼiila tenamit, kixtoqʼobʼa ruhebʼ xbʼaan naq chʼiʼchʼiʼinbʼilebʼ ut chaʼchookebʼ, joʼkebʼ li karneer maakʼaʼ aj ilol rehebʼ» (Mat. 9:36). Li Jesús moko kaʼaj tawiʼ kixtoqʼobʼa ruhebʼ, kixkʼirtasihebʼ ajwiʼ li yaj ut kixtenqʼahebʼ li kaw nekeʼkʼanjelak ut tawajenaqebʼ (Mat. 11:28-30; 14:14).

12. Chanru tooruuq xkʼutbʼesinkil naq nokootoqʼobʼank u?

¹² Wi naqaj xkʼutbʼesinkil naq naqara ut naq naqatoqʼobʼa ruhebʼ li qechpaabʼanel, tento tqakʼe saʼ qu li chʼaʼajkilal li yookebʼ xkʼulbʼal. Maare junaq li qechpaabʼanel ixq kichapeʼk xbʼaan junaq li nimla yajel. Usta maakʼaʼ  tixye, abʼan tixbʼanyoxi tana wi tqatenqʼa. Ma nachʼaʼajkoʼk chiru xchʼolaninkil li xjunkabʼal? Ma naraj naq tqatenqʼa chi kʼubʼank malaj chi xsaabʼesinkil li rochoch? Malaj qayehaq naq jun li hermaan winq kikanaak chi maakʼaʼ xkʼanjel. Ma tooruuq raj xkʼebʼal bʼayaq xtumin, chi inkʼaʼ tixnaw ani kikʼehok re, toj reetal tixtaw junaq xkʼanjel?

13, 14. Chanru tooruuq xkʼambʼal qe rikʼin li Jehobʼa li nakʼehok chi anchal xchʼool?

¹³Li Jehobʼa jwal chaabʼil (Mat. 5:45). Wi nokootoqʼobʼank u, moko tqoybʼeni ta naq ebʼ li qechpaabʼanel teʼxye qe naq tqatenqʼahebʼ. Tqasikʼ bʼan chanru xtenqʼankilebʼ joʼ naxbʼaanu li Jehobʼa. Usta maaʼani napatzʼok re, abʼan wulaj wulaj naxkʼe li saqʼe ut chixjunilebʼ nekeʼxtaw rusilal, usta wankebʼ inkʼaʼ nekeʼbʼanyoxink. Peʼyaal naq li Jehobʼa naxkʼutbʼesi naq nokooxra naq naxkʼe qe li naʼajmank chiqu? Jwal chaabʼil li Jehobʼa ut nawulak chiru kʼehok, joʼkan naq qʼaxal naqara!

¹⁴ Naabʼal rehebʼ li qechpaabʼanel nekeʼxkʼam re rikʼin li qachoxahil Yuwaʼ naq nekeʼxsikʼ chanru teʼtenqʼanq ut teʼkʼehoq. Qilaq li kikʼulmank saʼ li chihabʼ 2013 naq li nimla kaqsut-iqʼ Haiyan kixkʼam chaq li rahilal saʼ xbʼeen li tenamit Filipinas. Naabʼalebʼ li qechpaabʼanel kijukʼeʼk li rochochebʼ ut chixjunil li wank rehebʼ. Abʼan saʼ junpaat xeʼtenqʼaak xbʼaanebʼ li rechpaabʼanelil li wankebʼ saʼ chixjunil li Ruuchichʼochʼ. Saʼ xkʼabʼaʼ li kubʼsiil ut li kʼanjel li xeʼxbʼaanu naabʼalebʼ li hermaan, kiruhank xyiibʼankil ut xkabʼlankil wiʼ chik 750 tana chi ochoch chiru jun chihabʼ. Ut chiru li nimla yajel COVID-19, ebʼ laj Testiiw xeʼxkʼe xchʼool chi xtenqʼankilebʼ li rechpaabʼanel re naq maakʼaʼ tpaltoʼq chiruhebʼ. Naq seebʼ qachʼool chi xtenqʼankilebʼ li qechpaabʼanel, naqakʼutbʼesi naq naqarahebʼ.

