Laaʼat yaal aawe kʼaru taabʼaanu
Aʼ yaal kʼaru li tqasikʼ xbʼaanunkil naru tooxtenqʼa malaj inkʼaʼ, joʼkan naq aajel ru naq tqapaabʼ li naxye qe li Jehobʼa.
Li Jehobʼa naraj naq sahaq saʼ qachʼool.
«Laaʼin li Qaawaʼ, laaYos; laaʼin ninkʼut chawu li kʼaru us choʼq aawe ut nakatinbʼeres saʼ li bʼe tento taakʼam. Jwal us raj naq xapaabʼ linchaqʼrabʼ! Li xsahil aachʼool qʼaxal yo raj chi kʼiik joʼ junaq nimaʼ, ut laawosobʼtesinkil joʼ raj xnimal li xkawil roq li palaw» (Isaías 48:17, 18).
Saʼ xkʼabʼaʼ naq li Jehobʼa aʼan aj Yobʼtesinel qe naxnaw kʼaru us choʼq qe. Aʼan naraj naq tqabʼaanu li naxye, wi tqabʼaanu aʼin us tooʼelq. Joʼkan naq, chixjunil li naqabʼaanu saʼ li qayuʼam tixkʼe xsahil qachʼool.
Li Jehobʼa inkʼaʼ naxpatzʼ qe junaq li naʼlebʼ li inkʼaʼ tooruuq xbʼaanunkil.
«Li chaqʼrabʼ nakatintaqla wiʼ anaqwan moko chʼaʼaj ta xpaabʼankil chi moko najt wank aawikʼin» (Deuteronomio 30:11).
Xyuʼaminkil li naraj li Jehobʼa maare tixbʼaanu naq tqajal li qabʼaanuhom ut chanru nokookʼoxlak. Moko naabʼal ta naxpatzʼ qe li Jehobʼa xbʼaan naq naxnaw kʼaru tooruuq xbʼaanunkil. Naq tqanaw ru tqakʼe reetal naq «li xchaqʼrabʼ moko chʼaʼaj ta xbʼaanunkil» (1 Juan 5:3).
Li Jehobʼa naxye naq tixtenqʼahebʼ li nekeʼxyuʼami li naxye.
«Laaʼin li Qaawaʼ, laaYos, chapchookat chawuqʼ inbʼaan. Laaʼin ninyehok aawe: “Matxiwak, laaʼin nintenqʼank aawe”» (Isaías 41:13).
Tooruuq xpaabʼankil li naraj li Yos xbʼaan naq aʼan tooxtenqʼa. Aʼan nokooxtenqʼa rikʼin li Santil Hu naq naxwaklesi qachʼool.
Chi miyon li qas qiitzʼin ak xeʼxkʼe reetal naq xyuʼaminkil li naxye li Santil Hu kixchaabʼilobʼresi li xyuʼamebʼ. Joʼkan naq kʼe aaqʼe chi xtzolbʼal li Santil Hu, tikibʼ rikʼin li hu Sahaq laachʼool chi junelik! li wank saʼ jw.org. Chisaʼ wank oxibʼ li tzolom:
-
«Chanru truuq aatenqʼankil li Santil Hu?»
-
«Li Santil Hu naxyeechiʼi qe li sahil chʼoolejil»
-
«Ma paabʼajel li naxye li Santil Hu?»
Naq taatzʼil rix li naxye li Santil Hu taakʼe reetal naq paabʼajel ut naq wank chi junelik (Salmo 111:8). Xyuʼaminkil li naxye li Santil Hu qʼaxal tatxtenqʼa, abʼan li Yos inkʼaʼ naxmin aawu (Deuteronomio 30:19, 20; Josué 24:15). Laaʼat yaal aawe kʼaru taabʼaanu.
