Wankebʼ chʼolchʼo chiruhebʼ bʼar wank li us ut li inkʼaʼ. Wankebʼ inkʼaʼ nekeʼwulak chiru naq nekeʼchapeʼk li ixq malaj winq re xmuxbʼalebʼ ru, li kamsink ut naq nekeʼmuxeʼk ebʼ li kokʼal. Junchʼol chik nekeʼwulak chiru naq nakʼutbʼesimank li chaabʼilal, xkʼoxlankil ebʼ li junchʼol ut naq wanq li tiikilal. Abʼan kʼaru nayeemank chirix li wank saʼ wiibʼal, xyeebʼal li yaal ut xkʼirisinkilebʼ li kokʼal? Wankebʼ nekeʼxkʼoxla naq naru xbʼaanunkil li wiibʼ chi naʼlebʼ aʼin. Joʼkan naq wankebʼ li kristiʼaan nekeʼxsikʼ xbʼaanunkil li nekeʼxkʼoxla malaj rikʼin li nekeʼxye ebʼ li junchʼol. Abʼan ma us xbʼaanunkil aʼin?

Wank sut naq naqabʼaanu li naʼlebʼ aʼin, naqabʼaanu rikʼin li naqekʼa (Romanos 2:​14, 15). Naq toj kachʼino chaq naqakʼe reetal kʼaru li us ut li inkʼaʼ us. Naq ak xookʼiik chik naqatzol li us ut li inkʼaʼ us rikʼinebʼ li kristiʼaan li wankebʼ saʼ qasutam malaj rikʼin li qapaabʼal. Joʼkan naq li naqasikʼ xbʼaanunkil naxchap ribʼ rikʼin li xqatzol chirix li us ut li inkʼaʼ us.

Li naqekʼa tixbʼaanu naq tqakʼe qachʼool chirixebʼ li junchʼol, toobʼanyoxinq, tqasikʼ li tiikilal ut tooʼuxtaananq u. Tooxtenqʼa ajwiʼ re naq inkʼaʼ tqatochʼ qachʼool ut xchʼoolebʼ li qakomon.

Ma us xbʼaanunkil li naqakʼoxla naq us? Laj Garrick naxye naq toj saaj chaq, naxbʼaanu li naʼalaak saʼ xchʼool. Abʼan kixkʼe reetal naq moko us ta yook chi elk. Joʼkan naq kixye aʼin chirix li xyuʼam «yal nujenaq chi yibʼru aj naʼlebʼ».

Li naqasikʼ xbʼaanunkil moko kaʼaj tawiʼ aʼan nokooxtenqʼa, nokooxtenqʼa bʼan li nekeʼxkʼoxla li junchʼol chirix li naqasikʼ xbʼaanunkil. Naqataw rusilal naq naqatzol rikʼin kʼaru xeʼxkʼul saʼebʼ li xyuʼam. Nokooʼeʼroxloqʼi naq naqabʼaanu li nekeʼxye naq us.

Ma nakʼanjelak li nekeʼxye li junchʼol? Naq saaj chaq, li xPriscila naxbʼaanu li nekeʼxbʼaanu li ramiiw, nekeʼxmux ribʼebʼ. Kixkʼe reetal naq li nekeʼxkʼoxla li junchʼol naq us moko naxbʼaanu ta naq sahaq saʼ xchʼool. Joʼkan naq kixye: «Aʼin kixbʼaanu naq tinbʼaanu li toontil aj naʼlebʼ ut tinkʼe wibʼ saʼ xiwxiwal».

Wank xwankil naq tqakʼe saʼ ajl li nekeʼxkʼoxla ebʼ li junchʼol ut li naqakʼoxla laaʼo. Abʼan, wi kaʼajwiʼ tqakʼe saʼ ajl aʼin maare moko us ta tooʼelq. Xbʼaan naq moko naru ta xnawbʼal kʼaru tkʼulmanq (Proverbios 14:12). Usta tqakʼoxla naq us naqakʼoxla malaj li nekeʼxkʼoxla ebʼ li junchʼol maare tjalaaq moqon xbʼaan naq wank li naʼlebʼ li nekeʼxkʼoxla naq moko chaabʼil ta, us chik nekeʼril anaqwan ut wank li chaabʼil naʼlebʼ junxil anaqwan inkʼaʼ chik nawulak chiruhebʼ.

Ma wank junaq li naʼlebʼ li nokooxtenqʼa re xnawbʼal kʼaru li us ut inkʼaʼ us? Ma wank junaq li naʼlebʼ li naru nokooxtenqʼa anaqwan re naq li tqasikʼ xbʼaanunkil inkʼaʼ tooxchʼaʼajki saʼ junaq kutan?

Wank jun li naʼlebʼ li naxbʼaanu naq chaabʼil t-elq li tqasikʼ xbʼaanunkil maakʼaʼ naxye bʼar wanko. Saʼ li jun chik tzolom tqil bʼar wank li naʼlebʼ aʼin li nokooxtenqʼa.