15, 16. Joʼ naxye saʼ Lucas 6:36, kʼaru raj tento tqabʼaanu wi naqaj xkʼambʼal qe rikʼin li qachoxahil Yuwaʼ?

¹⁵Li Jehobʼa naʼuxtaanank u ut nakuyuk maak (taayaabʼasi Lucas 6:36). Wulaj wulaj naruxtaana qu li qachoxahil Yuwaʼ (Sal. 103:10-14). Joʼkaʼin ajwiʼ kixbʼaanu li Jesús, usta xeʼpaltoʼk ebʼ li xtzolom, abʼan kiruxtaana ruhebʼ ut kixkuyebʼ xmaak. Ut kixkʼe li xyuʼam re naq tkuyeʼq tsacheʼq li qamaak (1 Juan  2:1, 2). Peʼyaal naq qʼaxal nokoojilok chixkʼatq li Jehobʼa ut li Jesús naq naqil chanru nekeʼruxtaana qu ut nekeʼxkuy qamaak?

¹⁶ Naq nokookuyuk maak joʼ naxbʼaanu li Jehobʼa, qʼaxal naqarahebʼ wiʼ chik ebʼ li qechpaabʼanel (Efes. 4:32). Yaal naq wank sut nachʼaʼajkoʼk chiqu kuyuk maak, abʼan tento tqayal qaqʼe chi xbʼaanunkil. Jun li hermaan ixq naxseeraqʼi naq kʼajoʼ kikʼanjelak chiru li tzolom li kiʼelk saʼ li hu Laj Kʼaakʼalehom li naxye naq tento tqakuy qamaak chiqibʼil qibʼ. * Aʼan kixtzʼiibʼa: «Li tzolom aʼin xinxtenqʼa chi naʼlebʼak chiʼus. Kixchʼolobʼ naq xkuybʼal xmaak junaq li hermaan malaj kristiʼaan moko naraj ta xyeebʼal naq naqakʼulubʼa li maaʼusilal malaj li rahilal li kixbʼaanu qe. Li kʼaru bʼan naraj xyeebʼal aʼan risinkil saʼ li qachʼool li maaʼusilal li kixbʼaanu ut wank saʼ tuqtuukilal». Naq chi anchal qachʼool naqakuy xmaak ebʼ li qechpaabʼanel, naqakʼutbʼesi naq naqarahebʼ ut naqakʼam qe rikʼin li Jehobʼa, li Qayuwaʼ.

17. Joʼ naxkʼut Mateo 5:16, chanru tooruuq xkʼebʼal xloqʼal li qachoxahil Yuwaʼ?

¹⁷ Jwal oxloqʼ chiqu wank saʼ jun li junkabʼal li wank saʼ chixjunil li Ruuchichʼochʼ li nekeʼxra ribʼ chiribʼilebʼ ribʼ. Ut naqaj ajwiʼ naq naabʼalebʼ li kristiʼaan tooʼeʼrochbʼeni chi xloqʼoninkil ru li Jehobʼa. Joʼkan naq, inkʼaʼ naqaj xbʼaanunkil junaq li naʼlebʼ li tixtzʼajni ru li xkʼabʼaʼ li qachoxahil Yuwaʼ malaj li xtenamit. Junelik naqayal qaqʼe chi naʼlebʼak chiʼus re naq teʼraj rabʼinkil li chaabʼil esilal (taayaabʼasi Mateo 5:16).

18. Kʼaru ttenqʼanq qe re naq toopuktesinq chi maakʼaʼ qaxiw?

¹⁸ Wank sut, xikʼ tooʼileʼq malaj toorahobʼtesiiq xbʼaan naq naqapaabʼ li naxye li qachoxahil Yuwaʼ. Kʼaru tqabʼaanu wi nokooxuwak chi aatinak rikʼinebʼ li junchʼol chirix li naqapaabʼ? Qajultikaq naq li Jehobʼa ut li Ralal tooʼeʼxtenqʼa. Li Jesús kixye rehebʼ li xtzolom naq meʼkʼoxlak chirix li kʼaru teʼxye malaj chanru teʼxbʼaanu. Aʼan kixye: «Taakʼeheʼq eere saʼ li honal aʼan kʼaru teeye. Moko laaʼex ta texʼaatinaq, aʼ  bʼan li xMusiqʼ leeYuwaʼ taaʼaatinaq chi xtzʼuumal eere» (Mat. 10:19, 20).

19. Chanru kixbʼaanu laj Robert re xkolbʼal rix li xpaabʼal chi maakʼaʼ xxiw?

¹⁹ Qilaq li kixkʼul laj Robert jun li hermaan. Naq tojeʼ xʼok xtzolbʼal li Santil Hu ut moko naabʼal ta chaq xnawom chirix li yaal, kikʼameʼk chiruhebʼ laj raqol aatin re xkolbʼal rix li xpaabʼal saʼ li tenamit Sudáfrica. Chi maakʼaʼ xxiw kixchʼolobʼ naq inkʼaʼ twanq joʼ aj puubʼ xbʼaan naq naxrahebʼ li ras riitzʼin li wankebʼ joʼ rechpaabʼanel. Chʼolchʼo naq oxloqʼ chaq chiru wank saʼ li xjunkabʼal li Jehobʼa. Chi maakʼaʼ saʼ xchʼool naq jun rehebʼ laj raqol aatin kixpatzʼ re: «Anihebʼ laawas aawiitzʼin?». Laj Robert inkʼaʼ raj naroybʼeni naq t-uxq re li patzʼom aʼin, abʼan saʼ junpaat kichalk saʼ xchʼool li xraqal li Santil Hu re li kutan aʼan. Li raqal aʼan Mateo 12:50 li naxye: «Chixjunil li taabʼaanunq re li rajom linchoxahil Yuwaʼ, aʼan li wiitzʼin, li wanabʼ ut linnaʼ». Usta laj Robert tojeʼ xʼok chi xtzolbʼal li Santil Hu, abʼan li xsantil musiqʼej li Jehobʼa kitenqʼank re chi xsumenkil li patzʼom aʼan ut jalan chik patzʼom. Kʼajoʼ tana kisahoʼk saʼ xchʼool li Jehobʼa rikʼin! Ut tsahoʼq ajwiʼ saʼ xchʼool qikʼin wi naqakʼojobʼ qachʼool naq tooxtenqʼa chi xpuktesinkil li chaabʼil esil chi maakʼaʼ qaxiw usta chʼaʼajkaq xbʼaanunkil.

20. Kʼaru inkʼaʼ tqakanabʼ xbʼaanunkil? (Juan 17:11, 15).

²⁰ Junelik oxloqʼaq chiqu wank saʼ jun li junkabʼal bʼarwiʼ wank li rahok. Maakʼaʼ chik junaq Yuwaʼbʼej joʼ li Jehobʼa ut wankebʼ naabʼalebʼ li qechpaabʼanel li nokooʼeʼxra. Miqakanabʼ xbʼanyoxinkil chixjunil aʼin. Laj Tza ut li nekeʼtaqenk re nekeʼraj naq tqakʼoxla naq li qachoxahil Yuwaʼ inkʼaʼ nokooxra ut nekeʼraj xkʼambʼal chaq li jachok ibʼ saʼ qayanq. Abʼan li Jesús kitijok chiqix ut kixtzʼaama re li Jehobʼa naq chooxtenqʼaq re naq toowanq saʼ junajil rikʼinebʼ li qechpaabʼanel li wankebʼ joʼ qajunkabʼal (taayaabʼasi Juan 17:11, 15). Ut li Jehobʼa yook xsumenkil li tij aʼan. Qakʼamaq qe rikʼin li Jesús ut miqakʼoxla naq li qachoxahil Yuwaʼ inkʼaʼ nokooxra ut inkʼaʼ naraj qatenqʼankil. Miqakanabʼ bʼiʼ jilok chixkʼatq li Jehobʼa ut ebʼ li qechpaabʼanel.